ដោយប្រឈមនឹងការគំរាមតបត ប្រសិនបើលោកនាយករដ្ឋមន្ត្រី ហ៊ុន សែន ជួបការតវ៉ាអំឡុងពេលលោកបំពេញទស្សនកិច្ចជាផ្លូវការលើកដំបូងនៅសហរដ្ឋអាមេរិកនាសប្ដាហ៍ក្រោយនោះ គណបក្សសង្គ្រោះជាតិបានលើកឡើងកាលពីម្សិលមិញថា ខ្លួននឹងស្វះស្វែងស្នើឲ្យមានជំនួបមួយជាមួយមន្ត្រីរដ្ឋាភិបាលនៅក្នុងសប្ដាហ៍នេះជុំវិញក្ដីព្រួយបារម្ភអំពីសន្តិសុខ។
លោក ហ៊ុន សែន បានធ្វើការព្រមានតាមហ្វេសប៊ុកកាលពីចុងខែមុនដោយគំរាមអំពីការធ្វើបាតុកម្មតបតវិញនៅក្នុងប្រទេសកម្ពុជា ប្រសិនបើលោកត្រូវបានទទួលស្វាគមន៍ដោយការតវ៉ាអំឡុងជំនួបកំពូលជាមួយលោក បារ៉ាក់ អូបាម៉ា ប្រធានាធិបតីអាមេរិក និងមេដឹកនាំអាស៊ានផ្សេងទៀតនៅក្នុងរដ្ឋកាលីហ្វ័រញ៉ានៅថ្ងៃទី១៥ និង១៦ ក្នុងខែកុម្ភៈនេះ។
លោក ខាន់ ចាន់សុផល ជាបុគ្គលដ៏លេចធ្លោដែលគាំទ្រគណបក្សប្រជាជនកម្ពុជាតាមហ្វេសប៊ុក និងជាទាហានក្នុងជួរកងយោធពលខេមរភូមិន្ទបានបញ្ចេញសកម្មភាពកាន់តែខ្លាំងនៅក្នុងសារបង្ហោះតាមទំព័រហ្វេសប៊ុកកាលពីសប្ដាហ៍មុន ដោយបានលើកឡើងថា លោក កឹម សុខា អនុប្រធានគណបក្សប្រឆាំងគួរតែចាកចេញពីប្រទេសដើម្បីចៀសវាងអំពើហិង្សា។
ដោយសំដៅដល់តំណាងរាស្ត្រគណបក្សប្រឆាំងដែលត្រូវបានវាយដំយ៉ាងព្រៃផ្សៃអំឡុងការតវ៉ាប្រឆាំងគណបក្សសង្គ្រោះជាតិនៅខាងក្រៅរដ្ឋសភាកាលពីខែតុលា លោកបានសរសេរថា “លោក កឹម សុខា ខ្លាចអ្នកគាំទ្រគណបក្សប្រជាជនកម្ពុជាធ្វើបាតុកម្ម ដុតផ្ទះរបស់គាត់ ឬទាញគាត់ចេញពីក្នុងឡាន ហើយវាយដំដូចតំណាងរាស្ត្រទាំងពីររូបនោះ”។
លោកបានសរសេរបន្ថែមថា “វាប្រហែលជាដល់ពេលដែលលោក កឹម សុខា ត្រូវទិញសំបុត្រយន្តហោះធ្វើដំណើរទៅក្រៅប្រទេសហើយ មុនពេលរឿងនេះកើតឡើង”។
ពេលទាក់ទងតាមទូរស័ព្ទកាលពីម្សិលមិញ លោក ខាន់ ចាន់សុផល បានលើកឡើងថា ការបង្ហោះសារតាមហ្វេសប៊ុករបស់លោកមិនមែនមានន័យថា ជាការគំរាមនោះទេ ប៉ុន្តែជាការផ្ដល់យោបល់ដល់លោក កឹម សុខា។
លោកមានប្រសាសន៍ថា ”ការសរសេររបស់ខ្ញុំគ្រាន់តែចង់បង្ហាញពីទស្សនៈ និងមតិយោបល់នយោបាយរបស់ខ្ញុំតែប៉ុណ្ណោះ”។ លោកបានបន្ថែមថា ”អ្វីដែលខ្ញុំបានសរសេរ គឺគ្រាន់តែជាអ្វីដែលខ្ញុំព្រួយបារម្ភប៉ុណ្ណោះ ហេតុដូច្នេះគាត់គួរតែយកចិត្តទុកដាក់ក្នុងការណែនាំសកម្មជនគណបក្សប្រឆាំងនៅសហរដ្ឋអាមេរិក និងគ្រប់ទីកន្លែងឲ្យនៅស្ងៀម ហើយទុកឲ្យមេដឹកនាំគណបក្សដោះស្រាយបញ្ហា”។
“ប្រសិនបើរឿងបែបនេះកើតឡើង គឺឯកឧត្ដម កឹម សុខា ទេដែលនឹងជួបបញ្ហា”។
កញ្ញា កឹម មនោវិទ្យា កូនស្រីរបស់លោក កឹម សុខា ដែលជាអនុប្រធានទទួលបន្ទុកកិច្ចការសាធារណៈរបស់គណបក្សសង្គ្រោះជាតិបានលើកឡើងកាលពីម្សិលមិញថា គណបក្សនេះនឹងស្វះស្វែងស្នើសុំឲ្យមានជំនួបមួយជាមួយរដ្ឋាភិបាលនៅក្នុងសប្ដាហ៍នេះ ដើម្បីពិភាក្សាអំពីការដែលអាចមានការប្រើអំពើហិង្សាតបត ប្រសិនបើមានមនុស្សធ្វើការតវ៉ាប្រឆាំងលោក ហ៊ុន សែន នៅសហរដ្ឋអាមេរិក។
កញ្ញាបានលើកឡើងតាមរយៈអុីម៉េលមួយថា ”យើងនឹងទាក់ទងជាមួយអាជ្ញាធរនៅក្នុងសប្ដាហ៍នេះ មិនគ្រាន់តែទាក់ទិននឹងការបង្ហោះសារ [របស់លោក ចាន់សុផល] ទេ ប៉ុន្តែថែមទាំងទាក់ទិននឹងរាល់ការដែលអាចមានការប្រើអំពើហិង្សាតបតនៅទីនេះពីសំណាក់គណបក្សប្រជាជនកម្ពុជាផងដែរ”។
កញ្ញាបានបន្ថែមថា “ដោយមើលឃើញពីអ្វីដែលបានកើតឡើងនៅក្នុងខែតុលា យើងដឹងថា គណបក្សប្រជាជនកម្ពុជាអាចមានលទ្ធភាពគេចរួចផុតពីការរិះគន់ចំពោះអ្វីដែលខ្លួនបានធ្វើ ហើយឥឡូវនេះពួកគេបានចាត់ទុកបាតុកម្មដោយសន្តិវិធីសាជាថ្មីថា ជាការធ្វើឲ្យពួកគេអាម៉ាស់មុខ ដែលពួកគេជឿថា គួរតែមានការតបតដោយការប្រើកម្លាំង”។
លោក ហ៊ុន សែន ក៏បានព្រមានអំពីការធ្វើបាតុកម្មតបតនឹងការតវ៉ាដែលប្រឆាំងរូបលោកអំឡុងដំណើរបំពេញទស្សនកិច្ចទៅកាន់ទីក្រុងបា៉រីសកាលពីឆ្នាំមុនផងដែរ។ មួយថ្ងៃក្រោយមក លោក ញ៉យ ចំរើន និងលោក គង់ សភា សមាជិកសភាគណបក្សសង្គ្រោះជាតិត្រូវបានវាយដំយ៉ាងព្រៃផ្សៃ ដោយបាតុករដែលគាំទ្រគណបក្សប្រជាជនកម្ពុជា ខណៈពួកគាត់ទាំងពីរព្យាយាមចាកចេញពីរដ្ឋសភា។
ពេលថ្លែងទៅកាន់អ្នកគាំទ្រនៅឯភោជនីយដ្ឋានមួយដែលស្ថិតនៅខាងក្រៅទីក្រុងវ៉ាស៊ីនតោនកាលពីសប្ដាហ៍មុន លោក សម រង្ស៊ី មេដឹកនាំគណបក្សប្រឆាំងដែលកំពុងនិរទេសខ្លួនឯងដើម្បីគេចពីការផ្ដន្ទាទោសរយៈពេល២ឆ្នាំ បានណែនាំសកម្មជនគណបក្សសង្គ្រោះជាតិកុំឲ្យចូលរួមក្នុងការតវ៉ាប្រឆាំងលោក ហ៊ុន សែន។
ទោះជាយ៉ាងណា លោក ទូច វិបុល ប្រធានសម្ពន្ធភាពកម្ពុជា-អាមេរិក ដែលជាក្រុមសកម្មជនមានមូលដ្ឋាននៅសហរដ្ឋអាមេរិក បានឲ្យដឹងកាលពីម្សិលមិញថា ក្រុមរបស់លោកនៅតែបន្តគម្រោងតវ៉ាប្រឆាំងវត្តមានរបស់លោក ហ៊ុន សែន ដដែល អំឡុងកិច្ចប្រជុំកំពូលនៅក្នុងទីក្រុងរមណីយដ្ឋាន Rancho Mirage ដែលស្ថិតនៅក្នុងរដ្ឋកាលីហ្វ័រញ៉ា។
លោកលើកឡើងតាមរយៈសារអេឡិចត្រូនិកថា “យើងបន្តលើកឡើងអំពីការព្រួយបារម្ភរបស់យើងទាក់ទិនការរំលោភបំពានសិទ្ធិមនុស្ស និងការវាយប្រហារលើសេរីភាព និងមូលដ្ឋានលទ្ធិប្រជាធិបតេយ្យនៅក្នុងព្រះរាជាណាចក្រនេះ។ ជាថ្មីម្ដងទៀត ទោះបីជាមានអ្វីកើតឡើងនៅក្នុងព្រះរាជាណាចក្រនេះក៏ដោយ វាគឺជាការទទួលខុសត្រូវទាំងស្រុងរបស់នាយករដ្ឋមន្ត្រី”។
លោក ហ៊ុន ម៉ានិត កូនប្រុសរបស់លោក ហ៊ុន សែន ដែលជានាយកនៃនាយកដ្ឋានស្រាវជ្រាវចារកិច្ចនៃក្រសួងការពារជាតិបានលើកឡើងកាលពីម្សិលមិញថា លោកបានទទួលអុីម៉េលពីមន្ត្រីជាន់ខ្ពស់គណបក្សសង្គ្រោះជាតិដែលជួយរៀបចំការតវ៉ាប្រឆាំងលោក ហ៊ុន សែន។
ឧត្ដមសេនីយ៍ទោ ហ៊ុន ម៉ានិត បានលើកឡើងនៅក្នុងសារអេឡិចត្រូនិកមួយថា ”បើនិយាយទាក់ទិននឹងគម្រោងតវ៉ានៅក្នុងរដ្ឋកាលីហ្វ័រញ៉ា សហរដ្ឋអាមេរិកប្រឆាំងសម្ដេច ហ៊ុន សែន យើងទទួលបានការទាក់ទងតាមអុីម៉ែលរបស់ពួកគេដោយស្នើឲ្យសមាជិកជួយរៀបចំការតវ៉ា”។
នៅពេលសួរថា តើលោក កឹម សុខា គួរតែព្រួយបារម្ភអំពីសុវត្ថិភាពរបស់លោកដែរឬទេ ប្រសិនបើមានការតវ៉ាធ្វើឡើងនៅក្នុងរដ្ឋកាលីហ្វ័រញ៉ានោះ ឧត្ដមសេនីយ៍ទោ ហ៊ុន ម៉ានិត បានលើកឡើងថា គណបក្សកំពុងកាន់អំណាចនឹងខិតខំឲ្យអស់ពីលទ្ធភាពដើម្បីរក្សាភាពស្ងប់ស្ងាត់ក្នុងចំណោមអ្នកគាំទ្ររបស់ខ្លួន។
លោកបានថ្លែងថា “លោក កឹម សុខា មិនគួរព្រួយបារម្ភអំពីសុវត្ថិភាពរបស់លោកទេ ព្រោះយើង [គណបក្សប្រជាជនកម្ពុជា] នឹងព្យាយាមគ្រប់គ្រងអ្នកគាំទ្ររបស់យើង”។
លោកបានបន្ថែមថា យុវជនជាច្រើនកំពុងតាមដានបញ្ហានេះយ៉ាងយកចិត្តទុកដាក់ ព្រោះបេះដូងរបស់ពួកគេគឺនៅជាមួយសម្ដេចនាយករដ្ឋមន្ត្រី ហើយគាំទ្រគាត់ដល់ទីបញ្ចប់។ យើងនឹងខិតខំធ្វើការដើម្បីគ្រប់គ្រងពួកគេមិនឲ្យចេញមកឡើយ…ប៉ុន្តែគ្មានការធានាទេ”៕ ស៊ុយឈាង