ការសិក្សាថ្មីដោយវិទ្យាស្ថានជាតិសុខាភិ បាល(NIH)សហរដ្ឋអាមេរិកបានបញ្ជាក់ថា មានភាពស៊ាំកើនឡើងចំពោះថ្នាំមួយប្រភេទ ក្នុងចំណោមថ្នាំសំខាន់ៗដែលត្រូវបានប្រើដើម្បីប្រយុទ្ធនឹងជំងឺគ្រុនចាញ់ក្នុងប្រទេសកម្ពុជា ជាស្ថានភាពមួយទំនងកាន់តែធ្ងន់ធ្ងរទៅ ហើយដែលអាចឈានទៅរកករណីកើតជំងឺគ្រុនចាញ់កើនឡើងក្នុងរយៈពេលប៉ុន្មានឆ្នាំខាងមុខនេះ។
បុគ្គលិកសុខាភិបាលបានរកឃើញភាពស៊ាំរបស់ប៉ារ៉ាស៊ីតដែលកើតឡើងដោយសារសត្វមូសដំបូង ចំពោះថ្នាំ Artemisinin ក្នុងការព្យាបាលផ្សំចូលគ្នាដោយផ្អែកលើថ្នាំ Artemisininដែលត្រូវបានប្រើជាថ្នាំការពារដ៏សំខាន់ប្រយុទ្ធនឹងជំងឺគ្រុនចាញ់ក្នុងឆ្នាំ២០០៧ នៅតាមបណ្ដោយព្រំដែនកម្ពុជា-ថៃ ជាសញ្ញាដំបូងនៃការបរាជ័យរបស់ខ្លួនគ្រប់ទីកន្លែងក្នុងពិភពលោក។
ការសិក្សាថ្មីដោយវិទ្យាស្ថានជំងឺឆ្លង និងអាឡែហ្ស៊ីរបស់វិទ្យាស្ថានជាតិសុខាភិបាលបានចេញផ្សាយកាលពីសប្ដាហ៍មុន ដោយ The Lancet អះអាងថា ភាពស៊ាំចំពោះថ្នាំដ៏សំខាន់មួយទៀតដែលត្រូវបានប្រើនៅក្នុងការព្យាបាលផ្សំចូលគ្នាគឺថ្នាំ Piperaquine។
វិទ្យាស្ថានជាតិសុខាភិបាលនេះបានលើកឡើងនៅក្នុងសេចក្ដីថ្លែងការណ៍មួយស្ដីអំពីការសិក្សានេះថា ”ភាពស៊ាំចំពោះថ្នាំ Artemisinin នៅក្នុងផ្នែកមួយចំនួននៃតំបន់អាស៊ីអាគ្នេយ៍ក៏ត្រូវបានកត់ត្រាយ៉ាងល្អផងដែរ ប៉ុន្តែរហូតមកទល់ពេលនេះ ការសិក្សាតែពីរបីលើកប៉ុណ្ណោះ បានបង្ហាញភ័ស្តុតាងច្បាស់លាស់ពីភាពស៊ាំនៃការប្រើថ្នាំ Piperaquine”។
ក្រុមអ្នកស្រាវជ្រាវបានសិក្សាអំពីវត្តមាននៃមេរោគជំងឺគ្រុនចាញ់ដែលបណ្ដាលឲ្យស្លាប់ គឺបា៉ារ៉ាស៊ីតគ្រុនចាញ់ Falciparum ទៅលើអ្នកជំងឺដែលឆ្លងជំងឺនេះចំនួន២០៤នាក់ ដែលមានអាយុចាប់ពី២ឆ្នាំដល់៦៥ឆ្នាំ បន្ទាប់ពីពួកគេបានទទួលការព្យាបាលដោយប្រើថ្នាំ Dihydroartemisinin និង Piperaquine ក្នុងខេត្តរតនគិរី ព្រះវិហារ និងខេត្តពោធិ៍សាត់ក្នុងរយៈពេល៦៣ថ្ងៃ។
នៅក្នុងខេត្តពីរចុងក្រោយដែលការផ្សំចូលគ្នានូវថ្នាំទាំងពីរមុខនេះប្រើប្រាស់មិនសូវបានល្អនោះ វិទ្យាស្ថានជាតិសុខាភិបាលបានលើកឡើងថា ការធ្វើតេស្តរបស់មន្ទីរពិសោធន៍បានបង្ហាញថា “ភាពស៊ាំនៃថ្នាំ Artemisinin និង Piperaquine ជាចំណែកនៃការបរាជ័យចំពោះការព្យាបាល”។
លោក Didier Menard ដែលជាប្រធានផ្នែកជំងឺគ្រុនចាញ់នៅវិទ្យាស្ថានប៉ាស្ទ័រក្នុងរាជធានីភ្នំពេញ បានមានប្រសាសន៍ថា ក្នុងការព្យាបាលដោយការផ្សំចូលគ្នាដូចអ្វីដែលបានសិក្សា គឺថ្នាំ Artemisinin បាន ផ្ដល់នូវការបរាជ័តបឋមប្រឆាំងនឹងជំងឺគ្រុនចាញ់ ដោយអាចកម្ចាត់បានប៉ារា៉ស៊ីតភាគច្រើន ចំណែកថ្នាំមួយប្រភេទទៀតជាដៃគូកម្ចាត់បានអ្វីដែលនៅសេសសល់។ ការបាត់បង់ប្រសិទ្ធភាពថ្នាំទាំងពីរមុខនៅក្នុងប្រទេសកម្ពុជាភាគខាងលិចនេះ គឺជាដំណើរថយក្រោយដ៏ធ្ងន់ធ្ងរចំពោះការប្រយុទ្ធនឹងជំងឺនេះនៅក្នុងប្រទេសកម្ពុជា។
លោក Menard បានថ្លែងថា បុគ្គលិកសុខាភិបាលបានកត់សម្គាល់ឃើញពីភាពស៊ាំលើកដំបូងចំពោះការប្រើប្រាស់ថ្នាំផ្សំចូលគ្នានេះក្នុងឆ្នាំ២០១១ក្នុងខេត្តប៉ៃលិន ចំពោះ ថ្នាំ Artemisinin។ លោកបានថ្លែងថា “ឥឡូវនេះយើងឃើញ ភាពស៊ាំចំពោះថ្នាំជាដៃគូនេះ គឺថ្នាំ Piperaquine។ វាជាព័ត៌មានមិនល្អ ពីព្រោះ…យើងមិនមានការព្យាបាលថ្មីដែលល្អឡើយ”។
លោក Menard បានចង្អុលបង្ហាញថា ការប្រើប្រាស់ថ្នាំផ្សំចូលគ្នានេះមិនទាន់ជាការបរាជ័យចំពោះការព្យាបាលអ្នកជំងឺដែលកើតជំងឺគ្រុនចាញ់នៅឡើយទេ។ ប៉ុន្តែវាត្រូវការពេលវេលាច្រើនទៀត ដែលក្នុងនោះបង្ហាញ ថា វាកាន់តែចុះខ្សោយទៅៗ។ លោកបានថ្លែងថា និន្នាការនេះទំនងជាកាន់តែធ្ងន់ធ្ងរទៅ។ បើទោះជាមានភាពស៊ាំកើនឡើងចំពោះ ការប្រើប្រាស់ថ្នាំ Piperaquine ដែលទំនងជាមិនបង្កឲ្យមានករណីស្លាប់កើនឡើងក៏ដោយ ក៏ចំនួនសរុបនៃករណីកើតជំងឺគ្រុនចាញ់”ទំនងជាកើនឡើងដែរ”។
តួលេខសរុបនៃករណីកើតជំងឺគ្រុនចាញ់ក្នុងឆ្នាំ២០១៥មិនទាន់មាននៅឡើយទេ។ ប៉ុន្តែបើតាមមជ្ឈមណ្ឌលជាតិប្រយុទ្ធនឹងជំងឺគ្រុនចាញ់របស់រដ្ឋាភិបាល ប្រទេសកម្ពុជាមានករណីកើតជំងឺគ្រុនចាញ់៤១.០០០ករណីក្នុងរយៈពេល៩ខែដំបូងនៃឆ្នាំមុន គឺកើនឡើង២៥.០០០ករណីបើប្រៀបធៀបទៅនឹងរយៈពេលដូចគ្នានេះកាលពីឆ្នាំមុន។
ទោះជាយ៉ាងណា ការសិក្សាថ្មីបំផុតនេះមិនមែនជាព័ត៌មានអាក្រក់ទាំងអស់ទេ។ ក្រុមអ្នកស្រាវជ្រាវបានរកឃើញថា បា៉ារ៉ាស៊ីត ដូចគ្នាដែលស៊ាំនឹងថ្នាំ Piperaquine បង្ហាញថា វាងាយនឹងកើនឡើងចំពោះថ្នាំជាដៃគូមួយប្រភេទទៀតគឺ Mefloquine។ ពួកគេបាននិយាយថា ការផ្សំចូលគ្នានៃថ្នាំ Artemisinin និង Mefloquine ប្រហែលជាការបញ្ចូលគ្នាដ៏ប្រសើរនៅក្នុងតំបន់នានានៃប្រទេសកម្ពុជា ទីដែលការប្រើប្រាស់ថ្នាំ Artemisinin និង Piperaquine មិនបានផលនោះ។
លោក Menard បានលើកឡើងថា រដ្ឋាភិបាលបានធ្វើការសន្និដ្ឋានដូចគ្នានេះក្នុងឆ្នាំ២០១៤ ហើយបានធ្វើការផ្សំចូលគ្នាជាមួយថ្នាំ Mefloquine ក្នុងការព្យាបាលដំបូងក្នុងខេត្តបាត់ដំបង ឧត្ដរមានជ័យ ប៉ៃលិន និងខេត្តពោធិ៍សាត់។
លោកបានបន្ថែមថា “ប៉ុន្តែវាមានតែនៅលើក្រដាសប៉ុណ្ណោះ” ដោយលោកកត់សម្គាល់ ថា កង្វះការចាប់អារម្មណ៍ដំបូងពីសំណាក់ក្រុមហ៊ុនផ្គត់ផ្គង់ឥណ្ឌាក្នុងការបំពេញតាមការបញ្ជាទិញក្នុងចំនួនតិចតួចដូចជាប្រទេសកម្ពុជា បានពន្យារដល់ការផ្ដល់ថ្នាំទាំងនេះ។
លោក Menard បានថ្លែងថា លោកមិនច្បាស់ថាតើថ្នាំ Mefloquine បានមកដល់ហើយឬនៅទេ។ មជ្ឈមណ្ឌលជាតិប្រយុទ្ធនឹងជំងឺគ្រុនចាញ់មិនអាចទាក់ទងសុំការអត្ថាធិប្បាយបានទេ។
ប៉ុន្តែសូម្បីមានថ្នាំ Mefloquine នឹងជាដំណោះស្រាយបណ្ដោះអាសន្នតែប៉ុណ្ណោះសម្រាប់ប្រទេសកម្ពុជា។ ជំងឺគ្រុនចាញ់មានភាពស៊ាំចំពោះថ្នាំនេះក្នុងផ្នែកមួយចំនួននៃប្រទេសកម្ពុជាពីមុនមក៕ សារុន