ប៉ូលិសបាននិយាយកាលពីថ្ងៃអាទិត្យថា ប៉ូលិសបានស្គាល់ភិនភាគជនសង្ស័យម្នាក់ជាប់ពាក់ព័ន្ធការកាប់នឹងពូថៅយ៉ាងសាហាវលើគ្រួសារមួយក្នុងក្រុងព្រះសីហនុកាលពីថ្ងៃអង្គារ ដែលបណ្តាលឲ្យមនុស្សប្រាំនាក់របួស និងពីរនាក់ស្លាប់ ក៏ប៉ុន្តែនៅមិនទាន់មានការចាប់ខ្លួននរណាម្នាក់ទេ។
លោក ម៉ម កាម៉ាល ស្នងការរងនគរបាលខេត្ត បានមានប្រសាសន៍ថា នគរបាលស្គាល់ភិនភាគជនសង្ស័យម្នាក់ ក៏ប៉ុន្តែលោកបានបដិសេធមិនប្រាប់លម្អិតទេ ពីព្រោះនគរបាលកំពុងស៊ើបអង្កេតនៅឡើយ។
លោកបានមានប្រសាសន៍ “យើងបានដឹងព័ត៌មានមួយចំនួនអំពីជនសង្ស័យ ហើយកំពុងស៊ើបអង្កេតបន្ថែម។ មិនទាន់ច្បាស់នៅឡើយទេ គ្រាន់តែជាការសង្ស័យប៉ុណ្ណោះ”។
កាលពីរំលងអធ្រាត្រឈានចូលព្រឹកថ្ងៃអង្គារ ជនល្មើសបានដើរចូលទៅក្នុងផ្ទះអ្នកនេសាទ គង់ ភារម្យ ក្នុងសង្កាត់១ ក្រុងព្រះសីហនុ ខណៈដែលគាត់នេសាទនៅឯសមុទ្រ ហើយបានកាប់ប្រពន្ធ ម្តាយក្មេក និងកូនប្រាំនាក់។ ប្រពន្ធរបស់គាត់ ឈ្មោះ អ៊ុំ ផាន់ណា អាយុ៣១ឆ្នាំ និងកូនស្រីអាយុ១៣ឆ្នាំរបស់គាត់ ក្រោយមកបានស្លាប់ដោយសាររបួសធ្ងន់។
ខណៈដែលប៉ូលិសដំបូងឡើយបានបដិសេធថាមិនមែនជាអំពើប្លន់នោះ លោក កាម៉ាល បានមានប្រសាសន៍កាលពីថ្ងៃអាទិត្យថា ពួកគេជឿថា វាជាករណីសងសឹកគ្នាលាយឡំនឹងការប្លន់ ព្រោះខ្សែកមាសមួយកង់របស់ អ៊ុំ ផាន់ណា បានបាត់។
លោក កាម៉ាល បានមានប្រសាសន៍ថា ជនសង្ស័យបានមកដល់សង្កាត់១ថ្មីៗនេះ។ លោកបានបន្ថែមថា សាក្សីមួយចំនួនបាននិយាយថា ជនសង្ស័យរូបនេះបានមានជម្លោះជាមួយ អ៊ុំ ផាន់ណា ពីរបីម៉ោងមុនការវាយប្រហារកើតឡើង ហើយជនសង្ស័យបានសម្លឹងមើលខ្សែកមាសរបស់ជនរងគ្រោះ។
លោក កាម៉ាល បាននិយាយថា “នៅពេលយើងមានភ័ស្តុតាងគ្រប់គ្រាន់ពីសាក្សី យើងនឹងស្នើព្រះរាជអាជ្ញាបន្តនីតិវិធី”។
លោកបាននិយាយថា លោក ជួន ណារិន ស្នងការនគរបាលខេត្តព្រះសីហនុ បានបញ្ជាក់ថា ករណីនេះកើតឡើងដោយសារតែការសងសឹក តែលោកមិនអធិប្បាយច្រើនទេ។
លោកបានមានប្រសាសន៍ថា “នៅពេលណាវាចប់ ខ្ញុំនឹងឲ្យលោកដឹង”។
លោក ភារម្យ បាននិយាយថា នៅល្ងាចមុនមានរឿងកើតឡើង មានបុរសម្នាក់ដែលធ្វើការនៅការដ្ឋានសំណង់នៅជិតផ្ទះរបស់ពួកគេ បានដើរមកជិតប្រពន្ធរបស់គាត់និងកម្មកររោងចក្រស្បែកជើង ដែលជិះម៉ូតូទៅផ្ទះពីកន្លែងធ្វើការនៅរោងចក្រស្បែកជើង ដើម្បីសុំជិះ ហើយពួកគេមិនឲ្យជិះជាមួយ។
លោកបាននិយាយថា អ្នកជិតខាងក៏បានប្រាប់លោកដែរថា ជននោះក្រោយមកត្រូវគេឃើញដើររ៉េរ៉ចុះឡើង ខណៈដែលអ្នកភូមិកំពុងហូបបាយល្ងាចជុំគ្នា ប៉ុន្មានម៉ោងមុនហេតុការណ៍បានកើតឡើង។
លោកបាននិយាយថា “ខ្ញុំសង្ស័យគាត់ ដោយផ្អែកលើអ្វីដែលសាក្សីបាននិយាយ ថានៅពេលអាធ្រាត្រពួកគេបានឃើញជននេះដើរជុំវិញផ្ទះនោះ ទោះជាយ៉ាងនេះក្តី ខ្ញុំគ្មានភស្តុ័តាងបញ្ជាក់ទេ។
លោក ភារម្យ បាននិយាយថា ម្តាយក្មេករបស់លោកបានវិលត្រឡប់ទៅផ្ទះវិញហើយកាលពីថ្ងៃសៅរ៍ ហើយកូនរបស់គាត់បានជាគ្រាន់បើហើយនៅមន្ទីរពេទ្យគន្ធបុប្ផាក្នុងក្រុងភ្នំពេញ ប៉ុន្តែ កូនប្រុសអាយុ៥ឆ្នាំនៅឈឺធ្ងន់នៅឡើយ។
លោក ភារម្យ បាននិយាយថា “ខ្ញុំចង់ឲ្យអាជ្ញាធម៌ស្វែងរកជនដៃដល់ និងដាក់ទណ្ឌកម្មទៅតាមច្បាប់។ យើងមិនដឹងពឹងអ្វីទេឥឡូវនេះ។ ឈឺចាប់ណាស់”៕ និត