ក្រសួងសុខាភិបាលបានចេញសេចក្ដីប្រកាសព័ត៌មានមួយកាលពីថ្ងៃសុក្រ ដើម្បីក្រើនរំឭកឲ្យប្រជាពលរដ្ឋចេះការពារខ្លួនពីវីរុសហ្ស៊ីកា (Zika) ឆ្លងតាមមូសដែលមានវត្តមានក្នុងប្រទេសកម្ពុជា ជាច្រើនឆ្នាំមកហើយ ប៉ុន្តែទើបតែថ្មីៗនេះប៉ុណ្ណោះដែលគេអះអាងថាវាជាប់ទាក់ទិននឹងពិការភាពពីកំណើតរបស់ទារកនៅអាមេរិកខាងត្បូង។
ជាធម្មតា ជំងឺហ្ស៊ីកាមានអាការៈដូចគ្រុនផ្ដាសាយធម្មតា។ ទោះជាយ៉ាងណា បន្ទាប់ពីការផ្ទុះករណីក្នុងប្រទេសប្រេស៊ីល កាលពីឆ្នាំមុនបានកើតឡើងស្របពេលមានការកើនឡើងយ៉ាងគំហុកនូវទារកដែលកើតមកមានក្បាលតូចខុសពីធម្មតា និងមានខួរក្បាលមិនសូវលូតលាស់ដែលគេឲ្យឈ្មោះថាម៉ៃក្រូសេហ្វាលី (Microcephal) វីរុសនេះបានចាប់ផ្ដើមក្លាយជាព័ត៌មានអន្តរជាតិដែលគេចុះផ្សាយព្រោងព្រាត។
បន្ទាប់ពីរកឃើញថា បុរសជនជាតិថៃ ម្នាក់បានឆ្លងវីរុសហ្ស៊ីកានៅកោះតៃវ៉ាន់ កាលពីសប្ដាហ៍មុន មជ្ឈមណ្ឌលប្រយុទ្ធនឹងជំងឺរបស់តៃវ៉ាន់ (Taiwan Center for Disease Control) បានបង្កើនកម្រិតហានិភ័យរបស់វាសម្រាប់អ្នកធ្វើដំណើរទៅកាន់ប្រទេសចំនួនប្រាំនៅក្នុងតំបន់ រួមទាំងប្រទេសកម្ពុជាផង។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានលើកឡើងក្នុងសេចក្ដីប្រកាសព័ត៌មានកាលពីថ្ងៃសុក្រថា ខណៈមិនចាំបាច់ភ័យស្លន់ស្លោ ប្រជាពលរដ្ឋកម្ពុជា គួរតែចាត់វិធានការទប់ស្កាត់កុំឲ្យមូសខាំ និងចៀសវាងការបង្កើតកន្លែងដែលមូសអាចបង្កកំណើតបាន។
លោកបានលើកឡើងថា “សូមស្លៀកពាក់អាវវែង និងសម្រាន្តក្នុងមុង ក្រសួងសុខាភិបាលនឹងបន្តធ្វើការជូនដំណឹងដល់សាធារណជនអំពីការវិវឌ្ឍរបស់ជំងឺនេះតាមគេហទំព័ររបស់នាយកដ្ឋានប្រយុទ្ធនឹងជំងឺឆ្លងwww.cdcmoh.gov.kh”។
សេចក្ដីប្រកាសព័ត៌មាននេះក៏ជំរុញឲ្យអ្នកដែលបានធ្វើដំណើរទៅប្រទេសនានាទៅអាហ្វ្រិក អាមេរិកខាងត្បូង និងអាមេរិកកណ្ដាលកាលពីពេលថ្មីៗនេះឲ្យស្វែងរកការព្យាបាលភ្លាមៗផងដែរ ប្រសិនបើពួកគេវិវឌ្ឍអាការៈជំងឺពាក់ព័ន្ធនឹងវីរុសហ្ស៊ីកា ដែលរួមមានឈឺក្បាល ឈឺសន្លាក់ កន្ទួលក្រហមលើស្បែក និងភ្នែកក្រហមជាដើម។
សេចក្តីប្រកាសព័ត៌មានដដែលបានបន្តថា “នាពេលបច្ចុប្បន្ន គ្មានវ៉ាក់សាំង ឬការព្យាបាលជាក់លាក់ណាមួយសម្រាប់ជំងឺហ្ស៊ីកានេះទេ”។
លោក ហ្វីលីព ឌូសាត (Philippe Dussart) ប្រធានផ្នែកវិសាណូសាស្ត្រនៅវិទ្្យាស្ថានប៉ាស្ទ័រក្នុងរាជធានីភ្នំពេញ បានលើកឡើងតាមរយៈសារអេឡិចត្រូនិកមួយនៅសប្ដាហ៍នេះថា ជំងឺហ្ស៊ីកា ឬដែលគេហៅថា ហ្ស៊ីខេវី (ZIKV) ដែរនេះ ត្រូវបានរកឃើញនៅកម្ពុជា ក្នុងឆ្នាំ២០១០ ប៉ុន្តែថា វាមិនត្រូវបានចាត់ទុកជាក្តីបារម្ភអំពីសុខភាពសាធារណៈទេនៅពេលនោះ។
លោកបានសរសេរថា “កាលពីពេលថ្មីៗនេះ គ្មានករណីថ្មីណាមួយត្រូវបានរកឃើញទេ។ នៅដំណាក់កាលនេះ វាហាក់ដូចពិបាកខ្លាំងក្នុងការព្យាករអំពីអនាគតនៃវិរុសហ្ស៊ីកាក្នុងប្រទេសកម្ពុជា ពាក់ព័ន្ធការរាលដាលវីរុស និងពាក់ព័ន្ធទម្រង់វេជ្ជសាស្ត្រ ប្រសិនបើជំងឺ ហ្ស៊ីខេវី លេចមុខឡើងវិញ”៕ សុខុម (រាយការណ៍បន្ថែមដោយ Taylor O’Connell)