ប្រេសិតជាន់ខ្ពស់អាមេរិកប្រចាំអាស៊ានបាននិយាយកាលពីថ្ងៃពុធថា ថ្វីបើបញ្ហាពាណិជ្ជកម្មនិងសន្តិសុខត្រូវគេយកចិត្តដាក់នៅជំនួបកំពូលអាមេរិក-អាស៊ានកាលពីសប្តាហ៍មុនក៏ដោយ ក៏លោក បារ៉ាក់ អូបាម៉ា ប្រធានាធិបតីអាមេរិក បានប្រើជំនួបនោះដើម្បីលើកឡើងអំពីបញ្ហាសិទ្ធិមនុស្សរបស់តំបន់នេះដែរ។
ថ្លែងពីទីក្រុងហ្សាការតាក្នុងពេលធ្វើទូរសន្និសីទ ជាមួយអ្នកយកព័ត៌មាន លោកស្រី នីណា ហាឈីជាន (Nina Hachigian) បាននិយាយថា ជំនួបកំពូលដែលធ្វើឡើងនៅ រ៉ានឆូ មីរេជ រដ្ឋកាលីហ្វ័រញ៉ា ពីថ្ងៃទី១៥ដល់១៦ខែកុម្ភៈ ក៏ដូចជាទំនាក់ទំនងអាមេរិក-អាស៊ានជាទូទៅដែរ បានផ្តោតលើ “ការលូតលាស់ ស្ថិរភាព [និង]ច្បាប់ជាច្រើន”។
ឆ្លើយតបទៅនឹងសំណួរអំពីថាតើការអញ្ជើញប្រទេសកម្ពុជាចូលរួមជំនួបកំពូលនេះ បានបង្ហាញការមើលឃើញសុទិដ្ឋិនិយមទាក់ទិននឹងស្ថានភាពសិទ្ធិមនុស្សរបស់ប្រទេសនេះដែរឬទេ លោកស្រី ហាឈីជាន បាននិយាយថា “ខ្ញុំអាចប្រាប់លោកបានថា នៅគ្រប់ឱកាសទាំងអស់ក្នុងជំនួបកំពូល លោកប្រធានាធិបតីបានលើកឡើងនូវសារៈសំខាន់នៃសិទ្ធិមនុស្សនិងនីតិរដ្ឋ”។
លោកស្រីបាននិយាយថា “អាទិភាពសំខាន់របស់យើងគឺចង់មើលឃើញប្រទេសកម្ពុជាអភិវឌ្ឍទៅជាលទ្ធិប្រជាធិបតេយ្យរឹងមាំ ដែលគោរពសិទ្ធិមនុស្ស និងគាំទ្រសង្គមស៊ីវិលចម្រើនលូតលាស់”។
លោកស្រី ហាឈីជាន បានបន្ថែមថា “ការប្រឈមដ៏ច្រើន”នៅតែមាន។
លោកស្រីបាននិយាយថា “យើងជំរុញឲ្យរដ្ឋាភិបាលកម្ពុជាបន្តបង្កើតសង្គមប្រកបដោយយុត្តិធម៌ត្រឹមត្រូវថែមទៀត និងធ្វើឲ្យការប្ដេជ្ញារបស់ខ្លួនប្រសើរឡើងចំពោះលទ្ធិប្រជាធិបតេយ្យនិងសិទ្ធិមនុស្ស”។
ក្នុងសន្ទរកថាបើកនៅជំនួបកំពូលកាលពីថ្ងៃទី១៥ខែកុម្ភៈ លោក អូបាម៉ា បានរំលងការនិយាយអំពីសិទ្ធិមនុស្ស និងឋានៈរបស់ខ្លួនក្នុងទំនាក់ទំនងអាមេរិក-អាស៊ាន។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ដែលកាលពីសប្តាហ៍មុនបានចាត់ទុកការអញ្ជើញលោកនាយករដ្ឋមន្ត្រី ហ៊ុន សែន ទៅចូលរួមជំនួបកំពូលនេះជា “ដំបងឈើធ្ងន់ដ៏ធំវាយចំក្បាលអ្នកប្រឆាំង”នោះ បាននិយាយថា ការនិយាយអំពីសិទ្ធិមនុស្សរបស់លោក អូបាម៉ា គឺតិចតួចបំផុត។
លោក ឥសាន បាននិយាយថា “មុនដំណើរអញ្ជើញមកដល់របស់គណៈប្រតិភូជាន់ខ្ពស់កម្ពុជា [ក្រុមសង្គមស៊ីវិលនិងក្រុមអ្នកតវ៉ាប្រឆាំងរដ្ឋាភិបាល] បានសំលៀងកាំបិត ហើយហុចទៅឲ្យប្រធានាធិបតី អូបាម៉ា ដើម្បីកាប់ចិញ្ច្រាំគណៈប្រតិភូជាន់ខ្ពស់កម្ពុជា”។
លោកបាននិយាយថា “ទោះជាយ៉ាងនេះក្តី យើងបានកត់សម្គាល់ឃើញថា គ្មាននរណានៅឯជំនួបកំពូលនោះបានលើកឡើងពីបញ្ហាអវិជ្ជមានទាំងនេះដាក់លើថ្នាក់ដឹកនាំរបស់រដ្ឋាភិបាល ដែលដឹកនាំដោយ សម្តេច តេជោ ហ៊ុន សែន នោះទេ។ ហេតុដូច្នេះ យើងចាត់ទុកការទៅចូលរួមរបស់គណៈប្រតិភូជាន់ខ្ពស់កម្ពុជានៅជំនួបកំពូលអាមេរិក-អាស៊ាន ថាជោគជ័យសម្បើមមួយ”៕ និត