លោក យ៉ែម បុញ្ញឫទ្ធិ អ្នកនាំពាក្យគណបក្សប្រឆាំងបានមានប្រសាសន៍កាលពីម្សិលមិញថា សមាជិកប្រហែល២០រូបនៃគណៈកម្មការអចិន្ត្រៃយ៍របស់គណបក្សប្រឆាំងបានធ្វើដំណើរទៅកាន់ទីក្រុងម៉ានីល កាលពីយប់ថ្ងៃសៅរ៍ ដើម្បីចូលរួមកិច្ចប្រជុំរយៈពេលពីរថ្ងៃជាមួយលោក សម រង្ស៊ី ប្រធានគណបក្សសង្គ្រោះជាតិដែលកំពុងនិរទេសខ្លួន។
លោកថ្លែងថា ក្រុមមន្ត្រីទាំងនេះដែលរួមមានទាំងលោក កឹម សុខា អនុប្រធានគណបក្សប្រឆាំងផង នឹងពិភាក្សាអំពីសកម្មភាពរបស់គណបក្សសង្គ្រោះជាតិចាប់តាំងពីខែតុលាឆ្នាំ២០១៥ ដែលនៅពេលនោះតំណាងរាស្ត្រគណបក្សប្រឆាំងពីររូបបានរងការវាយដំអំឡុងបាតុកម្មមួយដែលគាំទ្រដោយគណបក្សប្រជាជនកម្ពុជា និងការដកលោក កឹម សុខា ចេញពីតំណែងអនុប្រធានរដ្ឋសភា។
លោកបានមានប្រសាសន៍ទៀតថា ថ្នាក់ដឹកនាំគណបក្សក៏នឹងត្រៀមរបៀបវារៈសម្រាប់សមាជប្រចាំឆ្នាំរបស់គណបក្សសង្គ្រោះជាតិដែលគ្រោងធ្វើនៅថ្ងៃទី២៦ ខែមីនា ផងដែរ។ ចាប់តាំងពីលោក សម រង្ស៊ី បានសម្រេចចិត្តមិនត្រឡប់មកប្រទេសកម្ពុជាវិញ បន្ទាប់ពីមានដីកាចាប់ខ្លួនលោកកាលពីខែវិច្ឆិកាមក គណបក្សនេះបានប្រាប់សមាជិករបស់ខ្លួន និងអ្នកគាំទ្រម្ដងហើយម្ដងទៀតឲ្យផ្ដោតយកចិត្តទុកដាក់លើការងារបោះឆ្នោតខាងមុខនៅឆ្នាំ២០១៧ និង២០១៨ ហើយកុំបែកអារម្មណ៍ចំពោះការបង្កបញ្ហានយោបាយ។
អ្នកនាំពាក្យរូបនេះលើកឡើងថា គណបក្សនឹងមិនជជែកអំពីបញ្ហារឿងអាស្រូវផ្លូវភេទរបស់លោក កឹម សុខា ទាក់ទិនខ្សែអាត់សំឡេងជាច្រើនភាគបង្ហោះតាមហ្វេសប៊ុកកាលពីពេលថ្មីៗនេះដែលគេអះអាងថាជាសំឡេងលោកនិយាយជាមួយស្រីកំណាន់ឡើយ។
លោកបានថ្លែងថា ”កិច្ចប្រជុំនេះនឹងមិនពិភាក្សាអំពីបញ្ហានេះទេ ពីព្រោះគណបក្សសង្គ្រោះជាតិមិនបារម្ភចំពោះរឿងឥតប្រយោជន៍នេះឡើយ”៕ សារុន