ក្នុងពិធីមួយនៅវិទ្យាស្ថានបច្ចេកវិទ្យាកំពង់ស្ពឺ ដែលស្ថិតក្រោមការសាងសង់កាលពីព្រឹកម្សិលមិញ លោកនាយករដ្ឋមន្ត្រី ហ៊ុន សែន បានថ្លែងអំណរគុណព្រះអង្គម្ចាស់ក្សត្រីយ៍ថៃ មហាចក្រី សិរិន្ទថន ដែលកំពុងយាងបំពេញទស្សនកិច្ចនៅកម្ពុជា និងដែលបានបរិច្ចាគព្រះរាជទ្រព្យផ្ទាល់ព្រះអង្គជួយដល់គម្រោងសាងសង់សាលានេះ ចំពោះការគាំទ្រការអប់រំផ្នែកបច្ចេកវិទ្យានៅកម្ពុជា។
ដោយពិធីបញ្ចុះបឋមសិលាសាងសង់វិទ្យាស្ថាននេះបានរៀបចំរួចតាំងពីខែសីហាមកនោះ ពិធីកាលពីម្សិលមិញនៅលើទីតាំងដែលមានផ្ទៃដី២០៥ហិកតានេះ ភាគច្រើនជាឱកាសសម្រាប់ថ្នាក់ដឹកនាំទាំងពីរថតរូប។
លោក ហ៊ុន សែន បានមានប្រសាសន៍ថា ”សមិទ្ធផលនេះមិនមែនសម្រាប់តែមនុស្សជំនាន់នេះទេ ប៉ុន្តែវាក៏សម្រាប់មនុស្សជំនាន់ក្រោយដែរ”។ លោកបានបន្តថា ដំបូងឡើយមន្ត្រីកម្ពុជាបានស្នើសុំឲ្យសាងសង់វិទ្យាស្ថាននេះនៅខេត្តកោះកុង ប៉ុន្តែព្រះអង្គម្ចាស់ក្សត្រីយ៍ សិរិន្ទថន បានស្នើឲ្យសាងសង់វាឆ្ងាយជាងនេះនៅប៉ែកខាងកើតដោយយល់ឃើញថា ប្រជាពលរដ្ឋកម្ពុជាដែលរស់នៅជិតព្រំដែន អាចសិក្សានៅក្នុងប្រទេសថៃ បានយ៉ាងងាយស្រួល។
សារមួយដែលបង្ហោះលើទំព័រហ្វេសប៊ុករបស់លោក ហ៊ុន សែន បានលើកឡើងថា វិទ្យាស្ថាននេះនឹងផ្តល់កម្មវិធីសិក្សាថ្នាក់បរិញ្ញាបត្រ និងបរិញ្ញាបត្ររងផ្នែកវិស្វកម្មស៊ីវិល និងអគ្គិសនី វិទ្យាសាស្ត្រកុំព្យូទ័រ បដិសណ្ឋារកិច្ច និងទេសចរណ៍ ហើយវគ្គសិក្សានឹងចាប់ផ្តើមក្នុងឆ្នាំ២០១៨។
កាលពីខែសីហា លោក ហង់ ជួន ណារ៉ុន រដ្ឋមន្ត្រីក្រសួងអប់រំបានមានប្រសាសន៍ថា សិស្សចំនួន១.៥០០នាក់របស់វិទ្យាស្ថាននេះភាគច្រើននឹងចេញពីខេត្តកំពង់ស្ពឺ ខេត្តកណ្តាល និងខេត្តកំពង់ឆ្នាំង៕សុខុម