រយៈពេលជាងមួយខែបន្ទាប់ពីបដិសេធលិខិតមួយច្បាប់ពីសមាជិកសភាគណបក្សប្រឆាំងមួយរូប ដែលទាមទារឲ្យរដ្ឋាភិបាលឆ្លើយទាក់ទិននឹងចម្ការក្នុងខេត្តរតនគិរីដែលគ្រប់គ្រងដោយកងទ័ពវៀតណាម លោក ហេង សំរិន ប្រធានរដ្ឋសភានៅសប្តាហ៍នេះ បានបញ្ជូនលិខិតនោះទៅលោកនាយករដ្ឋមន្ត្រី ហ៊ុន សែន។
លិខិតនោះមកពីលោក អ៊ុំ សំអាន តំណាងរាស្ត្រគណបក្សសង្គ្រោះជាតិ ជាអ្នករិះគន់ខ្លាំងលើកិច្ចការការពារព្រំដែនប្រទេសកម្ពុជា របស់រដ្ឋាភិបាល សំដៅអត្ថបទសារព័ត៌មាន ខេមបូឌា ដេលី ចេញផ្សាយនៅខែធ្នូ ដែលបញ្ចេញឲ្យដឹងថា សម្បទានដីសេដ្ឋកិច្ច (ELCs) ប្រហែល៤០.០០០ហិកតា ទទួលបានដោយក្រុមមេបញ្ជាការយោធាវៀតណាម។
លិខិតនោះដាក់បីសំណួរទៅលោកនាយករដ្ឋមន្ត្រី៖ ហេតុអ្វីកងទ័ពប្រជាជនវៀតណាមទទួលបានការគ្រប់គ្រងសម្បទានទាំងនោះ តើទាហានវៀតណាមមានវត្តមាន នៅក្នុងចម្ការទាំងនោះឬយ៉ាងណា និងថាតើរដ្ឋាភិបាលបម្រុងយកដីនោះមកវិញឬទេ។
លិខិតដែលចុះហត្ថលេខាដោយលោក ហេង សំរិន នៅថ្ងៃពុធ មានខ្លឹមសារថា “សូម សម្តេចនាយករដ្ឋមន្ត្រី បំភ្លឺស្របតាមគោលការណ៍ដែលមានចែងក្នុងមាត្រា៩៦នៃច្បាប់រដ្ឋធម្មនុញ្ញ”។
លោក ឡេង ប៉េងឡុង អ្នកនាំពាក្យរដ្ឋសភា បានមានប្រសាសន៍ថា លោក ហេង សំរិន ដែលមានកាតព្វកិច្ចតាមផ្លូវច្បាប់ក្នុងការបញ្ជូនលិខិតពីតំណាងរាស្ត្រទៅរដ្ឋមន្ត្រីដែលពាក់ព័ន្ធបានចារលើលិខិតចុងក្រោយនោះ ពីព្រោះការតម្រូវឲ្យមានចម្លើយត្រូវបានគេលើកជាសំណួរជាថ្មីទៀត។
លោកបានមានប្រសាសន៍ថា “សម្តេចប្រធានបានចុះហត្ថលេខាលើលិខិតនោះ ហើយយើងបានបញ្ជូនលិខិតនោះរួចរាល់ហើយទៅសម្តេចនាយករដ្ឋមន្ត្រី”។
“សម្តេចប្រធានមិនបានចុះហត្ថលេខាលើ [លិខិតមុន] ទេ ពីព្រោះលោក អ៊ុំ សំអាន មិនមានសិទ្ធិបង្ខំនាយករដ្ឋមន្ត្រីឲ្យផ្តល់ចម្លើយទៅនឹងសំណួររបស់លោក អ៊ុំ សំអាន ទេ ហើយលិខិតនោះមានបំណងបង្កើតការឃោសនាដើម្បីប្រយោជន៍ផ្ទាល់ខ្លួន”។
លោក អ៊ុំ សំអាន បានមានប្រសាសន៍ថា លោករីករាយដែលលោក ហេង សំរិន បានសម្រេចបញ្ជូនលិខិតរបស់លោកទៅរដ្ឋាភិបាល ”ពីព្រោះប្រជាពលរដ្ឋយើងចង់ដឹង ថាតើរដ្ឋាភិបាលបានផ្តល់សម្បទានដីសេដ្ឋកិច្ចទៅឲ្យទាហានវៀតណាមមែនឬយ៉ាងណា”។
លោកបានមានប្រសាសន៍ថា “ខ្ញុំគិតថា ការផ្តល់សម្បទានដីសេដ្ឋកិច្ចទៅឲ្យវៀតណាមគឺជាគ្រោះថ្នាក់ធំដល់ជាតិ ហើយប្រសិន បើរដ្ឋាភិបាលមិនយកដីនោះមកវិញទេ ប្រទេសកម្ពុជានឹងបាត់បង់ទឹកដីរបស់ខ្លួន”។
កាលពីខែវិច្ឆិកា លោក អៀង សុផាល្លែត អ្នកនាំពាក្យក្រសួងកសិកម្ម បានបដិសេធមិននិយាយ ថាតើរដ្ឋាភិបាលបានដឹងថា កងទ័ពវៀតណាមបានគ្រប់គ្រងចម្ការទាំងនោះឬយ៉ាងណាទេ ប៉ុន្តែបាននិយាយថា ចម្ការទាំងនោះនឹងត្រូវបញ្ចូលក្នុងការពិនិត្យឡើងវិញនូវសម្បទានដីសេដ្ឋកិច្ចទូទាំងប្រទេស។
លោក ហ៊ុន សែន បានប្រកាសកាលពីខែមុនថា សម្បទានដីសេដ្ឋកិច្ចមួយលានហិកតាត្រូវបានដកហូតយកមកវិញ បន្ទាប់ពីមានការពិនិត្យឡើងវិញនេះ ប៉ុន្តែរដ្ឋាភិបាលមិនបញ្ចេញឲ្យដឹងសេចក្តីលម្អិតនៅឡើយ ថាដីនោះនៅត្រង់ណា។
កាលពីខែសីហា លោកនាយករដ្ឋមន្ត្រីបានគំរាមចាប់ខ្លួននរណាក៏ដោយដែលអះអាងថា រដ្ឋាភិបាលបានប្រើប្រាស់ផែនទីដែលមិនអាចទទួលយកបាន ដើម្បីបោះបង្គោលព្រំដែនជាមួយប្រទេសវៀតណាម ជាការព្រមានដែលលោក សំអាន មិនអើពើ។
សមាជិកសភារូបនេះកំពុងរស់នៅក្រៅប្រទេសអស់រយៈពេលជាច្រើនខែមកហើយ ដោយខ្លាចក្រែងថា លោកនឹងត្រូវជាប់ពន្ធនាគារនៅពេលត្រឡប់មកវិញ។ ទោះជានិយាយថា លោកនឹងត្រឡប់មកវិញតែនៅពេលណាលោក សម រង្ស៊ី មេដឹកនាំគណបក្សប្រឆាំងដែលនិរទេសខ្លួនដែរនោះ ត្រឡប់មកប្រទេសកម្ពុជាវិញក៏ដោយ ក៏លោក សំអាន បាននិយាយកាលពីម្សិលមិញថា លោកបានកក់សំបុត្រយន្តហោះមកប្រទេសវិញហើយ និងមានផែនការវិលមកវិញនៅសប្តាហ៍ទី២ក្នុងខែមេសា៕ និត (រាយការណ៍បន្ថែមដោយ គីម ចាន់)