បន្ទាប់ពីមានការបាញ់បោះ និងធ្វើឱ្យសន្តិសុខពីរនាក់រងរបួសនៅខាងក្រៅក្លឹបកម្សាន្ត មេនហាតធេនក្នុងរាជធានីភ្នំពេញកាលពីរំលងអធ្រាត្រឈានចូលព្រឹកថ្ងៃច័ន្ទមក ជនសង្ស័យឈ្មោះ ចៅ រង្សី អាយុ៣១ឆ្នាំ ត្រូវបានចោទប្រកាន់កាលពីម្សិលមិញនៅសាលា ដំបូងរាជធានីភ្នំពេញ។
លោក អែល ពិដោរ ក្រឡាបញ្ជីរបស់ចៅក្រមស៊ើបសួរ លឹម មករន្ទ បានមានប្រសាសន៍ កាលពីម្សិលមិញថា “តុលាការបានសម្រេចឃុំខ្លួនបុរសរូបនេះបណ្តោះអាសន្នដោយចោទប្រកាន់ពីបទមានអាវុធខុសច្បាប់ និងប្រើអំពើហិង្សាដោយចេតនាមានស្ថានទម្ងន់ទោស”។
លោក លឹម មករន្ទ បានបដិសេធមិនធ្វើអត្ថាធិប្បាយអំពីរឿងក្តីនេះទេ។លោក ខេន សុវណ្ណ មេបញ្ជាការរងកងរាជអាវុធហត្ថរាជធានីភ្នំពេញបានបញ្ជាក់ពីសេចក្តីសម្រេចរបស់តុលាការក្នុងការឃុំខ្លួនលោក ចៅ រង្សី ប៉ុន្តែបានបដិសេធមិនធ្វើអត្ថាធិប្បាយបន្ថែមឡើយ។
ជនរងគ្រោះទាំងពីរគឺ កង ចិត្រា និង ដុំ ធី បានធូរស្រាលហើយនៅមន្ទីរពេទ្យកាល់ម៉ែតកាលពីម្សិលមិញ។
អ្នកស្រី សេង លីជាន ប្រពន្ធរបស់លោក ចិត្រា បាននិយាយថា “ប្តីរបស់ខ្ញុំបានគ្រាន់បើហើយ ប៉ុន្តែគ្រូពេទ្យឱ្យគាត់ស្នាក់នៅក្នុងបន្ទប់សង្គ្រោះបន្ទាន់នៅឡើយ ពីព្រោះគាត់មិនទាន់ហូបអាហារបាននៅឡើយទេ”។
អ្នកស្រីបានបន្ថែមថា “ស្ថានភាពរបស់លោក ធី ក៏បានប្រសើរដែរ។ ចៅ រង្សី ត្រូវបានចោទប្រកាន់ថាបានដកកាំភ្លើង AR-15 បាញ់ចំនួន១០គ្រាប់បន្ទាប់ពីត្រូវបានបដិសេធមិនឱ្យចូលក្នុងក្លឹបនេះ៕សារុន