មន្ត្រីធម្មការ និងសាសនាខេត្តកំពង់ស្ពឺបានចេញសេចក្តីសម្រេចឲ្យព្រះសង្ឃ១៥អង្គនិមន្តចេញពីវត្តមួយក្នុងមូលដ្ឋានក្នុងចំណោមបញ្ហាជាច្រើនទៀតដោយសារព្រះសង្ឃទាំងនេះជាអ្នកគាំទ្រលោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ (LDP) ដែលបានធ្វើឲ្យព្រះសង្ឃទូទាំងប្រទេសមានកំហឹងដោយការលើកឡើងថា មានរឿងអាស្រូវមិនចេះចប់មិនចេះហើយ ដែលធ្វើឲ្យប៉ះពាល់ដល់សាសនារបស់រដ្ឋ។ ប៉ុន្តែ ព្រះសង្ឃទាំងនេះមិនព្រមនិមន្តចេញពីវត្តឡើយ។
ព្រះតេជគុណ ប៊ូ ពុទ្ធីណា ព្រះចៅអធិការ ស្តីទីវត្តជ្រៃហូរព្នៅ ស្ថិតក្នុងស្រុកគងពិសីបានមានសង្ឃដីកាកាលពីម្សិលមិញថា ព្រះសង្ឃទាំង១៥អង្គនេះត្រូវបានស្តីបន្ទោសពីរលើកមកហើយក្នុងរយៈពេលប៉ុន្មានខែថ្មីៗនេះចំពោះការមិនស្តាប់បង្គាប់ការទូន្មានរបស់ព្រះអង្គ និងមិនគោរពវិន័យវត្តទៀតផងដោយមិនព្រមជួយបោសសម្អាតវត្ត និមន្តចេញពីវត្តដោយគ្មានការអនុញ្ញាត និងមិនមកឆាន់ចង្ហាន់រួមគ្នា។
ព្រះតេជគុណបានមានសង្ឃដីកាថា ”ព្រះសង្ឃទាំង១៥អង្គនេះមិនគោរពវិន័យវត្ត ឬស្តាប់ការទូន្មានរបស់អាត្មាឡើយ។ ផ្ទុយទៅវិញបែរជាស្តាប់ការនិយាយរបស់លោក ខឹម វាសនា ហើយគាំទ្រគណបក្សសម្ព័ន្ធដើម្បី ប្រជាធិបតេយ្យទៅវិញ ហើយតែងតែរំលោភបំពានវិន័យវត្ត”។
ព្រះតេជគុណ ប៊ូ ពុទ្ធីណា បានមានសង្ឃដីកាថា ព្រះអង្គបានជួបជាមួយមន្ត្រីសង្ឃស្រុកកាលពីថ្ងៃអាទិត្យនៅវត្តនេះ ដែលមន្ត្រី សង្ឃទាំងនេះបានសម្រេចបណ្តេញព្រះសង្ឃមួយក្រុមនេះចេញ។ ហើយបើទោះជាអ្នកគាំទ្រគណបក្សសម្ព័ន្ធដើម្បីប្រជាធិបតេយ្យប្រហែល២០០នាក់បានមកដល់កាលពីថ្ងៃអាទិត្យ និងថ្ងៃច័ន្ទ ដើម្បីសំដែងការគាំទ្រ ដល់ព្រះសង្ឃមួយក្រុមនេះក៏ដោយ ក៏ព្រះអង្គមានសង្ឃដីកាថា មន្ត្រីសង្ឃខេត្តបានតម្កល់សេចក្តីសម្រេចបណ្តេញចេញនេះកាលពីថ្ងៃអង្គារដែរ។
ព្រះអង្គបានមានសង្ឃដីកាថា “កាលពីថ្ងៃទី៩ ខែកុម្ភៈ លោក មិន ឃិន រដ្ឋមន្ត្រីក្រសួងធម្មការ និងសាសនា និងមន្ត្រីមួយចំនួនទៀតបានមកកាន់វត្តនេះ ប៉ុន្តែ លោកបានបង្វែរករណីនេះទៅមន្ត្រីសង្ឃថ្នាក់ខេត្តឱ្យសម្រេចអំពីព្រះសង្ឃទាំងនេះ”។
លោក វ៉ាង វណេ្ណត ប្រធានមន្ទីរធម្មការនិងសាសនាខេត្តបានមានប្រសាសន៍ថា លោក គាំទ្រសេចក្តីសម្រេចនេះ។
លោកបានមានប្រសាសន៍ថា “បញ្ហានេះកើតឡើងព្រោះតែព្រះសង្ឃទាំងនេះមិនគោរពវិន័យវត្ត និងព្រះចៅអធិការស្តីទីហើយព្រះសង្ឃទាំងនេះតែងតែនិមន្តចេញពីវត្តដោយមិនប្រាប់ព្រះអង្គ”។
ព្រះតេជគុណ កើត ផល ព្រះជន្ម២៧វស្សាជាព្រះសង្ឃមួយអង្គក្នុងចំណោមព្រះសង្ឃទាំង១៥អង្គដែលមានព្រះជន្មចាស់វស្សាជាងគេបានទទួលស្គាល់ថា ជួនកាលព្រះអង្គមិនបានទៅឆាន់ចង្ហាន់រួមគ្នា និងបោសសម្អាតវត្តមែន ប៉ុន្តែ នៅពេលណាដែលព្រះអង្គរវល់តែប៉ុណ្ណោះ ។ ប៉ុន្តែ ព្រះអង្គបានបដិសេធថា ព្រះអង្គមិនបាននិមន្តចេញពីវត្តដោយគ្មានការអនុញ្ញាតឡើយ ហើយព្រះតេជគុណបានបដិសេធការចោទប្រកាន់ដទៃទៀតដែលព្រះតេជគុណ ប៊ូ ពុទ្ធីណា បានចោទប្រកាន់មកលើព្រះអង្គ។
ព្រះតេជគុណមានសង្ឃដីកាថា “ព្រះចៅអធិការស្តីទីអង្គនេះបានចោទប្រកាន់ពួកយើងថា មិនគោរពលោក ឬគោរពវិន័យវត្ត ហើយយកទឹកនោមឲ្យព្រះអង្គឆាន់”។
ព្រះតេជគុណ កើត ផល បានមានសង្ឃដីកាថា ព្រះអង្គ និងព្រះសង្ឃដទៃទៀតដែលប្រឈមនឹងការបណ្តេញចេញ ជាអ្នកគាំទ្រលោក ខឹម វាសនា ហើយមិនព្រមសូមអភ័យទោសចំពោះរឿងនេះឡើយ។
ព្រះអង្គបានបន្ថែមថា “យើងមិនបានធ្វើអ្វីខុសឡើយ ពីព្រោះយើងគ្រាន់តែចូលចិត្តស្តាប់ការនិយាយរបស់លោក ខឹម វាសនាតាមវិទ្យុប៉ុណ្ណោះ ពីព្រោះគាត់និយាយត្រូវ ហើយយើងគាំទ្រគាត់”។
ព្រះអង្គមានសង្ឃដីកាថា ព្រះសង្ឃទាំង១៥អង្គមិនព្រមនិមន្តចេញពីវត្តឡើយ ហើយ បានអំពាវនាវឲ្យលោកនាយករដ្ឋមន្ត្រី ហ៊ុន សែន ជួយអន្តរាគមន៍ទាំងតាមទំព័រហ្វេសប៊ុករបស់លោកនាយករដ្ឋមន្ត្រី និងតាមរយៈខុទ្ទកាល័យរបស់លោក។
ព្រះតេជគុណ ប៊ូ ពុទ្ធីណា បានមានសង្ឃដីកាថា ព្រះអង្គមិនទាន់សម្រេចថា ត្រូវដោះស្រាយបញ្ហាការមិនស្តាប់បង្គាប់របស់ព្រះសង្ឃមួយក្រុមនេះដោយរបៀបណានោះឡើយ ហើយកំពុងរង់ចាំសេចក្តីណែនាំពីមន្ត្រីសង្ឃជាន់ខ្ពស់។
ប៉ុន្តែ ព្រះតេជគុណ ឃឹម សន ព្រះមេគណ រាជធានីបានមានសង្ឃដីកាថា ព្រះអង្គទើបតែបានអានអំពីអធិករណ៍នេះក្នុងសារព័ត៌មាន ហើយមិនទាន់បានឃើញរបាយការណ៍ផ្លូវការឡើយ។
ព្រះអង្គមានសង្ឃដីកាថា ប៉ុន្តែ ជាទូទៅវាជាការខុសឆ្គងដែលព្រះសង្ឃគាំទ្រគណបក្សសម្ព័ន្ធដើម្បីប្រជាធិបតេយ្យនោះ។
ព្រះអង្គបានបន្ថែមថា “យើងបានចេញសេចក្តីប្រកាសថា វាជាការខុសឆ្គងដែលព្រះ សង្ឃគាំទ្រលោក ខឹម វាសនា ពីព្រោះលោក ខឹម វាសនា និយាយថា គាត់គ្មានសាសនា ទេ។ ដូច្នេះប្រសិនបើព្រះសង្ឃគាំទ្រគាត់ ព្រះសង្ឃទាំងនោះក៏គ្មានសាសនាដែរ ដូច្នេះព្រះសង្ឃទាំងនេះមិនមែនជាសង្ឃទេ”។
នៅអនុសំវច្ឆរៈមហាសន្និបាតមន្ត្រីសង្ឃក្នុងរាជធានីភ្នំពេញកាលពីខែធ្នូ មន្ត្រីធម្មការនិងសាសនា បានចំណាយពេលយ៉ាងច្រើនលើកឡើងពីលោក ខឹម វាសនា ហើយបានចោទប្រកាន់លោកថា បានព្យាយាមបំផ្លាញពុទ្ធសាសនានៅក្នុងប្រទេសកម្ពុជា។ គណបក្សរបស់លោកបានបដិសេធការចោទប្រកាន់នេះ។
កាលពីមួយឆ្នាំមុន ព្រះចៅអធិការវត្តមួយអង្គគង់នៅក្នុងខេត្តសៀមរាបត្រូវបានចោទប្រកាន់ពីបទរំលោភសាមណេរ១០អង្គនៅក្នុងវត្ត ហើយមន្ត្រីសង្ឃមួយអង្គត្រូវសាមណេរមួយអង្គចាក់រហូតដល់សុគតនៅវត្តមួយក្នុងរាជធានីភ្នំពេញ។
ព្រះសង្ឃជាច្រើនត្រូវគេតាមទាន់ជក់ម៉ាទឹកកក ផ្តល់កន្លែងជ្រកកោនដល់ស្ត្រីរកស៊ីផ្លូវភេទ ចាប់រំលោភ និងប៉ុនប៉ងរំលោភស្ត្រី និងកុមារ វាយឧបាសក និងឈ្លោះទាស់ទែងគ្នា ហើយលបចេញក្រៅវត្តក្នុងសម្លៀកបំពាក់ស៊ីវិលទៅច្រៀងខារ៉ាអូខេជាដើម៕សារុន