29 C
Phnom Penh

​ការ​ចាប់​ខ្លួន​មន្ត្រី​គណបក្ស​ប្រឆាំង​បង្ក​ឲ្យ​មាន​ការ​ភ្ញាក់​ផ្អើល​

ដោយ ឌឹ ខេមបូឌា ដេលី

បទវិភាគ

មន្ត្រី​បាន​និយាយ​កាលពី​ម្សិលមិញ​ថា ​តុលាការ​ខេត្ត​សៀមរាប​បាន​ចោទ​ប្រកាន់​​​ និង​​ដាក់​ពន្ធនាគារ​​ចំពោះ​​ចៅសង្កាត់​គណបក្ស​ប្រឆាំង​​មួយ​រូប​​ពីបទ​ចុះ​ហត្ថលេខា​លើ​ឯកសារ​ផ្សេងៗ​ ដែល​អនុញ្ញាត​ឲ្យ​អ្នក​ភូមិ​​បញ្ចាំ​ដី​​ដែល​​ទាមទារ​កាន់កាប់​ដោយ​អាជ្ញាធរ​អប្សរា​​។

​យោង​តាម​លោក សុខ គីមសេង នាយក​រង​ប្រតិបត្តិ​​​នៃ​គណបក្ស​សង្គ្រោះ​​ជាតិ​​ប្រចាំ​ខេត្ត​​ឲ្យ​ដឹង​ថា លោក ហ៊ាង សារី ​ចៅសង្កាត់​អំពិល​​ ក្រុង​សៀមរាប និង​ជា​សមាជិក​នៃ​គណបក្ស​ សម រង្ស៊ី ​​​ត្រូវ​បាន​ចាប់​ខ្លួន និង​បញ្ជូន​ទៅ​តុលាការ​កាលពី​ព្រឹក​ថ្ងៃ​ព្រហស្បតិ៍ ​ហើយ​ចោទ​​​ប្រកាន់​ពីបទ​ចេញ​ឯកសារ​​ខុស​ច្បាប់​​ និង​ជ្រៀតជ្រែក​ដោយ​ខុស​ច្បាប់​ក្នុង​ការ​បំពេញ​ការ​ងារ​​​​មន្ត្រី​​រាជការ​។

ទាក់​ទង​កាលពី​ថ្ងៃ​សុក្រ លោក​ ឈុន ចាន់សីហា ចៅក្រម​ស៊ើបអង្កេត​​​បាន​ចុច​បិទ​ទូរស័ព្ទ​ពី​អ្នក​យក​ព័ត៌មាន​។ ទោះ​ជា​យ៉ាង​នេះ​ក្ដី ចៅក្រម​រូប​នេះ​​ត្រូវ​បាន​ដក​ស្រង់​សម្ដី​ដោយ​​សំឡេង​ប្រជា​ធិបតេយ្យ​ ដោយ​បញ្ជាក់​អំពី​បទ​ចោទ​​ និង​និយាយ​ថា លោក​ សារី ប្រឈមមុខ​នឹង​ការ​ជាប់​​ពន្ធនា​គារ​រយៈ​ពេល​៥​ឆ្នាំ​​ ប្រសិន​បើ​រក​ឃើញ​ថា​មាន​ទោស។

​អ្នក​ភូមិ​​ប្រហែល​២០០​នាក់​បាន​តវ៉ា​នៅ​ខាង​ក្រៅ​តុលាការ​ខេត្ត​សៀមរាប​​កាលពី​រសៀល​ថ្ងៃ​ព្រហស្បតិ៍ ​ដោយ​ទាម​ទារ​​ឲ្យ​ដោះលែង​ចៅសង្កាត់​ ហើយ​​​​និយាយ​ថា បទ​ចោទ​នោះ​​គឺ​ពាក់​ព័ន្ធ​នឹង​រឿង​នយោបាយ​។ ​អ្នក​ភូមិ​បាន​កត់​សម្គាល់​ថា មេភូមិ​​មកពី​គណបក្ស​ប្រជាជន​កម្ពុជា​​​​ដែល​បាន​ចុះ​ហត្ថលេខា​លើ​ឯកសារ​ទាំង​ឡាយ​​​មិន​​ត្រូវ​បាន​ចោទ​ប្រកាន់​​ទេ ចំណែក​ឯ​​​ចៅសង្កាត់​​មុន​​របស់​លោក សារី ​ដែល​ជា​ចៅសង្កាត់​​​មកពី​គណបក្ស​ប្រជាជន​កម្ពុជា​​ដែល​បាន​ចុះ​ហត្ថលេខា​​លើ​ឯកសារ​ដូច​​គ្នា​នេះ​ដែរ​​​កាលពី​មុន​ ក៏​​មិន​ត្រូវ​បាន​គេ​ចាប់​ខ្លួន​ដែរ​។

​ឯកសារ​ទាំង​ឡាយ​​គឺ​​ប្រើ​ដោយ​អ្នក​ភូមិ​​ដើម្បី​បញ្ជាក់​អំពី​កម្មសិទ្ធិ​ដីធ្លី​របស់​ពួកគេ​​ ក្នុង​គោល​បំណង​​ទទួល​បាន​​ប្រាក់​កម្ចី​ពី​ធនាគារ​​​មូលដ្ឋាន​។

លោក គីមសេង ​នៃ​គណបក្ស​សង្គ្រោះ​ជាតិ​បាន​និយាយ​ថា ​”​ប្រសិន​បើ​យើង​ក្រឡេក​មើល​​​ការ​​អនុវត្ត​រដ្ឋបាល​ ការ​ចាប់​ខ្លួន និង​ការ​ឃុំខ្លួន​គឺ​ជា​រឿង​នយោបាយ​។ ​គាត់​ត្រូវគេ​ឃាត់​ខ្លួន​​ ពីព្រោះ​គាត់​បាន​ចុះ​ហត្ថលេខា​​ទៅ​លើ​ឯកសារ​ដីធ្លី​ ចុះ​ហេតុ​អី​​ក៏​មេភូមិ​មកពី​គណបក្ស​ប្រជាជន​កម្ពុជា​​​ដែល​បាន​ចុះ​ហត្ថលេខា​​ដំបូង​លើ​ឯកសារ​ទាំង​នោះ​ដែរ​​ មិន​ត្រូវ​គេ​ចាប់​ខ្លួន​ហើយ​ដាក់​គុក?”។

អ្នកស្រី​ មឿង ឡេង ដែល​បាន​ចូល​រួម​ក្នុង​ការ​តវ៉ា​កាលពី​ថ្ងៃ​ព្រហស្បតិ៍​បាន​និយាយ​ថា ​អ្នក​ភូមិ​នឹង​បន្ត​ធ្វើ​បាតុកម្ម​​​រហូត​ទាល់​តែ​គេ​ដោះលែង​លោក​​ចៅសង្កាត់។

អ្នក​ភូមិ​រូប​នេះ​បាន​និយាយ​ថា ​”​​បទ​ចោទ​ប្រកាន់​គឺ​អយុត្តិធម៌​ទាំង​ស្រុង​ ពីព្រោះ​​ចៅសង្កាត់​​គ្រាន់​តែ​ស៊ីញ៉េ​យល់​ព្រម​ទៅ​លើ​ឯកសារ​​ បន្ទាប់ពី​​ឯកសារ​នោះ​​​ចុះ​ហត្ថលេខា​ដោយ​មេភូមិ​។ យើង​ជា​ម្ចាស់​ដី​ធ្លី​ ហើយ​យើង​មិន​ដែល​បាន​ទទួល​លុយ​កាក់​ពី​អាជ្ញាធរ​អប្សរា​​ដើម្បី​ឲ្យ​ចាក​ចេញពី​ដីធ្លី​របស់​យើង​ទេ អ៊ីចឹង​​ វា​មិន​ត្រឹម​ត្រូវ​​ក្នុង​ការ​ឃុំខ្លួន​ចៅសង្កាត់​​ដែល​គ្រាន់​តែ​ស៊ីញ៉េ​យល់​ព្រម​លើ​ឯកសារ​ដីធ្លី​របស់​យើង​នោះ​ទេ​”។

លោក ហង្ស កយ ​ជា​អ្នក​ភូមិ​ម្នាក់​ទៀត​មកពី​ភូមិ​ព្រៃកុយ ​​សង្កាត់អំពិល ​​បាន​និយាយ​ថា “​តុលា​ការ​មិន​គួរ​ចាប់​គាត់​ដាក់​គុក​ទេ ពីព្រោះ​ចៅសង្កាត់​មិន​បាន​ធ្វើ​អ្វី​ខុស​ឡើយ”​។

លោក​ កយ បាន​និយាយ​ថា ក្នុង​ឆ្នាំ​២០១៤ លោក​ សារី ​បាន​ចុះ​ហត្ថលេខា​យល់​ព្រម​លើ​ឯកសារ​ដីធ្លី​​ឲ្យ​រូប​លោក​ដែល​អាច​ឲ្យ​លោក​ដាក់​បញ្ចាំ​ទ្រព្យ​​ដើម្បី​បើក​ហាង​​លក់​ដូរ​មួយ​។

អ្នក​ភូមិ​អាយុ​៥២​ឆ្នាំ​រូប​នេះ​បាននិយាយ​ថា ​”​លោក​ចៅសង្កាត់​​បាន​ធ្វើ​អ្វី​គ្រប់​យ៉ាង​ដើម្បី​​ប្រជាជន​ក្រីក្រ​ អ៊ីចឹង​​ការ​ចាប់​ដាក់​គុក​បែប​នេះ​ពិត​ជា​​អយុត្តិធម៌​ណាស់​ចំពោះ​គាត់​”។

​អ្នក​ភូមិ​នៃ​ភូមិ​មួយ​​នៅ​ក្នុង​សង្កាត់​អំពិល​​និយាយ​ថា មាន​អ្នក​ភូមិ​ជាង​១០០​គ្រួសារ​កំពុង​រស់​នៅ​លើ​ដីធ្លី​នោះ​ចាប់​តាំង​ពីទសវត្សរ៍​​ឆ្នាំ​១៩៨០មក​ម្លេ៉ះ​ ​ចំណែកឯ​អ្នក​ភូមិ​ផ្សេង​ទៀត​បាន​មក​រស់​នៅ​​ក្នុង​ទសវត្សរ៍​ដើម​ឆ្នាំ​២០០០​ ហើយ​ថា ​ដី​ធ្លី​ទាំង​នោះ​មិន​អាច​ជា​កម្មសិទ្ធិ​​របស់​អាជ្ញាធរ​អប្សរា​​ដែល​ជា​​​ស្ថាប័ន​រដ្ឋាភិបាល​​ទទួល​បន្ទុក​គ្រប់គ្រង​ឧទ្យាន​​អង្គរ​នោះ​ទេ។

​លោក​ អុឹម សុខរិទ្ធី ​មន្ត្រី​ទំនាក់​ទំនង​អាជ្ញាធរ​អប្សរា​​បាន​បដិសេធ​មិន​​ធ្វើ​អត្ថាធិប្បាយ​​​នៅ​ពេល​សួរ​អំពី​​ករណី​នេះ​​ ហើយ​ក៏​បង្វែរ​សំណួរ​ទៅ​អ្នក​នាំពាក្យ​អាជ្ញាធរ​អប្សរា​​​គឺ​លោក ឡុង​ កុសល ដែល​​មិន​អាច​ទាក់​ទង​​បាន​​ទេ​កាលពី​​ថ្ងៃ​សុក្រ​។

​លោក សួស ណារិន ​​អ្នក​ឃ្លាំមើល​សិទ្ធិ​មនុស្ស​អង្គការ​អាដហុក​ប្រចាំ​ខេត្ត​សៀមរាប ​​បាន​និយាយ​ថា ​ពាក្យ​បណ្ដឹង​​ដែល​បណ្ដាល​ឲ្យ​មាន​ការ​ចោទ​ប្រកាន់​លោក សារី ​​ត្រូវ​ដាក់​ប្ដឹង​ដោយ​អាជ្ញាធរ​អប្សរា​ ដែល​អះអាង​​ថាជា​ម្ចាស់​កម្មសិទ្ធិ​​នៃ​ដី​ធ្លី​យ៉ាងច្រើន​នៅ​ក្នុង​តំបន់​នោះ​។

​​លោក សួស ណារិន បាននិយាយ​ថា “​​មាន​ចៅសង្កាត់​បី​ជំនាន់មក​ហើយ​​ដែល​បាន​​​ចុះ​ហត្ថលេខា​លើ​ឯកសារ​ដីធ្លី​​ឲ្យ​អ្នក​ភូមិ​ ប៉ុន្តែតុលាការ​​គ្រាន់​តែ​ចោទ​ប្រកាន់​ចៅសង្កាត់​ជាប់​ឆ្នោត​ចុង​ក្រោយ​គេ​បង្អស់​​​​​មកពី​គណបក្ស​ សម រង្ស៊ី ប៉ុណ្ណោះ​។ ប្រសិន​បើ​ [បទ​ចោទ​​គឺ​ស្រប​ច្បាប់​] ​ហេតុ​អី​ក៏​តុលាការ​​ និង​អាជ្ញាធរ​អប្សរា​​​​​ក៏មិន​ចាត់វិធានការ​ប្រឆាំង​នឹង​​​ចៅសង្កាត់​ពីមុន​ពីរ​រូប​​​មកពី​គណបក្ស​ប្រជាជន​កម្ពុជា​? យើង​គិត​ថា ​វា​ជា​ការ​គំរាម​កំហែង​ដើម្បី​​​រារាំង​​ចៅសង្កាត់​​មក​ពី​គណបក្ស​ប្រឆាំង​​​​​មិន​ឲ្យ​ធ្វើ​ការ​ងារ​ជួយ​អ្នក​ភូមិ”៕ រើន​​​​​​​​​​​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស