ឱសានវាទបណ្ដេញចេញសម្រាប់ផ្ទះសំណាក់ ភោជនីយដ្ឋាន និងបារតាមបណ្ដោយឆ្នេរអូរត្រេះដ៏ពេញនិយមនៅក្រុងព្រះសីហនុបានកន្លងផុតហើយកាលពីម្សិលមិញ ប៉ុន្តែក្នុងចំណោមអាជីវកម្មទាំងនោះមានមិនដល់ពាក់កណ្ដាលផងទេដែលបានរើចេញគិតមកទល់ល្ងាចម្សិលមិញ ដោយអាជីវកម្មផ្សេងៗទៀតព្យាយាមចរចារកដំណោះស្រាយជាមួយអាជ្ញាធរដែលនឹងអនុញ្ញាតឲ្យពួកគេនៅបន្ត។
កាលពីខែមុន ម្ចាស់អាជីវកម្មនានានៅលើឆ្នេរអូរត្រេះ និងផ្នែកខ្លះនៃឆ្នេរអូរឈើទាល ទទួលបានការជូនដំណឹងមួយដែលទុកពេលឲ្យពួកគេ១ខែដើម្បីរើចេញពីតំបន់នោះ ហើយអាជ្ញាធរលើកឡើងថា ការសម្រេចនេះគឺបណ្ដាលមកពីក្តីបារម្ភចំពោះបរិស្ថាន។ ពួកគេទទួលបានឱសានវាទឲ្យរើចេញនៅថ្ងៃទី១៣ ខែមីនា ដោយប្រាប់ថា ដោយសារតែទីតាំងអាជីវកម្មរបស់ពួកគេស្ថិតនៅលើដីរដ្ឋ និងមិនបានបង់ពន្ធអចលនទ្រព្យ រដ្ឋាភិបាលមិនត្រូវបានតម្រូវឲ្យផ្ដល់សំណងការខូចខាតរបស់ពួកគេឡើយ។
ទោះជាយ៉ាងណា ពេលនេះអាជ្ញាធរមូលដ្ឋានបានសម្រេចផ្ដល់សំណង ហើយដើម្បីឲ្យអាជីវកម្មទាំងនោះរើចេញ ហើយលើកឡើងថា ពួកគេនឹងមិនត្រូវបានបណ្ដេញចេញទាំងបង្ខំទេរហូតដល់សប្ដាហ៍ក្រោយ ដោយរង់ចាំការចរចាបន្ថែមទៀត។ ហើយទីតាំងចំនួនប្រាំមួយក្នុងចំណោមទីតាំងអាជីវកម្មធំៗបំផុតនៅឆ្នេរអូរត្រេះ នៅតែសង្ឃឹមថា នឹងទទួលបានដំណោះស្រាយអំឡុងជំនួបជាមួយលោក យន្ត មីន អភិបាលខេត្ត ព្រះសីហនុដែលគ្រោងធ្វើនៅថ្ងៃនេះដើម្បីបញ្ចៀសការបណ្ដេញចេញ។
លោក លាម ផេង លេខារបស់អភិបាលខេត្តបានមានប្រសាសន៍ថា ម្ចាស់អាជីវកម្មចំនួន១២បានយល់ព្រមរើចេញ បន្ទាប់ពីរដ្ឋាភិបាលផ្ដល់សំណងខូចខាតដល់ពួកគេចំនួន៣.៥០០ដុល្លារ ខណៈអាជីវកម្មចំនួនប្រាំបីទៀតបានដាក់សំណើផ្លូវការដើម្បីសុំសំណង។
លោកបានបន្តថា ”លោកអភិបាលខេត្តមានប្រសាសន៍ថា លោកនឹងយកសំណើនេះជូនទៅថ្នាក់ខេត្តដើម្បីធ្វើការសម្រេច ហើយបន្ទាប់មកលោកនឹងជូនដំណឹងទៅដល់អាជីវករអំពីសេចក្ដីសម្រេចនេះ”។
លោកបានថ្លែងថា ម្ចាស់អាជីវកម្មចំនួនប្រាំមួយដែលមិនទាន់យល់ព្រមចាកចេញ នឹងជួបជាមួយលោក យន្ត មីន នៅថ្ងៃនេះដើម្បីពិភាក្សាអំពីបញ្ហានេះ។ ទោះជាយ៉ាងណា លោកបានសង្កត់ធ្ងន់ថា រដ្ឋាភិបាលនៅតែមានគម្រោងបង្ខំឲ្យពួកគេចាកចេញ។
លោកលើកឡើងបន្ថែមថា “ជាលក្ខណៈក្រៅផ្លូវការ ខ្ញុំបានឮថា ពួកគាត់មានមនុស្សនៅពីក្រោយខ្នងដែលបានប្រាប់ពួកគាត់ថា ចំនួនប្រាក់សំណងគួរតែខ្ពស់ជាងនេះ។ ពួកគាត់នឹងប្រឈមការខាតបង់ នៅពេលយើងរុះរើហាងរបស់ពួកគាត់នៅសប្ដាហ៍ក្រោយ ព្រោះគណៈកម្មការធ្វើការងារនេះត្រូវបានបង្កើតឡើងហើយ ហើយកំពុងត្រៀមចាត់វិធានការ។ យើងនឹងមិនធ្វើភ្លាមៗទេ ពីព្រោះយើងចង់ផ្ដល់ពេលវេលាខ្លះដល់អាជីវករដើម្បីឲ្យពួកគាត់រើចេញ”។
លោក ធី តៃ អ្នកគ្រប់គ្រងនៅ Sea Garden Bungalows លើឆ្នេរអូរត្រេះនិយាយថា គាត់ និងអ្នកមិនសុខចិត្តផ្សេងទៀតសង្ឃឹមថា ជំនួបនៅថ្ងៃនេះជាមួយលោក យន្ត មីន នឹងអាចបញ្ចុះបញ្ចូលអាជ្ញាធរអនុញ្ញាតឲ្យពួកគាត់នៅបន្ត។ គាត់និយាយទៀតថា “កាលពីមុន ទីនេះមានសុទ្ធតែព្រៃ គ្មានទឹក គ្មានអគ្គិសនីប្រើប្រាស់។ ដោយសារតែយើង កន្លែងនេះបានក្លាយទៅជាគោលដៅទេសចរណ៍ដ៏ពេញនិយម។ ខ្ញុំសង្ឃឹមថាវាល្អ ខ្ញុំសង្ឃឹមថាយើងអាចនៅបន្តបាន”។
ទោះជាយ៉ាងណា គាត់ព្រមានថា ប្រសិនបើរដ្ឋាភិបាលមិនយល់ព្រមអនុញ្ញាតឲ្យពួកគេនៅបន្ត ប្រជាពលរដ្ឋមូលដ្ឋានជាង៥០០នាក់ដែលរងផលប៉ះពាល់ដោយសារការបណ្ដេញចេញ រួមមានម្ចាស់អាជីវកម្ម បុគ្គលិក និងក្រុមគ្រួសាររបស់ពួកគេ នឹងធ្វើបាតុកម្មទ្រង់ទ្រាយធំនៅក្រុងព្រះសីហនុនៅសប្ដាហ៍នេះ៕ សុខុម