មន្ត្រីនិយាយថា កាលពីថ្ងៃសុក្រសាលាដំបូងខេត្តបាត់ដំបងបានចោទប្រកាន់ និងដាក់ពន្ធនាគារព្រះសង្ឃមួយអង្គព្រះជន្ម៦៨វស្សា ដែលទើបតែបួសកាលពីពេលថ្មីៗនេះ ពីបទរំលោភក្មេងស្រីវ័យ៩ឆ្នាំ ពីរនាក់ជាច្រើនដងនៅក្នុងបន្ទប់របស់ខ្លួននៅវត្តមួយក្នុងស្រុកសំពៅលូន។
លោក ប៊ន វណ្ណារ៉ា ស្នងការរងខេត្តនេះបានមានប្រសាសន៍កាលពីល្ងាចថ្ងៃសុក្រថា ព្រះសង្ឃព្រះនាម ឪ ថន ដែលត្រូវបានចាប់ខ្លួនកាលពីល្ងាចថ្ងៃពុធ និងផ្សឹកនៅព្រឹកបន្ទាប់ ត្រូវបានបញ្ជូនទៅសាលាដំបូងខេត្តដើម្បីរង់ចាំសវនាការជំនុំជម្រះទោស បន្ទាប់ពីការសាកសួរនៅតុលាការ និងទីបំផុតត្រូវបានចោទប្រកាន់។
លោកថ្លែងថា “ជនសង្ស័យបានសារភាពក្នុងតុលាការថា ខ្លួនពិតជាបានរំលោភក្មេងស្រីសិស្សសាលាទាំងពីរនាក់មែន ហើយតុលាការបានចោទប្រកាន់គាត់ពីបទចាប់រំលោភមានស្ថានទម្ងន់ទោស”។
លោកបានបន្ថែមថា អតីតសង្ឃ ឪ ថន គឺជាកសិករនៅក្នុងស្រុកសំឡូត ខេត្តបាត់ដំបង ហើយទើបតែសាងផ្នួសកាលពីជាង១ខែមុនប៉ុណ្ណោះ បន្ទាប់ពីលែងលះប្រពន្ធ។ ”ពេលគាត់ស្នាក់នៅក្នុងវត្ត គ្មានអ្នកណាស្គាល់ឈ្មោះគាត់ទេ ហើយសូម្បីប្រធានភូមិក៏មិនស្គាល់ឈ្មោះគាត់ដែរ”។ លោកបានបន្តថា បុរសចំណាស់រូបនេះមិនបានណែនាំខ្លួនដល់មនុស្សធំណាម្នាក់ឡើយ នៅពេលមកគង់នៅក្នុងវត្តចម្ការតាប៊ុន ឃុំជ្រៃសីមា កាលពី៣សប្ដាហ៍មុន។
លោក លី រុំ អធិការរងស្រុកបានលើកឡើងកាលពីថ្ងៃព្រហស្បតិ៍ថា លោក ឪ ថន បានប្រើប្រាស់ឋានៈរបស់ខ្លួនជាព្រះសង្ឃ រួមជាមួយនឹងនំ និងលុយពីរបីពាន់រៀលដើម្បីល្បួងក្មេងស្រីទាំងពីរឲ្យទៅបន្ទប់របស់ខ្លួននៅក្នុងវត្ត ហើយចាប់រំលោភពួកគេនៅថ្ងៃទី៦ ទី៨ និងទី៩ នៃខែមករា។
ស្ត្រីវ័យ៤៨ឆ្នាំដែលជាម្ដាយរបស់ក្មេងស្រីម្នាក់ក្នុងចំណោមក្មេងស្រីរងគ្រោះទាំងពីរនាក់បាននិយាយកាលពីថ្ងៃសុក្រថា គាត់សប្បាយចិត្តដែលឮថា លោក ឪ ថន ត្រូវបានចោទប្រកាន់ និងដាក់ពន្ធនាគារ ហើយខ្ញុំនឹងមិនស្វែងរកសំណងជាលុយកាក់ទេ។ ស្ត្រីរូបនេះនិយាយទៀតថា “ខ្ញុំសប្បាយចិត្តចំពោះអ្វីដែលតុលាការចោទប្រកាន់ជនសង្ស័យនៅថ្ងៃនេះ។ ពេលនេះខ្ញុំនឹងទុកឲ្យច្បាប់ជាអ្នកចាត់ការ៕ សុខុម