កាលពីម្សិលមិញ លោក នេត សាវឿន អគ្គស្នងការនគរបាលជាតិបានបន្ទោសការត្រួតពិនិត្យព្រំដែនទន់ខ្សោយក្នុងប្រទេសម៉ាឡេស៊ី និងសិង្ហបុរីចំពោះការហូរចូលកូកាអីុន មេតំហ្វេតាមីន និងគ្រឿងញៀនគ្រោះថ្នាក់ផ្សេងៗទៀតចូលក្នុងប្រទេសកម្ពុជា។
អំឡុងកិច្ចប្រជុំបិទទ្វារជាមួយលោក ស ខេង រដ្ឋមន្ត្រីក្រសួងមហាផ្ទៃ និងក្រុមមន្ត្រីប្រយុទ្ធប្រឆាំងគ្រឿងញៀនខេត្តនៅថ្ងៃទី២នៃសន្និបាតបូកសរុបលទ្ធផលការងារត្រួតពិនិត្យគ្រឿងញៀនក្នុងរាជធានីភ្នំពេញ ឧត្តមសេនីយ៍ នេត សាវឿន បានមានប្រសាសន៍ថា គ្រឿងញៀនត្រូវបានជូញដូរចូលប្រទេស កម្ពុជានៅកម្រិតមួយដែលមិនធ្លាប់មានពីមុនមកតាមយន្តហោះពីតំបន់ចំនួនបីគឺ អាហ្វ្រិកអាមេរិកខាងត្បូង និងតំបន់ត្រីកោណមាស។
លោកបានថ្លែងថា “ពីតំបន់ទាំងបី គ្រឿងញៀនត្រូវបាននាំចូលក្នុងប្រទេសកម្ពុជាតាមផ្លូវអាកាស។ គ្រឿងញៀនត្រូវបានផ្ញើតាមការិយាល័យប្រៃសណីយ៍ យូរដោយដៃឬលាក់ក្រោមស្បែក”។ លោកបានបន្ថែមថា ប្រទេសដែលជាប្រភពចំនួន១០ត្រូវបានកំណត់អត្តសញ្ញាណ ប៉ុន្តែ បានចេញឈ្មោះប្រទេសតែ៥ប៉ុណ្ណោះ គឺនីហ្សេរីយ៉ា ប្រេស៊ីល ភូមា ថៃ និងឡាវ ។
ឧត្តមសេនីយ៍ នេត សាវឿន បានមានប្រសាសន៍ថា ប្រទេសម៉ាឡេស៊ី និងសិង្ហបុរី គឺជាប្រទេសតែពីរគត់ដែលអាចចាត់ជាចំណុចឆ្លងកាត់តាមផ្លូវអាកាសរវាងប្រទេសទាំង១០ និងប្រទេសកម្ពុជា។
លោកបានថ្លែងថា “យើងឆ្ងល់ថាហេតុអ្វីបានជាគ្រឿងញៀនត្រូវបាននាំចូលតាមរយៈប្រទេសអ្នកមាន?” ដោយលោកបន្តសម្តែងការខកចិត្តដែលតួនាទីរបស់ប្រទេសកម្ពុជាក្នុងការរារាំងផ្លូវនាំគ្រឿងញៀនទៅប្រទេសទាំងពីរ មិនត្រូវបានធ្វើតបវិញ។
លោកបានបន្ថែមថា “ទាំងនេះគឺជាប្រទេសឆ្លងកាត់ទាំងពីរ ហើយគ្រឿងញៀននៅតែមាននៅក្នុងប្រទេសកម្ពុជាបើទោះជាយើងបានសហការក្នុងពេលកន្លងមកអំពីបញ្ហានេះក៏ដោយ”។
យោងតាមអាជ្ញាធរជាតិប្រយុទ្ធប្រឆាំងគ្រឿងញៀនបានឲ្យដឹងថា រដ្ឋាភិបាលរឹបអូសបានគ្រឿងញៀនទម្ងន់១.៦២០គីឡូក្រាមក្នុងឆ្នាំ២០១៥ ដែលមានកញ្ឆាមួយចំនួនធំផងដែរ។ ករណីគ្រឿងញៀន និងការចាប់ខ្លួនពាក់ព័ន្ធកើនឡើងជាងទ្វេដងពីមួយឆ្នាំទៅមួយឆ្នាំ។
អំឡុងកិច្ចប្រជុំកាលពីម្សិលមិញ ឧត្តមសេនីយ៍ នេត សាវឿន ក៏បានស្នើឲ្យមានការធ្វើវិសោធនកម្មច្បាប់គ្រឿងញៀនដែលមានស្រាប់ រួមទាំងបទប្បញ្ញត្តិនានាដើម្បីធានាថា ទ្រព្យសម្បត្តិដែលរឹបអូសពីអ្នកជួញដូរមិនបានបាត់បង់ទៅណា។
លោកបានថ្លែងថា “ចំពោះទ្រព្យសម្បត្តិដែលរឹបអូសបានពីអ្នកជួញដូរគ្រឿងញៀននីតិវិធីគឺស្មុគស្មាញណាស់។ វាមិនគួរចំណាយពេលយូរក្នុងការប្រគល់ទ្រព្យសម្បត្តិនោះភ្លាមៗ…ទៅឲ្យរដ្ឋឡើយ”។
ឧត្តមសេនីយ៍រូបនេះក៏បានស្នើឲ្យបន្ថយកម្រិតបរិមាណហេរ៉ូអីុនដែលបុគ្គលម្នាក់មាន ពេលចាប់បានដែលត្រូវជាប់ពន្ធនាគារពី២០ទៅ៣០ឆ្នាំផងដែរ។ បច្ចុប្បន្នតួលេខគឺត្រឹម៨០ក្រាម។
លោក ដេវីដ ហាឌីង អ្នកជំនាញគ្រឿងញៀនឯករាជ្យបានមានប្រសាសន៍ថា កង្វល់អំពីចរាចរគ្រឿងញៀនកើនឡើងដែលបានលើកឡើងនៅក្នុងកិច្ចប្រជុំ បង្ហាញពីកំណើនក្នុងការចាប់បាន។
លោកបានថ្លែងថា “កំណើននៅក្នុងការចាប់បានគ្រឿងញៀន…អាចពាក់ព័ន្ធនឹងការពិតដែលការអនុវត្តមិនមានភាពប្រសើរឡើង ប៉ុន្តែ ថា កម្រិតនៃការធ្វើចរាចរកើនឡើងនៅអត្រាដែលការចាប់បានកើនឡើងច្រើនដែរ”។
លោក ហាឌីង បានថ្លែងថា ប្រសិនបើត្រូវបានពង្រឹង ច្បាប់គ្រឿងញៀននៅក្នុងប្រទេសកម្ពុជាតឹងរឹុងរួចទៅហើយ ហើយថាការស្នើឲ្យមានការដាក់ទោសធ្ងន់ធ្ងរ “ពិតជាមិនល្អ”ពីព្រោះប្រទេសភាគច្រើនបានងាកចេញពីការផ្តន្ទាទោសអប្បបរមាចំពោះការមានគ្រឿងញៀនតិចតួច៕ សារុន (រាយការណ៍បន្ថែមដោយ Taylor O’Connell)