លោក កឹម សុខា អនុប្រធានគណបក្សប្រឆាំងបានថ្លែងទៅកាន់ក្រុមអ្នកគាំទ្រនៅខេត្តតាកែវ និងខេត្តកំពតកាលពីចុងសប្ដាហ៍ថា ប្រជាពលរដ្ឋឆ្លាតណាស់មិនចាញ់បោកអ្នកនយោបាយទេ ហើយបានអះអាងជាថ្មីម្ដងទៀតថា កំណែទម្រង់របស់រដ្ឋាភិបាលកាលពីពេលថ្មីៗនេះធ្វើឡើងដោយសារតែមានសម្ពាធពីគណបក្សសង្គ្រោះជាតិ។
លោកនាយករដ្ឋមន្ត្រី ហ៊ុន សែន បានរិះគន់គណបក្សប្រឆាំងខ្លាំងៗតាមរយៈសារមួយបង្ហោះតាមហ្វេសប៊ុកកាលពីសប្ដាហ៍មុន បន្ទាប់ពីលោក កឹម សុខា បានប្រាប់ក្រុមអ្នកគាំទ្រថា ចំណាត់ការជាបន្តបន្ទាប់ក្នុងគោលនយោបាយប្រជានិយមដែលនាយករដ្ឋមន្ត្រីបានអនុវត្តនៅឆ្នាំនេះ គឺធ្វើឡើងដោយសារតែគណបក្សសង្គ្រោះជាតិ ដោយក្នុងនោះរួមមានទាំងការលុបចោលការយកប្រាក់លើផ្លូវសំខាន់ៗមួយចំនួនផងដែរ។
លោក ហ៊ុន សែន បានសរសេរក្នុងសារកាលពីថ្ងៃទី២២ ខែកុម្ភៈនោះថា “ខ្ញុំសូមផ្ញើសារខ្លីនេះទៅកាន់ក្រុមបក្សប្រឆាំងទាំងអស់ត្រូវឈប់បោកប្រាស់ប្រជាពលរដ្ឋតទៅទៀត ព្រោះកន្លងទៅប៉ុន្មានអាទិត្យនេះ បក្សប្រឆាំងបានយកលទ្ធផលដែលគណបក្សប្រជាជន និងលទ្ធផលដែលនាយករដ្ឋមន្ត្រីបានសម្រេចខាងលើយកទៅធ្វើនយោបាយប្រជាភិថុតិឃោសនាបោកប្រាស់ប្រជាពលរដ្ឋ”។
ក្នុងវីដេអូនៃសុន្ទរកថាចំនួនពីរកាលពីចុងសប្ដាហ៍កន្លងទៅដែលត្រូវបានបង្ហោះតាមទំព័រហ្វេសប៊ុករបស់លោក លោក កឹម សុខា លើកឡើងថា លោកនាយករដ្ឋមន្ត្រីមើលស្រាលអ្នកបោះឆ្នោត។ លោកបានថ្លែងទៅកាន់អ្នកចូលរួមនៅខេត្តតាកែវកាលពីថ្ងៃសៅរ៍ថា “គ្មាននរណាអាចបោកប្រាស់ប្រជាពលរដ្ឋបានទេ។ កុំបារម្ភចំពោះសមត្ថភាពរបស់ខ្ញុំអីអ្នកទាំងអស់គ្នា មេដឹកនាំបច្ចុប្បន្នទាំងនៅក្នុងគណបក្សកាន់អំណាច និងគណបក្សប្រឆាំងដែលចង់បោកប្រាស់ប្រជាពលរដ្ឋ ពួកគេមិនអាចធ្វើបានទេ”។
នៅខេត្តកំពតកាលពីថ្ងៃអាទិត្យ អនុប្រធានគណបក្សប្រឆាំងរូបនេះបានបង្កើនការអះអាងរបស់លោកថា គណបក្សប្រជាជនកម្ពុជា ធ្វើការផ្លាស់ប្ដូរក៏ដោយសារតែខ្លួនប្រឈមការប្រឆាំងខ្លាំងក្លា។ សំដៅដល់ការបង្កើនកិច្ចប្រឹងប្រែងធ្វើកំណែទម្រង់របស់រដ្ឋាភិបាលដែលកើតមានឡើងរយៈពេលជាងមួយឆ្នាំមុនការបោះឆ្នោតឃុំ-សង្កាត់ និងជាង២ឆ្នាំមុនការបោះឆ្នោតជ្រើសតាំងតំណាងរាស្ត្រអាណត្តិក្រោយ លោកបានថ្លែងថា “នៅក្នុងការប្រកួតប្រជែង បើអ្នករត់នៅខាងមុខឃើញអ្នករត់នៅពីក្រោយដាច់គ្នាឆ្ងាយ អ្នកនៅខាងមុខនឹងមិនខំទេ។ នេះជារឿងពិតដែលយើងត្រូវហ៊ាននិយាយ។ វាជាសមិទ្ធផលរបស់យើង”។
លោក កឹម សុខា ក៏សម្ដែងការមិនសប្បាយចិត្តដែរចំពោះសមត្ថកិច្ចដែលមិនបានចាត់វិធានការទៅលើអ្នកដែលគំរាមប្រើហិង្សាលើមន្ត្រីគណបក្សប្រឆាំង ដែលផ្ទុយទៅនឹងការចេញវិធានការផ្លូវច្បាប់ភ្លាមៗទៅលើអ្នកដែលគំរាមមន្ត្រីគណបក្សកាន់អំណាច។
អ្នកប្រើប្រាស់ហ្វេសប៊ុកមួយចំនួនត្រូវបានចាប់ខ្លួនក្នុងរយៈពេលប៉ុន្មានខែថ្មីៗនេះ រួមទាំងយុវជនបីនាក់ដែលត្រូវបានចោទប្រកាន់ពីបទគំរាមប្រើអំពើហិង្សាលើលោក ហ៊ុន សែន និងលោក ស ខេង រដ្ឋមន្ត្រីក្រសួងមហាផ្ទៃផងដែរ។
លោក កឹម សុខា ប្រធាន “ក្រុមភាគតិច” ក្នុងរដ្ឋសភា បានរងការគំរាមធ្វើឃាតយ៉ាងហោចណាស់ម្ដង និងការគំរាមប្រើអំពើហិង្សាផ្សេងៗទៀត ក្នុងនោះរួមទាំងការព្រមានមួយកាលពីដើមខែនេះពីសំណាក់អ្នកលេងហ្វេសប៊ុកដ៏ល្បីល្បាញដែលគាំទ្រគណបក្សប្រជាជនកម្ពុជាផងដែរ ប៉ុន្តែគ្មាននរណាម្នាក់ត្រូវបានចាប់ខ្លួនឡើយក្នុងករណីទាំងនេះទេ។
លោកមានប្រសាសន៍ថា “ពេលភាគីម្ខាងទៀតមានអំណាចចោទប្រកាន់មកលើក្រុមភាគតិច គ្មានអ្នកណាអើពើទេ ទោះជាមានការគំរាមសម្លាប់ក៏ដោយ គ្មានអ្នកដាក់ពាក្យបណ្តឹង គ្មានអ្នកចាត់វិធានការ។ ប៉ុន្តែ បើជាបុគ្គលទន់ខ្សោយវិញ ពួកគេនឹងជាប់គុក”។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានមានប្រសាសន៍កាលពីម្សិលមិញថា លោក កឹម សុខា យល់ច្រឡំហើយប្រសិនបើលោកយល់ថា គណបក្សសង្គ្រោះជាតិមានចំណែកនៅក្នុងគំនិតផ្ដួចផ្ដើមរបស់រដ្ឋាភិបាល។
លោកគូសបញ្ជាក់ថា “គណបក្សប្រជាជនធ្វើអ្វីៗតាមផែនការរបស់ខ្លួនមុន កឹម សុខា ឬ សម រង្ស៊ី ចាប់ផ្ដើមស្រែកទៅទៀត។ អ្វីដែលគាត់និយាយវាងាយស្រួល ប៉ុន្តែរដ្ឋាភិបាលកំពុងអនុវត្តផែនការរបស់ខ្លួនមួយជំហានម្ដងៗ។ ដូច្នេះគាត់បានប្លន់ និងឆក់ឱកាសដើម្បីទទួលគុណសម្បត្តិ និងសមិទ្ធផលរបស់គណបក្សប្រជាជន និងរដ្ឋាភិបាល”។
លោកក៏បានលើកឡើងដែរថា លោកមិនដែលឮការគំរាមកំហែងណាមួយលើគណបក្សប្រឆាំងទេ។ “តើអ្នកណាគំរាមអ្នកណា? គ្មានអ្នកណាគំរាមពួកគេទេ។ បើមានការគំរាមកំហែង សុំសួរថាម៉េចក៏គាត់អាចទៅជួបជាមួយអ្នកគាំទ្របានដោយសេរី?”៕ សុខុម