កាលពីម្សិលមិញ លោកនាយករដ្ឋមន្ត្រី ហ៊ុន សែន បានរិះគន់គណបក្សសង្គ្រោះជាតិចំពោះការអះអាងដែលថា កំណែទម្រង់មួយចំនួនក្នុងពេលថ្មីៗរបស់រដ្ឋាភិបាលធ្វើឡើងដោយសារមានសម្ពាធពីគណបក្សប្រឆាំង ដោយចាត់ទុកការអះអាងនេះថា ជា”ការនិយាយកុហកសុទ្ធសាធ”។
នៅក្នុងសារបង្ហោះតាមទំព័រហ្វេសប៊ុករបស់ខ្លួន លោកនាយករដ្ឋមន្ត្រីបានរិះគន់ចំពោះការអះអាងរបស់គណបក្សសង្គ្រោះជាតិដែលថា ខ្លួនមានឥទ្ធិពលលើគោលនយោបាយថ្មីៗមួយចំនួនរបស់លោក ក្នុងនោះរួមមានដូចជាការសម្រេចឲ្យអ្នកបើកបរភាគច្រើនមិនចាំបាច់មានប័ណ្ណបើកបរជាដើម។ លោក ហ៊ុន សែន បានសរសេរថា “ខ្ញុំសូមផ្ញើសារខ្លីនេះទៅកាន់មេបក្សប្រឆាំងព្រមទាំងក្រុមបក្សប្រឆាំងទាំងអស់ត្រូវឈប់បោកប្រាស់ប្រជាពលរដ្ឋតទៅទៀត ព្រោះកន្លងទៅប៉ុន្មានអាទិត្យនេះ បក្សប្រឆាំងបានយកលទ្ធផលដែលគណបក្សប្រជាជន និងលទ្ធផលដែលនាយករដ្ឋមន្ត្រីបានសម្រេចខាងលើយកទៅធ្វើនយោបាយប្រជាភិថុតិឃោសនាបោកប្រាស់ប្រជាពលរដ្ឋថា ដោយ សារពួកគេទាមទារទើបនាយករដ្ឋមន្ត្រីសម្រេចធ្វើបែបនេះ”។
ក្នុងរយៈពេលពីរបីខែកន្លងមកនេះ លោក ហ៊ុន សែន ទីបំផុតបានសម្រេចធ្វើការកែប្រែគោលនយោបាយថ្មីមួយចំនួន ដោយជារឿយៗផ្អែកលើសំណូមពរពីប្រជាពលរដ្ឋមកកាន់ទំព័រហ្វេសប៊ុកផ្ទាល់ខ្លួនរបស់លោក។ ការកែប្រែទាំងនេះរួមមានដូចជាការសម្រេច មិនចាំបាច់ឲ្យមានប័ណ្ណបើកបរ និងការលុបចោលបញ្ជរបង់ប្រាក់លើផ្លូវចំនួនពីរកន្លែង ក៏ដូចជាការកាត់បន្ថយថ្លៃផ្ទេរកម្មសិទ្ធិអចលន ទ្រព្យពីជីដូនជីតាទៅចៅ ពីឪពុកម្តាយទៅកូនពីប្រពន្ធទៅប្តីនិងពីប្តីទៅប្រពន្ធផងដែរ។
នៅក្នុងសារបង្ហោះតាមហ្វេសប៊ុកកាលពីម្សិលមិញ លោកនាយករដ្ឋមន្ត្រីបានលើកឡើងថា ការសរសើរគណបក្សសង្គ្រោះជាតិថា ដោយសារគណបក្សនេះទើបមានការកែប្រែទាំងនេះ គឺខុសហើយ។
លោកបានលើកឡើងថា “នេះជាការនិយាយកុហកបោកប្រាស់ប្រជាពលរដ្ឋសុទ្ធសាធ ដែលគណបក្សប្រឆាំងចេះធ្វើទៅរួចដែរ ដោយគ្មានការអៀនខ្មាស”។
លោកនាយករដ្ឋមន្ត្រីទំនងជាឆ្លើយតបទៅនឹងការលើកឡើងជាសាធារណៈរបស់លោក កឹម សុខា អនុប្រធានគណបក្សសង្គ្រោះ ជាតិកាលពីចុងសប្តាហ៍ ដែលអំឡុងពេលនោះលោកបានអះអាងថា គណបក្សរបស់លោកបានបង្ខំឲ្យមានការផ្លាស់ប្តូរគោលនយោបាយរដ្ឋាភិបាល ក្នុងនោះរួមមានដូចជាការលុបចោលបញ្ជរបង់ប្រាក់នៅផ្លូវជាតិលេខ៤ជាដើម។
លោក កឹម សុខា បានមានប្រសាសន៍ពេលថ្លែងទៅកាន់អ្នកគាំទ្រគណបក្សប្រឆាំង នៅក្នុងស្រុកសំរោង ខេត្តកំពង់ស្ពឺថា “អ្នកខ្លះនិយាយថា មេដឹកនាំរបស់យើងខ្សោយ ប៉ុន្តែ ជនរួមជាតិទាំងអស់ ជាពិសេសសកម្មជនទាំងអស់ដឹងរួចហើយថា បើគ្មានកម្លាំងរួបរួមបង្កើតជាគណបក្សសង្គ្រោះជាតិមួយដ៏ខ្លាំងក្លានេះទេ ថ្ងៃេនះប្រហែលជាផ្លូវជាតិលេខ៤ អម្បាញ់មិញនេះគេនៅយកលុយនៅឡើយទេ”។ លោកបានបន្ថែមថា ការសន្យាដំឡើងប្រាក់ខែគោលអប្បបរមាជូនមន្ត្រីរាជការដល់២៥០ដុល្លារកាលពីខែវិច្ឆិការបស់លោក ហ៊ុន សែន ក៏ដោយសារការកម្លាំងជំរុញរបស់គណបក្សលោកដែរ។
លោក កឹម សុខា បានថ្លែងថា “យើងមិនទាន់ទទួលបានជ័យជម្នះដឹកនាំប្រទេសក៏ពិតមែន ប៉ុន្តែ យើងមានឥទ្ធិពលយ៉ាងខ្លាំងក្នុងឆាកនយោបាយនៅកម្ពុជានិងអន្តរជាតិក្នុងពេលនេះ”។
ចាប់តាំងពីការបោះឆ្នោតជាតិដែលមានការប្រកួតប្រជែងគ្នាដ៏ស្វិតស្មាញកាលពីឆ្នាំ២០១៣មក វិធានការកំណែទម្រង់មួយចំនួនដែលដាក់ចេញដោយរដ្ឋាភិបាលរបស់លោក ហ៊ុន សែន មានភាពស្រដៀងគ្នាទៅនឹងគោលនយោបាយដែលដាក់ចេញដោយគណបក្សសង្គ្រោះជាតិជាផ្នែកនៃកម្មវិធីនយោបាយរបស់ខ្លួន ក្នុងនោះរួមមានដូចជាការជំរុញឲ្យមានការដំឡើងប្រាក់ខែជូនមន្ត្រីរាជការ និងកម្មកររោងចក្រកាត់ដេរ ការធានាផ្តល់សេវាកម្មថែទាំសុខភាពដោយឥតគិតថ្លៃជូនប្រជាពលរដ្ឋក្រីក្រ និងការកាត់បន្ថយតម្លៃអគ្គិសនី និងប្រេងសាំងជាដើម។
លោក គល់ បញ្ញា នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរីនិងយត្តិធម៌នៅកម្ពុជា(ខុមហ្វ្រែល) បានលើកឡើងថា គណបក្សប្រឆាំងធ្វើការវាយតម្លៃអំពីស្ថានភាពនេះគឺមិនខុសទេ។ លោកបានមានប្រសាសន៍ថា “ប្រសិនបើគ្មាន ការប្រឆាំងដ៏ខ្លាំងក្លាទេនោះ គ្មានផ្លូវដែលបញ្ហាទាំងនេះត្រូវបានឆ្លើយតបដូចនេះឡើយ”។លោកបានគូសបញ្ជាក់ថា បញ្ហាដូចជាប្រាក់ខែមន្ត្រីរាជការជាដើមនោះគឺមានភាពជាប់គាំងអស់រយៈពេលជាច្រើនឆ្នាំមុនការបោះឆ្នោត។
លោកបានបន្ថែមថា ការលើកឡើងរបស់ លោក ហ៊ុន សែន ដែលថា គណបក្សប្រឆាំងមិនគួរកេងចំណេញផលប្រយោជន៍ពីកំណែទម្រង់ក្នុងពេលថ្មីៗគឺទំនងជាលោកបានគិតគូរដល់ការបោះឆ្នោតនៅក្នុងឆ្នាំ២០១៧ និងឆ្នាំ២០១៨ ខណៈលោក កឹម សុខា កំពុងព្យាយាមបញ្ចុះបញ្ចូលអ្នកបោះឆ្នោតដែលខ្លួនខិតខំទាក់ទាញ។
លោកបានមានប្រសាសន៍ថា “នេះគឺប្រហែលសម្រាប់ភាគីទាំងពីរ នៅក្នុងការបោះឆ្នោតនាពេលខាងមុខ”៕ ស៊ុយឈាង (រាយការណ៍បន្ថែមដោយ Anthony Jensen)