32 C
Phnom Penh

អ្នកត​វ៉ា​ពីរនាក់​ត្រូវ​បាន​ចោទប្រកាន់​ បន្ទាប់ពី​ការ​ប៉ះទង្គិចគ្នា

ដោយ ឌឹ ខេមបូឌា ដេលី

បទវិភាគ

យោង​​​តាម​​​ឯក​​​សារ​​​តុលា​​​ការ​​​បានឲ្យ​​​ដឹង​​​ថា អ្នក​​​បើក​​​បរ​​​រថ​​​យន្ត​​​ក្រុង​​​ឱ្យ​ក្រុមហ៊ុន​ទេស​ចរណ៍​កាពីតូល​ពីរ​​​នាក់​​​ដែល​​​ត្រូវ​​​បាន​​​បណ្តេញ​​​​​ចេញពីការ​ងារ​​​​ និង​​​​ត្រូវ​​​បាន​​​វាយ​​​ប្រហារ​​​ដោយ​​​​​​អ្នក​​​រត់​​​រឺុម៉ក​​​ម៉ូតូ​​​កង់បី​​​ប្រដាប់​​​អាវុធ​​​មួយ​ក្រុម ​ខណ:​​​ដែល​​​ធ្វើ​​​ការ​​​តវ៉ា​​​ជាមួយ​​​អតីត​​​មិត្ត​​​រួម​​​ការ​​ងារ​​​របស់​​​ខ្លួន​​​នៅ​​​ក្នុង​​​រាជធានី​​​ភ្នំពេញ​​​កាល​​ពីថ្ងៃសៅរ៍ ត្រូវ​​​បានចោទ​​​ប្រកាន់​​​ពីបទប្រើ​​​អំពើ​​​ហិង្សា​​​ដោយ​​​ចេតនា​​​កាល​​​ពីម្សិល​​​មិញ។

យោងតាម​​​សេចក្តី​​​ថ្លែង​ការណ៍​​​ដែល​​​ថ្កោល​​​​​ទោស​​​អំពើ​ហិង្សា​​​ដែលចេញ​​​ផ្សាយ​​​ដោយ​​​អង្គ​ការ​​​សិទ្ធិ​​​មនុស្ស​​​ អង្គការ​​​ការងារ​​​និងសមាគម​​​សហគមន៍ជាច្រើន​បានឲ្យដឹងថា​​​ យ៉ាង​ហោច​​​ណាស់​​​មនុស្ស​​​១៤​​​នាក់​​​បានរង​​​របួស​​​នៅក្នុង​​​ការ​​​វាយ​​​ប្រហារ​​​នៅ​ខាង​​​ក្រៅ​​​ការិយាល័យ​​​របស់​​​ក្រុម​​​ហ៊ុន​​​នេះស្ថិត​​​ក្នុង​​​សង្កាត់​​​​បឹង​​​ព្រលឹត​​​ ខណ្ឌ៧មក​រា​​​ រួមទាំងអ្នក​​​បើកបរ​រថយន្ត​​​ក្រុង​​​ដែល​​​ធ្វើ​​​ការ​​​តវ៉ា​​​ អ្នក​​​គាំទ្រ​​​របស់​ពួកគេ​ អ្នក​​​ឃ្លាំមើល​​​សិទ្ធិ​​​មនុស្ស​​​ និងមន្រ្តី​​​នគរ​​​បាលផង។

អតីត​​​អ្នក​​​បើកបររថយន្ត​​​ក្រុង​​​ឲ្យក្រុម​​​ហ៊ុន​​កាពីតូល ប្រហែល៤០នាក់​​​ដែលធ្វើការ​​​តវ៉ា​​​រយៈពេលជាច្រើន​​​ខែមកហើយ​​​ជំុវិញអ្វី​​​ដែល​​ពួកគេ​​​អះអាង​​​ថា ជាការ​​​បណ្តេញចេញ​​​ពីការ​​​ងារ​​​ដោយ​​​មិនត្រឹម​​​ត្រូវ​​​ជា​​​ការតប​​​តទៅនឹង​​​ការ​​​ប្រឹង​​​ប្រែង​​​បង្កើត​​​សហជីព​​​របស់​​​ពួកគេ​​បាន​​​ជួប​​​ជំុ​​​គ្នា​​​នៅ​​​ម៉ោងប្រហែល​​​៨ព្រឹក​​​កាល​ពី​​ថ្ងៃសៅរ៍។ យោង​តាម​នគរបាល​បាន​ឱ្យ​ដឹង​ថា ​បន្ទាប់​​​ពីព្យាយាម​​​ប្រហែល​​​២ម៉ោង​​​ក្រោយ​​​មក​ដើម្បីរារាំង​​​រថយន្ត​​​ក្រុង​​​មិន​​​ឲ្យ​​​ចេញ​​​ដំណើរ​​​ពួកគេ​​​បាន​​​ពើប​​​ប្រទះ​​​នឹងអ្នក​​​រត់​​​រឺុម៉​ក​​ម៉ូតូ​​​កង់បី​​​ប្រហែល​​​៥០នាក់​​​ពួកមួក​​​សុវត្ថិ​ភាព ​​និង​​​ប្រដាប់​​​ដោយ​​​ដំបង ​​​ដែក​​​បំពង់​​​ទីប​​​និង​​ញញួរ​​​។

អង្គការ​លីកាដូ បាន​លើកឡើង​ថា មន្រ្តី​នគរបាល​​​ប្រដាប់ដោយ​​ឧបករណ៍បង្ក្រាប​កុបកម្ម​​​បានចូលរួមនៅក្នុង​​​ការវាយ​​​ប្រហារ​​​នោះ ចំណែកមន្រ្តី​​​ផ្សេងទៀត​​​ព្យាយាមជួួយ​​​រារាំង​​​មិនឲ្យ​​​មាន​​​អំពើ​​​ហិង្សា​​​នេះដែរ តែ​​​មិន​​​បាន​​​សម្រេច។ នៅក្នុង​​រូបភាព​​​វីដេអូ​​​ដែល​​​បង្ហោះ​​​តាម​​​ប្រព័ន្ធ​អីុនធឺណិត​​​ដោយក្រុម​​​នេះ ​​​គេ​​​ឃើញ​​​បុរស​​​ម្នាក់​​​ប្រើ​​​ញញួរ​​​វាយទៅលើ​​​​អ្នក​​​បើក​​​រថយន្ត​​​ក្រុង​​​ម្នាក់​​​ចំ​​​ក្បាល​​​និង​​​ខ្នង​​​។

គ្មាន​​​អ្នក​​​រត់រឺុម៉កម៉ូតូ​​​កង់បី​​​ណា​​​ម្នាក់​​​ដែល​​​មាន​​​ទំនាក់​​ទំនង​​​ជាមួយសមាគម​​​កម្ពុជា​​​ដើម្បី​​​អភិវឌ្ឍន៍​​​សហ​​​ព័ន្ធ​​​ដែលបាន​​​ធ្វើការ​​​ការ​​​តវ៉ា​តបត​​​​ស្រ​​​ដៀង​​​គ្នា​​​នេះ​​​ក្នុង​​​ពេល​​​កន្លង​​​មក ​​​ត្រូវ​​​បាន​​​ចាប់​​​ខ្លួន​​​នោះ​​​ទេ។ ហើយ​​​បើទោះ​​ណា​​​ជា​ហេតុការណ៍​​​នេះទំនង​​​ជា​​​កើត​​​ឡើង​​​ដោយ​​​ភាគី​​​​​តែម្ខាង​​​ក៏ដោយ ក៏អ្នក​​​បើក​​​បររថយន្ត​​​ក្រុង​​​​​ម្នាក់​​​ឈ្មោះ​​​ ណាន​​​ វណ្ណា និងអ្នក​​​តវ៉ា​​​ម្នាក់​​​ទៀត​​​​​​ឈ្មោះ​​​ រស់ សីុផៃ ត្រូវ​​​បាន​​​ចាប់​​​ខ្លួន​​​នៅពេល​អំពើ​ហិង្សា​បាន​ស្ងប់​ដែរ។

យោងតាមសេចក្តី​​​ថ្លែង​​​ការណ៍​​​ដែលចុះ​​​ហត្ថ​​​លេខា​​​ដោយ​​​លោក​​​​​​ ស្រី​​​ ម៉ាក់នី ​ព្រះរាជ​អាជ្ញារង​បានឲ្យ​​​ដឹង​​​ថា​ ​​កាល​​​ពីម្សិល​​​មិញ​​​អ្នក​​​ទាំងពីរ​​​ត្រូវ​​​បាន​​​សាក​​​សួរ​​​នៅ​​​សាលា​​​ដំបូង​​​រាជ​ធានី​​​ភ្នំ​ពេញ​​​ហើយ​​​ត្រូវ​​​ផ្តន្ទាទោស​​​ដាក់​​​ពន្ធនាគារ​​​ដោយ​​​ចោទ​​​ប្រកាន់​​​ពីបទ​​​ប្រើ​​​អំពើហិង្សា​ដោយ​​​ចេតនា រារាំង​​​មន្រ្តី​​​សាធារណ: ​និង​ធ្វើ​ឲ្យ​​​ប៉ះពាល់​​​ដល់​​​សណ្តាប់​​​ធ្នាប់​​​សាធារណៈ។

លោក​​ ស្រី ម៉ាក់នី និងមន្រ្តីតុលាការ​​​ដទៃ​​​ទៀត​​​មិន​​​អាច​​​ទាក់ទង​​​បាន​​​ទេ​​។ លោក ​ប៉ាត ​សំអាត នាយប៉ុស្តិ៍​​​សង្កាត់​​​បឹង​​​ព្រលឹត​​​កាល​​​ពី​ម្សិល​​​មិញ​​​បាន​​​និយាយ​​​ការពារ​​​​​​ភាព​អសកម្ម​​​របស់មន្រ្តីរបស់​​​លោក​​​កាល​​​ពីព្រឹក​​​ថ្ងៃសៅរ៍ ​ដោយ​​លោក​​​ឡើង​​ថាពួកគេមានការ​​​​ភ័យ​​​ខ្លាច​​​។

លោក​​​ថ្លែងថា ”យើង​​​បានព្យា​​​យាម​​​រារាំង​​​ភាគី​​​ទំាងពីរ​​​ ប៉ុន្តែ​​​បន្ទាប់មក​​​ភាគីមួួយ​​​បាន​​​​​​ចាប់​​​ផ្តើម​​​វាយ​​​ប្រហារ ​​​សូម្បី​​​ទាំងនគរ​​​​​បាល​​​។​​ យើង​​​មិន​​​អាច​​​ឃាត​​​់​​​បាន​​​ទេ ដូច្នេះ​​​យើង​​​​​​ត្រូវ​​​តែ​​​ចាក​​​ចេញ”។

លោក ​​​សំអាត ​​​បាន​​​បង្វែរ​​​សំណួរ​​​បន្ថែម​ទៅ​​​លោក​​​ នេត​​​ ស៊ី​​​ថុន អធិការ​​​នគរបាល​​​ខណ្ឌ ​ដែល​​​លោក​​​លើក​​​ឡើង​​​ថា មន្រ្តី​​​របស់​​​លោក​​​មិន​​​បាន​​​ចាប់​​​ខ្លួននរណាម្នាក់​​​​ឡើយ​​​កាល​​​ពី​​​ថ្ងៃ​​​សៅរ៍។ លោក ​​​ស៊ីថុន ​​​បាន​បដិសេធ​​​​​​​​មិន​​​ធ្វើ​​​អត្ថាធិប្បាយ​​​ទេ។

ក្រុម​​​ហ៊ុន​​​ទេសចរណ៍​​​កា​​​ពី​​​តូល​​​បាន​​​បដិ​​​សេ​​​ធ​​​​​​ថា​​​ ខ្លួន​មិន​​​ជាប់​​​ពាក់ព័ន្ធ​​​ក្នុង​​​ការ​​​វាយ​​​ប្រហារ​​​នេះ​​​ទេ​​។ ​នៅ​​​ខាង​​​ក្រៅ​​​ការិយាល័យ​​​​​របស់​​​ក្រុម​​​ហ៊ុន​​​​​​​​កាល​​​ពីម្សិល​​​មិញ​​​ ភាគច្រើននៃអ្នក​​​រត់​​​រឺុម៉ក​​​ម៉ូតូ​​កង់​​​បីដដែលដែល​​​បាន​​​ចូល​​​រួម​​ នៅ​​​តែ​​​ចត​​​រឺុម៉ក​​​​ម៉ូតូ​​​របស់​​​ខ្លួន​​​រង់​​​ចាំ​​​ម៉ូ​​​​យ​​​ក្នុង​​​តំបន់​​​នោះ​​​ដដែល។

លោក​​ ស៊ុត​​ ម៉េង​​​ហីុ អនុប្រធាន​​​សមាគម​​​កម្ពុជា​​​ដើ​​​ម្ប​​ី​​​អភិវឌ្ឍន៍​​​សហព័ន្ធ (CCDA) ​​​ដែល ​​បាន​​អង្គុយ​នៅក្នុង​​​​​រឺុម៉ក​​​ម៉ូតូ​​​កង់បី​​​របស់​សហ​សេវិក​ម្នាក់​បាន​​​មាន​​​ប្រ​​​សាសន៍​​​ថា បើ​​​ទោះ​ជា​​​សមាជិក​​​របស់​​​លោក​​​បាន​​​ត្រៀម​​​សម្រាប់​​​ការ​​​វាយ​​​ប្រហារ​​​នោះ​​​ក៏ដោយ​​​ ក៏ពួក​​​គេ​​​មិន​​​បាន​​​ចាប់​​​ផ្តើមវា​​​​ដែរ​​​។

ដោយ​​​បង្ហាញរូបថត​​​ដំបង​​​ដែល​​​អ្នក​​​បើក​​​បរ​​​រថ​​​យន្ត​​​ក្រុង​​​បាន​​​ប្រើ​​​ដើម្បី​​​លើក​​​ជា​​​បដា​​​ដល់​អ្នក​យក​ព័ត៌មាន​នោះ​​​លោក​​​បាននិយាយ​​​ទាំង​​​កំហឹង​​​ថា “ខ្ញុំសូម​​​ឲ្យ​​​អ្នក​​​រត់​​​រឺុម៉ក​​​ម៉ូតូ​​​កង់បី​​​របស់​​​ខ្ញុំ​​​ទាំងអស់​​​ពាក់មួក​​​សុវត្ថិ​​​ភាព​​​ពីព្រោះ​​​ខ្ញុំ​​​ឃើញថា​​​ពួកគេ​​​នឹងវាយ​​​ប្រហារមកលើ​ពួក​​​យើង​​​ដោយ​​​ដែក​​​បំពង់​​​ទីប​​​ និងដំបង​​​ឫស្សី​​​”។

លោក ម៉េងហីុ បាន​​​ថ្លែង​​​ថា ស​​​មា​​​ជិក​​​របស់​​​លោក​​​បាន​​​ទិញ​​​មួក​​​សុវត្ថិ​​​ភាព​​​ប៉ុន្មាន​​​សប្តាហ៍​​​មក​​​ហើយ​​​ដោយ​​​មាន​​​គម្រោង​​​ប្រើ​​​ប្រាស់​​​ដើម្បី​​​សម្គាល់​​​អត្តសញ្ញាណគ្នា​​​​នៅ​​​ពេល​​​មាន​​​ហេតុ​ការណ៍​​​ប៉ះ​​​ទង្គិចកើត​ឡើង​​​​។

ហើយ​បើ​​​ទោះ​​​ជា​​​មាន​​​ការ​​ទទួល​ស្គាល់​ថា​​​​​​អ្នក​​​បើក​​​បរ​​​រ​​​ថយន្ត​​​ក្រុង​​​មិន​​​មាន​​​បំណង​ធ្វើឲ្យ​​​ប៉ះពាល់​​​ដល់​​​​​​សមាជិក​របស់​​​លោក​​​ក៏ដោយ ​​​ក៏​​​លោក​​​​​លើក​​​ឡើង​​​ថា ពួកគេ​​​បាន​​​ផ្តើម​​​ឲ្យ​​​មាន​​ជម្លោះ​​​​នេះដោយ​ធ្វើ​សកម្មភាព​ដ៏គឃ្លើន​ ​​​ដែល​​​បណ្តាល​​​ឲ្យ​​​សមាជិក​​​របស់​​​លោក​​​គ្មាន​​​ជម្រើស​​​ក្រៅ​​​ពី​​​តបតវិញ​។

លោក​​​​​​មាន​​​ប្រ​​​សាសន៍ថា​​​ ”អង្គការ​​​លីកាដូ​​​បាន​​​ចេញ​​​សេ​​​ចក្តី​​​ថ្លែង​​​ការណ៍​​​មួយ ​​​ហើយ​​បាន​​​​​​​​ចោទ​​​ប្រកាន់​​​សមាជិក​​​របស់​​​ខ្ញុំ​​ ប៉ុន្តែ​​​ពួក​​​គេ​​​មិន​​​ដែល​​​សួរ​​​ពួក​​​យើង​​​ពី​​​អ្វី​​​ដែល​​​បាន​​​កើត​​​ឡើង​​​ឡើយ​​​។ ពួកគេ​​​មួយ​​​ចំនួន​​​ថែម​​​ទាំង​​​បាន​​​ចោទ​​​ក្រុម​​​ហ៊ុន​​​ថា​​​បាន​​​ជួល​​​ពួក​​​យើង​​​ទៀត​​​ផង​​​។​​​ តើ​​​​អ្នក​មាន​​​ភ័ស្តុតាង​​​បង្ហាញ​​​ទេ?”៕​​​ សារុន (រាយការណ៍​​​ បន្ថែម ដោយ Taylor O’Connell)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស