30 C
Phnom Penh

សហព័ន្ធស្រូវ​អង្ករ​កម្ពុជា​សន្យា​ចាត់​វិធានការក្រោយ​​​ពេល​មាន​ការ​រិះគន់​

ដោយ ឌឹ ខេមបូឌា ដេលី

បទវិភាគ

មួយ​សប្តាហ៍​បន្ទាប់ពី​ក្រុម​រោង​ម៉ាស៊ីន​កិន​ស្រូវ​និង​អ្នក​នាំចេញ​បាន​រិះគន់​សហព័ន្ធ​ស្រូវ​អង្ករ​កម្ពុជា ​(CFR)​ ថាមិន​​សកម្ម​​​ ​អំឡុង​ពេល​​វិស័យនេះ​ប្រឈម​នឹង​​បរាជ័យ​​ សហព័ន្ធ​​​នេះ​​​​​​​កាលពី​ម្សិលមិញ​បាន​ប្រកាស​នូវការ​បង្កើត​ក្រុម​ការងារ​ពិសេស​ថ្មី​មួយ​ដើម្បី​ដោះ​​​ស្រាយ​​​ ​បញ្ហាដែល​សមាជិក​របស់ខ្លួន​កំពុង​ប្រឈម។

សហព័ន្ធ​ស្រូវអង្ករ​កម្ពុជា ដែល​ត្រូវ​បាន​បង្កើត​ឡើង​នៅ​ក្នុង​ឆ្នាំ​២០១៤​ ដើម្បី​តំណាង​ឲ្យ​កសិករ​ រោងម៉ាស៊ីន​កិន​ស្រូវ​និង​អ្នកនាំ​​​ចេញ​នៅកម្ពុជានោះ​ បានជួបពិភាក្សា​​គ្នា​នៅក្នុង​​រាជធានី​ភ្នំពេញ​កាលពី​​ព្រឹក​ម្សិលមិញ​ដើម្បីពិភាក្សា​រក​យុទ្ធ​សាស្ត្រ​ដោះស្រាយ​​​បញ្ហា​គំរាម​កំហែង​ដែល​កំពុង​តែ​កើត​ឡើង​ចំពោះ​វិស័យ​ស្រូវអង្ករ ក្នុងនោះ​រួម​មាន​ដូចជា​ កង្វះ​ការ​គាំទ្រ​ផ្នែក​ហិរញ្ញវត្ថុ​សម្រាប់​​​រោង​ម៉ាស៊ីន​កិន​ស្រូវ​ក្នុង​ស្រុក​ជាដើម​ ចំពេល​​​​មានការ​ប្រកួត​ប្រជែង​ពី​ប្រទេស​ជិតខាង។​

លោក​ សុខ​ ពុទ្ធីវុធ​ ប្រធាន​សហព័ន្ធស្រូវ​អង្ករ​កម្ពុជា​បានលើកឡើងថា​ ក្រុមការងារ​ពិសេស​ថ្មីនេះ​ដែលមានសមាស​ភាព​​​ដូចជា​មន្ត្រី​​សហ​ព័ន្ធ​ជាន់ខ្ពស់ជាដើមនោះ នឹង​ដោះ​​​ស្រាយ​​​បញ្ហា​ត្អូញ​ត្អែ​របស់​សមាជិក​ខ្លួន​ប្រកប​​​ដោយ​ប្រសិទ្ធភាព​ជាងមុន​ ស្នើ​មូលនិធិថ្មីពី​​​រដ្ឋាភិ​​​បាល​ ហើយនឹង​​ទំ​នាក់ទំនង​ជាមួយ​ម្ចាស​​​់​​​ ជំនួយ​​​​ទាំង​ក្នុង​ប្រទេស​ និង​​​ក្រៅ​​​ប្រទេស។

លោកបាន​មានប្រសាសន៍​ថា “ក្រុមការ​ងារ​ពិសេស​នេះ​នឹង​សិក្សា​ឱ្យ​បាន​ស៊ីជម្រៅ​ថា តើ​នរណា​កំពុង​ជួប​ការ​លំបាក​ និង​ថាតើ​ប្រាក់ប៉ុន្មានដែលយើង​ត្រូវការ​។ យើង​នឹង​​​រៀប​ចំ​ធ្វើរបាយការណ៍​ផ្ញើជូន​លោក​នាយក​រដ្ឋមន្ត្រី ហើយ​ស្នើ​ថវិកា​រយៈពេល​ខ្លី​ដ៏​​​ពិសេស​ មួយ [សម្រាប់រោង​ម៉ាស៊ីកិនស្រូវ”​​]”។

លោក​បាន​បន្ថែម​ថា ”យើង​ក៏នឹង​ធ្វើការ​ជាមួយ​ធនាគារ​អភិវឌ្ឍន៍ជនបទ​ និង​ដៃគូផ្សេង​ៗ​ផងដែរ​ ដើម្បី​ជួយ​ឱ្យ​​​សមាជិក​របស់យើងទទួល​បាន​ឥណទាន​”។​

លោក សុខ ពុទ្ធីវុធ បាន​លើកឡើង​ទៀត​ថា ក្រុមការ​ងារ​ពិសេស​នេះ​ក៏នឹង​ពិចារណា​រកវិធី​បញ្ចុះ​បញ្ចូលឱ្យ​មាន​ការ​បង្កើត​ធនាគារ​ឯកទេស​មួយ​សម្រាប់វិស័យ​កសិកម្ម​នៅ​កម្ពុជា​ផងដែរ​ ជាធនាគារ​ដែល​នឹង​ជួយ​គាំទ្រ​ឱ្យ​កាន់តែប្រសើ​រសម្រាប់តម្រូវ​ការ​នៅក្នុង​វិស័យ​ស្រូវ​​អង្ករ​ ដែលគេ​ប៉ាន់​ប្រមាណថា ផ្តល់ការងារ​ដល់​ប្រជាពលរដ្ឋ​មួយភាគប្រាំនៃប្រជាពល​រដ្ឋសរុប​ទូទាំង​ប្រទេស។

កាលពីដើម​សប្តាហ៍មុន ក្រុម​រោងម៉ាស៊ីនកិនស្រូវ​ និងអ្នកនាំចេញ​បានដាក់លិខិត​រិះ​គន់​​​ផ្លូវ​ការ​ជូន​​លោក ស៊ុន ចាន់ថុល រដ្ឋមន្ត្រី​ក្រសួង​ពាណិជ្ជកម្ម​ដោយ​លើកឡើងថា​ សហព័ន្ធ​ស្រូវ​​​អង្ករ​កម្ពុជា​ មិន​បាន​ខិត​ខំ​តស៊ូមតិ​ឱ្យ​បានគ្រប់គ្រាន់​ជួសមុខ​ឱ្យ​ពួកគាត់ទេ​។

លោក ភូ ពុយ តំណាង​រោង​ម៉ាស៊ីន​កិនស្រូវប្រចាំ​ខេត្ត​បាត់ដំបងដែលចុះ​ហត្ថលេខា​លើ​លិខិត​រិះ​គន់​នេះ​បានលើកឡើង​ថា ការ​ត្អូញត្អែរ​ដ៏សំខាន់មួយ​ ​គឺកង្វះ​មូលនិធិ​ភ្លាមៗ​សម្រាប់​រោង​ម៉ាស៊ីនកិនស្រូវ​ដើម្បី​ទិញ​ស្រូវ​ពីកសិករ​ ដោយ​គូសបញ្ជាក់ថា សហព័ន្ធស្រូវ​អង្ករ​កម្ពុជា​ផ្តោត​តែទៅលើ​មូលនិធិ​រយៈពេល​វែង​។

លោក​បានមានប្រសាសន៍អំឡុង​កិច្ច​ប្រជុំ​របស់​សហព័ន្ធស្រូវ​ អង្ករ​កម្ពុជាថា “យើង​មិន​ចង់​បានថវិការយៈពេល​វែង​ទេ។ ប្រសិនបើ​យើងរង់​ចាំ​ប្រាក់​៤០០លានដុល្លារ​ វិស័យនេះ​នឹង​កាន់តែ​យ៉ាប់យ៉ឺន។ យើង​ត្រូវការ​ប្រាក់​២០លាន​​​ដុល្លារ​ជាបន្ទាន់​ដើម្បីទិញស្រូវ​ពីកសិករ​ក្នុង​ពេល​ឥឡូវ​នេះ”។

លោក​បាន​មានប្រសាសន៍ទៀត​ថា​ ”យើង​ក៏ត្រូវ​ការ​កូតា​ដើម្បីកំណត់​ការ​នាំចូល​អង្ករ​ចូលក្នុងទីផ្សារ​ក្នុងស្រុក​ផងដែរ”។

លោក​ ចាន់ សុខហៀង នាយក​ប្រតិបត្តិ​ក្រុមហ៊ុន​ Signature of Asia ជាក្រុមហ៊ុន​នាំ ចេញ​អង្ករ​ក្នុង​ស្រុក​បានលើកឡើង​ថា វា មានការ​លំបាកសម្រាប់​រោង​ម៉ាស៊ីនកិន​ស្រូវ​លក្ខណៈគ្រួសារ​ក្នុងការ​ប្រកួត​ប្រជែង​ជាមួ​យ​​​​អង្ករ​ដែលតែងតែ​នាំចូល​ដោយ​ខុស​ច្បាប់​ និង​មាន​តម្លៃថោក ជាពិសេស​ពីប្រទេស​វៀត​ណាម។

លោក​បាន​មានប្រសាសន៍ថា​ ”គួរ​តែមាននីតិវិធី​សម្រាប់​ការ​នាំចូល​អង្ករ​ ហេតុ​ដូច្នេះ យើង​អាច​ប្រកួត​ប្រជែង​ជាមួយ​ពួកគេ ដោយ​ត្រឹមត្រូវ​និង​មាន​តម្លាភាព។ ការនាំចូល​ដាច់ខាតត្រូវ​តែស្រប​ច្បាប់មានគុណភាព​ស្តង់ដារ​ និង​ត្រូវ​តែ​ឱ្យ​បង់​ពន្ធ​ឱ្យបាន​ត្រឹម​ត្រូវ​”។

កាលពីខែមករា អគ្គនាយក​នៃអគ្គនាយក ដ្ឋាន​កសិកម្ម​នៅក្រសួង​កសិកម្ម​បាន​រាយការណ៍ថា ទោះបីជាការ​នាំចេញ​អង្ករ​មានការ​កើនឡើង​៣៩ភាគរយ​កាលពី​ឆ្នាំមុនក៏ដោយ ក៏​កម្ពុជា ​នាំចេញ​អង្ករ​បាន​ត្រឹមតែ​​៥៣៨.៣៩៦ តោន​ប៉ុណ្ណោះ ពោលគឺ​ទាប​ជាង​គោលដៅ​របស់​រដ្ឋាភិបាល​ដែល​កំណត់​ថា ត្រូវ​នាំចេញ​ឱ្យ​បាន​១លានតោន​។ យោង​តាម​សហព័ន្ធ ស្រូវ​អង្ករ​កម្ពុជា​បាន​ឱ្យ​ដឹង​ថា ក្រុមអ្នក​សិក្សា​ស្រាវជ្រាវ​បាន​ប៉ាន់​ប្រមាណថា អង្ករ​វៀត​ណាម​ប្រហែល​១លានតោន​បាន​នាំចូល​មក​កម្ពុជា​ដោយ​ខុស​ច្បាប់​ជារៀង​រាល់​ឆ្នាំ​។

លោក ហ៊ុន ឡាក់​ អនុប្រធាន​សហព័ន្ធ​ស្រូវអង្ករ​កម្ពុជា​បាន​ឱ្យ​ដឹង​កាលពី​ម្សិលមិញថា​​​ ក្រុមការ​ងារ​ពិសេស​នេះ​នឹង​ស្នើ​ប្រាក់​ចន្លោះ ​​​ពី​២០ទៅ៤០លានដុល្លារ​ពី​រដ្ឋាភិបាល​ដើម្បី​ជួយ​ដោះស្រាយ​នៅក្នុង​ការ​ចំណាយ​លើ​ប្រតិបត្តិការ​នៅ​រដូវ​ប្រាំងរបស់​រោង​ម៉ាស៊ីន​កិន​ស្រូវ​ឱ្យ​បាន​ប្រសើ​រឡើង​​។

លោក​បាន​មានប្រសាសន៍ថា ”រោង​ម៉ាស៊ីនកិនស្រូវ​ប្រហែល​១០កន្លែង​បាន​ផ្អាកប្រតិបត្តិការ​របស់ខ្លួន​ដោយសារ​ខ្សត់ខ្សោយ​មូល​និធិ និង​គ្មាន​សមត្ថភាពក្នុងការ​ប្រកួត​ប្រជែង​ជាមួយ​ប្រទេស​ជិតខាង។ យើង​ត្រូវការ​ទទួលបាន​មូលន​ិធិសម្រាប់​សមាជិក​របស់យើង​ដើម្បី​ជួយ​ពួកគាត់​ទិញស្រូវ​ និង​ទប់ស្កាត់​កុំឱ្យ​ស្រូវ​ហូរ​ចេញ​ទៅ​ប្រទេស​ក្រៅ”។

លោក ហៀន វណ្ណហ៊ន អគ្គនាយក​រង​នៃអគ្គនាយកដ្ឋាន​កសិកកម្មនៅក្រសួង​កសិកម្ម​បាន​លើកឡើង​ថា លោក​ស្វាគមន៍​គម្រោង​របស់សហព័ន្ធស្រូវ​អង្ករ​កម្ពុជា ដោយ​គូស​បញ្ជាក់ថា ស្រូវដែល​​នៅសល់​៤លានតោន​ជារៀង​រាល់​ឆ្នាំ​ ​​ភាគច្រើន​បាន​ហូរ​ចេញ​ទៅ​ប្រទេស​វៀតណាម ជាហេតុ​ធ្វើ​ឱ្យ​រោង​ម៉ាស៊ីនកិនស្រូវ​និង​អ្នកនាំចេញ​មិន​ទទួលបាន​​ផល​ប្រយោជន៍​ហិរញ្ញវត្ថុ។

លោក​បានមានប្រសាសន៍ថា ”ខ្ញុំគិត​ថា សំណើ​សុំ​មូលនិធិ​គឺ​សម​ហេតុ​សម​ផល​ ព្រោះ​រោង​ម៉ាស៊ីន​កិន​ស្រូវ​គ្មាន​ប្រាក់​គ្រប់គ្រាន់​​​ដើម្បីទិញ​ស្រូ​វនោះឡើយ​ ដែលជាហេតុ​ធ្វើ​ឱ្យ​ស្រូវ​ហូរ​ចេញទៅ​ប្រទេស​ជិត​ខាង​ ព្រោះ​កសិករ​ត្រូ​វការ​លក់​ស្រូវ​របស់ខ្លួន​ជា​បន្ទាន់​”។

លោក​បានបន្ថែមថា “​យើង​ត្រូវ​តែ​ពង្រឹង​ ការ​ចុះ​ពិនិត្យ​មើល ហើយ​រឹត​បន្តឹង​ការ​​​គ្រប់​​​គ្រង ​[តាម​បណ្តោយ​ព្រំដែន] ​ជាមួយ​កង​កម្លាំង​ប្រដាប់អាវុធ”។

លោក​​ សុខ ពុទ្ធីវុធ បាន​លើកឡើង​ទៀត​ថា លោក​សង្ឃឹមថា ក្រុមការ​ងារ​ពិសេស​ថ្មីនេះ​នឹង​ជួយ​កាត់​បន្ថយ​បញ្ហា​ដែល​សមាជិក​របស់លោកកំពុង​ប្រឈម​ ប៉ុន្តែ​លោក​បាន​ក្រើន​រំឭក​ថា ការ​កែប្រែ​ត្រូវ​ការ​ពេល​វេលាយូរ​ដើម្បី​អនុវត្ត​។

លោក​បានមានប្រសាសន៍ថា “​ពីមុន គេ​គិត​ថា សហព័ន្ធស្រូវ​អង្ករ​បានតែ​និយាយ​ទេ។ ចំណាត់ការ​នេះ​នឹង​បង្ហាញ​ឱ្យ​ឃើញ​ថា ឥឡូវ​នេះ​យើង​ដោះស្រាយ​បញ្ហាហើយ​មិនមែន​គ្រាន់តែ​បង្ហាញមុខ​តាម​កញ្ចក់ទូរទស្សន៍នោះទេ”៕ស៊ុយឈាង​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស