យោងតាមក្រុមមន្ត្រីបានឲ្យដឹងថា កសិដ្ឋាន មួយក្នុងខេត្តកំពង់ធំដែលផ្គត់ផ្គង់ក្រុមហ៊ុន Charoen Pokphand ជាក្រុមហ៊ុនកសិឧស្សាហកម្មដ៏ធំមួយរបស់ថៃហៅថា CP បានបោះមាន់ដែលងាប់ដោយឆ្លងជំងឺចំនួន១១.៥០០ក្បាលចូលទៅក្នុងប្រព័ន្ធប្រឡាយមួយកាលពីថ្ងៃអាទិត្យ ដោយបំពុលផ្លូវទឹក និងធ្វើឲ្យគ្រោះថ្នាក់ដល់សត្វពាហនៈក្នុងស្រុកភូមិ។
កាលពីម្សិលមិញ គណៈគ្រប់គ្រងរបស់ក្រុមហ៊ុននេះបានបដិសេធមិនទទួលខុសត្រូវចំពោះហេតុការណ៍ដែលបានកើតឡើង នេះទេ ខណៈក្រុមមន្ត្រីមូលដ្ឋានមិនបានឯកភាពគ្នាទាក់ទិននឹងបញ្ហាថា តើនរណាគួរតែជាអ្នកត្រូវបន្ទោស។
កសិដ្ឋានចិញ្ចឹមមាន់នៅក្នុងក្រុងស្ទឹងសែន គឺជាកម្មសិទ្ធិរបស់អ្នកជំនួញក្នុងស្រុកម្នាក់ឈ្មោះ សៀត សឹម និងគ្រប់គ្រងដោយក្រុមហ៊ុន CP។ កសិដ្ឋាននេះ ជាកន្លែងដែលមានចិញ្ចឹមមាន់ចំនួន១.២០០០ក្បាល មុនពេលមាន់ទាំងអស់លើកលែងតែ៥០០ក្បាលត្រូវគេបោះចូលទៅក្នុងប្រឡាយដែល ត្រូវបានប្រើប្រាស់ដើម្បីស្រោចស្រពស្រែអំឡុងរដូវវស្សា និងជាប្រភពទឹកផឹកសម្រាប់សត្វពាហនៈពេញមួយឆ្នាំ។
លោក តាន់ ម៉េងឆាង ប្រធានការិយាល័យផ្នែកផលិតកម្ម និងបសុព្យាបាលក្រុងស្ទឹងសែនបានលើកឡើងថា អ្នកភូមិបានរាយការណ៍ថា លោក សៀត សឹមបានបោះសត្វមាន់ទាំងនេះទៅក្នុងប្រឡាយដោយខ្លួនលោកផ្ទាល់។
លោកបានមានប្រសាសន៍ថា “អ្នកចិញ្ចឹមមាន់ម្នាក់និយាយថា មានមាន់សរុបចំនួន១២.០០០ក្បាលនៅក្នុងកសិដ្ឋានចិញ្ចឹមមាន់នោះ ហើយមាន់ចំនួន១១.៥០០ក្បាលបានងាប់នៅសល់តែ៥០០ក្បាលប៉ុណ្ណោះ។ខ្ញុំគិតថា ការដែលយកមាន់ងាប់ទៅចោលក្នុងប្រឡាយ វាអាចធ្វើឲ្យជំងឺឆ្លងរាលដាលដល់បក្សីផ្សេងៗទៀត ដល់សត្វពាហនៈ ព្រមទាំងមនុស្សនៅក្នុងតំបន់នោះផងដែរ”។
លោកបានលើកឡើងទៀតថា “ព្រឹកមិញនេះ ខ្ញុំនិងមន្ត្រីផ្សេងៗទៀតបានចុះទៅកសិដ្ឋានចិញ្ចឹមមាន់នោះ ហើយយើងបានស្នើឲ្យអ្នកចិញ្ចឹមមាន់ម្នាក់សម្លាប់មាន់ដែលនៅសេសសល់ហើយដុតវាចោលទាំងអស់”។ លោកបានបន្ថែមថា ក្រុមការងាររបស់លោកនឹងត្រឡប់មកកសិដ្ឋាននេះម្តងទៀតនៅថ្ងៃេនះ ហើយព្យាយាមទប់ស្កាត់ជំងឺនេះតាមរយៈការបាញ់ថ្នាំសម្លាប់មេរោគ។
លោកបានមានប្រសាសន៍ថា “យើងមិនដឹងទេថា តើជំងឺអ្វីដែលបង្កឲ្យមាន់ទាំងនេះងាប់នោះ។ ក្រុមហ៊ុន CP មិនបានសហការ ឬផ្តល់ព័ត៌មានមកឲ្យយើងទេ ប៉ុន្តែ ពួកគេបានប្រាប់ថា ពួកគាត់ [អ្នកចិញ្ចឹមមាន់] គឺជាអ្នកធ្វើឲ្យមានគ្រោះថ្នាក់ដល់មាន់របស់ខ្លួនដោយខ្លួនឯង”។
លោក តាន់ ម៉េងឆាង បានពន្យល់ថា តំណាងក្រុមហ៊ុន CP នៅក្នុងខេត្តកំពង់ធំបានដឹងអំពីបញ្ហាមាន់ងាប់នេះដោយបានយកមាន់មួយក្បាលទៅឲ្យអាជ្ញាធររាជធានីភ្នំពេញ ដើម្បីពិនិត្យនិងវិភាគកាលពីសប្តាហ៍មុនហើយថា ការដែលក្រុមហ៊ុនមិនបានជូនដំណឹងដល់មន្ត្រីមូលដ្ឋានគឺជាការធ្វេសប្រហែស។
លោកបានបន្ថែមថា “កសិដ្ឋានចិញ្ចឹមមាន់នេះគ្មានអាជ្ញាប័ណ្ណទេ ហេតុដូច្នេះវាខុសច្បាប់”។
លោក សៀត សឹម ម្ចាស់កសិដ្ឋានមិនអាចទាក់ទងបានទេ។
លោក ប៊ុន សុវណ្ណារ៉ា អ្នកគ្រប់គ្រងផ្នែកថែទាំសុខភាពមាន់របស់ក្រុមហ៊ុន CP នៅកសិដ្ឋានក្នុងក្រុងស្ទឹងសែនបានបដិសេធថា ក្រុមហ៊ុនរបស់ខ្លួនមិនមែនជាអ្នកត្រូវទទួលខុសត្រូវចំពោះការងាប់ ឬវិធីនៅក្នុងការយកមាន់ទាំងេនះទៅចោលនោះឡើយ។
លោកក៏បានជំទាស់នឹងការអះអាងរបស់មន្ត្រីដែលថា មាន់ចំនួន១១.៥០០ក្បាលត្រូវបានបោះចូលក្នុងប្រឡាយផងដែរ ដោយលើកឡើងថា តួលេខនេះគឺវាស្មើទៅនឹង “មាន់ដែលមានសរុបទូទាំងខេត្ត”។
លោកបាននិយាយថា “មាន់ដែលមន្ទីរបសុសត្វអះអាងថា ងាប់មិនមែនជារបស់ក្រុមហ៊ុន CP ទេ។មាន់ទាំងអស់េនះគឺសុទ្ធតែមានប្រភពចេញពីកសិដ្ឋានរបស់អ្នកភូមិ”។ លោកបានបន្ថែមថា មាន់ប្រហែល៧០០ក្បាលរបស់ក្រុមហ៊ុន CP ត្រូវបានដុតកម្ទេចចោល”ប៉ុន្មានសប្តាហ៍មុន” បន្ទាប់ពីបានងាប់ដោយសារជំងឺរាករូស និងបញ្ហាផ្លូវដង្ហើម។
លោកបាននិយាយទៀតថា “នៅឯក្រុមហ៊ុន CP យើងមានមាន់ប្រហែល៥.០០០ក្បាល [នៅកសិដ្ឋាន] ។ នៅឯកសិដ្ឋាននោះ មាន់របស់យើងបានចាប់ផ្តើមងាប់នៅពាក់កណ្តាលខែធ្នូ។រហូតមកទល់ពេលនេះ យើងបានសម្លាប់ និងដុតកម្ទេចចោលអស់ប្រហែល៧០០ក្បាលមកហើយ។
លោក ហុង សុផាន់ណា ប្រធានការិយាល័យនៅមន្ទីរកសិកម្មក្រុងស្ទឹងសែន បានលើកឡើងថា ដោយសារក្រុមហ៊ុនCP ជាអ្នកគ្រប់គ្រងកសិដ្ឋានចិញ្ចឹមមាន់ អ៊ីចឹងក្រុមហ៊ុននេះត្រូវតែទទួលខុសត្រូវចំពោះការធ្វើឲ្យប៉ះពាល់ដល់សុខភាពសាធារណៈ។
ទោះជាយ៉ាងណា លោក ម៉ុក យូថាណា អនុប្រធានមន្ទីរកសិកម្មខេត្តបានលើកឡើងថា លោកជឿថាក្រុមហ៊ុន CP គ្មានកំហុសទេ។ លោកបានថ្លែងថា “គឺម្ចាស់កសិដ្ឋានឈ្មោះ[សៀត សឹម] ទេដែលជាអ្នកយកមាន់ងាប់ទៅបោះចោលក្នុងប្រឡាយ។ ក្រុមហ៊ុន CP មិនមែនជាអ្នកដែលយកមាន់ងាប់ទៅចោល ក្នុងប្រឡាយទេ ហេតុដូច្នេះក្រុមហ៊ុនCP មិនបានធ្វើអ្វីខុសឡើយ”។លោកបានគូសបញ្ជាក់ថា ម្ចាស់កសិដ្ឋានរូបនេះមិនអាចពិន័យតាមច្បាប់ដែលមានស្រាប់នោះឡើយ។
លោកបានមានប្រសាសន៍ថា “ប៉ុន្តែ យើងអាចអប់រំគាត់ ហើយណែនាំគាត់កុំឲ្យធ្វើរឿងដដែលទៀតនៅថ្ងៃក្រោយ”។
អនុប្រធានមន្ទីររូបនេះបានបន្ថែមថា មាន់ទាំងនេះប្រហែលជាមិនបានឆ្លងជំងឺទាល់តែសោះ។ “ ខ្ញុំមិនអាចសន្និដ្ឋានថា ជំងឺគឺជាមូលហេតុដែលធ្វើឲ្យមាន់ងាប់នោះឡើយ។ក្នុងករណីខ្លះ មាន់ក៏អាចងាប់ដែរ ពេលអាកាសធាតុផ្លាស់ប្តូរ”៕ ស៊ុយឈាង (រាយការណ៍បន្ថែមដោយ សេក ឧត្តម)