ការឃាត់អ្នកដំណើរពេលធ្វើចរាចរណ៍មួយករណីនៅក្នុងខណ្ឌមានជ័យ រាជធានីភ្នំពេញ កាលពីរំលងអធ្រាត្រឈានចូលព្រឹកថ្ងៃអាទិត្យ បានឈានទៅដល់ការប្រកែកគ្នារវាងនគរបាល និងតំណាងរាស្ត្រគណបក្សប្រឆាំងមួយរូបដែលទីបំផុតត្រូវបានផាកពិន័យ២៥.០០០រៀលចំពោះការមិនពាក់ខ្សែក្រវាត់។
លោក ឡឹក វីបូ អធិការរងខណ្ឌបានមានប្រសាសន៍ថា លោក រៀល ខេមរិន្ទ្រ តំណាងរាស្ត្រគណបក្សសង្គ្រោះជាតិត្រូវបានឃាត់ឲ្យឈប់នៅចំណុចត្រួតពិនិត្យមួយរបស់នគរបាលតាមផ្លូវលេខ២៧១ ក្នុងសង្កាត់បឹងត្របែក វេលាម៉ោងប្រហែល១និង៣០នាទីរំលេងអធ្រាត្រ។
លោកបានមានប្រសាសន៍ទៀតថា ”ខ្ញុំមិនដឹងថា បុរសម្នាក់នោះជាតំណាងរាស្ត្រទេ ពីព្រោះរថយន្តរបស់គាត់មិនពាក់ស្លាកលេខរដ្ឋសភា។ លោក រៀល ខេមរិន្ទ្រ បានប្រើពាក្យអាក្រក់ៗយ៉ាងច្រើនមើលងាយមន្ត្រីនគរបាលរបស់ខ្ញុំ បន្ទាប់ពីគាត់ត្រូវបានឃាត់ឲ្យឈប់ពីបទមិនពាក់ខ្សែក្រវាត់”។
លោក រៀល ខេមរិន្ទ្រ បានឆ្លើយតបថា នគរបាលបានឃាត់លោកឲ្យឈប់ ខណៈពេលលោកកំពុងបើករថយន្ត Toyota RAV4 របស់មិត្តភក្ដិដើម្បីទិញបបរនៅផ្សារច្បារអំពៅ ហើយលោកមិនសប្បាយចិត្តឡើយ បន្ទាប់ពីនគរបាលចាប់ផ្ដើមចំអកឲ្យលោក។
លោកបានបន្ថែមថា “ខ្ញុំបានចតឡាន ហើយសួរប៉ូលិសថាខ្ញុំខុសអី ព្រោះខ្ញុំមិនដឹងថាខ្ញុំខុសដោយសារការមិនពាក់ខ្សែក្រវាត់ទេ។ ប៉ុន្តែមន្ត្រីប៉ូលិសម្នាក់បានចំអកឲ្យខ្ញុំ ហើយនិយាយថា ខ្ញុំជាតំណាងរាស្ត្រដែលមិនគោរពច្បាប់។ ខ្ញុំមិនសប្បាយចិត្តទេចំពោះរឿងនោះ”៕ សុខុម