ក្រុមមន្ត្រីបាននិយាយកាលពីម្សិលមិញថា នគរបាលអន្តោប្រវេសន៍កំពុងត្រៀមឆែកឆេរកាស៊ីណូកំពុងធ្វើការសាងសង់មួយកន្លែងនៅក្រុងព្រះសីហនុ រកជនជាតិចិនមួយក្រុមធំដែលគេជឿថា កំពុងប្រតិបត្តិការក្រុមជំរិតទារប្រាក់តាមប្រព័ន្ធអុីនធឺណិត។
លោក អ៊ុក ហៃសិលា ប្រធានផ្នែកស៊ើបអង្កេតនៅនាយកដ្ឋានអន្តោប្រវេសន៍ក្រសួងមហាផ្ទៃមានប្រសាសន៍ថា មន្ត្រីរបស់លោកកំពុងរង់ចាំសាលាដំបូងខេត្តព្រះសីហនុអនុម័តយល់ព្រមលើដីកាឆែកឆេរ ដើម្បីឲ្យពួកគេអាចចុះពិនិត្យការដ្ឋានសាងសង់កាស៊ីណូនេះ ទីដែលបុរស៦០នាក់ត្រូវគេជឿថាកំពុងស្នាក់នៅទីនោះ។
ឧត្ដមសេនីយ៍ទោ អ៊ុក ហៃសិលា បានមានប្រសាសន៍ថា ”យើងនឹងឆែកឆេរកន្លែងដែលជនជាតិចិនស្នាក់នៅរួមគ្នាក្នុងខេត្តព្រះសីហនុ ប៉ុន្តែយើងត្រូវរង់ចាំដីកាឆែកឆេរពីតុលាការជាមុនសិន”។
លោកបដិសេធមិនប្រាប់ឈ្មោះកាស៊ីណូនេះ ឬពន្យល់ពីរបៀបដែលក្រុមជំរិតទារប្រាក់ជាច្រើនមកបើកហាងនៅទីនោះឡើយ ដោយលើកឡើងពីភាពរសើបនៃការស៊ើបអង្កេត។
ក្នុងរយៈពេលប៉ុន្មានឆ្នាំថ្មីៗនេះ នគរបាលបានរកឃើញក្រុមជំរិតទារប្រាក់មួយចំនួនដែលប្រតិបត្តិការចេញពីប្រទេសកម្ពុជា ដោយភាគច្រើនប្រើប្រាស់អីុនធឺណិតដែលមានតម្លៃថោកទៅកាន់ប្រទេសផ្សេងៗទៀត ជាពិសេសប្រទេសចិន។
ឧត្ដមសេនីយ៍ទោ អ៊ុក ហៃសិលា បានមានប្រសាសន៍ថា នគរបាលអន្តោប្រវេសន៍មានគម្រោងឆែកឆេរថា តើជនបរទេសទាំងនេះមានទិដ្ឋាការ ឬប័ណ្ណការងារត្រឹមត្រូវ និងថាតើពួកគេមានកុំព្យូទ័រដែលបង្ហាញពីក្រុមជំរិតទារប្រាក់តាមប្រព័ន្ធអុីនធឺណិតឬយ៉ាងណានោះ។
លោក អុឹម វលក្ខណ៍ ប្រធានអង្គភាពនគរបាលជនបរទេសនៅក្នុងខេត្តនេះបានមានប្រសាសន៍ថា លោកបានបង្កើតជាក្រុមមួយដើម្បីជួយដល់មន្ត្រីអន្តោប្រវេសន៍ក្នុងការស៊ើបអង្កេតរបស់ពួកគេ។
យោងតាមលោក សៀង សេន ប្រធាននាយកដ្ឋានសន្តិសុខផ្ទៃក្នុងក្រសួងមហាផ្ទៃបានឱ្យដឹងថា នៅក្នុងករណីដាច់ដោយឡែកមួយទៀត បុរសជនជាតិចិន៣៨នាក់ដែលត្រូវបានចាប់ខ្លួននៅកាស៊ីណូមួយក្នុងក្រុងប៉ោយប៉ែតកាលពីសប្ដាហ៍មុន ដោយសង្ស័យថា បានជាប់ពាក់ព័ន្ធនឹងក្រុមជំរិតទារប្រាក់តាមប្រព័ន្ធអុីនធឺណិតនោះ នឹងត្រូវនិរទេសទៅវិញនៅពេលឆាប់ៗនេះ។
ឧត្ដមសេនីយ៍ឯក សៀង សេន បានមានប្រសាសន៍ថា “យើងកំពុងរង់ចាំការយល់ព្រមពីស្ថានទូតចិន និងរដ្ឋមន្ត្រីក្រសួងមហាផ្ទៃ ប៉ុន្តែយើងមិនទាន់ដឹងពីកាលបរិច្ឆេទពិតប្រាកដនៅឡើយទេ”។
លោកឧត្ដមសេនីយ៍ឯក សៀង សេន បានមានប្រសាសន៍បន្ថែមថា ក្រុមស៊ើបអង្កេតបានបញ្ចប់ការសាកសួរបុរសទាំងនេះដែលកំពុងត្រូវឃុំខ្លួននៅទីស្នាក់ការរបស់នាយកដ្ឋានលោក៕ សារុន