កាលពីម្សិលមិញ មន្ត្រីកម្ពុជានិងមន្ត្រីអូស្ត្រាលីបានបដិសេធការអះអាងកាលពីចុងសប្តាហ៍របស់ជនភៀសខ្លួនជនជាតិភាគតិចរ៉ូហីុងយ៉ាម្នាក់មកពីប្រទេសភូមាដែលថា គេមិនយកចិត្តទុកដាក់ចំពោះគាត់នៅក្នុងរាជធានីភ្នំពេញ ដោយប្រធាននាយកដ្ឋានជនភៀសខ្លួននៃក្រសួងមហាផ្ទៃបានចាត់ទុកបុរសរូបនេះថា “ជាមនុស្សកុហក”។
ជនភៀសខ្លួនរូបនេះ ដែលជាមនុស្សម្នាក់ក្នុងចំណោមជនភៀសខ្លួន៥នាក់ដែលយល់ព្រមទទួលយកការផ្លាស់មកប្រទេសកម្ពុជា ពីប្រទេសដែនកោះណូរូ ជាកន្លែងប្រទេសអូស្ត្រាលីកំពុងឃុំខ្លួនជនអន្តោប្រវេសន៍រាប់រយនាក់ ដែលបានព្យាយាមជិះទូកទៅកាន់ប្រទេសរបស់ខ្លួននោះ បានប្រាប់ប្រព័ន្ធផ្សព្វផ្សាយ Fairfax នៅក្នុងបទសម្ភាសន៍មួយចេញផ្សាយកាលពីថ្ងៃអាទិត្យថា ខ្លួនមានអារម្មណ៍ថា ត្រូវគេបោះបង់ចោលនៅក្នុងរាជធានីភ្នំពេញ ហើយខ្លាចបាត់បង់ជីវិតនៅទីនេះ ព្រមទាំងមានការសោកស្តាយចំពោះចំណាត់ការនេះផងដែរ។
Fairfax ដែលប្រាប់អត្តសញ្ញាណបុរសម្នាក់នេះថា ឈ្មោះ ម៉ូហាមេដ រាស៊ីដ (Mohammed Rashid) នោះក៏បានរាយការណ៍ផងដែរថា គាត់កំពុងស្នាក់នៅការិយាល័យរបស់អង្គការអន្តរជាតិទេសន្តរប្រវេសន៍ (IOM) ទោះបីជាមានប្រាក់បន្ថែមរាប់លានដុល្លារដែលអូស្ត្រាលីបានបម្រុងទុកសម្រាប់តាំងលំនៅថ្មីជូនជនភៀសខ្លួនក៏ដោយ ហើយថា គាត់បាននិងកំពុងកើតជំងឺហឺត និងមានបញ្ហាសួត និងតម្រងនោមធ្ងន់ធ្ងរ ចាប់តាំងពីទៅដល់ប្រទេសដែនកោះណូរូ កាលពីឆ្នាំ២០១៣ មក។ អត្ថបទនេះបានឲ្យដឹងថា អង្គការអន្តរជាតិទេសន្តរប្រវេសន៍ ដែលបានចុះកិច្ចសន្យាជាមួយអូស្ត្រាលីដើម្បីដោះស្រាយការតាំងលំនៅថ្មីជូនជនភៀសខ្លួននៅក្នុងរាជធានីភ្នំពេញនោះ បានយកបុរសរូបនេះចេញពីមន្ទីរពេទ្យមួយក្នុងរាជធានីភ្នំពេញបន្ទាប់ពីជំទាស់នឹងការណែនាំរបស់គ្រូពេទ្យអស់រយៈពេល៣ថ្ងៃ។
ទោះជាយ៉ាងណា លោក តាន់ សុវិជ្ជា ប្រធាននាយកដ្ឋានជនភៀសខ្លួននៃអគ្គនាយកដ្ឋានអន្តោប្រវេសន៍នៅក្រសួងមហាផ្ទៃបានលើកឡើងថា បុគ្គលិករបស់លោកបានទាក់ទងជាមួយលោក រ៉ាស៊ីដ “ស្ទើររៀងរាល់ថ្ងៃ” ហើយបានចាត់ទុកការអះអាងរបស់គាត់ថា “កុហក”។
លោកបានមានប្រសាសន៍ថា “មិនពិតទេ មានន័យថា គាត់កុហក…គាត់គឺជាមនុស្សកុហក”។
លោកបានលើកឡើងទៀតថា លោក រ៉ាស៊ីដ សុខសប្បាយជាទេ ហើយបានបន្ទោសបុរសរូបនេះថា មានបញ្ហាសុខភាពដោយសារការដើរលេងពេលយប់ច្រើន។ “គាត់ដើរលែងសប្បាយច្រើនពេក គាត់មិនដែលដេកផ្ទះទេ។ គាត់ចេញក្រៅបី ឬបួនដងក្នុងមួយសប្តាហ៍”។
ប្រធាននាយកដ្ឋានអន្តោប្រវេសន៍រូបនេះ ក៏បានលើកឡើងផងដែរថា លោក រ៉ាស៊ីដ រស់នៅក្រៅការិយាល័យរបស់អង្គការអន្តរជាតិទេសន្តរប្រវេសន៍ដោយការជ្រើសរើសរបស់ខ្លួន។ លោកបានមានប្រសាសន៍ថា “លក្ខខណ្ឌរបស់គាត់គឺសេរី គាត់អាចផ្លាស់ទៅទីណាក៏បាន ប៉ុន្តែ គាត់មិនចង់”។
អ្នកនាំពាក្យនាយកដ្ឋានអន្តោប្រវេសន៍អូស្ត្រាលី ក៏បានលើកឡើងដែរថា ជនភៀសខ្លួនរូបនេះដែលបានមកដល់ទីនេះកាលពីខែវិច្ឆិកាត្រូវបានមើលថែបានយ៉ាងល្អ។
អ្នកនាំពាក្យរូបនេះបានមានប្រសាសន៍ថា “លោក រ៉ាស៊ីដ បន្តទទួលបានការគាំទ្រខ្លាំងណាស់ពីអ្នកផ្តល់សេវា [IOM] របស់នាយកដ្ឋាន ក្នុងនោះរួមមាន ការជួបដោយផ្ទាល់រៀងរាល់ថ្ងៃធ្វើការ និងការទាក់ទងតាមទូរស័ព្ទនៅចុងសប្តាហ៍ជាដើម។ គាត់ក៏ត្រូវបានផ្តល់ឲ្យនូវសេវាបន្ថែម មានដូចជាការប្រឹក្សាយោបល់ ដែលគាត់បានបដិសេធថាមិនទទួលផងដែរ”។
អ្នកនាំពាក្យនាយកដ្ឋានអន្តោប្រវេសន៍អូស្ត្រាលីរូបនេះបានលើកឡើងបន្ថែមទៀតថា លោក រ៉ាស៊ីដ កំពុងទទួលការព្យាបាលនៅក្នុងស្ថានភាពដែលគេមិនបានបញ្ជាក់ឲ្យដឹង “ដោយមានជំនួយពីមន្ត្រីពេទ្យរបស់ IOM។ ក្រោមលក្ខខណ្ឌនៃកិច្ចព្រមព្រៀងតាំងលំនៅថ្មី គាត់មានសិទ្ធិទទួលបានការធានាផ្នែកសុខភាពរយៈពេលប្រាំឆ្នាំ”។
អ្នកនាំពាក្យរូបនេះបានមានប្រសាសន៍ថា លោក រ៉ាស៊ីដ ទទួលបានការបង់ថ្លៃស្នាក់នៅពេញលេញរយៈពេលបីខែដំបូង ប៉ុន្តែ ”រហូតមកទល់ពេលនេះគាត់បានបដិសេធមិនទាក់ទងជាមួយអង្គការអន្តរជាតិទេសន្តរប្រវេសន៍ឡើយ ពាក់ព័ន្ធនឹងការផ្តល់ជំនួយនៅក្នុងការស្វែងរកជម្រើសស្នាក់នៅអចិន្ត្រៃយ៍”។ ជនភៀសខ្លួនមានសិទ្ធិជួលផ្ទះ និងប្រើប្រាស់ប្រាក់ជំនួយរហូតដល់១ឆ្នាំ។
អ្នកនាំពាក្យរូបនេះមិនបាននិយាយឡើយ ទាក់ទិននឹងការអះអាងនៅក្នុងសេចក្តីរាយការណ៍របស់ Fairfax ដែលថា មានការមិនគោរពតាមការសន្យាជួយបើកភោជនីយដ្ឋាន និងផ្តល់ប្រាក់សុទ្ធ៨.០០០ដុល្លារនោះ។
អង្គការអន្តរជាតិទេសន្តរប្រវេសន៍បានបដិសេធមិនធ្វើអត្ថាធិប្បាយទេ។
នៅក្នុងអត្ថបទមួយទៀតកាលពីម្សិលមិញ Fairfax បានរាយការណ៍ថា គណបក្សបៃតង (Greens) ដែលជាគណបក្សប្រឆាំងនៅអូស្ត្រាលី កំពុងស្នើឲ្យអគ្គសវនករនៃប្រទេសនេះសើុបអង្កេតបន្ថែមទៀតលើកិច្ចព្រមព្រៀងដែលមានទឹកប្រាក់៣០,៣លានដុល្លារដើម្បីតាំងលំនៅថ្មីនៅក្នុងប្រទេសកម្ពុជាជូនជនភៀសខ្លួនមកពីកោះណូរូ ដែលរដ្ឋាភិបាលនៃប្រទេសទាំងពីរនៅតែលាក់បាំងនិងថា តើប្រាក់ជំនួយបន្ថែមរាប់លាននេះដែលអូស្ត្រាលីយល់ព្រមផ្តល់មកឲ្យកម្ពុជាកំពុងត្រូវបានចំណាយត្រឹមត្រូវដែរឬអត់។
លោកស្រី សារ៉ា ហានសុនយ៉ាំង (Sarah Hanson-Young) សមាជិកព្រឹទ្ធសភាមកពីគណបក្សបៃតងត្រូវបានដកស្រង់សម្តីថា “ការចំណាយប្រាក់រាប់លានដុល្លារជួយរបបពុករលួយមួយ ដើម្បីឲ្យរដ្ឋាភិបាលនេះអាចយកមនុស្សមួយចំនួនតូចមកចាក់ចោលក្នុងប្រទេសដ៏ក្រីក្រមួយ គឺមិនអាចទទួលយកបានទេ”។
លោកស្រីបានបន្ថែមថា “វាមិនអាចទទួលបានព័ត៌មានច្បាស់លាស់អំពីកិច្ចព្រមព្រៀងនេះតាមរយៈការប៉ាន់ប្រមាណរបស់ព្រឹទ្ធសភា ឬដំណើរការរបស់គណៈកម្មការក្នុងពេលឆាប់ៗបានឡើយ… ពន្លឺព្រះអាទិត្យពិតជាថ្នាំសម្លាប់មេរោគដ៏ល្អបំផុត ហើយការិយាល័យអគ្គសវនករមានសិទ្ធិអំណាចដែលតម្រូវឲ្យលាតត្រដាងកិច្ចព្រមព្រៀងនេះថា តើវាគឺជាអ្វីឲ្យពិតប្រាកដ”។
អ្នករិះគន់កិច្ចព្រមព្រៀងនេះលើកឡើងថា អូស្ត្រាលីមិនដែលមានបំណងធ្វើឲ្យប្រទេសកម្ពុជាក្លាយជាប្រទេសដែលអាចរស់នៅបានសម្រាប់ជនភៀសខ្លួនក្នុងចំនួនជាក់លាក់ដែលកំពុងតែយ៉ាប់យ៉ឺនទៅៗនៅកោះណូរូនោះឡើយ ហើយបានបង្កើតកិច្ចព្រមព្រៀងនេះឡើងដើម្បីធ្វើឲ្យអ្នកដែលនឹងក្លាយជាជនអន្តោប្រវេសន៍ផ្សេងទៀតដែលព្យាយាមធ្វើដំណើរតាមទូកមកប្រទេសរបស់ខ្លួនខ្លាចរអា។ លោក ភីធឺ ដាតថុន (Pater Dutton) រដ្ឋមន្ត្រីក្រសួងអន្តោប្រវេសន៍អូស្ត្រាលីថ្មីៗនេះបានចាត់ទុកកិច្ចព្រមព្រៀងនេះថា ជាជោគជ័យមួយផ្នែកនៃយុទ្ធសាស្ត្រ ”បញ្ឈប់ទូក” របស់ខ្លួន៕ ស៊ុយឈាង