32 C
Phnom Penh

​​​ប្រទេសកម្ពុជា​​​ចុះ​​​កិច្ច​​​ព្រមព្រៀង​​​ស្តីពី​​​ការ​​​ជ្រើសរើស​​​ពលករ​​​ជាមួយ​​​​​​អារ៉ាប៊ីសាអូឌីត

ដោយ ឌឹ ខេមបូឌា ដេលី

បទវិភាគ

ប្រទេស​​​កម្ពុជា​​​បាន​​​ចុះ​​​កិច្ច​​​ព្រមព្រៀង​​​ជា​​​មួយ​​​ប្រទេស​​​អារ៉ាប៊ីសាអូឌីត ដោយ​​​បង្កើត​​​ក្រុម​​​ចរចា​​​ដើម្បី​​​ធ្វើការ​​​ប្រជុំ​​​ពិភាក្សា​​​លម្អិត​​​កិច្ច​​​ព្រមព្រៀង ដែល​​​នឹង​​​បើក​​​ច្រក​​​ស្រប​​​ច្បាប់​​​ឡើង​​​វិញ​​​សម្រាប់​​​ពលរដ្ឋ​​​ខ្មែរ​​​ដើម្បី​​​ស្វែង​​​រក​​​ការ​​​ងារ​​​នៅ​​​ប្រទេស​​​មជ្ឈិម​​​បូព៌ា​​​ ដែល​​​ជា​​​ញឹក​​​ញាប់ថៅកែ​​​រង​​​ការ​​​ចោទ​​​ប្រកាន់​​​ថា ​​​បាន​​​រំលោភ ​​​​​​បំពាន​​​លើ​​​កម្មករ​​​ចំណាកស្រុក។

យោង​​​តាម​​​សេចក្តី​​​ប្រកាស​​​ព័ត៌មាន​​​ដែល​​​ចេញ​​​ដោយ​​​ក្រសួង​​​ការងារ​​​កម្ពុជា​​​កាលពី​​​ថ្ងៃ​​​សុក្រ​​​​បាន​​​ឲ្យ​​​ដឹង​​​ថា ​​​លោក​​​ អិុត សំហេង រដ្ឋ​​​មន្ត្រី​​​ក្រសួង​​​ការងារ​​​បាន​​​ស្ថិត​​​នៅ​​​ទី​​​ក្រុង​​​រីយ៉ាដ ​​​កាលពី​​​ថ្ងៃ​​​ព្រហស្បតិ៍ ដើម្បី​​​ចុះ​​​ហត្ថលេខា​លើ​​​អនុស្សរណៈ​​​ចំនួន​​​ពីរ គឺ​​​១​​​សម្រាប់​​​ពលករ​​​បម្រើ​​​ការងារ​​​តាម​​​ផ្ទះ​​​​​​​​​​​​​​​​​​​​​ និង​​​១​​​ទៀត​​​សម្រាប់​​​ពលករ​​​ធ្វើ​​​ការងារ​​​ទូទៅ​​​ ជាមួយ​​​សម​​​ភាគី​​​អារ៉ាប៊ី​​​សាអូឌីត​​​​​​​​​របស់​​​លោក​​​គឺ​​​លោក Mufrej Al-Haqbani។

សេចក្តី​​​ប្រកាស​​​ព័ត៌មាន​​​បាន​​​ឲ្យ​​​ដឹង​​​ថា ​​​”កិច្ច​​​ព្រមព្រៀង​​​នេះ​​​គឺ​​​សំខាន់​​​ណាស់​​​ដើម្បី​​​ការពារ​​​សិទ្ធិ​​​ និង​​​ផលប្រយោជន៍​​​ពលករ​ខ្មែរ​​​ហើយ​​​ប្រទេស​​​ទាំង​​​ពីរ​​​ក៏​​​ត្រូវ​​​រៀបចំ​​​ឲ្យ​​​មាន​​​ប្រព័ន្ធ​​​គ្រប់​​​គ្រង​​​​​​​​​សម្រាប់​​​ការ​​​ជ្រើសរើស និង​​​សម្រាប់​​​ការ​​​ធ្វើ​​​មាតុភូមិ​​​និវត្ត​​​ពល​​​ករ ដោយ​​​អនុលោម​​​ទៅ​​​តាម​​​ច្បាប់”។

សេចក្តី​​​ប្រកាស​​​ព័ត៌មាន​​​បាន​​​បន្ថែម​​​ថា ​​​ភាគី​​​ទាំង​​​ពីរ​​​នឹង​​​បង្កើត​​​គណៈកម្មការ​​​ចម្រុះ​​​មួយ​​​ដើម្បី​​​ពិភាក្សា​​​អំពី​​​របៀប​​​អនុវត្ត​​​​​​កិច្ច​​​ព្រម​​​ព្រៀង​​​នេះ​​​ ដោយ​​​មិន​​​បាន​​ប្រាប់​​​រយៈ​​​ពេល​​​ឬ​​​សេចក្តី​​​លម្អិត​​​ពាក់ព័ន្ធ​​​​​នឹង​​​គោល​​​បំណង​ជាក់​​​លាក់​​​របស់​​​ប្រទេស​​​កម្ពុជា​​​ទេ។

អនុស្សរណៈ​​​នោះ​​​ក៏​​​មិន​​​ត្រូវ​​​បាន​​​បញ្ចេញ​​​ឲ្យ​​​ដឹង​​​ដែរ។ លោក​​​ សេង សក្កដា អគ្គនាយក​​​នៃ​​​អគ្គនាយកដ្ឋាន​​​ការងារ​​​នៃ​​​ក្រសួង​​​ការងារ​​​ បាន​​​បដិសេធ​​​មិន​​​ធ្វើ​​​អត្ថាធិប្បាយ។

អង្គការ​​​សិទ្ធិ​​​មនុស្ស Human Right Watch ​​​បាន​​​ចេញ​​​របាយការណ៍​​​ស្តី​​​ពី​​​អ្វី​​​ដែល​​​ខ្លួន​​​ហៅ​​​ថា ការ​​​រំលោភ​​​បំពាន​​​ “ខ្លាំង​​​ឡើង” លើ​​​ពលករ​​​ចំណាក​​​ស្រុក​​​ក្នុង​​​ប្រទេស​​​អារ៉ាប៊ីសាអូឌីត​​​ ក្នុង​​​នោះ​​​មាន​ទាំង​ពលកម្ម​​​ដោយ​​​បង្ខំ​​​ និង​​​លក្ខ​​​ខណ្ឌ​​​​​​ធ្វើការ​​​​​​​​​ពោរពេញ​​​ដោយ​​​ការ​​​កេង​​​ប្រវ័ញ្ច។​​​  កាលពី​ខែ​វិច្ឆិកា អង្គការ​នេះ​បាន​​​ឲ្យ​​​ដឹង​​​ថា ​​​កំណែ​​​ទម្រង់​​​ការងារ​​​ថ្មី​​​ៗ​​​របស់​​​អារ៉ាប៊ីសា​​​អូឌីត​​​​​​អាច​​​ជួយ​​​ទប់​​​ស្កាត់​​​ការ​​​រំលោភ​​​បំពាន​​​ប៉ុន្តែ បាន​​​ព្រមាន​​​ថា លក្ខខណ្ឌ​​​សម្រាប់​​​ពលករ ​​​ធ្វើការ​​​តាម​​​ផ្ទះ​​​នៅ​ដដែល។

ចំណែក​​​ឯ​​​អនុស្សរណៈ​​​ថ្មី​​​នេះ​​​អារ៉ាប៊ីសា​​​អូឌីត​​​ ​​​និង​​​កម្ពុជា​​​មាន​​​ចំណុច​​​ស្រដៀង​​​គ្នា​​​ក្នុង​​​ការ​​​ចរចា​​​កាល​​​ពី​​​៦​​​ឆ្នាំ​​​មុន។

កាលពី​​​ឆ្នាំ​​​២០១០​​​ ប្រទេស​​​ទាំង​​​ពីរ​​​បាន​​​ប្រុង​​​ប្រៀប​​​នឹង​​​ចុះ​​​ហត្ថលេខា​​លើ​​​អនុស្សរណៈ​​​​​​ នៃ​​​ការ​​​​​​យោគ​​​យល់​​​គ្នា​​​ ដែល​​​នឹង​​​បើក​​​ផ្លូវ​​​ឲ្យ​​​ប្រទេស​​​កម្ពុជា​​​បញ្ជូន​​​អ្នក​​​បម្រើ​​​​​​តាម​​​ផ្ទះ​​​៥.០០០​​​នាក់​​​ទៅ​​​​​​ប្រទេស​​​អារ៉ាប៊ីសាអូឌីត​​​ក្នុង​​​មួយ​​​ខែ។

នៅ​​​ពេល​​​នោះ​​​ក្រសួង​​​ការងារ​​​កម្ពុជា​​​បាន​​​និយាយ​​​ថា ភាគី​​​ទាំង​​​ពីរ​​​បាន​​​ព្រមព្រៀង​​​ប្រើ​​​គ្លីនិក​​​ផ្ទាល់​​​របស់​​​ក្រសួង​​​ដើម្បី​​​ពិនិត្យ​​​ពលករ​​​មុន​​​ពេល​​​ពួក​​​គេ​​​ចាក​​​ចេញ​​​ពី​​​ប្រទេស​​​ ហើយ​​​ក៏​​បាន​​​​​​ស្វែង​​​រក​​​ធនាគារ​​​មួយ​​​ដើម្បី​​​ផ្ញើ​​​ប្រាក់​​មក​​​ប្រទេស។ បើ​​​ទោះ​​​ជា កិច្ច​​​ព្រមព្រៀង​​​នោះ​​​មិន​​​ដែល​​​កើត​​​ជា​​​រូប​​​រាង​​​ក៏​​​ដោយ​​​ ក៏​​​ពលករ​​​កម្ពុជា​​​មួយ​​​ចំនួន​​​ត​​​ូច​​​បាន​​ទៅ​​​ដល់​​​​​​ប្រទេស​​​អារ៉ាប៊ីសាអូឌីត​​​តាម​​​រយៈ​​​ច្រក​​​មិន​​​ផ្លូវ​​​ការ។

យោង​​​តាម​​​អង្គការ​ពលកម្ម​​​អន្តរជាតិ​​​បាន​​​ឲ្យ​​​ដឹង​​​ថា នៅ​​​ឆ្នាំ​​​២០០៥​​​ប្រទេស​​​កម្ពុជា​​​បាន​​​បញ្ជូន​​​ស្ត្រី​​​៣៤​​​នាក់​​​ទៅ​​​ប្រទេស​​​នេះ ជា​​​ផ្នែក​​​មួយ​​​នៃ​​​កម្មវិធី​​​សាក​​​ល្បង​​​ជា​​​ផ្លូវ​​​ការ​​​​​​ ប៉ុន្តែ មិន​​​យូរ​​​ប៉ុន្មាន​​​បាន​​​បញ្ចប់​​​កិច្ច​​​ព្រម​​​ព្រៀង​​​នោះ​​​ទៅវិញ ពីព្រោះ​​​ខ្វះ​​​វត្តមាន​​​ការទូត​​​​​​​​ក្នុង​​​តំបន់​​​នោះ​​​ ដែល​​​អាច​​​ជួយ​ពលករ។

មន្ត្រី​​​ក្រសួង​​​ការងារ​​​ម្នាក់​​​នៅ​​​ពេល​​​នោះ​​​បាន​​​និយាយ​​​ថា ទីភ្នាក់ងារ​​​ជ្រើស​​​រើស​​​ពលករ​​​ខ្មែរ​​​ត្រូវ​​​បាន​​​គេ​​​បញ្ជា​​​ឲ្យ​​​ឈប់​​​បញ្ជូន​​​ពលករ​​​ព្រោះ​​​បារម្ភ​​​ថា ​​​សេចក្តី​​​រាយការណ៍​​​អំពី​​​ពលករ ​​​ចំណាក​​​ស្រុក​​​នៅ​​​ប្រទេស​​​អារ៉ាប៊ីសាអូឌីត​​​​​​​​​ត្រូវ​​​គេ​​​កាត់​​​ដៃ​​​ជើង​នោះ​​ អាច​​​ជា​​​ការ​​​ពិត៕ ​​​និត

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស