កាលពីម្សិលមិញ លោកនាយករដ្ឋមន្ត្រី ហ៊ុន សែន បានបន្តការកែប្រែដោយផ្ទាល់ចំពោះច្បាប់ចរាចរណ៍ផ្លូវគោកដែលទើបអនុវត្តនៅពេលថ្មីៗ ដោយបានប្រកាសថា អ្នកបើកបរម៉ូតូដែលមានកម្លាំងចាប់ពី១២៥CC ចុះក្រោម មិនចាំបាច់មានប័ណ្ណបើកបរទេ។
លោកនាយករដ្ឋមន្ត្រីបានពន្យល់ក្នុងការបង្ហោះហ្វេសប៊ុកនៅពេលល្ងាចម្សិលមិញថា សេចក្តីសម្រេចេនះគឺឆ្លើយតបទៅនឹងសំណូមពរពី “ជនរួមជាតិ ជាពិសេសយុវជននិងសិស្សានុសិស្ស” អំពីតម្លៃក្នុងការទទួលបានប័ណ្ណបើកបរ។
សេចក្តីប្រកាសបាននិយាយថា ក្រោយពីការពិភាក្សាជាមួយលោក ស ខេង រដ្ឋមន្ត្រីក្រសួងមហាផ្ទៃ លោក អូន ព័ន្ធមុនីរ័ត្ន រដ្ឋមន្ត្រីក្រសួងហិរញ្ញវត្ថុ និងលោក ត្រាំ អីុវតឹក រដ្ឋមន្ត្រីក្រសួងដឹកជញ្ជូន លោក ហ៊ុន សែន បានសម្រេច ”បញ្ឈប់ទាំងស្រុងនូវការតម្រូវឲ្យមានប័ណ្ណបើកបរម៉ូតូចាប់ពីកម្លាំង១២៥CCចុះក្រោម ចាប់ពីពេលនេះតទៅ”។
“ដូច្នេះប្រជាពលរដ្ឋដែលបើកបរម៉ូតូមានកម្លាំងចាប់ពី១២៥CC ចុះក្រោម គឺមិនចាំបាច់បង់លុយថ្លៃធ្វើប័ណ្ណបើកបរ និងមិនចាំបាច់មានប័ណ្ណបើកបរឡើយ”។
លោក ហ៊ុន សែន បន្ថែមក្នុងការបង្ហោះនោះថា លោកនឹងស្នើទៅអង្គការនីតិប្បញ្ញត្តិពាក់ព័ន្ធដើម្បីធ្វើវិសោធនកម្មច្បាប់ចរាចរណ៍ផ្លូវគោកថ្មីនេះ ដែលនគរបាលបានចាប់ផ្តើមអនុវត្តកាលពីថ្ងៃទី១ ខែមករា ជា “កាដូដល់បងប្អូនជនរួមជាតិទាំងអស់នៅថ្ងៃខួប ៧មករា ២០១៦នេះ”។
ថ្លែងនៅពិធីសម្ពោធដាក់ឲ្យប្រើប្រាស់ស្ពានអាកាស ៥មករា ក្នុងក្រុងភ្នំពេញកាលពីថ្ងៃអង្គារ លោក ហ៊ុន សែន បានអំពាវនាវឲ្យមានការអំណត់ពីអ្នកដែលបានរិះគន់ច្បាប់នេះដោយលោកបានប្រកាសថា តម្លៃក្នុងការទទួលបានប័ណ្ណបើកបរ ត្រូវបានបន្ថយពីតម្លៃ៧៤.០០០រៀលមកត្រឹម២៥.០០០រៀល។
ក្នុងការថ្លែងនោះដែរ លោក ហ៊ុន សែន បានមានប្រសាសន៍ថា លោកនឹងលុបចោលការតម្រូវឲ្យមានការប្រឡងបើកបរចំពោះម៉ូតូម៉ាស៊ីនធុនតូច ព្រោះ “មិនចាំបាច់រៀនបើកបរម៉ូតូទេ ដោយហេតុថា ការបើកបរម៉ូតូមិនពិបាកឡើយ”។
ច្បាប់ចរាចរណ៍ថ្មីនេះ ដែលតម្រូវឲ្យអ្នកដំណើរពាក់មួកសុវត្ថិភាព និងកម្រិតចំនួនអ្នករួមដំណើរបានត្រឹមតែមនុស្សចាស់ម្នាក់និងក្មេងម្នាក់ បានចាប់ផ្តើមទាំងមិនរលូន ដោយការពិន័យបង្ខំខុសប្រក្រតី ហើយហាក់ដូចជាខ្វះទំនាក់ទំនងគ្នាក្នុងចំណោមមន្ត្រី។
មុនការថ្លែងរបស់លោក ហ៊ុន សែន កាលពីម្សិលមិញ លោក រុន រ័ត្នវាសនា ប្រធាននាយកដ្ឋានសណ្តាប់ធ្នាប់នៃអគ្គស្នងការដ្ឋាននគរបាលជាតិបានមានប្រសាសន៍ថា នគរបាលនៅទូទាំងប្រទេសបានទទួលបញ្ជាឲ្យឈប់ពិន័យយានយន្តជាបណ្តោះអាសន្នចំពោះការខ្វះឯកសារដូចជា កាតគ្រី ឯកសារពិនិត្យរថយន្ត និងប័ណ្ណបើកបរជាដើម ដែលតម្រូវដោយច្បាប់ថ្មីនេះ។
លោកបានមានប្រសាសន៍ថា ”បញ្ជាពីថ្នាក់ដឹកនាំ គឺឲ្យ [យើង] ផ្អាកជាបណ្តោះអាសន្ននូវការពិន័យអ្នកបើកបរ ប៉ុន្តែ មិនមានន័យថា យើងឈប់ពិនិត្យនៅតាមតំបន់គោលដៅនោះទេ”។ លោកបានបន្ថែមថា អ្នកបើកបររថយន្តនៅតែទទួលការណែនាំដើម្បីបានឯកសារទាំងនោះ។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជា បានមានប្រសាសន៍ថា ការសម្រេចលើកលែងការប្រឡងបើកបរ មិនបាច់និយាយដល់ប័ណ្ណបើកបរទេ គឺជាការអនុវត្តដ៏គ្រោះថ្នាក់ ដោយមិនគិតអំពីកម្លាំងម៉ាស៊ីន។
លោកបានមានប្រសាសន៍ថា “ប្រសិនបើយើងនិយាយអំពីវិធានការសុវត្ថិភាព វាមិនមែនជាគំនិតល្អទាល់តែសោះ។ យើងគួរផ្តល់ការបង្ហាត់បង្រៀនខ្លះអំពីជំនាញបើកបរសំខាន់ៗមុនពេលយើងឲ្យប័ណ្ណបើកបរម៉ូតូទៅពួកគេ”។
អង្គការសិទ្ធិមនុស្សអាដហុកបានចេញសេចក្តីថ្លែងការណ៍មួយកាលពីម្សិលមិញ មុនពេលសារហ្វេសបុ៊ករបស់លោក ហ៊ុន សែន បង្ហោះ ដោយអំពាវនាវឲ្យរដ្ឋាភិបាលពន្យារពេលការចេញប័ណ្ណបើកបររយៈពេល៦ខែឬមួយឆ្នាំ ដើម្បីឲ្យប្រជាពលរដ្ឋមានពេលស្វែងយល់ពីច្បាប់នេះ និងប្រឡងបើកបរ”ដើម្បីឲ្យប័ណ្ណបើកបរមានប្រសិទ្ធភាព”។
សេចក្តីថ្លែងការណ៍បាននិយាយថា “ការចេញប័ណ្ណបើកបរគួរតម្រូវឲ្យអ្នកបើកបរមានចំណេះដឹងអំពីច្បាប់ចរាចរណ៍ និងរៀនបើកបរដោយប្រើច្បាប់នេះ។ បើពុំដូច្នោះទេ ការចេញប័ណ្ណបើកបរគឺគ្មានតម្លៃ ហើយ…យើងនឹងមិនអាចបង្ការ និងកាត់បន្ថយគ្រោះថ្នាក់ចរាចរណ៍បានទេ”៕និត (រាយការណ៍បន្ថែមដោយ Taylor O’Connell)