អាជ្ញាធរខេត្តមណ្ឌលគិរីបានឲ្យដឹងថា ពួកគេកំពុងស្វែងរកអ្នកដែលបានដុតបំផ្លាញឈើជាច្រើនគំនរកាលពីថ្ងៃព្រហស្បតិ៍សប្តាហ៍ មុននៅក្នុងក្រុមហ៊ុនចម្ការកៅស៊ូ Binh Phuoc 1 ដែលអ្នកភូមិក្នុងមូលដ្ឋានបានចោទប្រកាន់ថា ជាប់ពាក់ព័ន្ធនៅក្នុងការជួញដូរឈើខុសច្បាប់ដ៏រាលដាលក្នុងតំបន់នេះ។
ការដុតឈើគួរឲ្យសង្ស័យេនះធ្វើឡើងបន្ទាប់ពីការចាប់ផ្តើមបង្ក្រាបរបស់រដ្ឋាភិបាលទៅលើការកាប់ឈើខុសច្បាប់នៅក្នុងប្រទេសកម្ពុជាភាគបូពា៌ដែលគេឃើញអាជ្ញាធរបានចុះទៅពិនិត្យមើលចម្ការកៅស៊ូជាច្រើនដើម្បីស្វែងរកឈើស្តុកទុកគ្មានអាជ្ញាប័ណ្ណ។
លោក ស្វាយ សំអៀង អភិបាលរងខេត្តបានមានប្រសាសន៍កាលពីម្សិលមិញពីការដុតនេះថា “រដ្ឋបាលព្រៃឈើបានចុះទៅពិនិត្យមើលតំបន់នោះកាលពីម្សិលមិញ ដើម្បីរកឲ្យឃើញពីមូលហេតុ និងធ្វើរបាយការណ៍”។
លោកបានថ្លែងថា “ខ្ញុំគិតថា ពាណិជ្ជករមួយក្រុមបានប្រមូលឈើនេះពីក្នុងព្រៃ យកមកទុកនៅទីនោះ បន្ទាប់មកបានដុតបំផ្លាញចោលដើម្បីបំបិទភ័ស្តុតាង”។
លោកបានបន្ថែមថា “យើងមិនទាន់សន្និដ្ឋានថា ក្រុមហ៊ុន Binh Phuoc 1 ដុតឈើនេះនៅឡើយទេ ពីព្រោះក្រុមហ៊ុនមិនមានសិទ្ធិប្រមូលឈើនេះឡើយ។ ក្រុមហ៊ុនផ្សេងទៀតមានអាជ្ញាប័ណ្ណក្នុងការប្រមូលឈើនេះ “។
លោក សារូ រតនា នាយរងរដ្ឋបាលខណ្ឌព្រៃឈើបានមានប្រសាសន៍ថា លោកបានឃើញឈើដែលត្រូវគេដុតពីរបីគំនរអំឡុងពេលលោកចុះទៅពិនិត្យមើលកន្លែងនេះកាលពីថ្ងៃសៅរ៍ ប៉ុន្តែ បានបដិសេធមិននិយាយ លម្អិតទេ។
លោកបានថ្លែងថា “យើងមិនគិតថា ក្រុមហ៊ុន Binh Phuoc 1 បានដុតឈើនេះទេ ពីព្រោះ ពួកគេដឹងថា ពួកគេនឹងប្រឈមចំពោះមុខច្បាប់។ យើងគិតថា ប្រហែលជាអ្នកផ្សេងបានដុតឈើនេះ មិនមែនក្រុមហ៊ុន Binh Phuoc1 ទេ ហើយយើងកំពុងសើុបអង្កេតដើម្បីរកឱ្យឃើញអ្នកដែលជាប់ពាក់ព័ន្ធ”។
លោក ចេង សុវិចិត្រ អ្នកគ្រប់គ្រងចម្ការកៅស៊ូដែលកាន់កាប់ដោយវៀតណាមបាននិយាយថា លោកមិនដឹងពីអ្នកដែលប្រហែល ជាបានដុតឈើនេះទេ។
លោកបានថ្លែងថា “ឈើនេះជាកម្មសិទ្ធិរបស់ក្រុមហ៊៊ុន ដួង ស្រួច ពីព្រោះក្រសួងកសិកម្មបានផ្តល់សិទ្ធិឱ្យក្រុមហ៊ុននេះប្រមូលឈើ” នៅក្នុងចម្ការនេះ។
ទោះជាយា៉ាងណា កាលពីខែសីហា លោក ចេង សុវិចិត្រ បានប្រាប់កាសែត ខេមបូឌា ដេលី ថា ក្រុមហ៊៊ុន ដួង ស្រួច បានផ្ទេរសិទ្ធិទាំងនេះទៅលោក សឹង សំអុល ។
រដ្ឋាភិបាលបានចេញឈ្មោះលោក សឹង សំអុល ថា ជាជនសង្ស័យម្នាក់ក្នុងចំណោមជនសង្ស័យសំខាន់ៗក្នុងការបង្ក្រាបការកាប់ឈើខុសច្បាប់ថ្មីៗបំផុត ដែលបានចាប់ផ្តើមកាលពីថ្ងៃទី១៥ ខែមករា។ ចាប់តាំងពីពេលនោះមកអាជ្ញាធរបានចុះទៅពិនិត្យមើលចម្ការកៅស៊ូ Dai Thanh របស់លោកនៅក្នុងខេត្តមណ្ឌលគិរីដែរ ប៉ុន្តែមិនទាន់ប្រកាសថា តើពួកគេបានរកឃើញឈើណាមួយខុសច្បាប់ឬយ៉ាងណានោះនៅឡើយទេ។
នគរបាលជាតិបានចោទលោក សឹង សំអុល ថា បានលាងឈើតាមរយៈក្រុមហ៊ុនចម្ការកៅស៊ូ Dai Thanh នៅក្នុងរបាយការណ៍មួយដែលបានចុះក្នុងគេហទំព័ររបស់ពួកគេកាលពីដើមខែនេះ ប៉ុន្តែ បានបដិសេធថាមិនមានរបាយការណ៍នោះទេបន្ទាប់ពីដកចេញពីគេហទំព័រវិញរយៈពេលពីរបីថ្ងៃក្រោយមក។
នៅក្នុងបទសម្ភាសន៍កាលពីថ្ងៃទី១៤ ខែមករា លោក សឹង សំអុល បានបដិសេធថា លោកមិនជាប់ពាក់ព័ន្ធការកាប់ឈើខុសច្បាប់ ឡើយ ហើយបានលើកឡើងថា លោកមិនមានមុខជំនួញជាមួយចម្ការកៅស៊ូណាមួយឡើយ លើកលែងតែក្រុមហ៊៊ុន Dai Thanh ដែល លោកបានកាន់កាប់ និងក្រុមហ៊ុន Master Kson ដែលលោកជួលឲ្យរានដីនេះ៕សារុន