សកម្មជនសិទ្ធិដីធ្លី១៣នាក់មកពីតំបន់បឹងកក់បានបង្ហាញខ្លួនកាលពីម្សិលមិញនៅតុលាការកំពូលក្នុងរាជធានីភ្នំពេញដើម្បីការពារបណ្តឹងសាទុក្ខនៅក្នុងការតតាំងផ្លូវច្បាប់អស់រយៈពេលរាប់ឆ្នាំជុំវិញការចោទប្រកាន់ទាក់ទិននឹងការតវ៉ា។
ស្ត្រីទាំង១៣នាក់នេះដែលបានល្បីឈ្មោះ ដោយសារការតវ៉ាដ៏ស្វិតស្វាញរបស់ពួកគាត់ប្រឆាំងការបណ្តេញចេញដែលកើតឡើងដោយសារស្នាដៃរបស់ក្រុមហ៊ុនអចលនទ្រព្យគ្រប់គ្រងដោយសមាជិកព្រឹទ្ធសភាម្នាក់នោះត្រូវបានចាប់ខ្លួនក្បែរតំបន់បឹងកក់កាលពីខែឧសភាឆ្នាំ២០១២ពេលកងសន្តិសុខព្យាយាមបំបែកពួកគាត់ខណៈពួកគាត់ធ្វើការតវ៉ានៅលើដីមានជម្លោះ។
វីដេអូស្តីពីហេតុការណ៍តវ៉ានេះបានបង្ហាញថា ស្ត្រីទាំងនេះនាំគ្នាច្រៀងបទចម្រៀងតវ៉ាខណៈព័ទ្ធជុំវិញទៅដោយនគរបាល និងកងសន្តិសុខ មុនពេលសន្តិសុខម្នាក់រុញដៃរបស់ស្ត្រីម្នាក់ ដែលជាហេតុធ្វើឲ្យផ្ទុះការរុញប្រវាយ ប្រតប់គ្នាទៅវិញទៅមកនោះ។ ទោះជាយ៉ាងណាក៏ដោយ សាលារាជធានីភ្នំពេញបានចោទប្រកាន់សកម្មជនទាំងនេះ ថាបានប្រើប្រាស់ពូថៅ ញញួរ និងដំបងដែកតតាំងនឹងកងសន្តិសុខ។
ពួកគាត់ត្រូវបានចោទប្រកាន់ពីបទប្រឆាំងរាជការសាធារណៈដោយមានស្ថានទម្ងន់ទោស និងកាន់កាប់ដោយខុសច្បាប់លើអចលនវត្ថុសាធារណៈ ហើយត្រូវបានបញ្ជូន ទៅដាក់ពន្ធនាគារមួយរយៈពេលខ្លី។ អង្គការសិទ្ធិមនុស្សបានចាត់ទុកពួកគាត់ថា “បឹងកក់១៣” ហើយបានធ្វើយុទ្ធនាការទាមទារឲ្យដោះលែងពួកគេមកវិញ ដែលធ្វើឲ្យអន្តរជាតិមានការចាប់អារម្មណ៍យ៉ាងខ្លាំង ជាហេតុ ធ្វើឲ្យសាលាឧទ្ធរណ៍សម្រេចកាត់បន្ថយទោសជាប់ពន្ធនាការរបស់ពួកគាត់នៅខែក្រោយ ដោយអនុញ្ញាតឲ្យពួកគាត់មានសេរីភាពវិញភ្លាមៗ។
ទោះជាយ៉ាងណា ស្ត្រីទាំងនេះនៅតែបដិសេធមិនព្រមទទួលយកសាលដីកាផ្តន្ទាទោស ហើយចង់ឲ្យតុលាការកំពូលកែប្រែបទចោទប្រកាន់នេះ។
អ្នកស្រី ទេព វន្នី អាយុ៣៥ឆ្នាំបានប្រាប់តុលាការថា “ខ្ញុំប្តឹងសាទុក្ខ ព្រោះខ្ញុំមិនពេញចិត្តដោយសារសាលដីការបស់សាលាឧទ្ធរណ៍ និងសាលក្រមរបស់សាលាដំបូងរាជធានីបានផ្តន្ទាទោសខ្ញុំទាំងខ្ញុំមិនបានប្រព្រឹត្តបទល្មើសដូចការចោទប្រកាន់”។
អ្នកស្រីបានបន្ថែមថា “ខ្ញុំអត់មានកាន់អ្វីទេ ហើយអ្វីដែលពួកគេចោទប្រកាន់ខ្ញុំគឺជាការបំផ្លើស។ ខ្ញុំមិនអាចការពារផ្ទះរបស់ខ្ញុំបានផង តើខ្ញុំមានសិទ្ធិអំណាចទន្ទ្រានដីកម្មសិទ្ធិឯកជន និងរារាំងមន្ត្រីសាធារណៈម្តេចនឹងកើតទៅ?”។
ស្រ្តីដែលត្រូវបានចោទប្រកាន់ម្នាក់ទៀតឈ្មោះ សុង ស្រីលាភ អាយុ៣១ឆ្នាំបានលើកឡើងថា ស្ត្រីទាំងនេះចង់ឲ្យគេលុប ឈ្មោះរបស់ខ្លួនចេញពីបញ្ជីតុលាការ។ “ខ្ញុំចង់ឲ្យតុលាការកំពូលផ្តល់យុត្តិធម៌ ហើយធ្វើឲ្យឈ្មោះរបស់យើងស្អាតស្អំឡើងវិញ។ វាអស់រយៈពេល៤ឆ្នាំមកហើយ ខ្ញុំមិនចង់ឮថា យើងបានប្រព្រឹត្តបទល្មើសនោះឡើយ”។
មេធាវីម្នាក់ដែលតំណាងឲ្យស្ត្រីទាំងនេះបានអំពាវនាវឲ្យមានការលើកលែងការចោទប្រកាន់ដោយលើកឡើងពីទឡ្ហីករណ៍មុនៗមករបស់សាក្សី និងអ្នកកាសែតនៅកន្លែងតវ៉ាដើមដំបូងដែលនិយាយថា ស្ត្រីទាំងនេះគ្មានអាវុធក្នុងដៃទេ។
មេធាវីរូបនេះដែលមានឈ្មោះ សាន សុគន្ធា បានសួរថា “តើអ្នកមានភ័ស្តុតាងណាមួយដើម្បីបង្ហាញថា ក្នុងចំណោមកូនក្តីរបស់ខ្ញុំ មានកូនក្តីណាម្នាក់កាន់ពូថៅ ឬញញួរដែរឬទេ?។ យើងបានឃើញនគរបាលជាច្រើនចាប់ខ្លួនពួកគាត់ ហើយសែងពួកគាត់ដូចជ្រូកញាត់ចូលរថយន្តមួយបាំងកន្លះ”។
អគ្គព្រះរាជអាជ្ញារង ឈួន ចន្ថា មិនបានផ្តល់ភ័ស្តុតាងបែបនេះទេ ដោយលើកឡើងត្រឹមតែថា “សាលាឧទ្ធរណ៍សម្រេចត្រឹមត្រូវ” ហើយបានស្នើសុំឲ្យចៅក្រម “ពិចារណាអំពីច្បាប់នេះ”។
សាលដីកាស្ថាពរនៅក្នុងសំណុំរឿងនេះនឹងប្រកាសនៅថ្ងៃទី១៦ខែមីនា៕ ស៊ុយឈាង