យោងតាមកងរាជអាវុធហត្ថបានឱ្យដឹងថា បុរសម្នាក់ក្នុងចំណោមបុរសជនជាតិតួកគីពីរនាក់ត្រូវបានចាប់ខ្លួនជុំវិញជម្លោះកាប់ចាក់គ្នានៅក្នុងក្រុងព្រះសីហនុកាលពីថ្ងៃច័ន្ទ មានប្រវត្តិជាឧក្រិដ្ឋជននៅក្នុងក្រុងមាត់សមុទ្រនេះ។ ទោះយ៉ាងណា បុរសជនជាតិតួកគីរូបនេះបានអះអាងកាលពីម្សិលមិញថា គាត់ត្រូវបានគេកំណត់អត្តសញ្ញាណខុស ហើយថា នគរបាល និងអ្នកយកព័ត៌មានបានឃុបឃិតជាមួយជនជាតិតួកគីម្នាក់ទៀតជាគូសត្រូវដើម្បីបង្ខូចកេរ្តិ៍ឈ្មោះរបស់គាត់។
កាលពីម្សិលមិញ មន្ត្រីកងរាជអាវុធហត្ថម្នាក់បានអះអាងកាលពីម្សិលមិញថា មេម៉េដ តេកូគ្លូ អាយុ៤០ឆ្នាំ ជាបុរសម្នាក់ដែលជាប់ពាក់ព័ន្ធនៅក្នុងជម្លោះដោយប្រើកាំបិតផ្គាក់ជាមួយ សឺហាត យ៉ាលស៊ីន អាយុ៣៤ឆ្នាំ ដែលបានកើតឡើងបន្ទាប់ពី តេកូគ្លូ បានបណ្តេញ យ៉ាលស៊ីន ចេញពីការងារនៅសណ្ឋាគារ Eos Oceanfront។ ផ្អែកតាមរូបភាពវីដេអូនៃហេតុការណ៍នេះដែលបានបង្ហោះតាមប្រព័ន្ធអីុនធឺណិត យ៉ាលស៊ីន ទំនងជាមនុស្សសំខាន់នៅក្នុងការប្រឈមមុខគ្នានេះ។ពីមុន នគរបាលបានកំណត់អត្តសញ្ញាណបុរសជនជាតិតួកគីទាំងពីរនាក់នេះតែនាមខ្លួនប៉ុណ្ណោះ។
លោក ហាស់ សាមឿន នាយការិយាល័យព័ត៌មាននិងសន្តិសុខនៃកងរាជអាវុធហត្ថខេត្តថ្លែងកាលពីម្សិលមិញបន្ទាប់ពីកំណត់អត្តសញ្ញាណ តេកូគ្លូ ថា “ជននេះមានប្រវត្តិមិនល្អ។ ជននេះជាប់ពាក់ព័ន្ធក្នុងករណីបាញ់បោះ និងការប្រើអំពើផ្សេងៗទៀត ហើយបុរសនេះជាមនុស្សម្នាក់ដែលបានព្យាយាមរត់គេចពីតុលាការដោយដៃជាប់ខ្នោះ”។
កាលពីខែមីនា ពេលមានបទឧក្រិដ្ឋដ៏ហិង្សាកើតឡើងជាច្រើននៅក្នុងក្រុងព្រះសីហនុ ពាក់ព័ន្ធជនបរទេសដែលនគរបាលចាត់ទុកថា ជា “ពួកម៉ាហ្វីយ៉ា” តេកូគ្លូ ត្រូវបានចោទប្រកាន់ពីបទប្រើអំពើហិង្សាដោយចេតនាដោយបានចាក់បុរសជនជាតិអីុស្រាអែលម្នាក់។ នគរបាលថា ការចាក់នេះជាការសងសឹករបស់ តេកូគ្លូ ដែលជាគោលដៅក្នុងការបាញ់ពីក្នុងរថយន្តមិនសម្រេចដែលបណ្ដាលឲ្យត្រូវចំជើងខ្មែរម្នាក់ឈរនៅក្បែរនោះ។
យោងតាមនគរបាលបានឱ្យដឹងថា បន្ទាប់ពី ជននេះត្រូវបានចោទប្រកាន់នៅសាលាដំបូងខេត្តព្រះសីហនុមក តេកូគ្លូ បានរត់គេចពីតុលាការ បន្ទាប់ពីទទួលបានការអនុញ្ញាតឱ្យទៅងូតទឹក បានឡើងលើរបងដែលព័ទ្ធជុំវិញអគារទាំងដៃជាប់ខ្នោះ ហើយរត់ចូលទៅក្នុងតំបន់ព្រៃក្បែរនោះ។
លោក សាមឿន ថា នគរបាលនិយាយថា ពួកគេចាប់បានជននេះវិញចម្ងាយប្រហែល៣០០ម៉ែត្រ ហើយបានបញ្ជូនទៅពន្ធនាគារ។ ក្រោយមក ជននេះត្រូវបានកាត់ឱ្យជាប់ទោស ហើយបានអនុវត្តទោសជាប់ពន្ធនាគារ៧ខែ។
បន្ទាប់ពីដោះលែងបានបន្តិចកាលពីចុងឆ្នាំមុន តេកូគ្លូ ដែលគ្រប់គ្រងក្រុមហ៊ុនទូកទេសចរណ៍ទំនើប SeaCambodia ក្នុងក្រុងព្រះសីហនុបានមកការិយាល័យ កាសែត ខេមបូឌា ដេលី ក្នុងរាជធានីភ្នំពេញ ហើយបាននិយាយថា គាត់ចង់ឱ្យកាសែតនេះចុះផ្សាយ “រឿងពិត” ថា គាត់ត្រូវបានចោទប្រកាន់ខុសក្នុងការចាក់នោះ និងជាគោលដៅក្នុងការបាញ់ដោយសារមានជម្លោះជាមួួយ Bora Ozturk និង Sakip Capal ពាណិជ្ជករជនជាតិតួកគី ដែលគ្រប់គ្រង កោះរ៉ុង ដាយ សិនធឺរ និង សេវាកម្មទូកចម្លង។
គាត់បាននិយាយថា Ozturk និង Capal បានបាញ់ពីក្នុងរថយន្តដោយខ្លួនពួកគេ ហើយបានសូកប៉ាន់នគរបាលដើម្បីទម្លាក់កំហុសមកលើគាត់ចំពោះការវាយប្រហារលើជនជាតិអីុស្រាអែលជាការខិតខំប្រឹងប្រែងដើម្បីដេញគាត់ចេញពីទីផ្សារទេសចរណ៍។
ក្នុងសារហ្វេសប៊ុកជាច្រើនកាលពីម្សិលមិញ តេកូគ្លូ និយាយថា គាត់មិនជាប់ពាក់ព័ន្ធក្នុងជម្លោះកាប់ចាក់កាលពីថ្ងៃច័ន្ទទេ បន្ទាប់មកបានចោទប្រកាន់អ្នកយកព័ត៌មានថា បានឃុបឃិតជាមួយគូសត្រូវរបស់គាត់ និងនគរបាលដើម្បីភ្ជាប់គាត់ទៅហេតុការណ៍នោះ។
គាត់សរសេរថា ”នគរបាលធ្វើការរួមគ្នាជាមួយអ្នក។ តើ Sakip និង Bora ឱ្យប្រាក់អ្នកប៉ុន្មាន”។ គាត់បានបន្ថែមថា “នៅពេលខ្ញុំឃើញឈ្មោះខ្ញុំនៅក្នុងកាសែតរបស់អ្នក” ខ្ញុំបានទាក់ទងមេធាវីរបស់ខ្ញុំឲ្យដោះស្រាយជាមួយអ្នកនិងកាសែតរបស់អ្នក” ដោយគំរាមចាត់វិធានការផ្លូវច្បាប់ ប្រសិនបើឈ្មោះរបស់គាត់មាននៅក្នុងកាសែត ពាក់ព័ន្ធនឹងជម្លោះនោះ។
Capal បាននិយាយថា ការលើកឡើងថា គាត់និង Ozturk ដែលពីមុនបានសាងសង់ បាំងហ្គាឡូ នៅលើកោះដែលកាន់កាប់ដោយលោក សេរហ្គេ ប៉ូលុនស្គី ជនជាតិរុស្ស៊ី ដែលជាប់ពន្ធនាគារនោះ បានធ្វើការបាញ់បោះ ជារឿងមិនសមហេតុផលឡើយ៕ សារុន