អាជ្ញាធរបានរកឃើញឈើប្រណីតមួយចំនួនធំទៀតដែលកប់នៅជិតរោងអារឈើរបស់ឈ្មួញឈើដ៏ល្បីឈ្មោះម្នាក់នៅក្នុងខេត្តត្បូងឃ្មុំ ប៉ុន្មានសប្ដាហ៍ប៉ុណ្ណោះបន្ទាប់ពីការរកឃើញគំនរឈើដែលកប់នៅក្នុងដីរបស់ពាណិជ្ជកររូបនេះនៅក្នុងស្រុកដដែលនេះ។
ការរកឃើញនេះធ្វើឡើងអំឡុងការបោសសម្អាតរបស់រដ្ឋាភិបាលនៅខេត្តភាគបូពា៌ដើម្បីរកការស្តុកឈើខុសច្បាប់ដោយក្រុមការងារពិសេសថ្មីក្រោមការដឹកនាំរបស់លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានមានប្រសាសន៍កាលពីម្សិលមិញថា ឈើទាំងនេះកំពុងជីកកកាយចេញពីដីនៅឡើយ។ ឧត្ដមសេនីយ៍ត្រី អេង ហីុ បានមានប្រសាសន៍ថា “យើងបានរកឃើញគំនរឈើប្រណីតដែលលាក់ទុកក្នុងរណ្ដៅមួយក្រោយរោងចក្រកែច្នៃឈើនៅក្នុងស្រុកអូររាំងឪ។ ឈើទាំងនេះត្រូវបានកប់ក្នុងរណ្ដៅមួយ ហើយលុបដីនិងគ្របសំរាមពីលើ ហើយនៅថ្ងៃនេះ អ្នកជំនាញមកពីរដ្ឋបាលព្រៃឈើកំពុងប្រមូលយកឈើនេះ ហើយយកទៅស្តុកទុកនៅរោងចក្រដើម្បីធ្វើការវាស់វែង”។
លោកថ្លែងថា រោងចក្រេនះជាកម្មសិទ្ធិរបស់ “ឧកញ៉ា ថៃ” ជាឈ្មួញឈើដ៏ល្បីឈ្មោះម្នាក់ក្នុងមូលដ្ឋាន។ ឧកញ៉ាគឺជាងារដែលលោកទទួលបានដោយការបរិច្ចាគប្រាក់តិចបំផុត១០០.០០០ដុល្លារដល់រដ្ឋាភិបាល។ ឧត្ដមសេនីយ៍ត្រី អេង ហ៊ី និងមន្ត្រីដទៃទៀតកំពុងស៊ើបអង្កេតករណីនេះ ប៉ុន្តែលោកបានអះអាងថា មិនស្គាល់ឈ្មោះពេញរបស់គាត់ទេ។
លោក ហៀង សុភ័ក្ត្រ ព្រះរាជអាជ្ញាអមសាលាដំបូងខេត្តមានប្រសាសន៍ថា អាជ្ញាធរទទួលបានព័ត៌មានពីឈើដែលកប់នេះតាមរយៈប្រជាពលរដ្ឋក្នុងមូលដ្ឋាន ហើយបានរកឃើញឈើនេះកាលពីថ្ងៃសុក្រ។
លោកបានមានប្រសាសន៍ថា ឈើដែលរកឃើញនេះជាឈើសុក្រំ ប្រភេទឈើលេខ១មានចំនួន៤៩ដុំ។
លោក សុភ័ក្ត្រ បានថ្លែងថា ឈើទាំងនេះត្រូវបានកប់ចម្ងាយប្រហែល១គីឡូម៉ែត្រពីរោងអារឈើរបស់ឧកញ៉ាថៃ ប៉ុន្តែថា លោកមិនដឹងថា តើឈើនេះឬដីដែលគេរកឃើញនោះជាកម្មសិទ្ធិរបស់ពាណិជ្ជកររូបនេះឬយ៉ាងណាឡើយ។
លោកបានថ្លែងថា “ខ្ញុំមិនហា៊នសន្និដ្ឋានថា ឈើនេះជារបស់ឧកញ៉ាថៃនៅពេលនេះទេ ព្រោះយើងកំពុងស៊ើបអង្កេតរកឲ្យឃើញអ្នកពាក់ព័ន្ធពិតប្រាកដ”។ គេមិនអាចទាក់ទងក្រុមមន្ត្រីរដ្ឋបាលព្រៃឈើមូលដ្ឋានដើម្បីសុំអត្ថាធិប្បាយបានទេ។
ឧត្ដមសេនីយ៍ត្រី អេង ហ៊ី មានប្រសាសន៍កាលពីម្សិលមិញថា អាជ្ញាធរមិនទាន់កំណត់ថា តើឈើទាំងនេះជាកម្មសិទ្ធិឧកញ៉ារូបនេះឬយ៉ាងណានោះឡើយ។
ចាប់តាំងពីលោកនាយករដ្ឋមន្ត្រី ហ៊ុន សែន បានប្រកាសបង្កើតក្រុមការងារពិសេសកាលពីពាក់កណ្ដាលខែមករាមក ឈើប្រណីតជាច្រើនត្រូវបានដុតកម្ទេចចោលពីរលើកដាច់ដោយឡែកពីគ្នានៅក្នុងខេត្តមណ្ឌលគិរី នៅក្នុងករណីដុតកម្ទេចចោលគួរឲ្យសង្ស័យ។
ទោះបីជាក្រុមហ៊ុនចម្ការកៅស៊ូដែលជាកន្លែងមានការដុតឈើទាំងគំនរៗត្រូវបានប្រជាពលរដ្ឋមូលដ្ឋានចោទថា បានកាប់ឈើខុសច្បាប់ក្រៅព្រំប្រទល់របស់ខ្លួនក៏ដោយ ក៏អាជ្ញាធរដែលកំពុងស៊ើបអង្កេតករណីនេះមិនទាន់បានកំណត់អត្តសញ្ញាណជនសង្ស័យណាម្នាក់ ឬកំណត់ថា នរណាទទួលខុសត្រូវនៅឡើយដែរ។
ហើយបើទោះជាក្រុមការងារពិសេសនេះបានចុះទៅពិនិត្យមើលចម្ការកៅស៊ូជាច្រើន ឃ្លាំង និងកន្លែងដទៃទៀតជាច្រើននៅ ភាគខាងកើតប្រទេសកម្ពុជាក្នុងរយៈពេល៣សប្ដាហ៍កន្លងមកក៏ដោយ ក៏មិនទាន់មានការលើក ឡើងថា តើឈើដែលខ្លួនបានពិនិត្យនោះមានប្រភពខុសច្បាប់ឬយ៉ាងណានោះឡើយ។
ក្រុមការពារបរិស្ថានបានលើកឡើងថា រដ្ឋាភិបាលជាប់ពាក់ព័ន្ធនៅក្នុងការជួញដូរឈើខុសច្បាប់ដ៏រាលដាលនៅក្នុងប្រទេស ទាំងដោយផ្ទាល់ឬដោយការឃុបឃិតជាមួយឈ្មួញឈើឯកជន។ ពួកគេលើកឡើងថា ការបង្ក្រាបកន្លងមកដែលប្រកាសដោយរដ្ឋាភិបាលបានធ្វើតិចតួចប៉ុណ្ណោះដើម្បីទប់ស្កាត់ការជួញដូរ ហើយនៅតែមានការសង្ស័យថា យុទ្ធនាការថ្មីបំផុតនេះនឹងធ្វើផ្សេងទៅវិញ។
តាមបទបញ្ជាពីខុទ្ទកាល័យនាយករដ្ឋមន្ត្រី ឈើខុសច្បាប់ទាំងអស់ដែលអាជ្ញាធររឹបអូសបានត្រូវលក់ឲ្យលោក ទ្រី ភាព ដែលប្រឈមការចោទប្រកាន់កាន់តែច្រើនថាបានកាប់ឈើខុសច្បាប់ជាងឈ្មួញឈើដទៃទៀតនៅក្នុងប្រទេស៕ សារុន