មនុស្សប្រហែល៥០០នាក់បានប្រមូលផ្តុំគ្នានៅខាងក្រៅពន្ធនាគារព្រៃសក្នុងរាជធានីភ្នំពេញកាលពីម្សិលមិញ ដើម្បីទាមទារឲ្យដោះលែងលោក ណាន វណ្ណា អតីតអ្នកបើក បររថយន្តក្រុងឲ្យក្រុមហ៊ុនទេសចរណ៍កាពីតូល និង លោក រស់ ស៊ីុផៃ សកម្មជនការងារដែលត្រូវបានចាប់ខ្លួនកាលពីពីរសប្តាហ៍មុនពាក់ព័ន្ធការចូលរួមនៅក្នុងការតវ៉ាប្រឆាំងក្រុមហ៊ុននេះ។
ក្រុមនេះដែលភាគច្រើនជាសមាជិកនៃសហភាពការងារកម្ពុជា (CLC) បានមកដល់មណ្ឌលអប់រំកែប្រែក្នុងបរិវេណពន្ធនាគារព្រៃស ដែលស្ថិតនៅក្នុងខណ្ឌដង្កោ នៅវេលាម៉ោង៩ព្រឹក ជាទីដែលសន្តិសុខពន្ធនាគារបានរាយរបងបន្លាលួសបណ្តោះអាសន្នយ៉ាងឆាប់រហ័សដើម្បីកុំឲ្យអ្នកតវ៉ាចូលមកជិត ខណៈពួកគេស្រែកឡើងថា “អយុត្តិធម៌ណាស់! អយុត្តិធម៌ណាស់! សូមចាប់ខ្លួនជនដៃដល់ ហើយដោះលែងជនរងគ្រោះ!”។
បុរសទាំងពីរនាក់នេះត្រូវបានចាប់ខ្លួន និងចោទប្រកាន់ក្រោយការតវ៉ាកាលពីថ្ងៃទី៦ នៅក្នុងខែកុម្ភៈនេះនៅខាងក្រៅទីស្នាក់ការកណ្តាលរបស់ក្រុមហ៊ុនទេសចរណ៍កាពីតូល ជាកន្លែងដែលអតីតអ្នកបើកបររថយន្តក្រុង និងអ្នកគាំទ្ររបស់ពួកគេមកពីសហភាពការងារកម្ពុជាបាននាំគ្នាធ្វើការតវ៉ាម្តងម្កាលអស់រយៈពេល៨ខែ ដោយសារគិតថា ខ្លួនត្រូវបានបណ្តេញពីការងារដោយអយុត្តិធម៌ ទាក់ទិននឹងការព្យាយាមបង្កើតសហជីព។
អ្នករត់រ៉ឺម៉កម៉ូតូកង់បីមួយក្រុមបានផ្ទុះកំហឹងហើយយកដំបងដែក ដំបងឈើព្រមទាំងញញួរវាយប្រហារទៅលើអ្នកតវ៉ា ព្រោះពួកគេព្យាយាមឃាត់រថយន្តក្រុងមិនឲ្យចាកចេញពីចំណតនៅក្នុងខណ្ឌ៧មករា នេះបើយោងតាមអង្គការសិទ្ធិមនុស្សលីកាដូដែលបានបញ្ចេញវីដេអូស្តីពីហេតុការណ៍េនះ។
លោក អាត់ ធន់ ប្រធានសហភាពការងារកម្ពុជា ដែលជាអ្នកតស៊ូមតិការងារមួយរួបក្នុងចំណោមអ្នកតស៊ូមតិការងារចំនួន៤រូបដែលត្រូវបានចោទប្រកាន់ កាលពី ថ្ងៃទី៨ ខែកុម្ភៈ បានដឹកនាំការតវ៉ាកាលពីម្សិលមិញ។លោកបានរិះគន់សមាគមកម្ពុជាដើម្បីអភិវឌ្ឍន៍សហព័ន្ធដែលតំណាងអ្នករត់រ៉ឺម៉កម៉ូតូកង់បី ហើយជាថ្មីម្តងទៀតបានចោទប្រកាន់ពួកគេថា បានរួមគំនិតជាមួយក្រុមហ៊ុនទេសចរណ៍កាពីតូល។
លោកបានមានប្រសាសន៍ថា ”ហេតុការណ៍នេះកើតឡើងព្រោះថៅកែកាពីតូលមិនឲ្យបង្កើតសហជីព។សមាជិកនៃសមាគមកម្ពុជាដើម្បីអភិវឌ្ឍន៍សហព័ន្ធបានសហការជាមួយក្រុមហ៊ុននេះដើម្បីធ្វើការវាយប្រហារ”។
មនុស្សប្រហែល១០០នាក់បានធ្វើដំណើរចេញពីពន្ធនាគារទៅកាន់សាលាដំបូងរាជធានីភ្នំពេញនៅពេលរសៀលដើម្បីគាំទ្រលោក ណាន វណ្ណា ខណៈលោកត្រូវបានសាក សួរទាក់ទិនការចោទប្រកាន់ពីបទបង្កអំពើហិង្សាដោយចេតនា រារាំងមន្ត្រីសាធារណៈ និងរំខានដល់សណ្តាប់ធ្នាប់សាធារណៈ។
លោក ហន វិបុល អធិការរងខណ្ឌ៧មករា បានលើកឡើងថា អំពើហិង្សាកាលពីដើមខែនេះគឺជារឿងអកុសល ប៉ុន្តែមិនអាចទប់ស្កាត់បានឡើយ។ លោកបានបដិសេធមិនធ្វើអត្ថាធិប្បាយឡើយ ពេលសួរថា តើហេតុអ្វីបានជានគរបាលមិនបានចាប់ខ្លួនសមាជិកណាម្នាក់របស់សហជីពដែលតំណាងអ្នករត់រ៉ឺម៉កកង់បី ។
លោក កឹម សុជាតិ មេធាវីការពារក្តីឲ្យលោក ណាន វណ្ណា និងលោក រស់ ស៊ីផៃ បានលើកឡើងកាលពីម្សិលមិញថា តុលាការច្រាន ចោលសំណើរបស់លោកដែលស្នើសុំឲ្យដោះលែងបុរសទាំងពីរនាក់នេះនៅក្រៅឃុំកាលពីសប្តាហ៍មុន៕ ស៊ុយឈាង