អ្នកជំនាញខាងវេជ្ជសាស្ត្រមួយរូបប្រចាំការនៅសាលាដំបូងរាជធានីភ្នំពេញ ដែលបានកំណត់ថា ការគាំងបេះដូងក្នុងពេលដំណាលគ្នាបានផ្ដាច់ជីវិតវេជ្ជបណ្ឌិតជនជាតិកូរ៉េខាងជើងពីរនាក់ក្នុងខណ្ឌទួលគោកកាលពីសប្ដាហ៍មុន បានផ្អែកការសន្និដ្ឋានរបស់ខ្លួនទាំងស្រុងទៅលើសក្ខីកម្មផ្ដល់ដោយប្រពន្ធរបស់ជនរងគ្រោះដែលបានស្នើសុំកុំឲ្យធ្វើកោសល្យវិច័យ ឬធ្វើតេស្តឈាម។
ជនរងគ្រោះ អាន ហ្យុន ចាង (An Hyon Chang) អាយុ៥៦ឆ្នាំ និង រី មុញ ចូល (Ri Muhn Chol) អាយុ៥០ឆ្នាំ បានស្លាប់មុនក្រោយគ្នាតែប៉ុន្មានវិនាទីប៉ុណ្ណោះនៅវេលាជិតរំលងអធ្រាត្រឈានចូលព្រឹកថ្ងៃសុក្រ នៅគ្លីនិកតូចមួយកន្លែងក្នុងសង្កាត់បឹងកក់២ ជាកន្លែងដែលពួកគេធ្វើការ និងរស់នៅជាមួយប្រពន្ធរបស់ខ្លួនដែលជាវេជ្ជបណ្ឌិតដូចគ្នា នេះបើយោងតាមការលើកឡើងរបស់លោក គឹម ចាន់ថូ នាយរងប៉ុស្តិ៍នគរបាលសង្កាត់។
ដោយដកស្រង់សម្ដីរបស់លោក នង សុវណ្ណារ័ត្ន ដែលជាវេជ្ជបណ្ឌិតប្រចាំនៅតុលាការ លោកថ្លែអថា បុរសទាំងពីរបានស្លាប់ ដោយសារជំងឺគាំងបេះដូង បន្ទាប់ពីប្រពន្ធរបស់ខ្លួនចាក់សេរ៉ូមផលិតក្នុងស្រុកដើម្បីបំបាត់ការឈឺចុកចាប់ និងជំងឺគ្រុនក្ដៅក្រោយ ពីផឹកស៊ីជោកជាំរយៈពេលពីរថ្ងៃជាប់ៗគ្នា។
លោកលើកឡើងថា ប្រពន្ធជនរងគ្រោះមិនបានរាយការណ៍អំពីការស្លាប់របស់ប្ដីខ្លួនរហូតដល់ពេលថ្ងៃត្រង់កាលពីថ្ងៃសៅរ៍ ពោលគឺរយៈពេលប្រមាណ១២ម៉ោងបន្ទាប់ពីជនរងគ្រោះស្លាប់។ លោកក៏ជឿដែរថា បុរសជនជាតិកូរ៉េខាងជើងទាំងពីរនាក់នេះស្លាប់ដោយសារជំងឺគាំងបេះដូង ទោះបីជាមានការប្រើប្រាស់គ្រឿងស្រវឹង និងសេរ៉ូមដោយអាថ៌កំបាំងក្ដី ដោយមិននិយាយអំពីស្នាមក្រចកឃើញនៅលើទ្រូងរបស់ជនរងគ្រោះក្តី។
លោកមានប្រសាសន៍កាលពីថ្ងៃអង្គារថា “ជនរងគ្រោះស្លាប់ដោយសារសុខភាពខ្សោយ ហើយពួកគេក៏មានជំងឺបេះដូងដែរ។ យើងមិនដឹងថា ហេតុអ្វីបានជាជនរងគ្រោះមានស្នាមក្រចៅនៅលើទ្រូង និងក្បាលពោះរបស់ខ្លួនទេ។ យើងមិនដឹងថា ថ្នាំដែលពួកគេប្រាប់ឲ្យប្រពន្ធរបស់ខ្លួនចាក់ឲ្យខ្លួនគឺជាថ្នាំអ្វីទេ”។
លោក គឹម ចាន់ថូ មានប្រសាសន៍ថា ក្រៅពីការពិគ្រោះជាមួយវេជ្ជបណ្ឌិតប្រចាំតុលាការ នគរបាលសង្កាត់ជាអ្នកទទួលស៊ើបអង្កេតតាំងពីដើមដល់ចប់ ហើយបានបិទសំណុំរឿងនេះកាលពីចុងសប្ដាហ៍កន្លងទៅ។
វេជ្ជបណ្ឌិត នង សុវណ្ណារ័ត្ន បានលើកឡើងក្នុងបទសម្ភាសមួយកាលពីម្សិលមិញថា ប្រពន្ធជនរងគ្រោះ ស៊ីម យ៉ុង ហ្យេ (Sim Yong Hye) អាយុ៥៥ឆ្នាំ និង ចាំង ហ្យេ យ៉ុន (Jaing Hye Ryon) អាយុ៤៦ឆ្នាំ បានប្រាប់លោកថា ថ្នាំដែលចាក់នោះមានលាយវីតាមីន និងថ្នាំទឹកស្រដៀងសេរ៉ូមដែលគេនិយមប្រើប្រាស់ទូទៅពេញប្រទេសកម្ពុជា សម្រាប់ព្យាបាលការខ្សោះជាតិទឹក ការអស់កម្លាំង និងជំងឺធ្ងន់ផ្សេងៗទៀត។
លោកបានបន្តថា “ពួកគាត់សុទ្ធតែជាវេជ្ជបណ្ឌិត ហើយគួរតែទៅមន្ទីរពេទ្យ ប៉ុន្តែពួកគាត់សម្រេចចិត្តមិនទៅដោយសារតែខ្លួនជាវេជ្ជបណ្ឌិត។ ពួកគាត់គិតថាអាចព្យាបាលដោយខ្លួនឯងបាន”។
វេជ្ជបណ្ឌិតរូបនេះថ្លែងថា ការសន្និដ្ឋានរបស់លោកថាបុរសទាំងពីរនាក់ស្លាប់ដោយសារជំងឺគាំងបេះដូងក្នុងពេលដំណាលគ្នា គឺផ្អែកទាំងស្រុងលើអ្វីដែលស្ត្រីទាំងពីរបានប្រាប់លោក ហើយថា លោកគ្មានបរិក្ខារពេទ្យសម្រាប់បញ្ជាក់ការអះអាងរបស់ពួកគេដោយឯករាជ្យទេ។”នោះសុទ្ធតែជាអ្វីដែលស្ត្រីជាប្រពន្ធបានរាយការណ៍ប្រាប់ខ្ញុំ។ នៅកម្ពុជា គ្មានឧបករណ៍ធ្វើកោសល្យវិច័យដូចនៅក្នុងបណ្ដាប្រទេសផ្សេងទៀតទេ”។
វេជ្ជបណ្ឌិត ស៊ីម យ៉ុង ហ្យេ និងវេជ្ជបណ្ឌិត ចាំង ហ្យេ យ៉ុន មិនអាចទាក់ទងបានទេនៅសប្ដាហ៍នេះ ហើយគ្លីនិកត្រូវបានបិទទ្វារចាប់តាំងពីការស្លាប់នេះមក។
ដោយការពារសេចក្ដីសម្រេចបិទសំណុំរឿងនេះ លោក គឹម ចាន់ថូ បានបើកថតតុនៅប៉ុស្តិ៍នគរបាលសង្កាត់កាលពីថ្ងៃអង្គារ ហើយបានធ្វើឯកសារមួយច្បាប់ដែលចុះហត្ថលេខា និងផ្ដិតមេដៃដោយប្រពន្ធជនរងគ្រោះ ស្នើសុំឲ្យអាជ្ញាធរបញ្ឈប់ការស៊ើបអង្កេតសំណុំរឿងនេះ។
លិខិតសរសេរដោយដៃជាភាសាខ្មែរ ដែលចុះហត្ថលេខាដោយវេជ្ជបណ្ឌិត ស៊ីម យ៉ុង ហ្យេ និងវេជ្ជបណ្ឌិត ចាំង ហ្យេ យ៉ុន និងដែលអនុម័តដោយមន្ត្រីស្ថានទូតកូរ៉េខាងជើងនេះ ស្នើសុំឲ្យនគរបាលចៀសវាងការធ្វើកោសល្យវិច័យគ្រប់ប្រភេទ ហើយបញ្ជាក់ថា ស្ត្រីទាំងនេះនឹងមិនបន្តបណ្ដឹងផ្លូវច្បាប់ទេ។
លិខិតចុះថ្ងៃសៅរ៍នេះមានខ្លឹមសារថា “យើងសូមស្នើទៅអាជ្ញាធរដោយមានមន្ត្រីស្ថានទូតកូរ៉េខាងជើងជាសាក្សី ឲ្យពួកគេទទួលស្គាល់ថា ប្ដីរបស់យើងពិតជាស្លាប់ដោយសារជំងឺគាំងបេះដូងមែន។ មិនចាំបាច់ធ្វើការវះកាត់ពិនិត្យសាកសពទេ ហើយក៏មិនចាំបាច់ធ្វើតេស្តឈាមដែរ។ យើងស្នើសុំយកសាកសពទៅធ្វើបុណ្យតាមប្រពៃណីដែលពាក់ព័ន្ធការបូជា”។
ពេលសម្ភាសនៅសប្ដាហ៍នេះ អ្នកជិតខាងបាននិយាយថា ប្ដីប្រពន្ធជនជាតិកូរ៉េខាងជើងទាំងនេះរួសរាយរាក់ទាក់។ ពួកគេនិយាយថា គ្លីនិកដែលមានតែស្លាកយីហោតូចមួយសរសេរជាភាសាខ្មែរ កូរ៉េ និងអង់គ្លេស នេះ មានតែអ្នកជំងឺជនជាតិកូរ៉េ ប៉ុណ្ណោះដែលទៅទទួលការព្យាបាលនៅទីនោះ។
កញ្ញា លីម រស្មី អាយុ១៩ឆ្នាំ ជានិស្សិតសាកលវិទ្យាល័យដែលគ្រួសាររបស់នាងរស់នៅជាប់គ្លីនិកនោះ បាននិយាយកាលពីថ្ងៃអង្គារថា “ពួកគាត់ចិត្តល្អ ហើយរួសរាយណាស់” ហើយនាងបានឮសំឡេងស្រែកពីខាងក្នុងគ្លីនិកកាលពីយប់ថ្ងៃសុក្រ។
កញ្ញានិយាយទៀតថា ”ខ្ញុំបានឮសំឡេងយំដោយការឈឺចាប់នៅវេលាប្រហែលពាក់កណ្ដាលយប់ ប៉ុន្តែខ្ញុំមិនដឹងថា ពួកគាត់ស្លាប់ទេ”។ ហើយការស្លាប់នេះបានធ្វើឲ្យប្រជាពលរដ្ឋប៉ាន់ស្មានថា អាចមកពីមូលហេតុផ្សេងៗ។ កញ្ញាបានលើកឡើងបន្តទៀតថា “អ្នកគ្រប់គ្នាមានការងឿងឆ្ងល់ បន្ទាប់ពីគ្រោះថ្នាក់នេះ ហេតុអីបានជាពួកគាត់ស្លាប់? បើវាជាជំងឺគាំងបេះដូង ហេតុអីមនុស្សពីរនាក់ស្លាប់ក្នុងពេលតែមួយ?”៕ សុខុម