កាលពីសប្តាហ៍មុន សាលាដំបូងខេត្តសៀមរាបបានសាកសួរមេភូមិមកពីគណបក្សប្រជាជនកម្ពុជាដំណាលគ្នានឹងចៅសង្កាត់មកពីគណបក្សសម រង្ស៊ី ដែរបន្ទាប់ពីពួកគាត់បានចុះហត្ថលេខាលើឯកសារអនុញ្ញាតឲ្យអ្នកភូមិបញ្ចាំដីដែលអះអាងកាន់កាប់ដោយអាជ្ញាធរអប្សរា ប៉ុន្តែ បានចោទប្រកាន់ និងដាក់ពន្ធនាគារតែសមាជិកគណបក្សប្រឆាំងប៉ុណ្ណោះ។
លោក ឡុង កុសល អ្នកនាំពាក្យអាជ្ញាធរអប្សរាជាស្ថាប័នរដ្ឋាភិបាល ដែលមើលខុសត្រូវឧទ្យានបុរាណអង្គរបានមានប្រសាសន៍ថា អាជ្ញាធរបានដាក់ពាក្យបណ្តឹងប្តឹងលោកទាំងពីរ ហើយថា លោកជឿថា មេភូមិគណបក្ស ប្រជាជនកម្ពុជាត្រូវបានច្រានចោលចំពោះហេតុផលនីតិវិធី ហើយនឹងត្រូវផ្តន្ទាទោសនៅពេលឆាប់ៗនេះ។
លោក ឡុង កុសល បានថ្លែងថា “វាមិនមែនមានន័យថា តុលាការបដិសេធមិនចាត់វិធានការមេភូមិរូបនេះទេ។ មានន័យថា លោក ហ៊ាង សារី ចៅសង្កាត់អម្ពិលមកពីគណបក្ស សម រង្ស៊ី ព្រមទាំងលោក ប៉ាត កឹកមេភូមិមកពីគណបក្សប្រជាជនកម្ពុជា នឹងទទួលបានការចោទប្រកាន់ដូចគ្នាចំពោះការប្រព្រឹត្តបទឧក្រិដ្ឋ”។
កាលពីថ្ងៃពុធ លោក ហ៊ាង សារី ចៅសង្កាត់ អម្ពិល ក្រុងសៀមរាបត្រូវបានចាប់ខ្លួននៅតុលាការចោទប្រកាន់ពីបទផ្តល់ឯកសារក្លែងក្លាយ និងឃុបឃិតយកដីរបស់រដ្ឋ ហើយត្រូវបានបញ្ជូនទៅឃុំខ្លួននៅពន្ធនាគារខេត្តដើម្បីរង់ចាំការជំនុំជម្រះ។
កាលពីម្សិលមិញ លោក ឆេង សី សមាជិក ក្រុមប្រឹក្សាសង្កាត់អម្ពិល និងជាសមាជិកគណបក្ស សម រង្ស៊ី បានមានប្រសាសន៍ថា លោកបានទៅសួរសុខទុក្ខលោក ហ៊ាង សារី នៅក្នុងពន្ធនាគារកាលពីថ្ងៃពុធ ហើយថា ចៅសង្កាត់រូបេនះបានប្រាប់លោកថា ចៅក្រមសើុបសួរក៏បានសាកសួរលោក ប៉ាត កឹក កាលពីថ្ងៃពុធផងដែរ តែអនុញ្ញាតឲ្យគាត់ដើរហើរដោយសេរី។
លោកបានថ្លែងថា “យើងបានសួរថា តើហេតុអ្វីបានជាតុលាការឃុំខ្លួនតែចៅសង្កាត់រូបនេះ ហើយអនុញ្ញាតឲ្យមេភូមិរូបនេះដើរចេញពីតុលាការដោយសេរី បើទោះជាមេភូមិមកពីគណបក្សប្រជាជនកម្ពុជារូបនេះពីដំបូងបានចុះហត្ថលេខាលើឯកសារទាំងនេះក៏ដោយ”។លោកបានបន្ថែមថា “វាហាក់ដូចជាការដាក់ពន្ធនាគារនេះជាហេតុផលនយោបាយអ៊ីចឹង”។
លោក ឈុន ចាន់សីហា ចៅក្រមសើុបសួរបានអះអាងថា លោកទទួលបន្ទុករឿងក្តីនេះ។ នៅពេលសួរថា តើហេតុអ្វីបានជាមេភូមិរូបនេះមិនត្រូវបានចាប់ខ្លួន និងចោទប្រកាន់នោះ លោកបានថ្លែងថា គាត់ស្ថិត “ក្នុងការជំនុំជម្រះ” ហើយបានបដិសេធមិនធ្វើអត្ថាធិប្បាយទេ។
លោក ឡុង កុសល ជាអ្នកនាំពាក្យអាជ្ញាធរ អប្សរាបានមានប្រសាសន៍ថា លោក ប៉ាត កឹក មិនត្រូវបានចោទប្រកាន់ទេ ពីព្រោះគាត់ “បានសុំប្តូរមេធាវីការពារ”។
លោកបានថ្លែងថា “អ្វីដែលខ្ញុំដឹងគឺថា តុលាការបានកោះហៅមេភូមិរូបនេះឲ្យមកបង្ហាញខ្លួននៅតុលាការនៅពេលឆាប់ៗនេះ”។
លោក ឡុង កុសល បានមានប្រសាសន៍ថា អាជ្ញាធរបានដាក់ពាក្យបណ្តឹងកាលពីខែតុលាការចោទប្រកាន់លោក ប៉ាត កឹក និងលោក ហ៊ាង សារី ពីបទចុះហត្ថលេខាដោយខុសច្បាប់លើឯកសារដែលអនុញ្ញាតឲ្យអ្នកភូមិ៦០គ្រួសារសាងសង់ផ្ទះ និងបញ្ចាំដីលើផ្ទៃដីទំហំ៥០ហិកតាដែលកាន់កាប់ដោយរដ្ឋ។
លោកបានមានប្រសាសន៍ថា ការចោទប្រកាន់លោក ហ៊ាង សារី កើតចេញពីហេតុពិតថា ដីដែលមានជម្លោះនេះមិនស្ថិតក្នុងសង្កាត់អម្ពិលទេ ប៉ុន្តែ ស្ថិតក្នុងសង្កាត់នគរវត្តក្បែរនោះ។
លោកបានមានប្រសាសន៍ថា “យើងបានចោទប្រកាន់ពួកគាត់ទាំងពីរនាក់។ យើងមិនផ្តោតគោលដៅតែលើម្នាក់ទេ”។
យោងតាមលោក ឡុង កុសល បានឲ្យដឹងថា រដ្ឋាភិបាលបានកំណត់ព្រំប្រទល់ដីទំហំ៥០ហិកតាក្នុងឆ្នាំ១៩៩៥ ហើយបានលៃទុកសម្រាប់អភិវឌ្ឍជាតំបន់វប្បធម៌ និងទេសចរណ៍។ លោកបានមានប្រសាសន៍ថា អាជ្ញាធរ ក្រុងសៀមរាបបានជូនដំណឹងដល់មេភូមិ និងចៅសង្កាត់នេះជាច្រើនលើកថា ការចេញឯកសារបែបនេះគឺជាការខុសច្បាប់។
ទោះយ៉ាងណា លោក ឆេង សី សមាជិកក្រុមប្រឹក្សាសង្កាត់អម្ពិលបានច្រានចោលការលើកឡើងរបស់លោក ឡុង កុសល ដោយ អះអាងថា អ្នកភូមិ៦០គ្រួសារមានភ័ស្តុតាងបញ្ជាក់ពីកម្មសិទ្ធិដីនៅក្នុងតំបន់នេះយូរមកហើយ។ លោកបានថ្លែងថា មេភូមិ និងចៅសង្កាត់រូបនេះគ្រាន់តែធ្វើតាមការអនុវត្តរបស់អ្នកកាន់តួនាទីមុនរបស់ពួកគាត់ដែលបានចុះហត្ថលេខាលើឯកសារដូចគ្នាបេះបិទក្នុងពេលកន្លងមក។ ក្រុមអ្នកភូមិបានអះអាងពីការលើកឡើងរបស់លោក ឆេង សី។
អ្នកស្រី មឿង ឡេង អាយុ៥៣ឆ្នាំជាអ្នកភូមិម្នាក់បាននិយាយថា “ខ្ញុំបានទិញដីនៅទីនេះក្នុងឆ្នាំ២០០៤ ហើយឯកសារកាន់កាប់ដីរបស់ខ្ញុំត្រូវបានចុះហត្ថលេខាដោយអតីតចៅសង្កាត់មកពីគណបក្សប្រជាជនកម្ពុជា ដោយបង្ហាញថាដីរបស់ខ្ញុំស្ថិតក្នុងភូមិព្រៃកុយក្នុងសង្កាត់អម្ពិល មិនមែនស្ថិតក្នុងភូមិ អញ្ចាញ [ក្នុងសង្កាត់នគរធំ] ទេ”។
អ្នកស្រីបាននិយាយថា “ខ្ញុំបានបោះឆ្នោតរាល់ការបោះឆ្នោត ខណៈដែលបានចុះឈ្មោះជាអ្នកភូមិមកពីភូមិព្រៃកុយ ហើយអាជ្ញាធរអប្សរាមិនដែលផ្តល់សំណងដល់ពួកយើងក្នុងការចាកចេញឡើយ”៕សារុន