ក្រុមមន្ត្រីសហជីពដែលលើកឡើងថា ការចាប់ខ្លួនគឺជាហេតុផលនយោបាយបាននិយាយកាលពីម្សិលមិញថា មន្ត្រីសហជីពម្នាក់ និងអ្នកជិតខាងរបស់ខ្លួនត្រូវបានកងរាជអាវុហត្ថខេត្តកំពង់ឆ្នាំងឃាត់ខ្លួន ពីបទទះកំផ្លៀងស្ត្រីគ្រប់គ្រងរដ្ឋបាលរោងចក្រម្នាក់ ហើយបានប៉ុនប៉ងសម្លាប់ស្ត្រីរូបនោះ ។
យោងតាមសហជីពសេរីកម្មករ (FTU) បានឲ្យដឹងថា ជម្លោះនេះបានកើតឡើងនៅពេលអ្នកស្រី សំ ច្រឹប ជាប្រពន្ធរបស់មន្ត្រីសហជីពរូបនេះ ត្រូវបានបណ្ដេញចេញពីរោងចក្រ Horizon Outdoor ចំពោះការព្យាយាមបង្កើតសាខាសហជីពសេរីកម្មករនៅទីនោះ។
យោងតាមលោក កាន សុខវី ប្រធានសហជីពសេរីកម្មករនៅរោងចក្រ Can Sport Shoes ក្បែរគ្នានោះបានឲ្យដឹងថា បន្ទាប់ពីត្រូវបានសន្តិសុខក្រៀកចេញពីរោងចក្រកាលពីថ្ងៃអង្គារ អ្នកស្រី សំ ច្រឹប បានអះអាងថា គាត់ត្រូវបានប្រធានរដ្ឋបាលរោងចក្រ Horizon ដែលគេស្គាល់ត្រឹមតែថាឈ្មោះ គន្ធា បានតាមគាត់រហូតដល់ផ្ទះ។
លោក សុខវី និយាយថា “អ្នកស្រី សំ ច្រឹប បានទូរស័ព្ទទៅប្រាប់ប្ដីរបស់ខ្លួនថា ប្រធានរដ្ឋបាលរូបនេះបានតាមអ្នកស្រីដល់ផ្ទះ”។
លោក សុខវី បានថ្លែងថា បន្ទាប់មកលោក ផុន វណ្ណា ត្រូវជាប្ដីរបស់គាត់ និងជាសមាជិកសហជីពសេរីកម្មករដែលបម្រើការងារនៅរោងចក្រ Can Sport Shoes បានជិះរថយន្តមកផ្ទះរបស់ខ្លួនស្ថិតក្នុងស្រុកសាមគ្គីមានជ័យ ដើម្បីវាយតម្លៃស្ថានភាពនោះ។ ប៉ុន្តែ ស្ត្រីឈ្មោះ គន្ធា បានព្យាយាមបើករថយន្តចេញពីកន្លែងនោះបន្ទាប់ពីបុរសរូបនេះបានមកដល់។ ពេលនោះលោក វណ្ណា បានទូរស័ព្ទទៅលោក ចែម ជួន ដែលជាអ្នកជិតខាងឲ្យមកជួយតតាំងជាមួយស្ត្រីរូបនេះ ហើយពួកគេបានដេញតាមរថយន្តរបស់ស្ត្រីរូបនោះ។
អ្វីដែលកើតឡើងបន្ទាប់មកទៀតគឺមិនច្បាស់ទេ ប៉ុន្តែស្ត្រីឈ្មោះ គន្ធា បានអះអាងថា លោក វណ្ណា បានទះកំផ្លៀងគាត់ ហើយថា បុរសទាំងពីរនាក់នេះបានប៉ុនប៉ងសម្លាប់គាត់។ លោក វណ្ណា បានអះអាងថា ស្ត្រីរូបនេះបានប្រឌិតរឿងរ៉ាវឡើង។
លោក សុខវី ថ្លែងថា “លោក វណ្ណា បានប្រាប់ខ្ញុំថា គាត់មិនបានទះកំផ្លៀងស្រីរូបនោះទេ ប៉ុន្តែគ្រាន់តែចង់សួរស្ត្រីរូបនោះប៉ុណ្ណោះថា ‘ហេតុអ្វីបានជាតាមប្រពន្ធរបស់ខ្ញុំដល់ផ្ទះ? តើមានបញ្ហាអ្វីជាមួយប្រពន្ធរបស់ខ្ញុំ?’”។
លោកបាននិយាយថា កងរាជអាវុធហត្ថមកពីបន្ទាយក្បែរនោះបានឆ្លើយតបចំពោះការហៅទូរស័ព្ទពីស្ត្រីឈ្មោះ គន្ធា ហើយបានចាប់ខ្លួនបុរសទាំងពីរនាក់នេះ។
លោក ប៊ុត សុភ័ក្ត្រ ជាមេបញ្ជាការនៅបន្ទាយនោះ បានអះអាងពីការចាប់ខ្លួននេះ ហើយបាននិយាយថា បុរសទាំងពីរនាក់នេះត្រូវបានបញ្ជូនទៅទីបញ្ជាការដ្ឋានកងរាជអាវុធហត្ថខេត្ត ទីដែលពួកគេស្ថិតនៅទីនោះនៅឡើយ រហូតដល់ពេលត្រូវបានបញ្ជូនទៅសាលាដំបូងខេត្តដើម្បីធ្វើការសាកសួរកាលពីម្សិលមិញ។ លោកបាននិយាយថា ពួកគេមិនទាន់ត្រូវបានចោទប្រកាន់ពីបទឧក្រិដ្ឋនៅឡើយទេ។
លោក ជា មុនី ប្រធានសហជីពសេរីកម្មករបានមានប្រសាសន៍ថា ការចាប់ខ្លួននេះជារឿងគួរឲ្យសង្ស័យ ហើយបានចោទប្រកាន់ “អ្នកមានអំណាច” ថាបានរៀបចំរឿងនេះ។
លោកបានថ្លែងថា “ខ្ញុំបានសង្កេតឃើញថា នៅពេលពួកគាត់ក្លាយជាមន្ត្រីសហជីព អាជ្ញាធរនិងថៅកែរោងចក្រតែងតែរើសអើងមកលើពួកគេ”។ ប៉ុន្តែ លោក សុភ័ក្ត្រ បានអះអាងថា ពួកគាត់ត្រូវបានចាប់ខ្លួនដោយសារតែការតតាំងជាមួយស្ត្រីឈ្មោះ គន្ធា នេះ។
លោកលើកឡើងថា ”ប្រសិនបើពួកគេមិនមានបញ្ហា យើងក៏មិនចាប់ខ្លួនពួកគេដែរ”។ លោកបានបន្ថែមថា “ស្ត្រីម្នាក់បានទូរស័ព្ទមកប្ដឹងខ្ញុំដោយផ្ទាល់ថា មានបុរសពីរនាក់ប៉ុនប៉ងសម្លាប់គាត់ ហើយថា ពួកគេបានទាញគាត់ចេញពីឡាន ហើយបានវាយគាត់”។
តំណាងរោងចក្រមិនអាចទាក់ទងសុំអត្ថាធិប្បាយបានទេ៕សារុន