31 C
Phnom Penh

នាយក​រដ្ឋ​មន្ត្រី​​​៖ ​រដ្ឋាភិបាល​នឹង​​លុប​ចោល​ការ​បង់​ប្រាក់​​នៅ​​​ផ្លូវ​ជាតិ​លេខ៤

ដោយ ឌឹ ខេមបូឌា ដេលី

បទវិភាគ

បុគ្គលិក​នៅ​បញ្ជរ​​​​បង់​ប្រាក់​​​ ប្រមូល​ថ្លៃ​​សេវា​សម្រាប់​ការ​​​ប្រើ​ប្រាស់​ផ្លូវ​​​​​ជាតិ​លេខ​៤ ​កាលពី​ម្សិលមិញ។ រដ្ឋាភិបាល​​​​​បាន​​​បញ្ជា​ឲ្យ​ក្រុម​ហ៊ុន​ AZ ឈប់​​យក​ថ្លៃ​​​សេវា​ប្រើ​ប្រាស់​​ផ្លូវ​នេះ​​​​ចាប់​ពី​ថ្ងៃទី​​៧ ខែ​មករា​តទៅ​ ប៉ុន្តែ​ក្រុម​ហ៊ុន​មិនអនុវត្ត​តាម​។​​ រូបថតៈ Jens Welding Ollgaard/The Cambodia Daily
បុគ្គលិក​នៅ​បញ្ជរ​​​​បង់​ប្រាក់​​​ ប្រមូល​ថ្លៃ​​សេវា​សម្រាប់​ការ​​​ប្រើ​ប្រាស់​ផ្លូវ​​​​​ជាតិ​លេខ​៤ ​កាលពី​ម្សិលមិញ។ រដ្ឋាភិបាល​​​​​បាន​​​បញ្ជា​ឲ្យ​ក្រុម​ហ៊ុន​ AZ ឈប់​​យក​ថ្លៃ​​​សេវា​ប្រើ​ប្រាស់​​ផ្លូវ​នេះ​​​​ចាប់​ពី​ថ្ងៃទី​​៧ ខែ​មករា​តទៅ​ ប៉ុន្តែ​ក្រុម​ហ៊ុន​មិនអនុវត្ត​តាម​។​​ រូបថតៈ Jens Welding Ollgaard/The Cambodia Daily

លោក​នាយក​រដ្ឋ​មន្ត្រី ហ៊ុន សែន ​បាន​​ប្រកាស​កាលពី​ម្សិល​មិញ​ថា ​រដ្ឋាភិបាល​នឹង​លុប​ចោល​កិច្ច​សន្យា​​របស់​ខ្លួន​ជា​មួយ​ក្រុម​ហ៊ុន​ AZ Group of Companies ដែល​បាន​​​ប្រមូល​ប្រាក់​​​​​តាម​​បណ្ដោយ​ផ្លូវ​ជាតិ​លេខ៤ ​ចាប់​តាំង​ពី​ឆ្នាំ​២០០២មក។ ថ្លែង​នៅ​​ឯរដ្ឋ​សភា​ក្នុង​រាជ​​ធានី​​ភ្នំ​ពេញ លោក ហ៊ុន សែន បាន​លើក​ឡើង​ថា ​រដ្ឋមន្ត្រី​ក្រសួង​សាធារណការ និង​រដ្ឋ​មន្ត្រី​ក្រសួង​​​​សេដ្ឋ​កិច្ច​នឹង​​ត្រៀម​ឯក​សារ​ឱ្យ​លោក​ចុះ​ហត្ថ​លេខា​​​​ក្នុង​ពេល​ឆាប់ៗ​នេះ​​ដើម្បី​លុប​ចោល​កិច្ច​សន្យា។

លោក​នាយក​រដ្ឋ​មន្ត្រី​មាន​ប្រសាសន៍​ថា “ពិត​មែន​តែ​សេចក្តី​សម្រេច​នេះមិន​ទាន់​បាន​ចុះ​ហត្ថលេខា ក៏​ប៉ុន្តែ​ក្នុង​ឋានៈ​ជា​ប្រមុខនៃ​រាជរដ្ឋាភិបាល ខ្ញុំ​អាច​ប្រកាស​​ជូនជា​មុន​ថា ចាប់​ពីម៉ោង ១២ យប់​យប់នេះ នឹង​មិន​ចាំ​បាច់​​បង់​ប្រាក់អ្វីទាំងអស់​សម្រាប់​ការ​ធ្វើ​ដំណើរ​នៅតាម​ផ្លូវ​ជាតិលេខ៤”។

លោក​​​លើក​​ឡើង​​ទៀត​ថា ​កាល​​ពី​ថ្ងៃ​ទី​៥ ខែ​​មករា ​លោក​បាន​បញ្ជា​ឱ្យ​​ក្រុម​​ហ៊ុន​ AZ ឈប់​​យក​ថ្លៃ​​​ពី​​​​អ្នក​បើក​បរ​រថ​យន្ត​​សម្រាប់​ការ​​ប្រើ​ប្រាស់​ផ្លូវ​ដែល​តភ្ជាប់​រាជ​ធានី​ភ្នំ​ពេញ ទៅ​​ក្រុង​​​ព្រះ​សីហនុ​នេះ ដោយ​ចាប់​​ផ្ដើម​ពី​ថ្ងៃ​ទី​៧ ខែ​មករាតទៅ ប៉ុន្តែ​​​ក្រុម​ហ៊ុន​​មិន​បាន​អនុ​វត្ត​តាម​។ ​​លោក​​​បន្ត​​ថា “កាល​ពី​យប់​មិញ ​​ដោយសារខ្ញុំ​​បាន​ទទួល​នូវ​ព័ត៌​​មាន​ពាក់​ព័ន្ធ​ជា​មួយ​នឹង​ក្រុម​​ហ៊ុន​មិន​បាន​អនុវត្ត​ នូវអ្វី​​ដែល​​​ខ្ញុំ​បាន​ប្រកាស​ ​​ហើយ​​​នៅ​​ក្នុង​ស្រុកអង្គ​ស្នួល ​​នៅតែ​​មាន​ការ​បង់​ប្រាក់​ ខ្ញុំ​ក៏​បាន​ឱ្យ​ក្រុម​ចុះ​ទៅស្រាវ​​ជ្រាវ”។

លោក​​​​គូស​បញ្ជាក់​ថា ពេល​នេះ​រដ្ឋា​ភិបាល​​​នឹង​ថែទាំ​ផ្លូវ​នេះ​​ដោយ​ខ្លួន​ឯង។ លោកបក​​ស្រាយ​ថា “សូមមេត្តា​យោគយល់ថា នៅ​ពេល​​រដ្ឋ​ត្រូវ​គ្រប់​គ្រងខ្លួនឯង រដ្ឋ​ត្រូវ​ចំណាយ​ថវិកា​​​មួយ​ភាគ​ធំដើម្បី​ថែទាំ និង​ជួស​ជុល​ផ្លូវ​នេះ។ អញ្ចឹងទេច្បាស់ណាស់​ថា ការ​វិភាជន៍​ថវិកា​ទៅ​​​កាន់តំបន់ផ្សេង ​នឹងមានផល​ប៉ះពាល់​ហើយ”។

cam-photo-toll-road-jensលោក សុន​ ឆ័យ ​តំណាង​រាស្ត្រ​គណ​បក្ស​​ប្រឆាំង​​​ថ្លែង​​ថា លោក​ស្វាគមន៍​​កា​រ​ប្រកាស​របស់​​នាយក​រដ្ឋ​​មន្ត្រី។ “យើង​ដឹង​ថា ​ក្រុម​ហ៊ុន​​​​​ទទួល​បាន​កិច្ច​សន្យា​ដោយ​គ្មាន​តម្លា​ភាព​។ ក្រុម​​ហ៊ុន​បាន​​​ចំណាយ​ប្រាក់​តែ​បន្តិច​​បន្តួច​​ប៉ុណ្ណោះ ដែល​​មិននាំ​​​​អត្ថ​ប្រយោជន៍​គួរ​ឱ្យ​កត់​​សម្គាល់​​សម្រាប់​​ប្រ​ជា​​ពល​រដ្ឋ ដែល​បាន​​ត្អូញ​ត្អែរ​យ៉ាង​ច្រើន​ចំពោះ​ការ​បង់​ថ្លៃ​សម្រាប់​​ការ​ប្រើ​ប្រាស់​​ផ្លូវ​​នេះ​ទេ​”។

គួរ​រំឭក​ថា ​ក្រុម​ហ៊ុន​​ AZ ត្រូ​វ​បាន​បង្កើត​ឡើង​​​​​​ក្នុង​ឆ្នាំ​​១៩៩៣​ ដោយ​លោក អុឹង ប៊ុន​ហ៊ូវ ​អតីត​រដ្ឋ​លេខា​ធិការ​​ក្រសួង​សាធារណការ​មក​ពី​គណ​បក្ស​ប្រជាជន​កម្ពុជា ​ហើយ​ត្រូវ​បាន​គ្រប់​គ្រង​​ដោយ​លោក​ស្រី ហេង សុខា ភរិយា​របស់​លោក។

កាល​ពី​ខែ​មុន ​លោក​នាយក​រដ្ឋ​មន្ត្រី​​បាន​ប្រកាស​ថា ​រដ្ឋា​ភិបាល​​បាន​លុប​ចោល​​កិច្ច​សន្យា​​​​រយៈពេល៣០​ឆ្នាំ​ជា​មួយ​ក្រុម​ហ៊ុន​មួយ​ទៀត​​ឈ្មោះ Tollway ដែល​ប្រមូល​ប្រាក់​​​ពី​អ្នក​​​ដំណើរ​​​​ឆ្លង​កាត់​​​ផ្លូវ​វេង​ស្រេង ដែល​​សម្បូរ​ទៅ​​​ដោយ​​រោង​ចក្រ​​​ជា​ជួរ​​អម​សង​ខាង​ផ្លូវ​ ហើយ​​​​​ជំរុញ​ឱ្យ​​បណ្តា​រោង​ចក្រ​​ប្រើ​ប្រាស់​​ប្រាក់​ដែល​សន្សំ​​​បាន​​នេះ​​ដើម្បី​ធ្វើ​ឱ្យ​ជីវភាព​​រស់​នៅ​របស់​​កម្ម​ករ​កម្ម​ការិនី​ប្រសើរ​ឡើង​។ ​សូម​បញ្ជាក់​ថា ក្រុម​ហ៊ុន​​បាន​ចំណាយ​ប្រាក់​​​អស់​១០,៥លាន​ដុល្លារ​លើ​ការស្ថាបនា​ផ្លូវ​នេះ៕ សុខុម

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស