27 C
Phnom Penh

ក្រុមមន្ត្រី​ពិភាក្សា​ដេញដោល​ពី​ការ​និរទេស​​​បុរស​​​​ជនជាតិ​ហូឡង់ ជាជន​រួមភេទ​ជាមួយ​កុមារ​

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​ដែលមើលខុសត្រូវ​​​​ការ​ចាប់​ខ្លួន​​លោក ភីធឺ ខូឡិន (Peter Ceulen) ជនជាតិ​ហូឡង់​​​ ជាជន​រួមភេទ​​ជាមួយ​កុមារ​ដែលត្រូវ​បាន​កាត់ឱ្យ​ជាប់ទោស​នៅ​ក្នុង​រាជធានី​ភ្នំពេញ​​​​កាលពី​សប្ដាហ៍​មុ​ន​​​នោះ​បាន​លើក​ឡើង​ថា ពួកគេ​កំពុង​សម្រេច​ថា​តើ​ត្រូវ​និរទេស​ជន​នេះ​ឲ្យ​ទៅ​ប្រឈម​មុខ​ការ​ជាប់​ពន្ធនាគារ​​នៅក្នុង​ប្រទេស​បែលហ្សុិក​ ឬ​ក៏​​​ផ្តន្ទា​ទោស​គាត់​នៅ​ក្នុង​ប្រទេស​កម្ពុជា​។

ប្រធាន​អង្គភាព​នគរ​បាលរបស់​អង្គការ​មិនមែន​រដ្ឋាភិបាល​​ដែល​បាន​ដឹកនាំ​ការ​​ស្វែង​រក​លោក ខូឡិន កាលពី​សប្ដាហ៍​មុន​បាន​ឲ្យ​ដឹង​ថា ពាណិជ្ជករ​មានទ្រព្យ​ស្ដុកស្តម្ភ​រូប​នេះ​ និង​មាន​ទីលំ​​​នៅ​​​​ក្នុង​ក្រុង​សៀមរាប​នឹង​ត្រូវ​និរទេស​ “ក្នុង​រយៈពេល​៧២​ម៉ោង​ក្រោយ​”។

លោក ខូឡិន អាយុ​៦០​ឆ្នាំ ដែល​បាន​បែង​ចែក​​ពេល​វេលា​​របស់​គាត់​ជាច្រើន​ឆ្នាំ​រវាង​ប្រទេស​កម្ពុជា និង​ប្រទេស​បែលហ្សុិក ត្រូវ​បាន​ផ្ដន្ទាទោស​កំបាំង​មុខ​កាលពី​ខែ​មករា ​នៅ​តុលាការ​​​ក្នុង​ខេត្ត​អានទ្វាប (Antwerp) ​និង​ត្រូវ​បាន​ផ្ដន្ទាទោស​ដាក់ពន្ធនាគារ​​១៩​ឆ្នាំ​ពីបទ​បៀតបៀន​​ផ្លូវ​ភេទ​កុមារ​ រួម​ទាំង​​​ទារក​​ទើប​នឹង​កើត​​ និង​ក្មេង​ស្រី​​ជន​ជាតិ​ខ្មែរ​ដែល​គាត់​យក​មក​ចិញ្ចឹម​ផង និង​ពីបទ​ផលិត​​រូប​ភាព​អាសអាភាស​កុមារ​។

​បន្ទាប់ពី​មាន​សេចក្តី​រាយការណ៍​ថា គាត់​បាន​ត្រឡប់ទៅ​ខេត្ត​សៀមរាប ក្រុម​ការ​ងារ​ពិសេស​មួយ​ត្រូវ​បាន​បង្កើត​ឡើង​កាល​ពី​​​​ដើម​ខែ​នេះដើម្បី​ស្វែង​រក​​គាត់​នៅ​ទីនោះ​។ ក្រុម​​​ការ​​​ងារ​​​នេះ​ត្រូវ​បាន​បង្កើត​ឡើង​ដោយ​នគរ​​​បាល​ប្រឆាំង​ការ​ជួញដូរ​មនុស្ស នគរ​បាល​យុត្តិធម៌ និង​ក្រុម​ស៊ើបអង្កេត​មក​ពី​អង្គភាព​ការ​ពារ​កុមារ​ ជា​សាខា​របស់​អង្គការ​​មូលនិធិ​កុមារ​កម្ពុជា​។

នៅ​ពេល​ទាក់​ទង​កាលពី​ម្សិលមិញ លោក ​​​​James McCabe ប្រធាន​ផ្នែក​ប្រតិបត្តិការ​របស់​អង្គភាព​នេះ​មាន​ប្រសាសន៍​ថា ការ​និរ​ទេស​​លោក ខូឡិន ទៅ​ប្រទេស​បែលហ្សុិក​ នឹង​ធ្វើ​ឡើង​នៅពេល​ណាមួយ​ក្នុង​ពេល​ខាង​មុខ​​។

លោក​បាន​បន្ថែម​ថា “គេកំពុង​​ចាត់​​​ចែង​​​នៅឡើយ​​​រង់​ចាំ​ការ​ប្រគល់​​គាត់​​​ជា​ផ្លូវ​ការ​ឲ្យ​​​ទៅ​អាជ្ញាធរ​បែលហ្សុិក​​។ វាសុវត្ថិភាព​ក្នុង​​​ការ​​និយាយ​ថា វានឹង​ធ្វើ​ឡើង​ក្នុង​រយៈ​ពេល​៧២​ម៉ោង​ក្រោយ”។

ក្រុម​មន្ត្រី​មកពី​នាយកដ្ឋាន​ប្រឆាំង​ការ​ជួញដូរ​មនុស្ស​ក្រសួង​មហាផ្ទៃមានការ​ប្រយ័ត្ន​ប្រយែង​បន្ថែម​ទៀត​​​ទាក់​​​ទិន​​​បញ្ហា​​​នេះ។

លោក ណា នាង អនុប្រធាន​នាយកដ្ឋាន​នេះ​បាន​មាន​ប្រសាសន៍​ថា “​សូម​រង់ចាំ​រហូត​ដល់​ថ្ងៃ​ច័ន្ទ ហើយ​ព័ត៌មាន​នឹង​កាន់​តែ​ច្បាស់​នៅ​ពេល​នោះ ពីព្រោះ​ឥឡូវ​នេះ​មន្ត្រី​ជំនាញ​​​​កំពុង​​​បញ្ចប់​​នីតិវិធី​នេះ” ដោយ​លោក​ពន្យល់​ថា រហូត​មក​ទល់​ពេល​នេះ​មានការ​ពិភាក្សា​​​ជុំវិញ​បញ្ហាថា​ តើ​នឹង​ត្រូវ​បញ្ជូន​លោក ខឺឡិន ទៅ​ប្រទេស​បែលហ្សុិកឬ​ក៏​ផ្ដន្ទាទោស​ក្នុង​ប្រទេស​កម្ពុជា​។

លោក ប៉ុល ភិធេយ្យ ​ប្រធាន​នាយកដ្ឋាន​ប្រឆាំង​ការ​ជួញដូរ​មនុស្ស​បាន​អះអាង​ថា ការ​​​និរទេស​​គឺ​កំពុង​តែ​ពិភាក្សា​ ប៉ុន្តែ​បាន​លើក​ឡើង​​​​ថា ការ​ពិភាក្សា​លម្អិត​អំពី​បញ្ហា​នេះ​​​មិនបាន​គិត​មុខ​គិត​ក្រោយ​ឡើយ​។ លោក​បាន​ថ្លែង​ថា ដោយ​ប្រឈម​​នឹង​ការ​ជាប់​ពន្ធនាគារ​រយៈ​ពេល​យូរ​ លោក ខូឡិន ប្រហែល​ជា​អាច​ព្យាយាម​ធ្វើ​អត្តឃាត។

លោក​បាន​ថ្លែង​ថា ”ប្រសិន​បើ​យើង​​​ឲ្យ​គាត់​ដឹង​តាម​រយៈ​បណ្ដាញ​​ផ្សព្វផ្សាយ​ព័ត៌មាន និង​មាន​បញ្ហាណា​​​មួយ​​​ ខ្ញុំ​នឹង​និយាយ​ថា វា​ដោយ​​​​សារ​តែ​កាសែត​​ ខេមបូឌា ដេលី ចុះ​​​ផ្សាយ​​​​ព័ត៌មាន​ដោយការ​​ធ្វេស​ប្រហែស ធ្វើ​ឲ្យ​ជន​ល្មើស​មាន​ការ​ភ័យ​ខ្លាច ហើយ​បណ្ដាល​​​​ឲ្យ​គាត់​ធ្វើ​អត្តឃាត​”៕ សារុន (រាយការណ៍​បន្ថែម​ដោយ Peter Ford)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស