34 C
Phnom Penh

អូ រស្មី ដែល​ជា​តារាចម្រៀង​​ប្រជាប្រិយ ​​ប្ដឹង​ទាស់​ការ​ផ្ដន្ទាទោស​នាង​ពីបទ​​​​ធ្វើ​​​សញ្ចរកម្ម​​​​អនីតិជន

ដោយ ឌឹ ខេមបូឌា ដេលី

បទវិភាគ

​​​ចៅ​​​ក្រម​​​មួយ​​​​​​​​​​​​រូប​​​​​​ឲ្យ​​​ដឹង​​​​​​​​​​​​​​​​​​​​​ថា តារាចម្រៀង​ប្រជាប្រិយ​ម្នាក់​ដែល​តុលាការ​ផ្ដន្ទាទោស​​ឲ្យ​ជាប់​​​ពន្ធនាគារ​​៧ឆ្នាំ​ពីបទ​ធ្វើ​សញ្ចរកម្ម​​​​អនី​តិ​ជន បាន​អះអាង​នៅ​សាលា​ឧទ្ធរណ៍​ក្នុង​រាជធានី​​​​​​ភ្នំពេញ​កាលពី​ម្សិលមិញ​ថា នាង​គ្មាន​ទោស​ពៃរ៍​​​​​​​​​​​ទេ ហើយ​​​​​​ថា នាង​មិន​បាន​​​​នាំក្មេងស្រី​អាយុ១៤​ឆ្នាំ​ទៅឲ្យ​រួម​ភេទ​ជាមួយ​បុរស​ម្នាក់​នោះ​ឡើយ។

អូ រស្មី ដែល​បម្រើការ​ងារ​​​ឲ្យ​ក្រុមហ៊ុន​រៃមាស ជាក្រុម​ហ៊ុន​ផលិត​កម្មវិធី​ទូរទស្សន៍ និង​​ផលិត​កម្ម​ខារ៉ាអូខេ​ឆ្លង​ដែន ត្រូវ​​​សាលា​​​​ដំបូង​រាជធានី​ភ្នំពេញ​​​​​កាត់​​​ឲ្យ​​​ជាប់​​​ទោស​​​​ពីបទ​នាំក្មេងស្រី​ទៅ​​​ឲ្យ​រួម​ភេទ​ជាមួយ​បុរស​​ខ្មែរ​អាណិកជន​អាមេរិក​ម្នាក់​រយៈ​ពេល​បី​ថ្ងៃ​ជាប់គ្នា។

​អូ រស្មី ​ត្រូវ​​​​​​​​​​សមត្ថ​​​កិច្ច​​​ចាប់ខ្លួន​នៅ​ផ្ទះ​របស់​នាង​ក្នុង​សង្កាត់​ចោមចៅ ខណ្ឌពោធិ៍​សែន​ជ័យ ​កាល​ពី​ខែមករា ឆ្នាំ​២០១៤ បន្ទាប់ពី​ម្ដាយ​របស់​ក្មេងស្រី​រងគ្រោះ​ប្ដឹង​ទៅ​នគរ​បាល។

លោក​ ប្លង់ សំណាង ចៅក្រម​​ជំនុំជម្រះ​នៅ​សាលា​ឧទ្ធរណ៍​​​បាន​មាន​ប្រសាសន៍​អំពី​សវនាការ​បិទ​ទ្វារ​កាលពី​ម្សិលមិញ​ថា “​យើង​បាន​សាកសួរ​ជន​រងគ្រោះ​ដោយ​ផ្ទាល់ និង​ម្ដាយ​របស់​នាង ប៉ុន្តែ​សាក្សី​​ពីរ​នាក់​ទៀត​​​អវត្ត​​មាន​” ហើយ​ អូ រស្មី ក៏​ត្រូវ​បានចោទ​សួរ​ដែរ។ ​​លោក​​​​​​បាន​​​​​​បន្ថែម​​​​​​ថា ”​ចុងចម្លើយ​​​បាន​ច្រាន​ចោល​ការ​ចោទ​​ប្រកាន់ ហើយ​អះអាង​ថា ខ្លួន​​​មិន​បាន​នាំ​អនីតិជន​​ទៅ​ឲ្យ​រួម​ភេទ​ជាមួយ​​បុរស​​​​​ម្នាក់​នោះ​ទេ។ ប៉ុន្តែ​ដើម​ចម្លើយ​​​​​​ប្រាប់​តុលា​ការ​ថា ជន​សង្ស័យ​បាន​នាំ​នាង​ទៅ​ឲ្យ​រួមភេទ​ជាមួយ​បុរស​ចំណាស់​​ក្បាល​ទំពែក​ម្នាក់”។

​លោក​​​​បន្ត​​​ថា ក្មេងស្រី​រងគ្រោះ​បាន​ប្រាប់​​តុលាការ​ថា នាង​​យល់​ព្រម​រួម​ភេទ​ជាមួយ​បុរស​ម្នាក់​នោះ​​ដោយ​សារ​​ អូ រស្មី បាន​សន្យា​​ធ្វើ​ឲ្យ​នាង​ល្បី​ឈ្មោះ​​ជា​ថ្នូរ​ដោះដូរ។ ”​ជន​រងគ្រោះ​និយាយ​ថា អូ រស្មី បាន​ប្រាប់​នាង​ថា ‘​បើ​ឯង​​​ចង់​ក្លាយ​ជា​​តារា​ល្បី ទៅដេក​ជាមួយ​គាត់​ទៅ។ ពេល​នោះ​ជន​រងគ្រោះ​​ក៏​យល់​ព្រមទៅ​ដេក​ជាមួយ​បុរស​ម្នាក់​នោះ​​​ដែល​​​បាន​​​​អះអាង​ថា រូប​គេ​នឹង​លើក​​នាង​ឲ្យ​ក្លាយ​ជា​តារាល្បី”។

សូម​បញ្ជាក់​ថា អាយុ​គ្រប់ការ​នៅ​​ប្រទេស​​​​​កម្ពុជា​ គឺ​១៦ឆ្នាំ។

លោក ប្លង់ សំណាង បាន​ថ្លែង​ថា ​បុរស​ខ្មែរ​​​​អាណិកជន​អាមេរិក ដែល​សមត្ថកិច្ច​​​​​​​កំណត់​អត្ត​​​សញ្ញាណ​​​​​មិន​​បាន​​​រូប​​​នោះ​​​ កំពុង​គេច​ខ្លួន​នៅឡើយ​។ “​តុលាការ​មិន​​ទាន់​រក​ឃើញ​បុរស​​​ម្នាក់​នោះ​​ទេ។ ​សាលា​ឧទ្ធរណ៍​របស់​យើង​នឹង​ពិចារណា​​​លើ​ភ័ស្តុតាង ហើយ​នៅ​ថ្ងៃទី​២៩ ​កុម្ភៈ យើង​នឹង​ប្រកាស​​​​ថា ​តើការ​ផ្ដន្ទាទោស​នេះ​ត្រឹម​ត្រូវ ​ឬក៏អត់”។

ចំណែក​ឯ​ អូ រស្មី និង​លោក នូ ចន្ថា ​មេធាវី​​​របស់​នាង​​ សុទ្ធ​​​​​​តែ​​​​​​​បដិសេធ​មិន​ឆ្លើយ​បំភ្លឺ​កាល​​​ពី​ម្សិលមិញ៕ សុខុម​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស