កាលពីម្សិលមិញ លោកនាយករដ្ឋមន្ត្រី ហ៊ុន សែន បានសម្ពោធដាក់ឲ្យប្រើប្រាស់ស្ពានអាកាស៥មករា ស្ថិតក្នុងខណ្ឌទួលគោក រាជធានីភ្នំពេញ ហើយបានលើកឡើងថា វាគាប់ជួនដែលស្ពាននេះត្រូវបានដាក់ឈ្មោះចំថ្ងៃនៃខួបអាពាហ៍ពិពាហ៍របស់លោក ដោយចោទប្រកាន់គណបក្សប្រឆាំងដែលអះអាងការភ្ជាប់បែបនេះពិតជាមានចេតនា។
លោកបានមានប្រសាសន៍ថា “ពិធីសម្ពោធកំណត់ធ្វើនៅថ្ងៃទី៥ ខែមករា ឆ្នាំ២០១៦ ហើយវាគាប់ជួននឹងខួបអាពាហ៍ពិពាហ៍របស់ខ្ញុំលើកទី៤០ ប៉ុន្តែអ្វីដែលធ្វើឲ្យខ្ញុំខកចិត្តនោះគឺថា បើសិនជាកាសែតវាឆ្កួត មេដឹក នាំបក្សក្នុងឋានៈជាអ្នកតំណាងរាស្ត្រកុំឆ្កួត”។
លោក ហ៊ុន សែន បានមានប្រសាសន៍ថា លោកបានសំដៅដល់អត្ថបទមួយដែលចេញផ្សាយកាលពីម្សិលមិញនៅក្នុងកាសែតភ្នំពេញប៉ុស្តិ៍។
អត្ថបទនោះលើកឡើងពីសារដែលលោក ហ៊ុន សែន បានបង្ហោះក្នុងទំព័រហ្វេសប៊ុករបស់លោកកាលពីថ្ងៃច័ន្ទ ដែលក្នុងនោះលោកបានលើកឡើងពីខួបអាពាហ៍ពិពាហ៍របស់លោកនៅថ្ងៃទី៥ ខែមករា ប៉ុន្តែមិនបានលើកឡើងពីស្ពានអាកាសទេ។ ប៉ុន្តែអត្ថបទនេះអះអាងថា ស្ពានអាកាសថ្មីនេះដាក់ឈ្មោះតាមថ្ងៃនោះដើម្បីរំឭកដល់ខួបអាពាហ៍ពិពាហ៍។
អត្ថបទភាសាខ្មែរ រួមមានការអត្ថាធិប្បាយ របស់លោក យឹម សុវណ្ណ អ្នកនាំពាក្យគណបក្សសង្គ្រោះជាតិផងដែរ។ នៅពេលសួរអំពីឈ្មោះស្ពានអាកាសនេះ លោក យឹម សុវណ្ណ ត្រូវបានដកស្រង់សម្ដីដែលនិយាយថា ប្រទេសកម្ពុជាមានវីរបុរសច្រើនដែលបានជួយការពារទឹកដី។
លោក ហ៊ុន សែន បានមានប្រសាសន៍កាលពីម្សិលមិញថា “បើសិនជាស្ពាននេះដាក់ថា ជាស្ពានអនុស្សាវរីយ៍ខួបលើកទី៤០នៃខួបអាពាហ៍ពិពាហ៍របស់សម្ដេចតេជោ និងភរិយា អាហ្នឹងចាំថា។ តែអា៥មករា គឺមនុស្សម៉ាពិភពលោក”។
ថ្លែងនៅពិធីនោះផងដែរ លោក បា៉ សុជាតិ វង្ស អភិបាលរាជធានីភ្នំពេញបានមានប្រសាសន៍ថា ស្ពានអាកាសនេះ និងអមដោយផ្លូវក្រោមដីត្រង់ចំណុចប្រសព្វនៃមហាវិថីសហព័ន្ធរុស្ស៊ី និងម៉ៅសេទុងនេះត្រូវបានសាងសង់ដោយចំណាយទឹកប្រាក់អស់១៤,៥លានដុល្លារដោយក្រុមហ៊ុនវិនិយោគទុនអាណិកជនកម្ពុជា គឺក្រុមហ៊ុនដដែលដែល ជាម្ចាស់កោះពេជ្រ។
លោកបានថ្លែងថា កំណើនសេដ្ឋកិច្ចកើនឡើងក្នុងរាជធានីភ្នំពេញបានធ្វើឲ្យគម្រោងហេដ្ឋារចនាសម្ព័ន្ធដូចនេះ គឺស្ពានអាកាសដែលជាស្ពានទី៤ក្នុងរាជធានី ជាការចាំបាច់។
លោកបានថ្លែងថា ”ការសាងសង់ហេដ្ឋារចនាសម្ព័ន្ធដូចនេះនៅក្នុងរាជធានី ដូចជាផ្លូវក្រវាត់ ស្ពានអាកាស ផ្លូវក្រោមដី និងគម្រោង ផ្សេងៗទៀតជាការចាំបាច់ ណាស់ក្នុងការដោះស្រាយបញ្ហាកកស្ទះចរាចរណ៍”។
លោក ហ៊ុន សែន បានមានប្រសាសន៍ថា លោកបានផ្ដល់ការយល់ព្រមជាមួយសាលារាជធានី “ជាគោលការណ៍” សម្រាប់ស្ថាបនាស្ពានអាកាសបីទៀត ឬផ្លូវក្រោមដី និងគម្រោង ដ៏ធំគឺការស្ថាបនាផ្លូវល្បឿនលឿនចាប់ពីកណ្ដាលរាជធានីទៅអាកាសយានដ្ឋានអន្តរជាតិភ្នំពេញពីលើផ្លូវរថភ្លើងដែលមានស្រាប់។
សេចក្ដីសម្រេចនេះច្រានចោលផ្លូវពីរទៀតដែលសាលារាជធានីកំពុងពិចារណាសម្រាប់ ផ្លូវល្បឿន លឿនទៅកាន់អាកាសយានដ្ឋាននេះ។
ដោយប្ដូរប្រធានបទ លោកនាយករដ្ឋមន្ត្រីបានមានប្រសាសន៍ថា ប្រជាពលរដ្ឋដែលរស់នៅតាមបណ្ដោយផ្លូវជាតិលេខ៤ចាប់ពីរាជធានីភ្នំពេញទៅកាន់ក្រុងព្រះសីហនុនឹងលែងបង់ថ្លៃទៀតហើយចាប់ពីថ្ងៃព្រហស្បតិ៍ គឺថ្ងៃបុណ្យជាតិរំឭកដល់ការដួលរំលំរបបខ្មែរក្រហមក្នុងឆ្នាំ១៩៧៩។
លោកបានថ្លែងថា រថយន្តអត់ដំបូលដែលដឹកកម្មកររោងចក្រកាត់ដេរទៅកាន់រោងចក្ររបស់ពួកគេរាល់ថ្ងៃក៏នឹងត្រូវលើកលែង ផងដែរ។ លោកបានបន្ថែមថា យានយន្តប្រហែល៣៣.០០០គ្រឿងដែលកំណត់ដោយក្រុមហ៊ុន AZ Distribution ជាក្រុមហ៊ុនប្រតិបត្តិករផ្លូវបង់ថ្លៃ ទទួលបានការលើកលែងដែរ៕ សារុន