នៅក្នុងចំណាត់ការដ៏កម្រមួយ កាលពីម្សិលមិញនគរបាលជាតិបានដាក់ការចោទប្រកាន់ថា បានកាប់ឈើខុសច្បាប់លើក្រុមហ៊ុនគ្រប់គ្រងដីសម្បទានសេដ្ឋកិច្ចមួយចំនួនដែលរដ្ឋាភិបាលផ្តល់ឲ្យនៅភាគខាងកើតខេត្តមណ្ឌលគិរី ដោយបញ្ចេញឈ្មោះក្រុមហ៊ុនចម្ការកៅស៊ូមួយគ្រប់គ្រងដោយជនជាតិចិន និងលោក សឹង សំអុល អ្នកជំនួញមានទ្រព្យសម្បត្តិស្តុកស្ដម្ភ។
ទោះជាមានសេចក្តីរាយការណ៍ជាប្រចាំពីអ្នកភូមិ និងអង្គការសិទ្ធិមនុស្សអំពីការកាប់ឈើខុសច្បាប់ដោយក្រុមហ៊ុនគ្រប់គ្រងដីសម្បទានសេដ្ឋកិច្ច និងអ្នកជំនួញមានខ្នងក្រាស់នៅទូទាំងប្រទេសក៏ដោយក្តី តែវាជារឿងកម្រណាស់ដែលរដ្ឋាភិបាលបញ្ចេញឈ្មោះ និងបំបាក់មុខក្រុមហ៊ុនជាក់លាក់ និងដៃគូជំនួញរបស់ពួកគេដោយសារតែបទល្មើសនេះ។
សេចក្តីថ្លែងការណ៍មួយបង្ហោះលើគេហទំព័ររបស់នគរបាលជាតិកាលពីម្សិលមិញ បានបញ្ចេញឈ្មោះក្រុមហ៊ុនគ្រប់គ្រងដីសម្បទានសេដ្ឋកិច្ចដែលប្រព្រឹត្តបទល្មើសចំនួនបីនៅក្នុងខេត្តមណ្ឌលគិរី ប៉ុន្តែ បានផ្តោតលើក្រុមហ៊ុនគ្រប់គ្រងដីសម្បទានសេដ្ឋកិច្ចឈ្មោះ Dai Thanh ដែលមានចម្ការកៅស៊ូទំហំ៨៧.០០០ហិកតានៅក្នុងដែនជម្រកសត្វព្រៃភ្នំព្រិច ហើយបានដាក់ឲ្យប្រធានគ្រប់គ្រងតំបន់ការពារនេះស្ថិតក្នុងចំណោមអ្នកដែលត្រូវទទួលខុសត្រូវចំពោះការកាប់ឈើខុសច្បាប់។
ដោយបន្តបន្ទោសលោក សឹង សំអុល ចំពោះការកាប់ឈើខុសច្បាប់ សេចក្តីថ្លែងការណ៍នេះមានខ្លឹមសារដូច្នេះថា “ដែនជម្រកសត្វព្រៃភ្នំព្រិចក្នុងខេត្តមណ្ឌលគិរីកំពុងប្រឈមនឹងការកាប់ឈើយ៉ាងខ្លាំង ប៉ុន្តែ ប្រធានដែនជម្រកសត្វព្រៃនេះគឺលោក សំរ៉ុង ឌីវិចិត្រ មិនបានចាត់វិធានការប្រឆាំងការកាប់ឈើខុសច្បាប់ឡើយ”។
សេចក្តីថ្លែងការណ៍នេះមានខ្លឹមសារបន្តថា “លោកឧកញ៉ា សឹង សំអុល ត្រូវគេដឹងថា មានការជាប់ពាក់ព័ន្ធក្នុងការកាប់ឈើខុសក្នុងដែនជម្រកសត្វព្រៃ។ លោក សឹង សំអុល បានប្រើល្បិចដោយប្រើប្រាស់គម្រោងវិនិយោគរបស់ក្រុមហ៊ុន Dai Thanh ជាលេសដើម្បីកាប់ឈើ និងដឹកជញ្ជូនឈើយកទៅលក់នៅទីផ្សារអន្តរជាតិ”។
ឧកញ៉ា គឺជាងារមួយដែលគេផ្តល់ឲ្យអ្នកដែលបានបរិច្ចាគប្រាក់យ៉ាងតិច ១០០.០០០ដុល្លារចូលរដ្ឋ។សេចក្តីថ្លែងការណ៍នេះមានខ្លឹមសារបន្តដូច្នេះថា “ឈ្មួញឈើតូចតាចមួយ ចំនួនបានត្អូញត្អែរថា លោកឧកញ៉ា សឹង សំអុល បានបញ្ជាឲ្យតំណាងគ្រប់គ្រងរបស់គាត់ឈ្មោះ ខុន ឲ្យនាំមនុស្សទៅកាប់ឈើក្នុងព្រៃដែលមានដើមឈើល្អៗក្នុងដែនជម្រកសត្វព្រៃភ្នំព្រិច “។
“អ្នកទាំងនោះបានប្រើប្រាស់រណារអារឈើរាប់រយគ្រឿងដើម្បីកាប់ផ្តួលដើមឈើជារៀងរាល់ថ្ងៃ ហើយពួកគេបានដឹកជញ្ជូនឈើទៅឲ្យក្រុមហ៊ុនគ្រប់គ្រងដីសម្បទាន Dai Thanh ដើម្បីធ្វើឲ្យវា [មើលទៅទំនងជា]ឈើដែលកាប់ដោយស្របច្បាប់។ ក្រុមហ៊ុននេះបានដឹកជញ្ជូនឈើទៅប្រទេសវៀតណាមដោយឆ្លងកាត់ខេត្តក្រចេះ និងប៉ុស្តិ៍ឆែកឆេរក្រៅផ្លូវការមួយចំនួនតាមបណ្តោយ ព្រំប្រទល់ជាប់ខេត្តត្បូងឃ្មុំ”។
សេចក្តីថ្លែងការណ៍នេះក៏បានលើកឡើងអំពីសេចក្តីរាយការណ៍ពីមន្ត្រីនៅក្នុងស្រុកកោះញែក ខេត្តមណ្ឌលគិរី ដែលដាក់ការចោទប្រកាន់អំពីការលាងឈើខុសច្បាប់ស្រដៀងគ្នានេះលើក្រុមហ៊ុនគ្រប់គ្រងដីសម្បទានសេដ្ឋកិច្ចឈ្មោះ Master K Sun ដែលគ្រប់គ្រងដោយជនជាតិខ្មែរ និងដែលក៏ស្ថិតក្នុងតំបន់ភ្នំព្រិចដែរនោះ និងក្រុមហ៊ុនគ្រប់គ្រងដីសម្បទានសេដ្ឋកិច្ចឈ្មោះUnigreen ដែលគ្រប់គ្រងដោយជនជាតិសិង្ហបុរី។
សេចក្តីថ្លែងការណ៍នេះមិនបានលើកឡើងថា តើវិធានការអ្វីដែលអាជ្ញាធរនឹងចាត់ឡើងចំពោះលោក សឹង សំអុល លោក សំរ៉ុង ឌីវិចិត្រ ឬក្រុមហ៊ុនណាមួយក្នុងចំណោម ក្រុមហ៊ុនទាំងនេះឡើយ។អ្នកនាំពាក្យនគរបាលជាតិមិនអាចទាក់ទងបានទេ។
ការកាប់ឈើខុសច្បាប់ត្រូវពិន័យ និងផ្តន្ទាទោសឲ្យជាប់ពន្ធនាគាររហូតដល់រយៈពេល៥ឆ្នាំ។
លោក យិច សាមិទ្ធី ដែលប្រាប់អត្តសញ្ញាណខ្លួនឯងថា ជាមេធាវីរបស់ក្រុមហ៊ុន Dai Thanh បានលើកឡើងថា លោកមិនបានដឹងអំពីសកម្មភាពរបស់ក្រុមហ៊ុននេះគ្រប់គ្រាន់សម្រាប់ការធ្វើអត្ថាធិប្បាយឡើយ។ តំណាងក្រុមហ៊ុនចំនួនពីរផ្សេងទៀតមិនអាចទាក់ទងបានទេ។
លោក សំរ៉ុង ឌីវិចិត្រ បានអះអាងថា ឧទ្យានុរក្សរបស់លោកបានរារាំងអ្នកកាប់ឈើខុសច្បាប់ជាច្រើននាក់ ទោះជាយ៉ាងណាលោកបានលើកឡើងថា ពួកគេតែងតែគេចខ្លួនរួច ប៉ុន្តែ ថា លោកមិនដឹងថា តើបទល្មើសណាមួយដែលលោក សឹង សំអុលនឹងត្រូវចោទប្រកាន់នោះឡើយ។
លោកបានលើកឡើងថា “ខ្ញុំមិនច្បាស់ទេថា តើលោកឧកញ៉ា សឹង សំអុល កាប់ឈើនៅខាងក្រៅដីសម្បទានសេដ្ឋកិច្ចដែរ ឬអត់នោះ ព្រោះយើងមិនដែលប្រទះឃើញឡើយ ហើយយើងគ្មានភ័ស្តុតាងបញ្ជាក់ថា គាត់ធ្វើបែបនេះទេ។ ប៉ុន្តែ ខ្ញុំបានជួបការកាប់ឈើខុសច្បាប់ជាច្រើន ហើយបានបញ្ឈប់ពួកគេ [អ្នកកាប់ឈើ] ជាច្រើនលើកច្រើនសារ មិនឲ្យកាប់ឈើនៅខាងក្រៅដីសម្បទានសេដ្ឋកិច្ច”។
លោក សំរ៉ុង ឌីវិចិត្រ បានលើកឡើងទៀតថា លោក សឹង សំអុល ត្រូវបានផ្តល់អាជ្ញាប័ណ្ណដោយក្រសួងសេដ្ឋកិច្ច និងហិរញ្ញវត្ថុឲ្យកាប់ឈើនៅក្នុងដីសម្បទានសេដ្ឋកិច្ចគ្រប់គ្រងដោយក្រុមហ៊ុន Dai Thanh ហើយបានលក់ឈើទាំងនៅក្នុងខេត្តនេះ និងដឹកឆ្លងកាត់ទៅលក់នៅប្រទេសវៀតណាម ដោយបង់ពន្ធដែលតម្រូវឲ្យបង់ចូលរដ្ឋ។
លោក វ៉ាន់ ដានិន អ្នកនាំពាក្យនគរបាលខេត្តបានលើកឡើងថា លោកមិនដឹងអំពីសេចក្តីថ្លែងការណ៍របស់នគរបាលជាតិ ឬការចោទប្រកាន់លើលោក សឹង សំអុល និងក្រុមហ៊ុន Dai Thanh ឡើយ។ លោកបានលើក ឡើងថា “វាមានការលំបាកសម្រាប់យើងក្នុងការចូលទៅកាន់ដែនជម្រកសត្វព្រៃភ្នំព្រិច ព្រោះយើងត្រូវធ្វើដំណើរឆ្លងកាត់ខេត្តក្រចេះ ហើយពេលយើងទៅដល់ក្នុងព្រៃ អ្នកកាប់ឈើបានគេចខ្លួនបាត់ទៅហើយ”។
“ប៉ុន្តែ លោកស្នងការនឹងបញ្ជូនមន្ត្រីប្រដាប់អាវុធមួយក្រុមទៅតំបន់នេះនៅថ្ងៃស្អែក ដើម្បីសើុបអង្កេត ហើយប្រសិនបើយើងរកឃើញអ្នកកាប់ឈើខុសច្បាប់ យើងនឹងចាត់វិធានការលើពួកគេ”។
លោក សៅ សុភាព អ្នកនាំពាក្យក្រសួងបរិស្ថាន ដែលគ្រប់គ្រងដែនជម្រកសត្វព្រៃនេះបានលើកឡើងថា លោកដឹងអំពីការចោទប្រកាន់ទាក់ទិននឹងការកាប់ឈើខុសច្បាប់ជាទូទៅ ប៉ុន្តែ មិនដឹងការអះអាងថ្មីដោយនគរបាលជាតិឡើយ។
លោកបានលើកឡើងថា “យើងកំពុងខិតខំល្បាតយ៉ាងខ្លាំង។សេចក្តីរាយការណ៍ចុងក្រោយ យើងត្រូវតែពិនិត្យមើលអ្វីដែលកំពុង បន្តកើតឡើង និងចាត់វិធានការសមស្រប”។
លោក ប្លិក ម៉ាល សកម្មជនការពារបរិស្ថានមួយរូបដែលធ្វើការនៅក្នុងដែនជម្រកសត្វព្រៃនេះបានលើកឡើងថា ខ្លួនបានឃើញអ្នកកាប់ឈើខុសច្បាប់ដែលកំពុងធ្វើការក្នុងរយៈពេលត្រឹមតែបីថ្ងៃកន្លងមកនេះប៉ុណ្ណោះ ហើយថា ពួកគេបានប្រាប់គាត់ថា ពួកគេធ្វើការឲ្យលោក សឹង សំអុល។
លោកបាននិយាយថា “លោក សឹង សំអុល កំពុងកាប់ឈើនៅក្នុងដីសម្បទានសេដ្ឋកិច្ច ហើយក៏នៅខាងក្រៅដីសម្បទានសេដ្ឋកិច្ចដែរ ដោយប្រើប្រាស់ឈ្មោះក្រុមហ៊ុន Dai Thanh “៕ស៊ុយឈាង (រាយការណ៍បន្ថែមដោយ Zsombor Peter)