យោងតាមមន្ត្រីនគរបាលម្នាក់បានឲ្យដឹងថា ខេត្តដាក់ឡាក់របស់វៀតណាមបានផ្តល់ទឹកប្រាក់ និងសម្ភារសំណង់ដើម្បីសាងសង់ប៉ុស្តិ៍នគរបាលថ្មីមួយឆ្លងកាត់ព្រំដែនក្នុងស្រុកកោះញែក ខេត្តមណ្ឌលគិរី។
លោក វ៉ាន់ ដានិន អ្នកនាំពាក្យនគរបាលខេត្តមណ្ឌលគិរីបានមានប្រសាសន៍កាលពីម្សិលមិញថា រដ្ឋាភិបាលខេត្តដាក់ឡាក់បានផ្តល់ស័ង្កសីសម្រាប់ប្រក់ដំបូលចំនួន១៨០ម៉ែត្រក្រឡា ស៊ីម៉ង់ត៍៥,៥តោន និងទឹកប្រាក់១.៨០០ដុល្លារដល់ប៉ុស្តិ៍នគរបាលថ្មីក្នុងស្រុកកោះញែកដែលមានព្រំប្រទល់ប្រហែល ៥០គីឡូម៉ែត្រជាប់ប្រទេសវៀតណាម។
លោកបានមានប្រសាសន៍ថា “ភាគីវៀតណាមបានជួួយតាមរយៈការផ្តល់សម្ភារសំណង់ទាំងនេះដើម្បីសាងសង់ប៉ុស្តិ៍នគរបាលក្នុងស្រុកកោះញែកដើម្បីពង្រឹងកិច្ចសហប្រតិបត្តិការ និងមិត្តភាពរវាងខេត្តទាំងពីរ។ យើងបានព្រមព្រៀងរួមគ្នាបញ្ឈប់រាល់បទឧក្រិដ្ឋឆ្លងដែននៅក្នុងខេត្តទាំងពីរ។
លោក ដានិន បានទទួលស្គាល់ថា ព្រំដែន នៅមិនទាន់មានសន្តិសុខនៅឡើយទេ ប៉ុន្តែ បានអះអាងថា នគរបាលខេត្តមណ្ឌលគិរីមិនបានសហការជាមួយអ្នកជួញដូរឈើឆ្លងព្រំដែនឡើយ។
លោកបានថ្លែងថា “ខ្ញុំសូមបដិសេធការដែលថា មន្ត្រីនគរបាលរបស់យើងបានអនុញ្ញាតឲ្យជនជាតិវៀតណាមឆ្លងចូលប្រទេសកម្ពុជា ហើយកាប់ឈើក្នុងព្រៃនៃខេត្តមណ្ឌល គិរី ប៉ុន្តែ ពួកគេប្រហែលជាចូលប្រទេសកម្ពុជា តាមរយៈប៉ុស្តិ៍ត្រួតពិនិត្យមួយចំនួនក្រៅម៉ោងល្បាតរបស់មន្ត្រីនគរបាលយើង”។
គ្រាន់តែក្នុងខែមុនប៉ុណ្ណោះ ជនជាតិវៀតណាម៥នាក់ត្រូវបានចាប់ខ្លួនក្នុងស្រុកកោះញែកជាមួយឈើប្រណីតមួយចំនួនធំ បន្ទាប់ពីឆ្លងចូលទឹកដីកម្ពុជាដោយខុសច្បាប់។ កាលពីខែកុម្ភៈ ជនជាតិវៀតណាម៤នាក់ដែលត្រូវបានចាប់ខ្លួន ខណៈពេលព្យាយាមដឹកឈើប្រភេទលេខ១ចេញពីស្រុកកោះញែកបាននិយាយថា មន្ត្រីនគរបាលកម្ពុជាម្នាក់ដែលឈរជើងនៅព្រំដែនបានសម្របសម្រួលការចូលរបស់ពួកគេ។
លោក សុខ រដ្ឋា អ្នកសម្របសម្រួលរបស់អង្គការសិទ្ធិមនុស្សអាដហុកប្រចាំខេត្តនេះបានលើកឡើងកាលពីម្សិលមិញថា អ្នកភូមិនៅស្រុកកោះញែក បានឃាត់ខ្លួនអ្នកកាប់ឈើជាជនបរទេសដោយខ្លួនឯង ហើយប្រគល់ទៅឲ្យនគរបាល។ លោកបានថ្លែងថា ការផ្តល់អំណោយពីខេត្តឆ្លងព្រំដែននេះអាចធ្វើឲ្យនគរបាលមូលដ្ឋានមិនដាក់ទោសជនល្មើស។
លោកបានថ្លែងថា “យើងមិនដឹងច្បាស់ថា ការជួយសាងសង់ប៉ុស្តិ៍នគរបាលនេះនឹងបង្កលក្ខណៈងាយស្រួលដល់ជនជាតិវៀតណាមកាប់ឈើដោយសេរី ឬយ៉ាងណានោះឡើយ ប៉ុន្តែ ខ្ញុំគិតថា នេះគឺជាចំណុចខ្សោយរបស់អាជ្ញាធរយើង។ នៅពេលពួកគេទទួលបានអំណោយ ពួកគេមានការយោគយល់។ ប្រសិនបើពួកគេចាប់បានជនជាតិវៀតណាម មួយចំនួនដែលកាប់ឈើក្នុងប្រទេសកម្ពុជា ពួកគេនឹងគ្រាន់តែបញ្ជូនទៅវិញឬ?៕សារុន