ក្រុមមន្ត្រីបាននិយាយថា កាលពីម្សិលមិញ នគរបាលខេត្តសៀមរាបបានចាប់ខ្លួនកម្មករសំណង់ម្នាក់ពីបទប៉ុនប៉ងរំលោភក្មេងស្រីអាយុ១០ឆ្នាំម្នាក់ដែលគេជឿថា ជាគោលដៅ ដោយសារនាងជាមនុស្សគ និងស្វិតដៃជើង។
លោក ទិត្យ ណារ៉ុង អធិការនគរបាលក្រុង សៀមរាបបានមានប្រសាសន៍ថា ជនសង្ស័យឈ្មោះ ឈិន វុទ្ធី អាយុ៣៤ឆ្នាំ បានលបចូលផ្ទះរបស់ក្មេងស្រីរូបនេះស្ថិតក្នុងសង្កាត់គោកចក កាលពីរំលងអធ្រាត្រឈានចូលព្រឹកម្សិលមិញ បន្ទាប់ពីផឹកស៊ីនៅពេលយប់នៅផ្ទះរបស់ខ្លួនក្បែរនោះ។
លោកបានថ្លែងថា “ជននេះបានទៅផ្ទះជនរងគ្រោះ ហើយបានព្យាយាមចាប់រំលោភនាងនៅម៉ោងប្រហែល៣រំលងអធ្រាត្រ។ ជនសង្ស័យរូបនេះគិតថា ដោយសារនាងគ និងមានជំងឺស្វិតដៃជើងទៀតនោះ ក្រុមគ្រួសារនាងមិនដឹងឡើយ”។
លោកបានមានប្រសាសន៍ថា “នៅពេលជនសង្ស័យរូបនេះព្យាយាមដោះសម្លៀកបំពាក់របស់នាង នាងបានប្រឹងរើបម្រះគេចចេញ។ ពេលនោះឪពុកម្តាយរបស់នាងបានឮសំឡេង ហើយភ្ញាក់ឡើង”។
លោកបានបន្ថែមថា ឪពុកម្តាយជនរងគ្រោះបានចាប់ជនសង្ស័យរូបនេះទុករហូតដល់នគរបាលសង្កាត់មកដល់។ លោក ទិត្យ ណារ៉ុង បានមានប្រសាសន៍ថា ជននេះត្រូវបានបញ្ជូនទៅការិយាល័យប្រឆាំងការជួញដូរមនុស្សខេត្តសៀមរាបកាលពីយប់មិញ។
លោក ដួង សុខា នាយនគរបាលព្រហ្មទណ្ឌខេត្តបានមានប្រសាសន៍ថា ជនសង្ស័យរូបនេះនឹងត្រូវបញ្ជូនទៅតុលាការនៅថ្ងៃនេះ ដែលគេរំពឹងថា នឹងត្រូវចោទប្រកាន់ពីបទប៉ុនប៉ងរំលោភ៕សារុន