35 C
Phnom Penh

ទោះមាន​​​អត្រា​​​ឃុំ​​​ខ្លួន​​​ខ្ពស់​​​ ក៏​​​នគរបាល​​​បដិសេធ​​​ការ​​​បំពាន​​​​​​អ្នក​​​រក​​​ស៊ីផ្លូវ​​​ភេទ

ដោយ ឌឹ ខេមបូឌា ដេលី

បទវិភាគ

យោង​​​តាម​​​អង្គការ​​​ក្រៅ​​​រដ្ឋាភិបាល​​​ថ្នាក់​​​មូលដ្ឋាន​​​​​​មួយ​​​បាន​​​ឲ្យ​​​ដឹង​​​ថា នគរបាល​​​ក្រុង​​​ភ្នំពេញ​​​បាន​​​ឃាត់​​​ខ្លួន​​​អ្នក​​​រក​​​ស៊ីផ្លូវ​​​ភេទ​​​យ៉ាង​​​ហោច​​​ណាស់​​​២៧៤​​​នាក់​​​​​​តាម​​​ដង​​​ផ្លូវ​​​នានា​កាល​​​ពី​​​ឆ្នាំ​​​មុន មុន​​​ពេល​​​បញ្ជូន​​​​​​ពួកគេ​​​ទៅ​​​មណ្ឌល​​​ សង្គម​​​កិច្ច​​​ព្រៃ​​​ស្ពឺ​​​​​​ ដែល​​​មាន​​​ឈ្មោះ​​​អាក្រក់។  ​​​អង្គការ​​​ក្រៅ​​​រដ្ឋាភិបាល​​​មួយ​​​នេះ​​ក៏​​​បាន​​​រាយ​​​ការណ៍​​​ផង​​​ដែរ​​​ថា ៨០​​​ភាគ​​​រយ​​​នៃ​​​អ្នក​​​រក​​​ស៊ី​​​ផ្លូវ​​​ភេទ​​​តាម​​​​​ផ្លូវ​​​​​ដែល​​​ស្ថិត​​​ក្នុង​​​ការ​​​​​​​​មើល​​​ថែ​​​របស់​​​ខ្លួន​​​​​​បាន​​​និយាយ​​​ថា ពួក​​​គេ​​​​​​ត្រូវ​​​បាន​​​ “រំលោភ​​​បំពាន​​​” ដោយ​​​មន្ត្រី​​​មាន​​​ភារ​​​កិច្ច​នៅ​​​មណ្ឌល​​​នេះ។

នាយក​​​គ្រប់​​​គ្រង​​​លោក​​​ស្រី សាម៉ារ៉ា ​​​ស៊ីហាតា​​​ បាន​​​និយាយ​​​កាលពី​​​ម្សិលមិញ​​​ថា អង្គការ​​​បណ្តាញ​​​ស្ត្រី​​​រួប​​​រួម​​​គ្នា​​​ (WNU) ដែល​​​គ្រប់​​​គ្រង​​​ភាគ​​​ច្រើន​​​ដោយ​​​អ្នក​​​រក​​​ស៊ីផ្លូវ​​​ភេទ​​​​​​បច្ចុប្បន្ន​​​ និង​​​អតីត​​​អ្នក​​​រកស៊ី​​​ផ្លូវ​​​ភេទ​​​ បាន​​​ជួយ​​​ឲ្យ​​​មាន​​​ការ​​​​​​ដោះ​​​លែង​​​ស្ត្រី​​​រក​​​ស៊ី​​​ផ្លូវ​​​ភេទ​​​២៧៤​​​ នាក់​​​ពី​​​មណ្ឌល​​​ឃុំ​​​ខ្លួន​​​នោះ​​​កាលពី​​​ឆ្នាំ​​​មុន។

ក្នុង​​​ឯកសារ​​​ព័ត៌មាន​​​មួយ​​​ដែល​​​ចេញ​​កាល​​​ពី​​​ខែ​​​មុន ដោយ​​​ផ្អែក​​​លើ​​​បទ​​​សម្ភាសន៍​​​ជា​​​មួយ​​​អ្នក​​​រក​​​ស៊ី​​​ផ្លូវ​​​ភេទ​​​ប្រហែល​​​៣០០​​​នាក់​​​ក្នុង​​​ក្រុង​​​ភ្នំពេញ​​​​​​ អង្គការ​​​ស្ត្រី​​​រួប​​​រួម​​​គ្នា​​​បាន​​​ឲ្យ​​​ដឹង​​​ថា អ្នក​​​រក​​​ស៊ី​​​ផ្លូវ​​​ភេទ​​​តាម​​​​​ដង​​​​ផ្លូវ​​​បាន​​​រាយ​​​ការណ៍​​​ថា ត្រូវ​​គេ​​​ចាប់​​​ខ្លួន​​​៨​​​ទៅ​​​៩​​​ដង​​​ក្នុង​​​មួយ​​​ ​​​ឆ្នាំ​​​ជា​​​មធ្យម។ ពួកគេ​​​៨០​​​ភាគ​​​រយ​​​ដែល​​​ត្រូវ​​​បាន​​​សាក​​​សួរ​​​បាន​​​រាយការណ៍​​​ថា”ត្រូវ​​​រំលោភ​​​បំពាន” ដោយ​​​មន្ត្រី​​​នគរបាល​​​ ទាំង​​​រាង​​​កាយ​​​ទាំង​​​ផ្លូវ​​​ភេទ។

ដោយ​​​ទាក់​​​ទង​​​កាល​​​ពី​​​ម្សិល​​​មិញ​​​ លោក​​​គួច ​​​ចំរើន​​​ អភិបាល​​​ខណ្ឌ​​​ដូន​​​ពេញ​​​បាន​​​បដិសេធ​​​ ទាំង​​​ខឹង​​​ថា ​​​នគរ​​​បាល​​​របស់​​​លោក​​​មិន​​​បាន​​​រំលោភ​​​បំពាន​​​អ្នក​​​រក​​​ស៊ី​​​ផ្លូវ​​​ភេទ​​​ទេ អំឡុង​​​ពេល​​​ចុះ​​​បោស​​​សម្អាត​​​ជា​​​ប្រចាំ​​​តាម​​​ដង​​​ផ្លូវ​​ដែល​​​ក៏​​​ផ្តោត​​​គោលដៅ​​​លើ​​​ជនអនាថា និង​​​អ្នក​​​ញៀន​​​ថ្នាំ​​​ដែរ​​​នោះ​​​ ប៉ុន្តែ លោក​​​បាន​​​និយាយ​​​ ថា ប្រសិន​​​​​​បើ​​​ការ​​​ចោទ​​​ប្រកាន់​​​ណា​​​មួយ​​​អាច​​​បញ្ជាក់​​​ថា​​​ពិត​​​នោះ​​​ មន្ត្រី​​​ល្មើស​​​នឹង​​​ត្រូវ​​​ដាក់​​​ទោស​​​ទណ្ឌ។

លោក​​​បាន​​​និយាយ​​​ថា “សូម​​​បង្ហាញ​​​ភ័ស្តុ​​​តាង​​​មក។ សូម​​​ឲ្យ​​​អ្នក​​​ដែល​​​ចោទ​​​ប្រកាន់​​​ប្តឹង​​​យើង​​​មក។ យោង​​​តាម​​​ច្បាប់​​​ ប្រជា​​​ពលរដ្ឋ​​​មាន ​​​សិទ្ធិ​​​ប្តឹង​​​ ប៉ុន្តែ ត្រូវ​​​មាន​​​ភ័ស្តុ​​​តាង​​​គ្រប់​​​គ្រាន់”។

លោក​​​ គួច ចំរើន បាន​​​បន្ថែម​​​ថា ​​​ដោយ​​​សារ​​​ការ​​​ផ្តល់​​​សេវា​​​ផ្លូវ​​​ភេទ​​​នៅ​​​តាម​​​ទី​​​សាធារណៈ​​​បាន​​​រំលោភ​​​មាត្រា​​​២៤​​​នៃ​​​ច្បាប់​​​ស្តីពី​​​ការ​​​បង្ក្រាប​​​ការ​​​ជួញ​​​ដូរ​​​មនុស្ស​​​ និង​​​ការ​​​កេង​​​ប្រវ័ញ្ច​​​ផ្លូវ​​​ភេទ នគរ​​​បាល​​​មាន​​​សិទ្ធិ​​​ចាប់​​​ខ្លួន​​​អ្នក​​​រក​​​ស៊ី​​​ផ្លូវ​​​ភេទ​​​តាម​​​ផ្លូវ។

ក្រៅ​​​តែ​​ពី​ចាប់​​​និង​​​ចោទ​​​​​​ប្រកាន់​​​អ្នក​​​រក​​​សីុ​​​ផ្លូវ​​​ភេទ នគរបាល​​​ជា​​​រឿយៗ​​​តែងតែ​​​​​​បញ្ជូន​​​ពួកគេ​​​ទៅ​​​ព្រៃ​​​ស្ពឺ ដែល​​​ជា​​​ផ្លូវ​​​ការ​​គេ​ហៅ​​​ថា ​​​មណ្ឌល​​​បណ្តុះ​​​បណ្តាល​​​វិជ្ជាជីវៈ​​​ពោធិ៍​​​សែន​​​ជ័យ បើ​​​ទោះ​​​ជា​​​មិន​​​មាន​ការ​​​បណ្តុះ​​​បណ្តាល​​​វិជ្ជាជីវៈ​​​ក៏​​​ដោយ។ បុគ្គលិក​នៅ​​​មណ្ឌល​​​នោះ​​​​​បាន​​​ទទួល​​​រង​​​ការ​​​ចោទ​​​ប្រកាន់​​​ជាយូរ​​​មក​​​ហើយ​​​ថា បាន​​​ប្រព្រឹត្ត​​​ការ​​​​​រំលោភ​​​បំពាន​​​ទាំង​​​​​​ផ្លូវ​​​ភេទ​​​ទាំង​​​ផ្លូវ​​​កាយ​លើ​​​អ្នក​​​ជាប់​​​ឃុំ។

យោងតាម​​​លោក អំ សំអាត អ្នក​​​គ្រប់​​​គ្រង​​​​​​បច្ចេកទេស​​​នៅ​​​អង្គការ​​​សិទ្ធិ​​​មនុស្ស​​​លីកាដូ​​​បាន​​​ឲ្យ​​​ដឹង​​​ថា ដោយសារ​​​អ្នក​​​រក​​​ស៊ី​​​ភ្លូវ​​​ភេទ​​​ដែល​​​ជាប់​​​ឃុំ​​​នៅ​​​ព្រៃ​​​ស្ពឺ​​​មិន​​​ទទួល​​​បាន​​​នីតិ​​​វិធី​​​ត្រឹមត្រូវ​​​តាម​​​ច្បាប់ ឬ​​​ប្រឈម​​​នឹង​​​ការ​​​កាត់​​​ក្តី​​​ក្នុង​​​តុលាការ​​​នោះ ការ​​​ឃុំ​​​ខ្លួន​​​ពួកគេ​​​គឺ​​​ខុស​​​ច្បាប់។

លោក​​​បាន​​​និយាយ​​​ថា “ជា​​​ការ​​​រំលោភ​​​សិទ្ធិ​​​ របស់​​​ពួកគេ​​​ធ្ងន់ណាស់ ហើយ​​​ផ្ទុយ​​​នឹង​​​ច្បាប់ ​​​នៅ​​​ពេល​​​ដែល​​​អាជ្ញាធរ​​​ចាប់​​​ពួកគេ​​​ឃុំ​​​ខ្លួន​​​ដោយ​​​មិន​​​ធ្វើ​​​តាម​​​នីតិវិធី​​​តុលាការ​​​នោះ”។

អ្នក​​តស៊ូ​​​មតិ​​​ផ្សេង​​​ទៀត​​​បាន​​​បញ្ជាក់​​​ថា ​​​អំពើ​​​ ពុករលួយ​​​និង​​​ការ​​​ខ្លាច​​​អាជ្ញាធរ​​​នឹង​​​ធ្វើ​​​ឲ្យ​​​លទ្ធ​​​ភាព​​​ប្តឹង​​​ចំពោះ​​​មន្ត្រី​​​រលាយ​​​បាត់​​​ទៅ​​​វិញ។

លោក ហួន ចាន់ឌី ប្រធាន​​​មជ្ឈមណ្ឌល​​​អប់រំ​​​ច្បាប់​​​សម្រាប់​​​សហគមន៍ ​​​និយាយ​​​ថា ​​​”ជន​​​រងគ្រោះ​​​ពិបាក​​​នឹង​​​ប្តឹង​​​មន្ត្រី​​​អនុវត្ត​​​ច្បាប់”។

លោក​​​បាន​​​និយាយ​​​ថា “តុលាការ​​​មិន​​​បាន​​​បង្ហាញ​​​នូវ​​​ការ​​​ប្តេជ្ញា​​​ណាមួយ​​​ថា​​​នឹង​​​ធ្វើ​​​ដោយ​​​អព្យាក្រឹត ឬ​​​យក​​​ជន​​​រំលោភ​​​សិទ្ធិ​​​មនុស្ស​​​មក​​​កាត់​​​ទោស​​​នោះ​​​ទេ”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស