យោងតាមមន្ត្រីសហជីពបានឲ្យដឹងថា កម្មកររោងចក្រចំនួនប្រាំបីនាក់បានរងរបួសកាលពីម្សិលមិញ នៅតំបន់សេដ្ឋកិច្ចពិសេសមួយកន្លែងក្នុងខេត្តកណ្ដាល បន្ទាប់ពីបុរសរាប់សិបនាក់ប្រដាប់ដោយបំពង់ទីប និងកាំបិតប៉័ងតោ រួមជាមួយសន្តិសុខនៅតំបន់សេដ្ឋកិច្ចពិសេសបានវាយប្រហារពួកគេ។
លោក សៀង រិទ្ធី ប្រធានសម្ព័ន្ធសហជីពសាមគ្គីភាពការងារកម្ពុជា (CLSU) បានលើកឡើងថា ការវាយប្រហារនេះបានកើតឡើង ខណៈកម្មករកាត់ដេរប្រមាណ៦០០នាក់ព្យាយាមឡើងជិះរថយន្តឆ្ពោះមករាជធានីភ្នំពេញ ដើម្បីធ្វើការតវ៉ាប្រឆាំងការបណ្ដេញតំណាងសហជីពមួយរូបចេញពីការងារ។
លោកមានប្រសាសន៍ទៀតថា នៅពេលកម្មករមកពីរោងចក្រ Star Light Apparel Manufacturing នៅតំបន់សេដ្ឋកិច្ចពិសេស 7NG ក្នុងស្រុកខ្សាច់កណ្ដាល កំពុងដើរឆ្ពោះទៅរថយន្ត ក៏ស្រាប់តែសន្តិសុខស្លៀកពាក់ឯកសណ្ឋានប្រហែល១០នាក់ និងអន្ធពាលដែលគេជួលប្រមាណ៣០នាក់ វាយប្រហារពួកគេតែម្ដង។
លោកបានបញ្ជាក់ថា “កម្មករកំពុងត្រៀមឡើងឡាន ប៉ុន្តែក្រុមក្មេងទំនើង និងសន្តិសុខប្រហែល៤០នាក់ជួលដោយតំបន់សេដ្ឋកិច្ចពិសេស 7NG បានជិះម៉ូតូមករាំងផ្លូវកម្មករ ហើយក៏វាយប្រហារពួកគេដោយកំាបិតប៉័ងតោ បំពង់ទីប និងខ្សែក្រវាត់ ហើយបន្ទាប់មកក៏បើកគេចខ្លួនបាត់”។
កម្មករប្រាំបីនាក់បានរងរបួសអំឡុងពេលវាយប្រហារនោះ រួមទាំងលោក សែម សិដ្ឋអាយុ២៧ឆ្នាំ ដែលត្រូវគេកាប់នឹងកាំបិតប៉័ងតោចំខ្នងផងដែរ ហើយពេលនេះកំពុងសម្រាកព្យាបាលនៅគ្លីនិកឯកជនមួយកន្លែង និងមានសភាពធូរស្រាលហើយ ហើយរថយន្តមួយគ្រឿង និងម៉ូតូពីរគ្រឿងដែលជារបស់មន្ត្រីសហជីព ក៏ត្រូវជនដៃដល់ធ្វើឲ្យខូចខាតដែរ។
លោក សៀង រិទ្ធី បានបកស្រាយថា កម្មករទាំងនេះបានគ្រោងធ្វើការតវ៉ាមួយក្នុងរាជធានីភ្នំពេញ ដោយសារជម្លោះដែលកំពុងបន្តកើតមានជាមួយរោងចក្រ Star Light Apparel ដែលបានចាប់ផ្ដើមកាលពីដើមខែមករា នៅពេលរោងចក្រនេះបដិសេធមិនបន្តកិច្ចសន្យារបស់តំណាងសហជីពដ៏មានប្រជាប្រិយភាពម្នាក់ឈ្មោះ ទ្រី សេត្រា។ កម្មករប្រាំពីរនាក់ទៀតត្រូវបានបណ្ដេញចេញពីការងារ បន្ទាប់ពីរោងចក្របានចោទប្រកាន់ពួកគេថា ញុះញង់កម្មករធ្វើកូដកម្មដើម្បីសងសឹក។
លោកបានធ្វើការកត់សម្គាល់ថា “ក្រុមហ៊ុនតែងតែចោទប្រកាន់ ទ្រី សេត្រា ថាញុះញង់កម្មករឲ្យធ្វើការតវ៉ា នៅពេលថៅកែរោងចក្រដាក់សម្ពាធលើកម្មករ និងបង្ខំពួកគេឲ្យធ្វើការច្រើនម៉ោង”។
លោក ផន ញឹក អាយុ២៨ឆ្នាំ តំណាងសហជីព CLSU ដែលធ្វើការនៅរោងចក្រនេះនិយាយថា គាត់ជាមនុស្សម្នាក់ក្នុងចំណោមអ្នកដែលរងរបួសក្នុងហេតុការណ៍នោះ។ គាត់និយាយថា “ជើងកាងដែលគេជួល និងសន្តិសុខប្រហែល៤០នាក់មកពីតំបន់សេដ្ឋកិច្ចពិសេស 7NG បានឡើងលើឡាន ហើយវាយប្រហារកម្មករ។ ខ្ញុំក៏ត្រូវគេដាល់ចំមុខពីរបីដៃដែរ។ ពេលនេះយើងកំពុងប្រមូលភ័ស្តុតាងដើម្បីដាក់ពាក្យបណ្ដឹងទៅស្នងការដ្ឋាននគរបាលខេត្តនៅថ្ងៃពុធ ដោយចោទថៅកែរោងចក្រ និងបក្ខពួករបស់គាត់ពីបទបង្ករបួសស្នាម និងបំផ្លិចបំផ្លាញទ្រព្យសម្បត្តិឯកជន”។
ទោះជាយ៉ាងណា គណៈគ្រប់គ្រងរោងចក្រ និងតំបន់សេដ្ឋកិច្ចពិសេសនេះមិនអាចទាក់ទងសុំការបភ្លឺបានទេ។
លោក ឌិន ចាន់ឌី ជាមន្ត្រីមួួយរូបមកពីមន្ទីរការងារខេត្តបានបញ្ជាក់ថា ការវាយតប់គ្នាមួយបានកើតឡើងនៅតំបន់សេដ្ឋកិច្ចពិសេសនេះរវាងកម្មកររោងចក្រ និងសន្តិសុខ ប៉ុន្តែនិយាយថា គាត់មិនដឹងរឿងលម្អិតទេ។ លោកថ្លែងថា តំណាងម្នាក់មកពីរោងចក្រ Star Light Apparel បានប្រាប់លោកថា គ្មាននរណាម្នាក់រងរបួសធ្ងន់ទេ។
លោកបានបន្តថា ”ពេលនេះខ្ញុំកំពុងធ្វើការជាមួយអ្នកគ្រប់គ្រងរោងចក្រដើម្បីប្រមូលព័ត៌មានអំពីមូលហេតុដែលនាំឲ្យមានការវាយតប់គ្នានេះ។ អ្នកគ្រប់គ្រងរោងចក្របានប្រាប់ខ្ញុំថា គាត់មិនដឹងពីមូលហេតុដែលនាំឲ្យមានការវាយតប់គ្នានេះទេ ពីព្រោះការប៉ះទង្គិចគ្នានេះបានកើតឡើងនៅឆ្ងាយពីរោងចក្រ”។
លោកមានប្រសាសន៍បន្ថែមទៀតថា មន្ត្រីក្រសួងការងារ នឹងសម្រុះសម្រួលឲ្យមានជំនួបរវាងមន្ត្រីសហជីព និងតំណាងរោងចក្រនៅក្រសួងការងារក្នុងរាជធានីភ្នំពេញ នៅថ្ងៃនេះ៕ សុខុម