ឈើមានតម្លៃមួយគំនរបានឆេះក្លាយជាផេះនៅលើចម្ការកៅស៊ូដែលកាន់កាប់ដោយជនជាតិសិង្ហបុរីនៅក្នុងខេត្តមណ្ឌលគិរីកាលពីថ្ងៃពុធ តែប៉ុន្មានម៉ោងប៉ុណ្ណោះបន្ទាប់ ពីសមាជិកក្រុមការងារពិសេសរបស់រដ្ឋាភិបាលប្រឆាំងការកាប់ឈើបានបញ្ចប់ការធ្វើបញ្ជីសារពើភណ្ឌ ដោយជំរុញឲ្យមានការស៊ើបអង្កេតរកមូលហេតុនៃការេឆះនេះ។
ក្រុមមន្ត្រីបាននិយាយកាលពីម្សិលមិញថា ការេឆះនេះបានកើតឡើងនៅតំបន់ព្រៃមួយកន្លែងនៅលើដីសម្បទានទំហំ៨.០០០ហិកតារបស់ក្រុមហ៊ុន Unigreen Resources នៅម៉ោងប្រហែល៧យប់ ហើយបានឆេះអស់ឈើមួយចំនួនជាប្រភេទឈើលេខ១ប៉ុន្តែមិនបានរាលដាលដល់ដើមឈើនៅជុំវិញនោះទេ។
យ៉ាងហោចណាស់ វាជាការឆេះលើកទី៤ហើយនៅក្នុងរយៈពេលប៉ុន្មានសប្ដាហ៍ថ្មីៗនេះដើម្បីបំបាត់ភ័ស្តុតាងប្រឆាំងក្រុមហ៊ុនកាន់កាប់ដីដែលស្ថិតនៅក្រោមការស៊ើបអង្កេត របស់ក្រុមការងារពិសេស ដែលបង្កើតឡើងដោយលោកនាយករដ្ឋមន្ត្រី ហ៊ុន សែន នៅពាក់កណ្ដាលខែមករា ដើម្បីប្រយុទ្ធប្រឆាំងការកាប់ឈើខុសច្បាប់នៅភាគបូពា៌ប្រទេស។
តាមផ្លូវឆ្ពោះទៅកាន់ដីសម្បទានរបស់ក្រុមហ៊ុន Unigreen ស្ថិតក្នុងស្រុកកោះញែកកាលពីព្រឹកម្សិលមិញ លោក តូច យ៉ុន ស្នងការ នគរបាលខេត្តបានអះអាងថា លោកនិងសមាជិកក្រុមការងារដទៃទៀតកំពុងស៊ើបអង្កេតរកមូលហេតុនៃការឆេះនេះ ប៉ុន្តែលោកមិនធ្វើអត្ថាធិប្បាយបន្ថែមឡើយ។
ថ្លែងនៅពេលរសៀល លោក កាន ពេញ អធិការនគរបាលស្រុកបានមានប្រសាសន៍ថា លោកបានឃើញឈើដែលនៅសេសសល់ ប៉ុន្តែថា អាជ្ញាធរមិនអាចចូលទៅជិតបានទេ ពីព្រោះដីក្ដៅពេកមិនអាចដើរកាត់បានឡើយ។ លោកបានថ្លែងថា ភ្លើងបានឆេះបំផ្លាញឈើនេះ ប៉ុន្តែមិនបានប៉ះពាល់ដល់ឈើដែលនៅជុំវិញនោះឡើយ។
លោក កាន ពេញ បានបដិសេធមិនធ្វើការប៉ាន់ប្រមាណអំពីចំនួនឈើដែលត្រូវបានបំផ្លាញឡើយ ប៉ុន្តែបានលើកឡើងថា ឈើមួយដុំៗមានប្រវែងពី៣ទៅ៥ម៉ែត្រ និងមានមុខកាត់ពី៣០ទៅ៦០សង់ទីម៉ែត្រ ហើយថា ឈើទាំងនេះត្រូវបានកាប់ពីឈើប្រណីតបីប្រភេទ គឺសុក្រំ ស្រឡៅ និងគគីរ។
លោកបានថ្លែងថា ក្រុមការងារពិសេសកំពុងធ្វើការវាស់វែង និងរាប់ឈើទាំងនេះរយៈពេលពីរបីសប្ដាហ៍កន្លងមក ជាផ្នែកមួយនៃការអង្កេតជាប្រចាំទៅលើទ្រព្យសម្បត្តិរបស់ក្រុមហ៊ុន Unigreen ហើយបានបញ្ចប់ការងាររបស់ខ្លួនតែប៉ុន្មានម៉ោងប៉ុណ្ណោះ មុនពេលឈើបានឆេះ។
លោក កាន ពេញ បានមានប្រសាសន៍ថា អ្នកជំនាញកំពុងធ្វើការវាស់វែងឈើទាំងនេះជាច្រើនសប្ដាហ៍ ហើយបានរកឃើញថា ឈើភាគច្រើនមិនស្ថិតក្នុងបញ្ជីសារពើភណ្ឌរបស់ក្រុមហ៊ុននេះទេ” ដោយលើកឡើងថា វាត្រូវបានកាប់ដោយខុសច្បាប់។
ប៉ុន្តែបើទោះជាមានការសង្ស័យថា ហេតុការណ៍កើតឡើងគាប់ជួនគ្នា ហើយការឆេះនេះមិនរាលដាលខ្លាំងក៏ដោយ ក៏លោក កាន ពេញ បានថ្លែងថា លោកជឿថា គ្មាននរណាមានចេតនាធ្វើដូច្នេះឡើយ។
លោកបានថ្លែងថា “ខ្ញុំមិនដឹងពីមូលហេតុនៃការឆេះនេះទេ ប៉ុន្តែខ្ញុំគិតថា អាចជាការឆេះព្រៃដោយចៃដន្យ ពីព្រោះតែងតែមានភ្លើងឆេះអំឡុងរដូវប្រាំង”។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស ដែលមានលោក សៅ សុខា ជាប្រធានក្រុមការងារនេះបានមានប្រសាសន៍ថា អាជ្ញាធរកំពុងស៊ើបអង្កេតរកមូលហេតុនៃការឆេះនេះនៅឡើយ។
លោកបានថ្លែងថា “យើងមិនទាន់ប្រាកដពីមូលហេតុនៃការឆេះនេះទេ ពីព្រោះយើងកំពុងធ្វើការស៊ើបអង្កេតនៅឡើយ ពីព្រោះខ្ញុំទទួលបានរបាយការណ៍ថា ភ្លើងបានឆេះរាលដាលពីព្រៃក្បែរនោះ” ហើយលោកបានបដិសេធមិននិយាយថាតើឈើប៉ុន្មានត្រូវបានបំផ្លាញនោះឡើយ។
គេបានចាប់អារម្មណ៍ខ្លាំងលើក្រុមហ៊ុន Unigreen ដែលទទួលបានដីសម្បទានដើម្បីដាំកៅស៊ូក្នុងឆ្នាំ២០០៩ កាលពីដើមខែមករាពេលនគរបាលជាតិបានចេញសេចក្ដីថ្លែងការណ៍មួយ ចោទក្រុមហ៊ុននេះក្នុងចំណោមក្រុមហ៊ុនផ្សេងៗទៀតថា បានលាងឈើដោយខុសច្បាប់។
មួយខែក្រោយមក ក្រុមហ៊ុន ទ្រី ភាព គ្រុប របស់លោក ទ្រី ភាព ដែលជាឈ្មួញឈើមានអំណាច និងមានរឿងចម្រូងចម្រាសនៅក្នុងប្រទេសកម្ពុជានោះ បានចេញសេចក្ដីថ្លែងការណ៍របស់ខ្លួនបដិសេធការចោទប្រកាន់គ្មានការបញ្ជាក់ដែលថា ខ្លួនមានទំនាក់ទំនងជាមួយក្រុមហ៊ុន Unigreen។ ពីរ សប្ដាហ៍ក្រោយមក ក្រុមហ៊ុន Unigreen បានផ្ញើលិខិតមួយច្បាប់ទៅនាយឧត្ដមសេនីយ៍ សៅ សុខា បដិសេធថា ក្រុមហ៊ុនមិនជាប់ពាក់ព័ន្ធក្នុងការជួញដូរឈើខុសច្បាប់ឡើយ។
ការឆេះកាលពីថ្ងៃអង្គារ យ៉ាងហោចណាស់គឺជាលើកទី៤ហើយក្នុងការបំផ្លាញស្តុកឈើនៅលើដីសម្បទានឯកជនចាប់តាំងពីក្រុមការងារពិសេសត្រូវបានបង្កើតឡើងមក ប៉ុន្តែក្រុមហ៊ុនមួយចំនួនបានរួចផុតពីការស្តីបន្ទោស ដោយអាជ្ញាធរសម្រេចថា ការឆេះនេះជារឿងកើតឡើងដោយចៃដន្យ ឬដោយ អ្នកបង្កអគ្គិភ័យ។
លោក អំ សំអាត អ្នកគ្រប់គ្រងបច្ចេកទេស នៅអង្គការសិទ្ធិមនុស្សលីកាដូ ដែលបានតាមឃ្លាំមើលសកម្មភាពរបស់ក្រុមការងារពិសេស នេះយ៉ាងដិតដល់នោះ បានមានប្រសាសន៍ថា ការឆេះជាច្រើនកាលពីពេលថ្មីៗនេះជារឿងគួរឲ្យភ្ញាក់ផ្អើល។
លោកបានថ្លែងថា “វាជារឿងចម្លែក ពីព្រោះ មុនពេលក្រុមការងារពិសេសប្រឆាំងការកាប់ឈើខុសច្បាប់ត្រូវបានបង្កើតឡើង យើងមិនដែលឃើញឈើរាប់គំនរឆេះទេ ប៉ុន្តែឥឡូវនេះយើងឃើញការឆេះឈើនៅលើដីរបស់ក្រុមហ៊ុនមួយចំនួន។យើងសង្ស័យ ថា ក្រុមហ៊ុនមួយចំនួនដុតវាដើម្បីបំផ្លាញភ័ស្តុតាងតែម្ដង។
គេមិនអាចទាក់ទងក្រុមហ៊ុន Unigreen ដើម្បីសុំអត្ថាធិប្បាយបានទេ៕ សារុន