33 C
Phnom Penh

​​​សម្រាប់​​​តំណែង​​​សំខាន់ គ.ជ.ប.​​​ថ្មី​​​ពិចារណា​​​លើ​​​មន្ត្រី​​​ចាស់​​​

ដោយ ឌឹ ខេមបូឌា ដេលី

បទវិភាគ

ស្ទើរ​​​តែ​​​រយៈ​​​ពេល​​​មួយ​​​ឆ្នាំ​​​​​​បន្ទាប់​​​ពី​​​​​​ការ​​​បង្កើត​​​​​​គណៈ​​​កម្មា​​​ធិការ​​​​​​ជាតិ​​​រៀប​​​ចំ​​​ការ​​​បោះ​​​ឆ្នោត (គ.ជ.ប.) សមាជិកទាំង​​​៩​​​រូប​​​របស់​​​ខ្លួន​​​​​​នឹង​​​ជួប​​​គ្នា​​​នៅ​​​ថ្ងៃ​​​សុក្រ​​​ ដើម្បី​​​ជ្រើស​​​រើស​​​​​​អគ្គលេខា​​​ធិការ​​​​​​ថ្មី​​​ ជា​​​មន្ត្រី​​​ដែល​​​នឹង​​​អនុវត្ត​​​របៀប​​​វារៈ​​​កំណែ​​​ទម្រង​​​់​​​របស់​​​ខ្លួន​​​មុន​​​នឹង​​​ការ​​​បោះ​​​ឆ្នោត​​​​​​នា​​​ឆ្នាំ​​​២០១៧ និង​​​២០១៨។

ការ​​​ជ្រើស​​​រើស​​​​​​អ្នក​​​ស្នង​​​តំណែង​​​អគ្គ​​​លេខា​​​ធិការ​​​បច្ចុប្បន្ន គឺ​​​លោក ទេព នី​​​ថា មាន​​​បំណង​​​​​​បង្ហាញ​​​​​​ជំហាន​​​ចុង​​​ក្រោយ​​​​​​នៅ​​​ក្នុង​​​ការ​​​ផ្លាស់​​​ប្តូរគ.ជ.ប.ពីគណៈ​​​កម្មាធិការគ្រប់​​​​​​គ្រង​​​​​​​​​លើស​​​លុប​​​ដោយ​​​សមាជិក​​​គណ​​​បក្ស​​​ប្រ​​​ជា​​​ជន​​​កម្ពុជា​​​ទៅ​​​ជា​​​​​​គណៈ​​​កម្មាធិការ​​​ទ្វេ​​​បក្ស​​​ដែល​​​អាច​​​ចាត់​​​ចែង​​​​​​ឲ្យ​​​បាន​​​ត្រឹម​​​ត្រូវ​​​នូវ​​​ការ​​​បោះ​​​ឆ្នោត​​​​​​ក្នុង​​​ពេល​​​ខាង​​​មុខ។​​​​​​​​​​​​​​​​​​

ដូច្នេះ​​​រឿង​​​នេះ​​​​​​បាន​​​ធ្វើ​​​ឲ្យ​​​មនុស្ស​​​ជា​​​ច្រើ​​​នភ្ញាក់​​​ផ្អើល​​​​​​កាល​​​ពី​​​សប្តាហ៍​​​មុន នៅ​​​ពេល​​​ដែល​​​លោក ទេព នី​​​ថា​​​ ជាប់​​​ឈ្មោះ​​​ជា​​​បេក្ខជន​​​ម្នាក់​​​​​​ក្នុង​​​ចំណោម​​​បេក្ខ​​​ជន​​​៣​​​រូប​​​​​​សម្រាប់​​​តំណែង​​​នោះ រួម​​​ជា​​​មួយ​​​មេដឹក​​​នាំ​​​សង្គម​​​ស៊ីវិល​​​​​​មិន​​​សូវ​​​លេច​​​ធ្លោ​​​​​​ពីរ​​​រូប​​​ទៀត គឺ​​​លោក​​​ ហេង​​​ មណី​​​​​​ចិន្តា និង​​​លោក យ៉ា ណាវុធ។

លោក គល់ បញា នាយក​​​អង្គការ​​​ខុម​​​ហ្វ្រែល បាន​​​មាន​​​ប្រសាសន៍​​​កាល​​​ពី​​​ថ្ងៃ​​​ពុធ​​​ថា “សាធារ​​​ណ​​​ជន​​​​​​មិន​​​បាន​​​គិត​​​ថា អគ្គ​​​លេខា​​​ធិការ​​​បច្ចុប្បន្ន​​​​​​អាច​​​ត្រូវ​​​គេ​​​ជ្រើស​​​រើស​​​ម្ត​​​ងទៀត​​​ទេ។ គេ​​​សន្និដ្ឋាន​​​ថា​​​ជា​​​មនុស្ស​​​ថ្មី”។​​​

នាយក​​​អង្គការ​​​ខុម​​​ហ្វ្រែល​​​រូប​​​នេះ​​​បាន​​​មាន​​​ប្រសាសន៍​​​បន្ត​​​ថា “រឿង​​​នេះ​​​សំខាន់​​​ណាស់​​​​​​ ព្រោះ​​​អគ្គ​​​លេខាធិការ​​​​​​នឹង​​​អនុវត្ត​​​កំណែ​​​ទម្រង់​​​សម្រាប់​​​ការ​​​ចុះ​​​ឈ្មោះ​​​អ្នក​​​បោះ​​​ឆ្នោត ហើយ​​​​​​ធ្វើ​​​ឲ្យ​​​ប្រាកដ​​​ថាការ​​​ប្រព្រឹត្ត​​​ទៅ​​​នៃ​​​ការ​​​បោះ​​​ឆ្នោត ដែល​​​រួម​​​មាន​​​ថ្ងៃ​​​បោះ​​​ឆ្នោត និង​​​ការរាប់​​​សន្លឹក​​​ឆ្នោត គឺ​​​ត្រូវ​​​តែ​​​មាន​​​តម្លា​​​ភាព”។​​​

សមា​​​ជិក​​​ទាំង​​​៩​​​រូប​​​របស់គ.ជ.ប.​​​​​​គឺ​​​មាន​​​លក្ខណៈ​​​​​​​​​ជា​​​ក្រុម​​​ប្រ​​​ឹក្សា​​​នាយក​​​​​​ក្រុម​​​ហ៊ុន ដែល​​​ធ្វើ​​​ការ​​​សម្រេច​​​ចិត្ត​​​​​​ទាក់​​​ទង​​​នឹង​​​​​​ការ​​​បោះ​​​ឆ្នោត ចំណែកឯ​​​អគ្គ​​​លេខាធិការ​​​​​​ដើរ​​​តួ​​​ជា​​​នាយក​​​ប្រតិបត្តិ​​​ដែល​​​ទទួល​​​ខុស​​​ត្រូវ​​​ចំពោះ​​​ការ​​​ចាត់​​​ចែង​​​​​​ការ​​​បោះ​​​ឆ្នោត​​​។​​​

លោក ទេព​​​ នីថា​​​ក្លាយ​​​ជា​​​អគ្គ​​​លេខាធិការ​​​គ.ជ.ប.​​​ចាប់​​​តាំង​​​ពី​​​ឆ្នាំ​​​២០០២ ដោយ​​​រៀប​​​ចំ​​​ការ​​​បោះ​​​ឆ្នោត​​​ជាតិ​​​នា​​​ឆ្នាំ​​​​​​២០០៣ ឆ្នាំ​​​២០០៨ និង​​​ឆ្នាំ​​​២០១៣​​​ដែល​​​​​​ញាំញី​​​ដោយ​​​មាន​​​ការ​​​អះ​​​អាង​​​ថា​​​មាន​​​ការ​​​លួច​​​បន្លំ។ មុន​​​នឹង​​​កាន់​​​តំណែង​​​នេះ លោក​​​​​​បម្រើ​​​ការ​​​ជា​​​គណៈ​​​កម្មការ​​​ឃោសនា​​​​និង​​​អប់​​​រំ​​​​​​​​​យុវជន​​​នៃ​​​គណបក្ស​​​ប្រ​​​ជា​​​ជន​​​កម្ពុជា។

បន្ទាប់​​​ពី​​​ការ​​​បោះ​​​ឆ្នោត​​​ជាតិ​​​នា​​​ឆ្នាំ​​​២០១៣ គណបក្ស​​​សង្គ្រោះ​​​ជាតិ​​​បាន​​​ធ្វើ​​​ពហិការ​​​មិន​​​ចូល​​​សភា​​​​​​ស្ទើរ​​​រយៈ​​​ពេល​​​មួយ​​​ឆ្នាំ​​​ ដោយ​​​តវ៉ា​​​ប្រឆាំង​​​​​​នឹង​​​អ្វី​​​​​​​​​ដែល​​​ពួក​​​គេ​​​និយាយ​​​ថា​​​​​​ជា​​​ការ​​​បោះ​​​ឆ្នោត​​​​​​មាន​​​ការ​​​លួច​​​បន្លំ​​​។ ការ​​​តវ៉ា​​​​​​បាន​​​នាំ​​​ឲ្យ​​​មាន​​​កិច្ច​​​ព្រម​​​ព្រៀង​​​​​​នា​​​ខែ​​​កក្ក​​​ដា ឆ្នាំ​​​២០១៤​​​ជាមួយ​​​គណបក្ស​​​ប្រជា​​​ជន​​​កម្ពុជា ដើម្បី​​​កែ​​​ទម្រង​​់​​​គ.ជ.ប.។

ស្ថិត​​​ក្រោម​​​កិច្ច​​​ព្រម​​​ព្រៀង​​​ ទាំង​​​គណបក្ស​​​ប្រជា​​​ជន​​​កម្ពុជា និង​​​គណ​​​បក្ស​​​សង្គ្រោះ​​​ជាតិ​​​ទទួល​​​បាន​​​ការ​​​អនុញាត​​​​​​ឲ្យ​​​ជ្រើស​​​រើស​​​​​​សមាជិក​​​គណៈ​​​កម្មាធិការ​​​បួន​​​រូប​​​រៀងៗ​​​ខ្លួន​​​​​​ដើម្បី​​​ដាក់​​​ចូល​​​ក្នុង​​​គ.ជ.ប.ថ្មី ហើយ​​​បន្ទាប់​​​មក​​​ត្រូវ​​​យល់​​​ព្រម​​​​​​ចំពោះ​​​សមាជិក​​​អព្យាក្រឹត។​​​ ប៉ុន្តែ លោក ទេព នីថា​​​បាន​​​បន្ត​​​តួនាទី​​​របស់​​​លោក​​​ជា​​​បណ្ដោះ​​​អាសន្ន​​​ ដោយ​​​បង្ក​​​ឲ្យ​​​មាន​​​ការ​​​បញ្ចេញ​​​ទស្សនៈ​​​ថ្នាំង ​​​ថ្នាក់​​​​​​​​​​​​ជា​​​សាធារណៈ​​​ពី​​​គណបក្ស​​​ប្រឆាំង។​​​​​​​​​​​​

លោក ធន់ សារ៉ាយ ប្រធាន​​​អង្គការ​​​សិទ្ធិមនុស្ស​​​អាដហុក​​​ និង​​​ជា​​​មេដឹកនាំ​​​សង្គម​​​ស៊ីវិល​​​ដ៏​​​លេច​​​ធ្លោ​​​មួយរូប​​​​​​ចាប់តាំងពី​​​ទសវត្សរ៍​​​ឆ្នាំ​​​១៩៨០​​​ បាន​​​មាន​​​ប្រសាសន៍ថា “ប្រសិនបើ​​​គេ​​​ចង់បាន​​​ការទុកចិត្ត​​​ពីសាធារណជន​​​ ឥឡូវនេះ​​​គេគួររើសយក​​​បុគ្គល​​​មិនមែនជាសមាជិក​​​បក្ស​​​ ហើយ​​​ខ្ញុំគិត​​​ថា មាន​​​តែ​​​លោក​​​ មណីចិន្តា​​​ និង​​​លោក យ៉ា ណាវុធ ប៉ុណ្ណោះដែល​​​ត្រូវនឹង​​​គំនិតនោះ”។

លោក ធន់ សារ៉ាយ​​​ បាន​​​មាន​​​ប្រសាសន៍​​​បន្ថែម​​​ថា “ទេព នីថា មាន​​​អ្នករិះគន់​​​ច្រើនណាស់​​​កាលពី​​​មុន​​​ ជាពិសេស​​​ការ​​​បោះឆ្នោត​​​នាឆ្នាំ​​​២០១៣។ គាត់​​​ងាក​​​ទៅរក​​​ម្ខាង​​​ ដូច្នេះ​​​ខ្ញុំ​​​គិត​​​ថា ប្រសិន​​​បើ​​​គេ​​​ជ្រើសរើស​​​គាត់​​​ម្តងទៀត​​​ នឹងមាន​​​បញ្ហា​​​ចំពោះ​​​ការ​​​ជឿទុកចិត្ត​​​ទៅលើ​​​ គ.ជ.ប.”។

ប្រធានអង្គការ​​​អាដហុករូបនេះ​​​បាន​​​មាន​​​ប្រសាសន៍ថា “អ្នកគាំទ្រ​​​គណបក្ស​​​ប្រជាជន​​​កម្ពុជា​​​នឹង​​​គាំទ្រ​​​បេក្ខភាព​​​ ទេព នីថា ប៉ុន្តែ ម្ខាងទៀត​​​មិនគាំទ្រ​​​ទេ។ ចំពោះខ្ញុំ គ.ជ.ប. ត្រូវជ្រើសរើស​​​​​​នរណាម្នាក់​​​ក្រៅពី​​​គាត់​​​”។

ការព្រួយ​​​បារម្ភ​​​អំពី​​​ឯករាជ្យ​​​ភាព​​​នៃ​​​ គ.ជ.ប. ថ្មី​​​ បាន​​​កើតឡើង​​​ចាប់តាំងពី​​​មុននឹង​​​ការបង្កើត​​​ជាផ្លូវការ​​​នៃ គ.ជ.ប. ដោយ​​​គណបក្ស​​​ប្រជាជន​​​កម្ពុជា​​​បញ្ចុះបញ្ចូល​​​ឲ្យ​​​គណបក្ស​​​សង្គ្រោះជាតិ​​​ទទួល​​​យក​​​ខបញ្ញត្តិ​​​មួយ​​​ដែលតម្រូវ​​​ឲ្យ​​​នាយករដ្ឋមន្ត្រី​​​ចុះ​​​ហត្ថលេខា​​​លើ​​​ការផ្លាស់​​​ប្តូ​​​រ​​​វិធាន​​​ផ្ទៃ​​​ក្នុង​​​​​​រ​​​បស់​​​ខ្លួន​​​។

ប៉ុន្តែ ​​​ចាប់តាំង​​​ពី​​​ពេល​​​នោះមក សមាជិក​​​នៃ​​​គណៈកម្មាធិការ​​​ទ្វេ​​​បក្ស​​​បាន​​​ធ្វើ​​​ការ​​​ជាមួយ​​​គ្នា​​​ដោយ​​​​​​ស្ងៀមស្ងាត់​​​ និង​​​បញ្ចប់​​​ដោយ​​​ជោគជ័យ​​​នូវ​​​គម្រោង​​​សាកល្បង​​​សម្រាប់​​​ការកសាង​​​ឡើង​​​វិញ​​​ទូលំទូលាយ​​​នៃ​​​បញ្ជី​​​អ្នកបោះឆ្នោត​​​ដោយប្រើ​​​អត្តសញ្ញាណ​​​កម្ម​​​ជីវមាត្រ​​​ដែល​​​នឹង​​​ត្រូវបញ្ចប់​​​មុន​​​នឹង​​​ការ​​​បោះ​​​ឆ្នោត​​​ឃុំសង្កាត់​​​នៅឆ្នាំ​​​ក្រោយនេះ​​​។

លោក ស៊ិក ប៊ុនហុក ប្រធាន​​​ គ.ជ.ប. ដែល​​​បាន​​​លាលែង​​​ចេញពី​​​តំណាង​​​រាស្ត្រ​​​គណបក្ស​​​ប្រជាជន​​​កម្ពុជា​​​កាលពី​​​ដើម​​​ឆ្នាំមុន​​​ បាន​​​មាន​​​ប្រសាសន៍​​​កាលពី​​​ម្សិលមិញ​​​ថា លោក និង​​​សហ​​​សេវិក​​​​​​របស់លោក​​​បាន​​​យល់​​​អំពី​​​ការត្រូវ​​​ជ្រើសរើស​​​អគ្គលេខាធិការ​​​មួយរូប​​​ដែលនឹងចាត់​​​ទុក​​​ថា​​​ស្រប​​​​​​ច្បាប់។

លោក ស៊ិក ប៊ុនហុក បានមាន​​​ប្រសាសន៍ថា “យើង​​​នឹង​​​ប្រឹងប្រែង​​​ធ្វើការងារ​​​ស្រប​​​តាម​​​ច្បាប់​​​ ហើយ​​​យើង​​​នឹងមិន​​​រង​​​សម្ពាធ​​​ពី​​​គណបក្ស​​​នយោបាយ​​​ អង្គការ​​​ក្រៅរដ្ឋាភិបាល​​​ ស្ថាប័ន​​​ ឬ​​​បុគ្គលណាម្នាក់​​​នោះទេ។ គ.ជ.ប. ចង់ជ្រើសរើស​​​នរណាម្នាក់​​​ដែល​​​ទទួល​​​យល់​​​ព្រម​​​ដោយ​​​ជាប់​​​អ្នក​​​ពាក់ព័ន្ធ​​​ទាំង​​​អស់។ សូមរង់ចាំ​​​មើលសិន”។

លោក រ៉ុង ឈុន សមាជិក​​​ គ.ជ.ប. មួយរូប​​​ ជាអតីត​​​ប្រធាន​​​សហជីព​​​ដែល​​​ជា​​​បេក្ខជន​​​ម្នាក់​​​ក្នុង​​​បណ្តា​​​បេក្ខជន​​​បួនរូប​​​របស់​​​គណបក្ស​​​សង្គ្រោះជាតិ​​​មិនធ្វើ​​​អត្ថាធិប្បាយ​​​ទៅលើ​​​​​​ការ​​​ជាប់​​​សម្រាំងរបស់​​​លោក នីថា ​​​សម្រាប់​​​តំណែងនោះទេ។

លោក រ៉ុង ឈុន បាន​​​មាន​​​ប្រសាសន៍ថា “យើង​​​នឹង​​​ពិចារណា​​​រាល់​​​គំនិត​​​ទាំង​​​អស់​​​ដែលលើក​​​ឡើង​​​ដោយ​​​ពលរដ្ឋ​​​ និង​​​ដោយ​​​ក្រុម​​​សង្គមស៊ីវិល​​​ ប៉ុន្តែ ការ​​​ជ្រើសរើស​​​នឹង​​​ធ្វើ​​​ឡើង​​​ផ្អែក​​​លើ​​​មូលដ្ឋាន​​​ច្បាប់​​​ និងនីតិវិធី​​​”។

លោក ធន់ សារ៉ាយ បាន​​​មាន​​​ប្រសាសន៍ថា លោកបាន​​​ស្គាល់​​​ទាំង​​​លោក មណីចិន្តា និងលោក ណាវុធ  ហើយជឿជាក់​​​ថា អ្នកទាំងពី​​​រនឹងមាន​​​សមត្ថភាព​​​គ្រប់គ្រាន់​​​ដើម្បី​​​ជំនួស​​​តំណែង​​​លោក ទេព នីថា។

អ្នកទាំងពីរ​​​ជាប្រធាន​​​អង្គការ​​​ពុទ្ធសាសនា​​​ដើម្បី​​​អភិវឌ្ឍ​​​ន៍ និង​​​អង្គការ​​​ខារ៉ាម កម្ពុជា។ លោក ធន់ សារ៉ាយ បាន​​​មាន​​​ប្រសាសន៍ថា “ហេង មណីចិន្តា មាន​​​ចំណេះដឹង​​​ជ្រៅជ្រះ​​​ ពីព្រោះ​​​លោក​​​មាន​​​សញ្ញាប័ត្រ​​​ពីសាកល​​​វិទ្យាល័យ​​​ហាវឺដ ហើយ​​​លោក​​​មិនមាន​​​បញ្ហា​​​ក្នុងការ​​​ធ្វើការ​​​ជាមួយ​​​គណបក្ស​​​ទាំងពីរ​​​ទេ ពីព្រោះលោក​​​មិនមានទំនាក់ទំនង​​​នយោបាយ​​​”។

នាយកអង្គការ​​​អាដហុក​​​រូបនេះបាន​​​មាន​​​ប្រសាសន៍ថា “បញ្ហា​​​អាច​​​ត្រង់ថា លោក​​​ខ្វះ​​​បទ​​​ពិសោធ​​​ផ្នែក​​​បោះឆ្នោត​​​។ យ៉ា ណាវុធ ក៏មិនមាន​​​បទពិសោធច្រើន​​​ក្នុងការងារ​​​បោះឆ្នោត​​​ដែរ​​​ ខ្ញុំមិនដឹងថា គេស្វែងរក​​​លក្ខណៈសម្បត្តិ​​​យ៉ាងដូចម្តេ៉ច​​​ទេ”។

លោក នីថា បដិសេធ​​​មិន​​​ឲ្យ​​​សម្ភាស​​​សម្រាប់អត្ថបទនេះ​​​ទេ។ ទាំង​​​លោក​​​ មណីច​​​ិន្តា ទាំង​​​លោក​​​ ណាវុធ បាន​​​និយាយថា ពួកគេ​​​នឹង​​​ធ្វើ​​​អត្ថាធិប្បាយ​​​ចំពោះ​​​បេក្ខភាព​​​ខ្លួន​​​បាន​​​ លុះត្រា​​​តែ​​​ក្រោយពី​​​ គ.ជ.ប. សម្រេច​​​ចិត្ត​​​របស់ខ្លួន​​​ដែល​​​យល់ព្រម​​​ដោយ​​​មតិរួមនៃ​​​សមាជិកទាំង​​​ប្រាំបួន​​​រូប។

លោក ហង្ស ពុទ្ធា អ្នកនាំពាក្យ គ.ជ.ប. ដែល​​​បាន​​​ដឹកនាំ​​​​​​គណៈកម្មាធិការ​​​អព្យាក្រឹត និងយុត្តិធម៌​​​ដើម្បី​​​ការ​​​បោះឆ្នោត​​​ដោយ​​​សេរី និង​​​ត្រឹមត្រូវ​​​នៅកម្ពុជា ( និកហ្វិច) មុននឹង​​​ជ្រើសរើស​​​ឲ្យធ្វើ​​​ជា​​​សមាជិក​​​អព្យាក្រឹត​​​នៃ ​​​គ.ជ.ប. បាន​​​មាន​​​ប្រសាសន៍​​​ថា សមាជិក​​​ គ.ជ.ប. បាន​​​ទទួល​​​ការ​​​ណែនាំ​​​ថា មិនត្រូវ​​​លាតត្រដាង​​​ជម្រើស​​​របស់ខ្លួនទេ រហូត​​​ដល់មាន​​​ការ​​​ជ្រើស​​​រើស​​​នៅ​​​ថ្ងៃសុក្រសិន។

លោក ហង្ស ពុទ្ធា បាន​​​មាន​​​ប្រសាសន៍​​​ថា “គ.ជ.ប. ដឹង​​​អ្វី​​​ដែល​​​យើង​​​ត្រូវ​​​ធ្វើ​​​ដើម្បី​​​ទទួល​​​បានការ​​​ជឿ​​​និង​​​​​​ការទុកចិត្តពីប្រជាពលរដ្ឋ​​​។ លោក ពុទ្ធា បាន​​​មាន​​​ប្រសាសន៍​​​បន្ថែម​​​ថា លោក ជឿជាក់ថា អគ្គលេខាធិការ​​​ថ្មី​​​នឹង​​​ទទួល​​​បាន​​​សេរីភាពដូច​​​លោក​​​ ទេព នីថា ដែរ។

លោក ហង្ស ពុទ្ធា បាន​​​មាន​​​ប្រសាសន៍ថា “ខ្ញុំ​​​ចង់ជម្រាប​​​ថា បច្ចុប្បន្ននេះ​​​ខុស​​​ពី​​​អតីតកាល​​​។ ឥឡូវ​​​នេះ​​​គ្មាន​​​នរណា​​​ម្នាក់​​​អាច​​​ជិះសេះលែងដៃ​​​បាន​​​ទេ។ តំណែង​​​អគ្គលេខាធិការ​​​គឺគ្រាន់តែ​​​ជាជំនួយការ​​​ការងារ​​​ គ.ជ.ប. ប៉ុណ្ណោះ”។

ប៉ុន្តែ លោក យឹម សុវណ្ណ អ្នកនាំពាក្យ​​​គណបក្ស​​​សង្គ្រោះជាតិ​​​ បានមាន​​​ប្រសាសន៍ថា “មិនថា អគ្គលេខាធិការថ្មី​​​នឹងមាន​​​អំណាច​​​សម្រេច​​​តិចតួច​​​ប៉ុណ្ណាទេ លោក នីថា មិនមែន​​​ជាជម្រើស​​​អាច​​​ទទួលយក​​​បាន​​​ទេ”។

អ្នកនាំពាក្យ​​​គណបក្ស​​​សង្គ្រោះជាតិ​​​រូបនេះបាន​​​មាន​​​ប្រសាសន៍ថា “អ្នកដែល​​​ធ្លាប់​​​បង្កបញ្ហា​​​ច្រើន​​​ពេល​​​បោះឆ្នោត​​​គួរទុកឲ្យ​​​អ្នកផ្សេង​​​ចូល​​​មកកសាង​​​ការជឿទុកចិត្ត​​​របស់​​​សាធារណជន​​​ទៅលើ​​​ស្ថាប័ននេះ”៕​​​រើន​​​​​​​​​​​​​​​​​​​​​​​​​​​​​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស