លោក ហោ ណាំហុង រដ្ឋមន្ត្រីក្រសួងការបរទេសបានបញ្ជាឲ្យស្ថានទូតខ្មែរនៅក្រុងបាងកកផ្ដល់មេធាវីជួយអ្នកនេសាទខ្មែរប្រាំ នាក់ ដែលត្រូវបានចាប់ខ្លួនពីបទវាយប្រហារភ្ញៀវទេសចរបារាំងបួននាក់ ហើយរំលោភម្ដាយនិងកូនស្រី លើកោះគុតរបស់ថៃ កាលពីយប់ថ្ងៃសៅរ៍។
លោកស្រី អ៊ាត សុភា ឯកអគ្គរាជទូតខ្មែរ បានធ្វើដំណើរទៅកោះនោះនៅខេត្តត្រាត ប្រទេសថៃ ក្នុងបេសកកម្មស្វែងរកការពិតកាលពីថ្ងៃច័ន្ទ ដោយត្រឡប់មកក្រុងបាងកកវិញនៅពេលរសៀលដើម្បីជម្រាបជូនលោក ហោ ណាំហុង តាមទូរស័ព្ទ។
សេចក្ដីជូនព័ត៌មានមួយចុះហត្ថលេខាដោយលោករដ្ឋមន្ត្រី និងចេញកាលពីម្សិល មិញ បានបញ្ជាក់ពិស្ដារនូវការវាយប្រហារ ដែលត្រូវបានរាយការណ៍ដោយព័ត៌មានអន្តរជាតិ និងព័ត៌មានថៃ ក្នុងនោះមានទាំងហេតុការណ៍ដែលជនសង្ស័យបានសារភាពថា បានវាយប្រហារភ្ញៀវទេសចរបារាំងនៅ ជិតរមណីយដ្ឋានរបស់ពួកគេ និងថាពួកគេបានរំលោភស្ត្រីទាំងនោះ ដែលទីភ្នាក់ងារព័ត៌មាន AP បានរាយការណ៍ថា គឺជាម្ដាយនិងកូនស្រី។
សេចក្ដីជូនព័ត៌មានក៏បានឲ្យដឹងដែរថា បុរសទាំងនោះស្រវឹងស្រានៅពេលពួកគេវាយប្រហារអ្នកដើរលេងវិស្សមកាលទាំងនោះ។ សេចក្ដីជូនព័ត៌មានមិនបានប្រាប់ភិនភាគបុរសទាំងនោះទេ ប៉ុន្តែបានឲ្យដឹងថា មនុស្សទាំងប្រាំនាក់មានអាយុក្រោម២៥ឆ្នាំ និងរៀនសូត្របានតិចតួច។
សេចក្ដីជូនព័ត៌មានបានបន្ថែមថា បុគ្គលិកស្ថានទូតកម្ពុជា “ ត្រូវស្វែងរកវិធីជួយអ្នកនេសាទ ទាំងប្រាំនាក់ និងផ្ដល់មេធាវីអំឡុងពេលសាកសួរនៅតុលាការ” ក្នុងប្រទេសថៃ។
លោក ជុំ សុន្ទរី អ្នកនាំពាក្យក្រសួងការបរទេស បាននិយាយតាមទូរស័ព្ទថា គេមានគម្រោងសាកសួរជនសង្ស័យនៅតុលាការខេត្តត្រាតកាលពីម្សិលមិញ។
លោកបាននិយាយថា ”មិនមែនជាលើកដំបូងទេដែលពលរដ្ឋខ្មែរបានឡើងតុលាការក្នុងប្រទេសថៃ” ដោយលោកបានពន្យល់ថា ស្ថានទូតនៅក្រុងបាងកកបានជួលមេធាវីម្នាក់ដើម្បីដោះស្រាយករណីបែបនេះ។
លោក ស៊ុន្ទរី បាននិយាយថា ស្ថានទូតបានព្យាយាមទាក់ទងគ្រួសាររបស់អ្នកទាំងប្រាំ ដែលមកពីខេត្តកំពង់ចាម និងបាត់ដំបង ហើយធ្វើការលើទូកនេសាទថៃឈ្មោះ Chok Kamolwan។ លោកមិនបានផ្ដល់ឈ្មោះជនជាប់ចោទទាំងនោះទេ តែត្រូវនគរបាលថៃបានឲ្យដឹងថា មានឈ្មោះ យីម ឈ្មោះ ផៃ ឈ្មោះ ចឺន ឈ្មោះ ធី និង ប៊ុត ម៉ាន។
អ្នកនាំពាក្យរូបនេះបាននិយាយថា លោកមិនដឹងថា រដ្ឋាភិបាលកម្ពុជានឹងចាត់វិធានការបែបណាទេក្នុងហេតុការណ៍ដែលមានការចោទប្រកាន់លើអ្នកនេសាទទាំងនោះប៉ុន្តែបានលើកឡើងថា ប្រទេសកម្ពុជានិងប្រទេសថៃមានសន្ធិសញ្ញាបត្យាប័នទ្វេភាគី។
កាសែតបាងកកប៉ុស្តិ៍បានរាយការណ៍ថា ទូកនេសាទ Chok Kamolwan បានចូលចតនៅឆ្នេរកោះគុតកាលពីថ្ងៃសៅរ៍ ហើយថា អ្នកនេសាទទាំងនោះបានហែលមកកាន់ឆ្នេររកទិញគ្រឿងស្រវឹង ក៏ស្រាប់តែជួបប្រទះនឹងភ្ញៀវទេសចរទាំងនោះតែម្តង។ បន្ទាប់មក បុរសទាំងនោះបានវាយប្រហារភ្ញៀវទាំងបួននាក់ដោយកំាំបិតនិងដំបងមុនពេលរំលោភស្ត្រីពីរនាក់នោះ។
ក្នុងអត្ថបទកាលពីម្សិលមិញ កាសែតនេះបានរាយការណ៍ថា ក្រុមអ្នកស៊ើបអង្កេតប្រមូលបាន៥១ភ័ស្តុតាង ក្នុងនោះមានកាំបិតដែលគេជឿថា ត្រូវបានប្រើក្នុងការវាយប្រហារនោះ៕ និត