លោក ចន ឃើរី ​​​ចាប់​ផ្ដើម​ទស្សនកិច្ច​ការ​ទូត​​​រយៈ​ពេល​ខ្លី​​នៅ​​​​​កម្ពុជា​​

លោក ចន ឃើរី ​រដ្ឋមន្ត្រី​ការ​បរទេស​​សហ​​​រដ្ឋអាមេរិក បាន​​​​​​ធ្វើ​​​​​​ដំណើរ​​​មក​ដល់​កាល​ពី​ល្ងាច​ម្សិលមិញ ដើម្បីចាប់​ផ្ដើម​​​ទស្សនកិច្ច​រយៈ​​ពេល​២៤​ម៉ោង​មក​កាន់​ប្រទេស​កម្ពុជា ហើយ​​​អំឡុង​ពេល​នេះ ​លោក​គ្រោង​​ជួប​ជាមួយ​លោក​​​​នាយក​រដ្ឋមន្ត្រី ហ៊ុន សែន លោក កឹម សុខា អនុប្រធាន​គណបក្ស​ប្រឆាំង និង​ថ្នាក់​ដឹកនាំ​សង្គម​ស៊ីវិល​​មួយ​ចំនួន​ទៀត​​។

​​​ដោយ​​​ចេញ​​​ដំណើរ​​​​តាម​​​ជើង​​​​​ហោះ​​​ហើរ​​​​​​ពី​ប្រទេស​ឡាវ​ បន្ទាប់ពី​​​ធ្វើ​ទស្សនកិច្ច​​​ ​​​និង​​​ជួប​ជាមួយ​ថ្នាក់​ដឹកនាំ​រដ្ឋាភិបាល​នៅ​ទីនោះ លោក ចន ឃើរី គ្រោង​​​​ជួប​ពិភាក្សា​ជាមួយ​លោក ហ៊ុន សែន និង​លោក ហោ ណាំហុង ​រដ្ឋមន្ត្រី​ក្រសួង​ការ​បរទេស​​​​​ដើម្បី​​​​​​ពិភាក្សា​​​​​​អំពី​ឲ្យ​មាន​ចរាចរណ៍​ចេញ​ចូល​។ សមាជិក​នៃ​កង​អង្គរក្ស​​​របស់​នាយក​រដ្ឋមន្ត្រី​ និង​​​ភ្នាក់ងារ​​​ស៊ើប​​​​​ការណ៍​​​​សម្ងាត់​ ​​​ចាំ​​​​​​​យាម​​​​​​ការ​​​ពារ​​​នៅ​ច្រក​ចូល​​​ភោជនីយ​​​ដ្ឋាន​។

ទោះ​ជា​យ៉ាង​ណា មុន​ពេល​ចូល​ទៅ​កាន់​​ភោជនីយ​ដ្ឋាន លោក ចន ឃើរី បាន​​ឈប់​​​​មួយ​​​ភ្លែត​​​​​​ដើម្បី​ថតរូប​ជាមួយ​​ភ្ញៀវទេសចរ​ និង​​​​​​​​​ពល​​​រដ្ឋ​​​​​​ក្នុង​​​ស្រុក​​​ដែល​ដើរ​តាម​មាត់​ទន្លេ។

ខណៈ​​​ស្ថាន​​​ទូត​​​សហរដ្ឋ​​​អាមេរិក​​​​​​មិន​​​បាន​​​និយាយ​​​ពី​អ្វី​​​ដែល​​​ លោក ចន ឃើរី​ ​​​នឹង​​​ពិភាក្សា​​​ពេល​លោក​​​នៅ​​​ទី​​​នេះ កាល​​​ពី​​​ម្សិល​មិញ​​​ក្រសួង​​​ការបរទេស​​​សហរដ្ឋ​​​អាមេរិក​​​បាន​​​​ចេញ​​​ប្រតិចារឹក​​​ស្តី​​​ពី​កិច្ច​​​ប្រជុំ​​​មួយ​​​កាល​​​ពី​​​ថ្ងៃ​​​អាទិត្យ​​​ រវាង​​​ “មន្ត្រី​​ក្រសួង​​​ការបរទេស​​​ជាន់​​​ខ្ពស់”​ ដែល​​​គេ​​​មិន​​​បញ្ចេញ​​​ឈ្មោះ​​​មួយ​​​រូប​​​និង​​​ក្រុម​​​អ្នក​​​កាសែត​​​ពាក់​​​ព័ន្ធ​​​ដំណើរ​​​បំពេញ​​​ទស្សនកិច្ច​​​របស់​​​លោក ចន ឃើរី មក​​​កាន់​​​ប្រទេស​​​ឡាវ កម្ពុជា និង​​​ចិន​​​។

មន្ត្រី​​​ជាន់​​​ខ្ពស់​​​រូប​​​នេះ​​​បាន​​​ប្រៀបធៀប​​​ឥទ្ធិពល​​​របស់​​​ចិន​​​នៅ​​​ក្នុង​​​ប្រទេសកម្ពុជា​​​ និង​​​ប្រទេស​​​ឡាវ​​​​​​ដោយ​​​ចាត់​​​ទុក​​​ប្រទេស​​​ចិន​​​ថា ​ជា​​​ ”តួអង្គ​​​ដ៏​​​សំខាន់លើសលប់​​ទាំង​​​នៅ​​​ក្នុង​​​លក្ខខណ្ឌ​​​សេដ្ឋកិច្ច និងលក្ខខណ្ឌ​​​​នយោបាយ​​​”។

​​​មន្ត្រ​ី​​​រូប​​​នេះ​​​ក៏​​​បាន​​​លើក​​​ឡើង​​​​ពី​​​ “ក្តី​​​ព្រួយ​​​បារម្ភ” អំពី​​​ស្ថាន​​​ភាពនយោបាយ​​​នៅ កម្ពុជា​​​ផង​​​ដែរ​​​។ លោក​បាន​​​គូស​​​បញ្ជាក់​​​ថា ” ទំនាក់​​​ទំនង​​​រវាង​​​គណបក្សកាន់​​​អំណាច និង​​​គណ​បក្ស​​​ប្រឆាំង​​​កំពុង​​​តែមាន​​​ភាពតាន​​​តឹង​​​ក្នុង​​​ពេល​​​បច្ចុប្បន្ន​​​”។​ លោក​​​បាន​​​បន្ថែម​​​ថា លោក ​ចន ឃើរី នឹង​​​ជួប​​​ពិភាក្សា​​​ជាមួយ​​​មន្ត្រី​​​គណ​បក្ស​​​ប្រឆាំង​​​ក៏​​​ដូច​​​ជា​​​អង្គការ​​​សង្គម​​​ស៊ីវិល​​​ផង​​​ដែរ​​​ “ដើម្បី​​​សង្កត់​​​ធ្ងន់​​​អំពី​ការ​​​គាំទ្រ​​​​​​របស់​​​សហ​រដ្ឋ​​​អាមេរិក​​​ចំពោះ​​​លទ្ធិប្រជាធិបតេយ្យ​​​នៅ​​​កម្ពុជា​​​ និង​​​ជា​​​ពិសេស​​​ការ​​​គាំទ្រ​​​របស់​​​សហរដ្ឋ​​​អាមេរិក​​​ចំពោះ​​​សិទ្ធិ​​​មនុស្ស​​​ សិទ្ធិ​​​ស៊ីវិល និង​​​បរិយាកាស​​​នយោបាយ​​​”។

កាល​​​ពី​​​ខែ​​​វិច្ឆិកា​​​ ឆ្នាំ​​​២០១០​​​ លោក​​​ស្រី ​ហ៊ីលឡារី គ្លីន​​​តុន ដែល​ជា​រដ្ឋ​​​មន្ត្រី​​​ក្រសួង​​​ការបរទេស​​​នៅ​​​​ពេល​​​នោះ បាន​​​​​​មក​​​បំពេញ​ទស្សនកិច្ចនៅ​​​​​​កម្ពុជា​​​ដែល​​​អំឡុង​​​ពេល​​​នោះ​​​​​​លោក​​​ស្រី​​​ក៏​​​បាន​​​ជួប​​​ពិភាក្សា​​​ជាមួយ​​​​​លោក ​​​ហ៊ុន សែន និង​​​លោក ហោ ណាំហុង​​​ព្រម​​​ទាំង​​​បាន​​​បើក​​​កិច្ច​​សំណេះសំណាល​​​​សំណួរ​​​​​ចម្លើយ​​​ជា​​​មួយ​​​និស្សិត​​​ប្រហែល​​​៦០០នាក់​​​ផង​​​ដែរ​​​។

លោក ចន ឃើរី ត្រូវ​​​បាន​​​គេ​​​រំពឹង​​​ថា នឹង​​​ធ្វើ​​​សេចក្តី​​​ថ្លែងការណ៍​​​ជា​​​សាធារណៈ​​​ទៅ​កាន់​​​​ប្រព័ន្ធ​​​ផ្សព្វ​​​ផ្សាយ​​​នៅ​​​ថ្ងៃ​​​ស្អែក ប៉ុន្តែ កិច្ច​​​ប្រជុំ​​​របស់​​​លោក​​​នឹង​​​ត្រូវ​​​ធ្វើ​​​ឡើង​​​ក្នុង​​​លក្ខណៈ​​​បិទ​​​ទ្វារ​​​៕ សុុខុម និងស៊ុយឈាង​

© 2016, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.