នគរបាលខេត្តពោធិ៍សាត់បាននិយាយថ្ងៃនេះថា មានមនុស្ស៥នាក់បានស្លាប់ និង២៤នាក់ផ្សេងទៀតរងរបួស នៅពេលដែលរថយន្តក្រុងដឹកអ្នកដំណើរមួយគ្រឿងបុកចំពីចំហៀងរថយន្តដឹកអង្ករនៅម៉ោង១២យប់មិញនេះនៅតាមផ្លូវជាតិលេខ៥ ក្នុងភូមិត្រពាំងរំដេញ ឃុំក្បាលត្រាច ស្រុកក្រគរ។
លោក ឯម រុន អធិការស្រុកក្រគរ បាននិយាយថា គ្រោះថ្នាក់នេះបានកើតឡើង នៅពេលដែលរថយន្តក្រុងរស្មីក្រុងភ្នំពេញមួយគ្រឿងបើកបរពីក្រុងភ្នំពេញឆ្ពោះទៅខេត្តបាត់ដំបងបានបែកកង់ក្រោយទាំងពីរនៅខាងឆ្វេង ហើយក៏រេចង្កូតទៅបុករថយន្តដឹកអង្ករដែលធ្វើដំណើរពីខេត្តបាត់ដំបងមកក្រុងភ្នំពេញ ដោយបណ្តាលឲ្យមនុស្សម្នាក់ស្លាប់នៅនឹងកន្លែង។
លោក ឯម រុន បាននិយាយថា “នៅកន្លែងកើតហេតុមានស្លាប់ម្នាក់ ហើយបួននាក់ទៀតបានស្លាប់នៅមន្ទីរពេទ្យបង្អែកខេត្តពោធិ៍សាត់ គឺមានស្ត្រី២នាក់ និងប្រុស៣នាក់”។
លោកអធិការស្រុកក្រគររូបនេះបាននិយាយថា ក្នុងបណ្តាអ្នករបួសទាំង២៤នាក់ មាន៧នាក់ទទួលរងរបួសធ្ងន់ ហើយកំពុងទទួលការព្យាបាលនៅក្នុងមន្ទីរពេទ្យបង្អែកខេត្តពោធិ៍សាត់។
កាលពីថ្ងៃទី៨ ខែមករា មានមនុស្ស៦នាក់បានស្លាប់នៅលើកំណាត់ផ្លូវលេខ៥ នៅក្នុងឃុំអន្សាចំបក់ ស្រុកក្រគរ នៅពេលដែលរថយន្តស៊ីតែនសាំងបានបុកជាមួយរថយន្តទួរីសមួយគ្រឿងដែលដឹកអ្នកដំណើរឆ្ពោះទៅខេត្តសៀមរាប។
យោងតាមរបាយការណ៍អគ្គស្នងការនគរបាលជាតិឲ្យដឹងថា ក្នុងឆ្នាំ២០១៥ មានមនុស្សរងគ្រោះដោយគ្រោះថ្នាក់ចរាចរណ៍ចំនួនសរុប ៩.៧៧៥នាក់ ក្នុងនោះបណ្តាលឲ្យស្លាប់ចំនួន២.២៦៥នាក់ និងរងរបួសចំនួន៧.៥១០នាក់៕