នារីម្នាក់ត្រូវបាននគរបាលមកពីនាយកដ្ឋានសន្តិសុខផ្ទៃក្នុងនៃក្រសួងមហាផ្ទៃ ឃាត់ខ្លួនកាលពីម្សិលមិញ ចំពោះការបង្ហោះរូបភាពមួយតាមហ្វេសប៊ុកដែលបានអះអាងថា លោក ហ៊ុន សែន ស្លាប់បន្ទាប់ពីត្រូវបណ្ដាសានៅក្នុងឆ្នាំ២០១៤។
នគរបាលនិយាយថា ប៉ុន្មានម៉ោងក្រោយមក នាងត្រូវបានដោះលែងវិញ បន្ទាប់ពីពួកគេកំណត់ថា គណនីហ្វេសប៊ុករបស់នាងត្រូវគេហ៊ែក (Hack)។
យោងតាមលោក ម៉េង ហេងទិត្យ នាយការិយាល័យសន្តិសុខផ្ទៃក្នុងនៃស្នងការដ្ឋាននគរបាលរាជធានីបានឲ្យដឹងថា នារីឈ្មោះដែត ម៉េងគាង អាយុ៣០ឆ្នាំ ត្រូវចាប់ខ្លួនក្នុងខណ្ឌមានជ័យ រាជធានីភ្នំពេញ វេលាម៉ោងប្រហែល៨និង៣០នាទីព្រឹក។
លោកមានប្រសាសន៍ថា ”នាងត្រូវបានបញ្ជូនខ្លួនទៅសាកសួរនៅនាយកដ្ឋានសន្តិសុខផ្ទៃក្នុងនៃក្រសួងមហាផ្ទៃ” ដោយបកស្រាយថា នគរបាលបានកំណត់អត្តសញ្ញាណ ដែត ម៉េងគាង ថាជាម្ចាស់គណនីហ្វេសប៊ុក “Kim Bopha” ដែលបានបង្ហោះសេចក្តីជូនដំណឹងមរណភាពក្លែងក្លាយនេះ។
យោងតាមរូបភាពផ្ទាំងស្គ្រីនដែលត្រូវបានចែកចាយតៗគ្នាតាមអុីនធឺណិត សារដែលបង្ហោះកាលពីថ្ងៃទី១៧ ខែមករានេះបានដាក់ចំណងជើងថា ”ដំណឹងមរណភាព” ហើយមានខ្លឹមសារដូច្នេះថា “ ខ្មោច ហ៊ុន សែន ងាប់នៅក្នុងមន្ទីរពេទ្យមួយនៃប្រទេសសិង្ហបុរី ដោយសារត្រូវបណ្ដាសាប្រជាពលរដ្ឋខ្មែរឆ្នាំ២០១៤”។ នៅពីក្រោមពាក្យទាំងនេះមានរូបភាពលោក ហ៊ុន សែន ដែលទំនងជាដេកក្នុងក្ដារមឈូស។
លោក សារ៉ាន់ កំសត់ អ្នកនាំពាក្យនគរបាលជាតិមានប្រសាសន៍ថា ដែត ម៉េងគាង ត្រូវបានដោះលែងវិញនៅម៉ោងប្រហែល៤រសៀល បន្ទាប់ពីសាកសួរពេញមួយថ្ងៃ និងក្រោយពីនាងបានបញ្ចុះបញ្ចូលអ្នកស៊ើបអង្កេតឲ្យជឿថា នាងមិនមែនជាអ្នកបង្ហោះសារនោះ។
ឧត្ដមសេនីយ៍ឯក សារ៉ាន់ កំសត់ បានលើកឡើងតាមរយៈសារក្នុងកម្មវិធី WhatsApp នៅពេលល្ងាចថា “នាងត្រូវបានអនុញ្ញាតឲ្យត្រឡប់ទៅផ្ទះវិញហើយ។ ឈ្មោះរបស់នាង [នៅលើហ្វេសប៊ុក] មានអ្នកហ៊ែក និងប្រើប្រាស់”។
ពេលសួរថា តើនគរបាលរកឃើញដោយវិធីណាថា គណនីហ្វេសប៊ុករបស់នាងត្រូវបានគេហ៊ែកនោះ លោក សារ៉ាន់ កំសត់ បានឆ្លើយថា ពួកគេគ្រាន់តែទទួលយកការនិយាយការពារខ្លួនរបស់នារីរូបនេះប៉ុណ្ណោះ ហើយពេលនេះនឹងចាប់ផ្ដើមស្រាវជ្រាវវែកមុខរកអ្នកដែលហ៊ែក។
អ្នកនាំពាក្យរូបនេះលើកឡើងបន្ថែមទៀតថា ”នេះគឺយោងតាមចម្លើយរបស់នាង។ សមត្ថកិច្ចនឹងបន្តស្រាវជ្រាវវែកមុខពិរុទ្ធជនពិត។ ពេលយើងមិនទាន់រកឃើញភ័ស្តុតាងថ្មី យើងត្រូវស្ដាប់ចម្លើយរបស់នាង”។
នៅមុននេះក្នុងថ្ងៃដដែល លោក សារ៉ាន់ កំសត់ បកស្រាយតាមទូរស័ព្ទថា ដែត ម៉េងគាង បានបង្ហោះសារដែលមិនអាចទទួលយកបាននេះតាមបណ្ដាញទំនាក់ទំនងសង្គម។ ”នេះមិនមែនជាការរិះគន់ស្ថាបនាទេ។ នេះជាការប្រមាថដល់ប្រមុខរដ្ឋាភិបាលដែលប្រជាពលរដ្ឋបោះឆ្នោតគាំទ្រ”។
សូមបញ្ជាក់ថា ដែត ម៉េងគាង គឺជាគោលដៅថ្មីបំផុតនៃយុទ្ធនាការមួយដែលលោក ហ៊ុន សែន បានប្រកាសកាលពីថ្ងៃទី២៨ ខែធ្នូ ប្រឆាំងអ្នករំខានយាយីលោកតាមបណ្ដាញទំនាក់ទំនងសង្គមដែលក្នុងនោះទំព័រហ្វេសប៊ុករបស់លោកមានអ្នក “ចូលចិត្ត” (Like) លើស២លានកាលពីយប់មិញ។
លោក ហ៊ុន សែន បានព្រមានអ្នកលេងហ្វេសប៊ុកកុំឲ្យប្រមាថលោក ឬគ្រួសាររបស់លោកតាមប្រព័ន្ធអុីនធឺណិតថា ”បើខ្ញុំចាត់វិធានការលើអ្នកឯង យើងនឹងចាប់ [អ្នកឯង] បានក្នុងរយៈពេល៧ម៉ោង”។
ចាប់តាំងពីពេលនោះមក លោកបានធ្វើដូចពាក្យសម្ដីរបស់លោកមែន ដោយកាលពីដើមខែនេះ នគរបាលបានចាប់ខ្លួនកសិករម្នាក់មកពីគ្រួសារមួយដែលគាំទ្រគណបក្សប្រជាជនកម្ពុជា យ៉ាងប្តូរផ្តាច់នៅក្នុងខេត្តកំពង់ធំ ចំពោះការប្រមាថលោក និងការផ្ញើសារគំរាមធ្វើឃាតលោកតាមហ្វេសប៊ុក។
កាលពីថ្ងៃសុក្រ លោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រីដែលជាប្រធាននាយកដ្ឋានប្រឆាំងភេរវកម្មនៃក្រសួងការពារជាតិ ក៏បានប្រកាសដែរថា លោកនឹងប្ដឹងលោក ឆាំ ឆានី (Chham Chhany) ដែលបានប្រើប្រាស់ហ្វេសប៊ុកដើម្បីចោទប្រកាន់លោក និងម្ដាយលោកថាមានទំនាក់ទំនងនឹងពាណិជ្ជកម្មឈើប្រណីតខុសច្បាប់។
នៅក្នុងករណីមួយទៀតកាលពីសប្តាហ៍មុន ក្រសួងមហាផ្ទៃបានស្នើឲ្យនគរបាលអាំងទែប៉ូលជួយចាប់ខ្លួន “ពលរដ្ឋខ្មែរម្នាក់រស់នៅបរទេស” ដែលរដ្ឋាភិបាលជឿថាជាអ្នកកាត់តរូបភាពលោកស្រី ប៊ុន រ៉ានី ភរិយារបស់លោក ហ៊ុន សែន ក្នុងកាយវិការឈរកន្ធែកជើងបែបមិនសមរម្យ៕ សុខុម