នៅឆ្នាំខាងមុខ សាលារាជធានីនឹងដាក់កាមេរ៉ាសុវត្ថិភាពប្រហែល៦០០ទៀតនៅតាមផ្លូវបំបែកក្នុងរាជធានី ដោយបន្ថែមទៅនឹងកាមេរ៉ា២០០គ្រឿងដែលជាអំណោយរបស់ចិនដែលមានដំណើរការស្រាប់របស់នគរបាលជាតិ។
លោក ឡុង ឌីម៉ង់ អ្នកនាំពាក្យសាលាក្រុងបាននិយាយថា កាមេរ៉ាថ្មីនេះនឹងត្រូវប្រើដើម្បីឃ្លាំមើលរំហូរចរាចរណ៍ និងផ្តល់សន្តិសុខសាធារណឲ្យប្រសើរឡើង។
លោកបាននិយាយថា “ចំពោះកាមេរ៉ាសុវត្ថិភាព៦០០គ្រឿងនេះ យើងមានបំណងនឹងបញ្ចប់[ការដំឡើង]នៅឆមាសទី១ក្នុងឆ្នាំនេះ”។
លោក ឌីម៉ង់ បាននិយាយថា លោកមិនបានដឹងថាគម្រោងនេះនឹងចំណាយប្រាក់ប៉ុន្មាននោះទេ ប៉ុន្តែលោកបានពន្យល់ថា សាលារាជធានីនឹងចំណាយ ហើយថាកាមេរ៉ាសុវត្ថិភាពទំនងនឹងត្រូវទិញពីប្រទេសចិន។
កាមេរ៉ាថ្មីនេះនឹងសម្របសម្រួលជាមួយកាមេរ៉ានគរបាលជាតិ២០០គ្រឿង ដែលដាក់កាលពីឆ្នាំមុនអស់ទឹកប្រាក់បីលានដុល្លារ ដែលជាអំណោយរបស់រដ្ឋាភិបាលក្រុងប៉េកាំង។
យោងតាមលោក មីន សុវណ្ណា ប្រធាននាយកដ្ឋានវិទ្យុទាក់ទងនគរបាលជាតិបានឲ្យដឹងថា ដាក់ភ្ជាប់នឹងភ្លើងចរាចរណ៍ដោយនគរបាលចិននៅខែកក្កដានិងខែសីហា កាមេរ៉ាទាំងនោះបានដំណើរការកាលពីចុងខែមុន។
ទោះជាមិនផ្ដល់សេចក្ដីលម្អិត ឧត្ដមសេនីយ៍ទោ សុវណ្ណា បាននិយាយថា មណ្ឌលត្រួតពិនិត្យ២៤ម៉ោងមានផ្ទៃស្គ្រីនអិលស៊ីឌី៣២ម៉ែត្រក្រឡា អនុញ្ញាតឲ្យនគរបាលតាមរកករណីជាច្រើន ដែលពួកគេមិនអាចធ្វើបាន។
លោក បាននិយាយថា “ចាប់តាំងពីកាមេរ៉ាដំណើរការមក យើងបានឃើញជនល្មើសទាក់ទិននឹងបញ្ហាចរាចរណ៍ និង ការឆក់[កាបូប]។ ខ្ញុំមិនអាចប្រាប់ច្រើនទេ ពីព្រោះវាជាការសម្ងាត់”។
លោក អំ សំអាត អ្នកគ្រប់គ្រងបច្ចេកទេសនៅអង្គការសិទ្ធិមនុស្សលីកាដូ បាននិយាយថា កាមេរ៉ាសុវត្ថិភាព CCTV អាចជាឧបករណ៍មានប្រសិទ្ធភាពមួយក្នុងការប្រយុទ្ធនឹងឧក្រិដ្ឋកម្ម ប៉ុន្តែ លុះត្រាតែវាមានធនធានគាំទ្រគ្រប់គ្រាន់ប៉ុណ្ណោះ។
លោកបាននិយាយថា “កាមេរ៉ាសុវត្ថិភាពជាមធ្យោបាយបន្ថែម [ដើម្បីដោះស្រាយបញ្ហាឧក្រិដ្ឋកម្ម] ប៉ុន្តែប្រសិនបើមិនមានប៉ូលិសគ្រប់គ្រាន់ដើម្បីទប់ស្កាត់ ឬ បង្ក្រាបបទល្មើសទេនោះ ឧក្រិដ្ឋកម្មនឹងនៅតែកើតឡើង។ យើងមិនដឹងថាតើ វាមានប្រសិទ្ធភាពយ៉ាងណាទេ”៕ និត