28 C
Phnom Penh

រដ្ឋមន្ត្រីប្តឹង​លោក​ សម រង្ស៊ី​ ពាក់ព័ន្ធ​​ការអះអាង​អំពី​គណនី​ហ្វេសប៊ុក​ក្លែង​ក្លាយ​

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​គណបក្ស​ប្រជាជន​កម្ពុជា​មួយរូប​បាន​លើក​ឡើង​កាល​ពី​ម្សិលមិញថា​ ខ្លួន​កំពុង​ប្តឹង​លោក​ សម​ រង្ស៊ី​ មេដឹកនាំ​គណបក្ស​​ប្រឆាំងពាក់ព័ន្ធការ​អះអាង​ដែល​ថា ​រដ្ឋ​មន្ត្រី​រូប​នេះ​បាន​ចេញ​បទ​បញ្ជា​ឱ្យ​​សមាជិក​គណបក្ស​កាន់​អំណាច​ជួយ​បង្កើន​ចំនួន​ចុច ​”ចូលចិត្ត​​” ​(like)​ នៅលើ​ទំព័រ​ហ្វេស​ប៊ុក​របស់​លោក​នាយក​រដ្ឋ​មន្ត្រី​ ហ៊ុន​ សែន​ ដោយ​ប្រើ​គណនី​​ក្លែងក្លាយ​។​​​​

សារដែល​បង្ហោះ​និង​ដែល​ធ្វើ​ឱ្យ​មានការ​ខឹង​សម្បា​ កាលពីថ្ងៃពុធ គឺ​លោក​ សម​ រង្ស៊ី​ បាន​​ចម្លង​​ចេញពីគណនី​ហ្វេសប៊ុក​ ​ឈ្មោះ​ Hak Sokmakara អនុ​​​រដ្ឋលេខាធិការ​ ដែល​ទទួល​​​​និង​បញ្ជូន​បន្ត​នូវសារ​​ណែនាំនេះ​​ពី​លោក​ សោម​​​​ សឿន​ រដ្ឋមន្ត្រី​ប្រតិភូ​អមនាយក​រដ្ឋមន្ត្រី​។

យោងតាម​សារនេះ​ លោក​ សោម​ សឿន​ ​​​​បាន​ណែនាំឱ្យ​សមាជិក​​គណបក្ស​ប្រជា​ជន​ម្ពុជា ​”ផ្សព្វ​ផ្សាយ​”​ ទំព័រ​ហ្វេស​ប៊ុក​របស់​លោក​នាយករ​ដ្ឋមន្ត្រី​ ហ៊ុន​ សែន​ ក្នុង​គ្រប់​កិច្ច​ប្រជុំ​និង​ការ​ជួួប​ជុំសមាជិក​បក្ស​​ ឱ្យ​សមាជិក​បក្ស​ចូល​រួម​ចុច​ like និង​ឱ្យ​ជំរុញ​​​មិត្ត​ភក្តិ​ក្នុង​ហ្វេស​ប៊ុក​​ធ្វើដូច្នេះដែរ​។​ លោក​ក៏បាន​ប្រាប់​ឱ្យ​ពួក​​​គេ​ចូល​ទៅ​ក្នុងទំព័រ​ហ្វេស​ប៊ុក​របស់​លោក​ សម​ រង្ស៊ី​ ដើម្បីចុ​ច​ “មិនចូលចិត្ត” (unlike) ផងដែរ។​​​​

សារ​​​េនះ​​​មាន​ខ្លឹមសារ​​​​បន្ថែម​ដូច្នេះ​​​​ថា ​”​គណបក្ស​​​គ្រប់​​​ថ្នាក់​​​ត្រូ​​​វ​​​តាម​​​ដាន​​​ត្រួត​​​ពិនិត្យ​​​អនុវត្ត​​​ការងារ​​​​នេះ​​​ជា​​​ប្រចាំ​​​ ជា​​​យុទ្ធនាការ​​​ទូលំ​​​ទូ​​​លាយ​​​ នៅ​​​មូលដ្ឋាន​​​ឆ្ពោះ​​​ទៅ​​​ដណ្តើម​​​ជោគ​​​ជ័យ​​​ក្នុង​​​ការ​​​បោះ​​​ឆ្នោត​​​”។ នៅ​​​ក្នុង​​​​​​​​​ការ​បញ្ចេញ​មតិ​​​យោបល់ ​​​(comment​​​) ​​​​លើទំព័រ​ហ្វេសប៊ុក​ផ្ទាល់​​​ខ្លួន លោក សម រង្ស៊ី បាន​​​លើក​​​ឡើង​​​ថា ពល​​​រដ្ឋ​​​ក្រីក្រ​​​នៅ​​​ក្នុង​​​ប្រទេស​​​ឥណ្ឌា​​​ និង​​​ប្រទេស​​​ហ្វីលីពិន​​​ត្រូវ​​​បាន​​​ជួល​​​ដើម្បី​​​ឲ្យ​​​បង្កើត​​​គណនី​​​ក្លែង​​​ក្លាយ​​​ក្នុង​​​គោល​​​បំណង​​​ជួយ​​​បង្កើន​​​ចំនួន​​​ Like នៅ​​​ក្នុង​​​ទំព័រ​​​ហ្វេស​​​ប៊ុក​​​របស់​​​លោក​​​នាយក​​​រដ្ឋ​​​មន្ត្រី​​​ ដោយ​​​ដក​​​ស្រង់​​​ចេញ​​​ពី​​​សេចក្តី​​​រាយការណ៍​​​ព័ត៌មាន​​​របស់​​​ប្រព័ន្ធ​​​​​​ផ្សព្វផ្សាយ​​​ក្នុង​​​ពេល​​​ថ្មី​​​ៗ។

ពេល​​​ទាក់​​​ទង​​​កាល​​​ពី​​​ម្សិលមិញ ​​​លោក ​​​សោម សឿន បាន​​​លើក​​​ឡើង​​​ថា លោក​​​បាន​​​ដាក់​​​ពាក្យ​​​បណ្តឹង​​​ទៅ​​​កាន់​​​សាលា​​​ដំបូង​​​រាជ​​​ធានីភ្នំពេញ​​​នៅ​​​ពេល​​​រសៀល​​​ដោយ​​​ចោទ​​​ប្រកាន់​​​លោក សម រង្ស៊ី ថា “មូល​​​បង្កាច់​​​ខុស​​​ពី​​​ការ​​​ពិត​​​” ហើយ​​​ទាម​​​ទារ​​​សំណង​​​ជំងឺ​​​ចិត្ត​​​២០​​​លាន​​​រៀល​​​។

លោក សោម សឿន ដែល​​​និយាយ​​​ថា ​​​ខ្លួន​​​ជា​​​អ្នក​​​គ្រប់​​​គ្រង​​​គេហទំព័រ និង​​​ទំព័រ​​​ហ្វេស​​​ប៊ុក​​​របស់​​​គណបក្ស​​​ប្រជាជន​​​កម្ពុជា​​​ មិន​​​បាន​​​បដិសេធ​​​ការ​ដែល​ថា លោក​បាន​​​ចេញ​​​ការ​​​ណែ​​​នាំ​​​​​​នេះ​​​​ឡើយ​​​។​​​​​​ ប៉ុន្តែ លោក​​​បាន​​​ច្រាន​​​ចោល​​​ការ​​​លើក​​​ឡើង​​​របស់​​​លោក សម រង្ស៊ី​​​ ដែល​​​ថា លោក​​​កំពុង​​​ជួយ​​​ផ្សព្វផ្សាយ​ឲ្យ​​​មាន​​​ការ​​​បង្កើត​​​គណនី​​​ហ្វេសប៊ុក​​​​​​ក្លែង​​​ក្លាយ​​​។

លោក​​​បាន​​​មាន​​​ប្រសាសន៍​​​ថា “វា​​​មិន​​​​​​មែន​​​អ៊ីចឹង​​​ទាល់​​​តែ​​​សោះ​​​។ ការ​​បញ្ចេញយោបល់​​​បន្ថែម​​​​​​គឺ​​​មិន​​​ពិត​​​ទេ​​​ ហើយ​​​វា​​​ប៉ះ​​​ពាល់​​​ដល់​​​កេរ្តិ៍​​​ឈ្មោះ​​​របស់ខ្ញុំ និង​​​កិត្តិយស​​​របស់​​​ថ្នាក់​​​ដឹក​​​នាំ​​​។ ខ្ញុំ​​​គឺជា​​​សមា​​​ជិកបក្ស​​​មួយ​​​រូប​​​ ខ្ញុំ​​​ត្រូវ​​​តែ​​​ការ​​​ពារ​​​ថ្នាក​​​់​​​ដឹក​​​នាំ​​​របស់​​​ខ្ញុំ ហើយ​​​បង្ហាញ​​​ឲ្យ​​​ឃើញ​​​ពី​​​ទង្វើ​​​ថោក​​​ទាប​​​របស់​​​ឯកឧត្តម​​​​​​ សម រង្ស៊ី ដែល​​​ផ្ទុយ​​​ពី​​​ការ​​​ពិត​​​”។

រដ្ឋ​​​មន្ត្រី​​​រូប​​​នេះ​​​បាន​​​​​​លើក​​​ឡើង​​​ទៀត​ថា ​​​លោក សម រង្ស៊ី​​​ ច្រណែន​​​នឹង​​​លោក​​​​​​នាយក​​​រដ្ឋ​​​មន្ត្រី​​​ដែល​​​ទទួល​បាន​ការ​​​ចុច​​​ Like ​​​វ៉ា​​​ដាច់​​​មេដឹកនាំ​​​គណបក្ស​​​ប្រឆាំង​​​រូប​​​នេះ​​​ ​​​​​​កាល​​​ពី​​​ដើម​​​ឆ្នាំ​​​នេះ​​​ និងបាន​អួតអាង​ពីប្រជា​ប្រិយ​​​ភាពរបស់ខ្លួន​នៅ​ក្នុង​បណ្តាញ​ទំនាក់​ទំនង​សង្គម​។

មន្ត្រី​​​សាលា​​​ដំបូង​​​រាជធានី​​​ភ្នំពេញ​​​មិន​​​អាច​​​ទាក់​​​ទង​​​បាន​ទេ​​ដើម្បី​សុំ​​​ការ​​​បញ្ជាក់​​​​ថា ​​​តើ​​​ពិត​​​ជាមាន​​​ការ​​​ដាក់​​​ពាក្យ​​​បណ្តឹង​​​មែន​ឬក៏អត់​។​​​

លោក សម រង្ស៊ី ​​​បច្ចុប្បន្ន​​​កំពុង​​​និរទេស​​​ខ្លួន​​​ឯង​​​ទៅ​​​ប្រទេស​​​ក្រៅ​​​ដើម្បី​​​គេច​​​ពី​​​ដីកា​​​ចាប់​​​ខ្លួន​​​ពាក់​​​ព័ន្ធ​​​ការ​​​កាត់​​​ឲ្យ​​​​​​ជាប់​​​ទោស​​​ពី​​​បទ​​​បរិ​​​ហារ​​​កេរ្តិ៍​​​​ច្រើន​​​ឆ្នាំ​​​មក​​​ហើយ​​​ ដែល​​​​អាជ្ញាធរ​​​បាន​​​សម្រេច​​​អនុវត្ត​​​​កាល​​​ពី​​​ខែ​​​វិច្ឆិកា​​​ឆ្នាំ​​​មុន​​​។

ពេល​​​ទាក់​​​ទង​​​កាល​​​ពី​​​ម្សិលមិញ​​​តាម​​​អីុម៉េល​​​​​​ មេដឹកនាំ​​​គណបក្ស​​​ប្រឆាំង​​​រូប​​​នេះ​​​បាន​​​​​​លើក​​​ឡើង​​​ថា លោក​​​ប្រកាន់​ជំហរ​អះ​​​អាង​​​នៅ​​​ក្នុង​​​ហ្វេសប៊ុក​​​របស់​​​លោក​​​។ លោក​​​លើក​​​ឡើង​​​ទៀត​​​ថា ការ​​​ណែនាំ​​​របស់​​​គណបក្ស​​​ប្រជាជន​​​កម្ពុជា​​​តាម​​​បណ្តាញ​​​ទំនាក់​​​ទំនង​​​សង្គម​​​ គឺ​​​ជា​សំណៅ​ដើម​​​ ដែល​លោក​បាន​​​​ចម្លង​​​ចេញ​​​ពី​​​ការ​​​បង្ហោះ​​​មួយ​​​​​​នៅ​​​លើ​​​ទំព័រ​​​ហ្វេសប៊ុក​​​របស់​​​លោក ហាក់​​​សុខមករា កាល​​​ពី​​​ខែ​​​តុលា ឬ​​​ខែ​​​វិច្ឆិកា។ លោក សម រង្ស៊ី បាន​​​លើក​​​ឡើង​​​ថា លោក​​​ជឿ​​​ថា លោក​​​ សោម សឿន “កំពុង​​​ប្រើ​​​​​​ប្រាស់​​​គ្រប់​​​មធ្យោបាយ​​​បច្ចេក​​​ទេស​​​ទាំង​​​អស់​​​ដែល​​​អាច​​​ទៅ​​​រួច​​​ ដើម្បី​​​សម្រេច​​​គោល​​​ដៅ​​​ក្នុង​​​ការ​​​ធ្វើ​​​ឲ្យ​​ចំនួន​​​ Like នៅ​​​ក្នុង​​​ទំព័រ​​​ហ្វែសបុ៊ក​​​របស់​​​លោក​​​នាយករដ្ឋ​​​មន្ត្រី​​​កើន​​​ឡើង​​​ខ្លាំង”។

លោក​​​បាន​​​មានប្រសាសន៍​​​បន្ថែម​​​ថា “ការ​​​ស្នើ​​​ឲ្យ​​​អ្នក​​​ជំនាញ​​​ខាង​ IT ​​បង្កើត​​​ Like ក្លែង​​​ក្លាយ​​​ ​​​ដោយ​គ្មាន​​​ការត្រួតពិនិត្យ​តាម​ផ្លូវ​​​ច្បាប់នៅ​​​ក្នុង​បរិបទ​នេះ​ មាន​​​ន័យ​​​ថាប្រភេទ​​​ Like បែប​​​​​​េនះ​​​គឺ​​​ក្រុម​​​ហ្វេស​​​ប៊ុករបស់​​​ ហ៊ុន សែន បាន​​​ទិញ​​​ពី​​​​ឥណ្ឌា​​​ក្នុង​​​ពេល​​​ថ្មី​​​ៗ”៕​​​ ស៊ុយឈាង  (រាយការណ៍​​​បន្ថែម​​​ដោយ Zsombor Peter)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស