លោក ចន ឃើរី នឹង​ជួប​សវនាការ​ជាមួយ​លោក​នាយក​រដ្ឋមន្ត្រី​ ហ៊ុន សែន​ ក្នុង​រាជធានី​ភ្នំពេញ​

ក្រសួង​ការ​បរទេស​​អាមេរិក​​​បាន​​​​ប្រកាស​កាលពី​ថ្ងៃ​សុក្រថា លោក ចន ឃើរី ​រដ្ឋមន្ត្រី​ក្រសួង​ការ​បរទេស​​​​អាមេរិក​នឹងមក​បំពេញ​ទស្សន​កិច្ច​នៅ​រាជ​ធានី​​​ភ្នំពេញ​នៅថ្ងៃទី​២៦ ខែមករា ជា​​ផ្នែក​មួួយ​​ដំណើរ​ទស្សន​កិច្ច​រយៈ​ពេល​ខ្លី​មក​កាន់​តំបន់​ ​។

យោង​​តាម​សេចក្តី​ប្រកាស​នេះ​បាន​ឱ្យ​ដឹង​ថា លោក ចន ឃើរី នឹង​ជួប​​សវនាការ​ជាមួយ​លោក​​នាយក​រដ្ឋមន្ត្រី ហ៊ុន​ សែន និង​លោក ហោ ណាំហុង រដ្ឋមន្ត្រី​ក្រសួង​ការ​បរទេស​​ដើម្បី​ពិភាក្សា​អំពី​​កិច្ច​ប្រជុំ​កំពូល​​អាមេរិក​-អាស៊ាន​នៅ​ពេល​ខាង​មុខ ដែល​ធ្វើ​ឡើង​ក្នុង​ទីក្រុង​សាន់​នីលែន រដ្ឋ​កាលីហ្វ័រ​នីញ៉ា នៅ​ខែ​កុម្ភៈ មុន​ពេល​លោក​​ធ្វើ​ដំណើរ​ទៅ​ប្រទេស​ចិន​​នៅ​ថ្ងៃទី​២៧ ខែមករា។

សេចក្ដី​ប្រកាស​នេះ​លើកឡើង​ទៀត​ថា ដំណើរ​ទស្សនកិច្ច​នេះ​ក៏​នឹង “​ស្វែង​រក​​វិធី​ដើម្បី​​ពង្រឹង​​កិច្ច​សហប្រតិបត្តិការ​ទ្វេ​ភាគីបន្ថែម​ទៀត និង​ទំនាក់​ទំនង​សេដ្ឋកិច្ច​ទ្វេ​ភាគី ដែល​កំពុង​តែ​កើន​ឡើង​”។

cam-photo-kerry-reutersលោក ជុំ ស៊ុនរី អ្នក​នាំពាក្យ​ក្រសួងការ​បរទេស​បាន​បញ្ជាក់​អះអាង​ពី​ជំនួប​គ្រោង​ទុក​របស់​លោក ឃើរី នៅ​ក្នុង​ប្រទេស​កម្ពុជា​នៅ​ចុង​ខែ​នេះ​។

លោក​បាន​ថ្លែង​ថា “​គោល​បំណង​សំខាន់​នៃ​ដំណើរ​ទស្សនកិច្ច​នេះ​​ គឺ​ដើម្បី​ជំរុញ និង​ពង្រឹង​ទំនាក់​ទំនង​ទ្វេ​ភាគី​បន្ថែម​ទៀត​​រវាង​ប្រទេស​ទាំង​ពីរ​។ ​ពេល​នេះ​​ខ្ញុំ​មិន​ដឹង​ថា តើ​ប្រធាន​បទអ្វី​នឹង​ត្រូវ​លើក​យក​មក​ពិភាក្សា​នោះ​ទេ…​យើង​ត្រូវ​រង់ចាំ​សិន​”។

កាលពី​ខែ​វិច្ឆិកា មន្ត្រី​ក្រសួង​ការ​បរទេស​ម្នាក់​​​​បាន​ប្រាប់​ព្រឹទ្ធសភា​​សហរដ្ឋអាមេរិក​ថា ហេតុ​ការណ៍​នយោបាយ​ក្នុង​ប្រទេស​កម្ពុជា​ ​​​រួម​ទាំង​ការ​វាយ​ដំ​តំណាង​រាស្ត្រ​​គណបក្ស​ប្រឆាំង​​​ និង​ចំណាត់​ការ​ផ្លូវ​ច្បាប់​ប្រឆាំង​លោក ​​សម រង្ស៊ី មេដឹកនាំ​គណបក្ស​ប្រឆាំង​​ ជាមូល​ហេតុ​ចំពោះ​ “​កង្វល់ធ្ងន់ធ្ងរ”​។

​លោក ស្កុត បុសប៊ី (Scott Bus-by) ឧបការី​​នៃការិយា​ល័យ​​​​ប្រជាធិបតេយ្យ​ សិទ្ធិមនុស្ស និង​ការ​ងារ​របស់​ក្រសួង​ការ​បរទេស​បាន​មាន​ប្រសាសន៍​ថា “​សកម្មភាព​ទាំង​នេះ​​ ធ្វើឱ្យ​នឹក​ឃើញ​ដល់​រយៈ​ពេល​នៃ​របប​ផ្ដាច់​ការ​​ក្នុង​ពេល​អតីត​កាលថ្មីៗ​​របស់​ប្រទេស​កម្ពុជា និង​ធ្វើ​ឲ្យ​មាន​មន្ទិល​កាន់​តែ​ខ្លាំង​អំពី​ការ​ប្ដេជ្ញា​របស់​រដ្ឋា​ភិបាល​នេះ​ចំពោះ​ការ​ធ្វើកំណែទម្រង់​​ក្នុង​​ឆ្នាំ​២០១៤”។

​យោងតាម​ជំនួយការ​ម្នាក់​បាន​ឱ្យ​ដឹង​ថា កាលពី​ឆ្នាំ​២០១២ លោក បារ៉ាក់ អូបាម៉ា ប្រធា​នាធិបតី​សហរដ្ឋអាមេរិក​បាន​ជំរុញ​ឲ្យ​​លោក​ ហ៊ុន​ សែន​ អនុម័ត​កំណែទម្រង់​ការ​បោះ​ឆ្នោត និង​លើក​កម្ពស់ស្ថាន​ភាព​​សិទ្ធិ​មនុស្ស​។ កាលពី​ឆ្នាំ​២០១០ លោកស្រី ហ៊ីឡារី ​​គ្លីនតុន ដែល​ពេល​នោះ​ជា​រដ្ឋមន្ត្រី​ការ​បរ​ទេស​​​​អាមេរិក​​បាន​​សម្ដែង​ការ​គាំទ្រ​ចំពោះ​ការិយា​​ល័យ​សិទ្ធិ​មនុស្ស​​អង្គការ​​សហប្រជា​ជាតិ ដែល​​​​ពេលនោះ​រដ្ឋាភិបាល​នេះ​បាន​​គំរាម​​បិទ។

ប្រទេស​កម្ពុជាតែងតែ​​​ប្រើ​ប្រាស់​​ជំនួប​បែប​នេះ​ជំរុញ​ឲ្យមានការ​​លើក​លែង​បំណុល​​​​សម័យ​ លន់ នល់ ដែល​មាន​ទឹក​ប្រាក់​ជាង​៤០០​លាន​ដុល្លារ​។

កិច្ច​ប្រជុំ​កំពូល​អាមេរិក-អាស៊ាន​នៅ​ពេល​​​ខាង​មុខ ត្រូវ​បាន​ប្រកាស​នៅ​កិច្ច​ប្រជុំ​កំពូល​អាស៊ាន​លើក​ទី​២៧​ ដែល​ធ្វើ​ឡើង​ក្នុង​ប្រទេស​​​ម៉ាឡេស៊ី​កាលពី​ខែ​វិច្ឆិកា ដែល​នៅ​ពេល​នោះ​​​​លោក អូ​បាម៉ា បាន​អញ្ជើញ​មេដឹក​​នាំ​​នៃ​ប្រទេស​ជា​សមាជិក​អាស៊ាន​ទាំង​១០​​ឲ្យ​មក​ចូល​រូម​ផង​ដែរ​។ ដំណើរ​ទស្សនកិច្ច​នេះ​នឹង​កត់​សម្គាល់​ជា​ដំណើរ​ទស្សនកិច្ច​ផ្លូវ​ការ​​លើក​ដំបូង​របស់​លោក ហ៊ុន សែន ទៅ​កាន់​សហរដ្ឋអាមេរិក​៕ សារុន​

© 2016, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.